Kgaolo 42
Legodimo le Lefsa le Lefase le Lefsa
1. Johane o hlalosa’ng ge morongwa a mmušetša mathomong a Pušo ya Nywaga e Sekete?
PONO ye ya letago e tšwela pele go utologa ge morongwa a bušetša Johane mathomong a Pušo ya Nywaga e Sekete. O re’ng ge a hlalosa? “Ka bona legodimo le lefsa le lefase le lefsa; gobane legodimo la pele le lefase la pele di be di fetile, le lewatle ga le sa le gona.” (Kutollo 21:1) Pono e kgahlišago gakaakang e a tšwelela!
2. (a) Boporofeta bja Jesaya bja mabapi le magodimo a mafsa le lefase le lefsa bo ile bja phethagala bjang go Bajuda bao ba ilego ba bušetšwa morago ka 537 B.C.E.? (b) Re tseba bjang gore go tla ba le go phethagala mo gongwe ga boporofeta bja Jesaya, gomme kholofetšo ye e phethwa bjang?
2 Jehofa o be a ile a botša Jesaya nywageng e makgolo pele ga mehla ya Johane gore: “Ke tlo hlôla maxodimo a mafsa le lefase le lefsa; tša kxalê di ka se hlwê di tsebywa, le mo pelong ya motho di ka se hlwê di rotoxa.” (Jesaya 65:17; 66:22) Boporofeta bjo bo ile bja phethagala la mathomo nakong ya ge Bajuda ba botegago ba be ba boela Jerusalema ka 537 B.C.E. ka morago ga bothopša bja bona bja nywaga e 70 kua Babilona. Ka nako yeo ya tsošološo, ba ile ba bopa lekoko le le hlwekišitšwego, e lego “lefase le lefsa” leo le lego tlase ga tshepedišo e mpsha ya mmušo, yeo e lego “magodimo a mafsa.” Lega go le bjalo, moapostola Petro o ile a šupa go go phethagala mo gongwe ga boporofeta bjo, ka gore: “Eupša go na le magodimo a mafsa le lefase le lefsa tše re di letetšego go ya ka kholofetšo ya gagwe, gomme toko e tla aga go tšona.” (2 Petro 3:13) Johane bjale o bontšha gore kholofetšo ye e phethega nakong ya letšatši la Morena. “Legodimo la pele le lefase la pele,” e lego tshepedišo e rulagantšwego ya Sathane ya dilo gotee le thulaganyo ya yona ya mmušo yeo e tutuetšwago ke Sathane le batemona ba gagwe, di tla feta. “Lewatle” leo le bilokanago la batho ba babe ba marabele, le ka se hlwe le sa ba gona. Sebakeng sa lona go tla ba le “magodimo a mafsa le lefase le lefsa,” e lego lekoko le lefsa la lefaseng tlase ga mmušo o mofsa, Mmušo wa Modimo.—Bapiša le Kutollo 20:11.
3. (a) Johane o hlalosa’ng, gomme Jerusalema o Mofsa ke’ng? (b) Ke bjang Jerusalema o Mofsa e ‘theogago e e-tšwa legodimong’?
3 Johane o tšwela pele ka gore: “Ka bona le motse o mokgethwa, Jerusalema o Mofsa o theoga o e-tšwa legodimong go Modimo o itokišitše bjalo ka monyadiwa yo a ikgabišeditšego monna wa gagwe.” (Kutollo 21:2) Jerusalema o Mofsa ke monyadiwa wa Kriste, yo a bopšago ke Bakriste ba tloditšwego bao ba botegago go fihla lehung, gomme e le bao ba tsošetšwago go ba dikgoši le baperisita gotee le Jesu yo a tagafaditšwego. (Kutollo 3:12; 20:6) Go swana le ge Jerusalema ya lefaseng e ile ya ba mošate Isiraeleng ya bogologolo, Jerusalema o Mofsa ye e kgahlišago kudu le Monyadi wa yona ba bopa mmušo wa tshepedišo e mpsha ya dilo. Se ke legodimo le lefsa. ‘Monyadiwa o theoga a e-tšwa legodimong’ e sego ka mokgwa wa kgonthe, eupša ka kgopolo ya go lebiša tlhokomelo lefaseng. Monyadiwa wa Kwana e tla ba mothuši wa yona yo a botegago tabeng ya go buša batho ka moka mmušong wa go loka. E tloga e le tšhegofatšo gakaakang go lefase le lefsa!
