Kgaolo 40

Go Pšhatla Hlogo ya Noga

Pono 14—Kutollo 20:1-10

Taba: Go lahlelwa ga Sathane sekoting, Pušo ya Nywaga e Sekete, moleko wa mafelelo wa batho le go fedišwa ga Sathane

Nako ya phethagatšo: Go tloga bofelong bja masetlapelo a magolo go ya go fedišweng ga Sathane

1. Boporofeta bja pele bja Beibele bo ile bja phethagala bjang?

NA O gopola boporofeta bja pele bja Beibele? Bo boletšwe ke Jehofa Modimo nakong ya ge a be a botša Noga gore: “Le xôna ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô, ’me wêna O tlo e loma serêthê.” (Genesi 3:15) Phethagatšo ya boporofeta bjoo bjale e fihlile seremong sa yona! Re hlalositše histori ya go lwa ga Sathane le mokgatlo wa Jehofa wo o swanago le mosadi wa legodimong. (Kutollo 12:1, 9) Peu ya lefaseng ya Noga gotee le bodumedi bja yona, dipolitiki tša yona le dikgwebo tša yona tše dikgolo di tlaišitše ka tsela e sehlogo peu ya mosadi, e lego Jesu Kriste le balatedi ba gagwe ba tloditšwego ba 144 000 mo lefaseng. (Johane 8:37, 44; Bagalatia 3:16, 29) Sathane o ile a bakela Jesu lehu le bohloko. Eupša se se ipontšhitše se swana le ntho ya seretheng, ka gobane Modimo o ile a tsoša Morwa wa gagwe yo a botegago ka letšatši la boraro.—Ditiro 10:38-40.

2. Noga e pšhatlwa bjang, gomme go direga’ng go peu ya lefaseng ya Noga?

² Go thwe’ng ka Noga le peu ya yona? Mo e ka bago ka 56 C.E., moapostola Paulo o ile a ngwala lengwalo le letelele kudu a le ngwalela Bakriste ba Roma. Ge a le fetša, o ile a ba kgothatša ka gore: “Ge e le Modimo yo a neago khutšo yena, o tla pšhatlaganya Sathane tlase ga dinao tša lena kgaufsinyane.” (Baroma 16:20) Se ke seo se fetago go gobatša feela. Sathane o swanetše go pšhatlwa! Paulo mo o diriša lentšu la Segerika la syn·triʹbo, leo le bolelago go duba-dubja, go gatakelwa le go senyetšwa ruri ka go pšhatlwa. Ge e le ka peu ya batho ya Noga, yona e rulaganyeditšwe go otlwa e le ka kgonthe letšatšing la Morena le le tlago go fihla seremong sa lona masetlapelong a magolo, ge go pšhatlelwa ruri Babilona o Mogolo le ditshepedišo tša bopolitiki tša lefase gotee le bathekgi ba tšona ba tša ditšhelete le tša bohlabani. (Kutollo, dikgaolo 18 le 19) Ka go re’alo, Jehofa o fihliša lehloyo leo le lego magareng ga dipeu tše pedi seremong. Peu ya mosadi wa Modimo e fenya peu ya lefaseng ya Noga, gomme peu yeo ga e sa hlwa e e-ba gona!

Sathane o Lahlelwa Sekoting

3. Johane o re botša gore Sathane o tla diragalelwa ke’ng?

³ Ke’ng seo se boloketšwego Sathane le batemona ba gagwe? Johane o a re botša: “Ka bona morongwa a theoga legodimong a swere senotlelo sa sekoti le ketane e kgolo seatleng sa gagwe. A swara drakone noga ya kgale, yeo e lego Diabolo le Sathane, a e tlema ka nywaga e sekete. A e lahlela sekoting a se tswalela gomme a se tiiša godimo ga yona, gore e se ke ya hlwa e timetša ditšhaba go fihla ge nywaga e sekete e fedile. Ka morago ga dilo tše ka moka e swanetše go lokollwa lebakanyana.”—Kutollo 20:1-3.

4. Morongwa yo a nago le senotlelo sa sekoti ke mang, gomme re tseba bjang?

⁴ Morongwa yo ke mang? O swanetše go ba a e-na le matla a magolo kudu a gore a kgone go fediša lenaba le legolo la Jehofa. O na le “senotlelo sa sekoti le ketane e kgolo.” Na se ga se re gopotše ka pono e nngwe ya pejana? Ee, kgoši ya go buša ditšie e bitšwa “morongwa wa sekoti”! (Kutollo 9:11) Mo gape re bona Mogodiši yo Mogolo wa Jehofa, e lego Jesu Kriste yo a tagafaditšwego a le modirong. Morongwa yo yo mogolo yo a rakilego Sathane legodimong, yo a ahlotšego Babilona o Mogolo le yo a fedišitšego “dikgoši tša lefase le madira a tšona” ka Haramagedone, ruri o be a ka se ke a emela ka thoko gomme a dira gore morongwa yo monyenyane a dire tiro e kgolo gakaakaa ya go lahlela Sathane sekoting!—Kutollo 12:7-9; 18:1, 2; 19:11-21.

5. Morongwa wa sekoti o dira’