4. Ke kholofetšo efe ye Modimo a e dirago yeo e swanago le yela a ilego a e dira setšhabeng seo se bego se sa tšwa go rulaganywa sa Isiraele?
4 Johane o re botša gape gore: “Ke moka, ka kwa lentšu le le hlabošago le le tšwago sedulong sa bogoši le re: ‘Bonang! Tente ya Modimo e go batho, o tla dula le bona gomme e tla ba batho ba gagwe. Modimo ka noši o tla ba le bona.’” (Kutollo 21:3) Nakong ya ge Jehofa a be a dira kgwerano ya Molao le setšhaba seo ka nako yeo e bego e le se sefsa sa Isiraele, o ile a holofetša gore: “Ke tlo axa Ngwakô wa-ka makxatheng a lena; ’me pelo ya-ka e ka se kê ya Le nyatša. Ke tlo sepela le lena, ka ba Modimo wa lena, ’me lena Lè le sethšaba sa-ka.” (Lefitiko 26:11, 12) Jehofa bjale o dira kholofetšo e swanago go batho ba ba botegago. Nakong ya Letšatši la Kahlolo la nywaga e sekete, e tla ba batho ba kgethegilego kudu go yena.
5. (a) Modimo o tla dula bjang le batho nakong ya Pušo ya Nywaga e Sekete? (b) Modimo o tla dula bjang gare ga batho ka morago ga Pušo ya Nywaga e Sekete?
5 Jehofa nakong ya Pušo ya Nywaga e Sekete, o tla “dula” gare ga batho ka thulaganyo ya nakwana, a emetšwe ke Morwa wa gagwe wa bogošing, Jesu Kriste. Lega go le bjalo, bofelong bja Pušo ya Nywaga e Sekete ge Jesu a bušetša Mmušo go Tatagwe, ga go na moemedi wa bogošing goba mmoelanyi yo a tlago go nyakega. Jehofa o tla dula ka mokgwa wa moya le “batho ba gagwe” ka tsela yeo e lego ya neng le neng le e lebanyago. (Bapiša le Johane 4:23, 24.) A tokelo e kgolo gakaakang bakeng sa batho ba tsošološitšwego!
6, 7. (a) Johane o utolla dikholofetšo dife tše dikgolo, gomme ke bomang bao ba tlago go thabela ditšhegofatšo tšeo? (b) Jesaya o hlalosa bjang paradeise ya moya gotee le ya kgonthe?
6 Johane o tšwela pele ka gore: “O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 21:4) Re gopotšwa gape ka dikholofetšo tša pele tšeo di buduletšwego. Jesaya le yena o ile a lebelela pele nakong ya ge lehu le manyami di be di tla ba di se sa le gona, gomme bohloko bo be bo tla ba bo tšeetšwe sebaka ke lethabo. (Jesaya 25:8; 35:10; 51:11; 65:19) Johane bjale o tiiša gore dikholofetšo tše di tla phethagala ka mo go kgahlišago nakong ya Letšatši la Kahlolo la nywaga e sekete. Sa mathomo, lešaba le legolo le tla thabela ditšhegofatšo tšeo. “Kwana yeo e lego gare ga sedulo sa bogoši” gomme e tšwelago pele go ba diša, “e tla ba iša methopong ya meetse a bophelo. Modimo o tla phumola megokgo ka moka mahlong a bona.” (Kutollo 7:9, 17) Eupša bohle bao ba tsošitšwego gomme ba dumela ditokišetšong tša Jehofa, ba tla feleletša ba le moo le bona gomme ba thabela paradeise ya moya gotee le ya kgonthe.
7 Jesaya o re: “Ké mo xo tl’o xo budullwa mahlô a difofu, xwa thibollwa ’tsêbê tša difoa.” Ee, “ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 35:5, 6) Nakong yeo le gona “nywakô ye ba e axaxo ba tlo dula mo xo yôna; dirapa tša merara, ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele; xobane matšatši a batho ba-ka a tlo lekana le matšatši a sehlare, ’me bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng.” (Jesaya 65:21, 22) Ka gona, ba ka se ke ba fedišwa lefaseng.
8. Ke’ng seo Jehofa ka boyena a se bolelago mabapi le go botega ga dikholofetšo tše tše dikgolo?
8 Re kgona go bona ka leihlo la kgopolo ditebelelo tše dibotse gakaakang ge re dutše re naganišiša ka dikholofetšo tše! Ditokišetšo tše di makatšago di boloketšwe batho ba botegago tlase ga mmušo o lerato wa legodimong. Na dikholofetšo tše bjalo di bonala di ka se kgonege? Na ke feela ditoro tša mokgalabje yo a bego a golegilwe sehlakahlakeng sa Patimo? Jehofa ka noši o a araba: “Yo a dutšego sedulong sa bogoši a re: ‘Bonang! dilo ka moka ke di dira tše mpsha.’ Gape, a re: ‘Ngwala, gobane mantšu a a botega e bile ke a therešo.’ A re go nna: ‘Di diragetše! Ke nna Alfa le Omega, mathomo le mafelelo.’”—Kutollo 21:5, 6a.
9. Ke ka baka la’ng ditšhegofatšo tše tša nako e tlago di ka lebelelwa e le tšeo di tlago go direga e le ka kgonthe?
9 Go bjalo ka ge eka Jehofa ka boyena o saenela batho ba botegago tiišetšo goba tumelelo ya go hwetša ditšhegofatšo tše tša nakong e tlago. Ke mang yo a ka bago le sebete sa go belaela Motiišetši yo bjalo? Ee, dikholofetšo tše tša Jehofa ke tša kgonthe kudu moo a bolelago bjalo ka ge eka di šetše di phethagetše, ge a re: “Di diragetše!” Na Jehofa ga se “Alfa le Omega . . . , Yo a lego gona le yo a bego a le gona le yo a tlago go tla, yena Ra-matla-ohle”? (Kutollo 1:8) Ruri ke yena! O bolela ka boyena gore: “Ké Nna wa mathômô, ké Nna wa mafêlô; xa xo Modimo xe e se Nna.” (Jesaya 44:6) Ka ge e le yo bjalo, gona a ka budulela diporofeto gomme a di phetha ka botlalo. Seo se tloga se matlafatša tumelo! Ka gona, o holofetša gore: “Dilo ka moka ke di dira tše mpsha”! Go e na le go belaela ge e ba dilo tše tše di makatšago di tla direga e le ka kgonthe, yo mongwe le yo mongwe wa rena o swanetše go ipotšiša gore: ‘Ke’ng seo nna ke swanetšego go se dira gore ke tle ke hwetše ditšhegofatšo tše bjalo?’
“Meetse” Bakeng sa ba Nyorilwego
10. Jehofa o nea “meetse” afe, gomme a emela’ng?
10 Ke Jehofa ka boyena yo a bolelago gore: “Mang le mang yo a nyorilwego ke tla mo nweša mothopong wa meetse a bophelo ka ntle le tefo.” (Kutollo 21:6b) Motho gore a tle a timole lenyora leo, o swanetše go lemoga gore o nyaka dilo tša moya gomme a ikemišetše go amogela “meetse” ao Jehofa a a neago. (Jesaya 55:1; Mateo 5:3) Ke “meetse” afe? Jesu ka noši o ile a araba potšišo yeo nakong ya ge a be a nea bohlatse go mosadi yo mongwe sedibeng kua Samaria. O ile a mmotša gore: “Mang le mang yo a nwago meetse ao ke tlago go mo nea ona a ka se ke a ba a nyorwa, eupša meetse ao ke tlago go mo nea ona e tla ba mothopo wa meetse o runyago bakeng sa go nea bophelo bjo bo sa felego.” ‘Mothopo woo wa meetse a bophelo’ o tšwa go Modimo ka Kriste, e le tokišetšo ya gagwe ya go bušetša batho bophelong bjo bo phethagetšego. Ka go swana le mosadi yoo wa Mosamaria, le rena re tloga re swanelwa ke go fišegela go nwa mothopong woo! Ka go swana le yena mosadi yoo, le rena re tloga re swanelwa ke go itokišetša go lahla dikgahlego tša lefase ka go rata e le gore re botše ba bangwe ditaba tše dibotse!—Johane 4:14, 15, 28, 29.
Bao ba Fenyago
11. Jehofa o dira kholofetšo efe, gomme mantšu a a thoma ka go phethagala go bomang?
11 Bao ba nwago “meetse” ao a lapološago, gape ba swanetše go fenya go etša ge Jehofa a tšwela pele go bolela gore: “Mang le mang yo a fenyago o tla ja bohwa bja dilo tše, gomme ke tla ba Modimo wa gagwe, yena ya ba morwa wa-ka.” (Kutollo 21:7) Kholofetšo ye e swana le dikholofetšo tšeo di hwetšwago melaetšeng e yago diphuthegong tše šupago; ka gona, mantšu a a swanetše go thoma ka go phethagala go barutiwa ba tloditšwego. (Kutollo 2:7, 11, 17, 26-28; 3:5, 12, 21) Go theoša le nywaga, bana babo Kriste ba moya ba be ba letetše ka mafolofolo tokelo ya go ba karolo ya Jerusalema o Mofsa. Ge e ba ba fenya go etša ge Jesu a fentše, gona dikholofelo tša bona di tla phethagala.—Johane 16:33.
12. Kholofetšo ya Jehofa e lego go Kutollo 21:7 e tla phethagala bjang go lešaba le legolo?
12 Lešaba le legolo le le tšwago ditšhabeng ka moka, le lona le lebeletše kholofetšong ye. Le lona le swanetše go ba bafenyi, le hlankele Modimo ka go botega go fihlela ge le feta masetlapelong a magolo. Ke moka le tla tsena bohweng bja lona bja lefaseng, e lego “mmušo wo le o lokišeditšwego go tloga go theweng ga lefase.” (Mateo 25:34) Lona gotee le ba bangwe ba dinku tša Morena tša lefaseng bao ba atlegago molekong bofelong bja nywaga e sekete, ba bitšwa “bakgethwa.” (Kutollo 20:9) Ba tla thabela tswalano e kgethegilego le ya botswadi le Mmopi wa bona, Jehofa Modimo, e le ditho tša mokgatlo wa gagwe wa legohleng.—Jesaya 66:22; Johane 20:31; Baroma 8:21.
13, 14. Ke mediro efe yeo re swanetšego go e phema e le ka kgonthe gore re tle re amogele dikholofetšo tše dikgolo tša Modimo, gomme ka baka la’ng?
13 Go bohlokwa gakaakang gore Dihlatse tša Jehofa mo nakong ye ka go gopola ka tebelelo ye e kgolo, di dule di hlwekile dilong tše di šilafatšago tša lefase la Sathane! Re swanetše go tia, re tsepame gomme re ikemišetše gore Diabolo le ka mohla a se ke a re gogela sehlopheng seo Jehofa ka noši a se hlalosago mo: “Eupša ge e le ba boi le bao ba se nago tumelo le bao ba ferošago dibete ditšhileng tša bona le babolai le diotswa le bao ba dirišanago le meoya le barapedi ba medimo ya diswantšho le baaketši ka moka, kabelo ya bona e tla ba ka letsheng le tukago mollo le sebabole. Se se bolela lehu la bobedi.” (Kutollo 21:8) Ee, yo e tlago go ba mojabohwa o swanetše go phema mediro yeo e šilafaditšego tshepedišo ye ya kgale ya dilo. O swanetše go fenya ka go dula a botega ge a lebane le dikgateletšo ka moka le meleko ka moka.—Baroma 8:35-39.
14 Bojakane gaešita le ge bo ipolela gore ke monyadiwa wa Kriste, fela bo tsebja ka mediro e ferošago dibete yeo Johane a e hlalosago mo. Ka gona, bo tla senywa ka mo go sa felego gotee le karolo ka moka ya Babilona o Mogolo. (Kutollo 18:8, 21) Ka mo go swanago, mang le mang wa batlotšwa goba wa lešaba le legolo yo a dirago mediro e bjalo e mebe goba a thoma go e kgothaletša, o lebanwe ke phedišo ya ka mo go sa felego. Ge e ba ba phegelela go dira mediro ye, gona ba ka se ke ba hwetša dikholofetšo tše. Mang le mang yo a lekago go tšweletša mediro e bjalo lefaseng le lefsa, o tla fedišwa kapejana gomme o tla ya lehung la bobedi a se na kholofelo ya tsogo.—Jesaya 65:20.
15. Ke bomang bao e lego bafenyi ba bagolo, gomme Kutollo e tlišwa seremong se segolo ka pono efe?
15 Bao e lego bafenyi ba bagolo ke Kwana, Jesu Kriste le monyadiwa wa gagwe wa ba 144 000, e lego Jerusalema o Mofsa. Ka gona, ke mo go swanetšego gakaakang ge Kutollo e tlišwa seremong se segolo ka pono ya mafelelo e kgahlišago kudu ya Jerusalema o Mofsa! Johane bjale o hlalosa pono e nngwe ya mafelelo.
[Diswantšho go letlakala 302]
Go tla ba le modiro o thabišago le bogwera bjo bo thabišago bakeng sa bohle, lekokong la lefase le lefsa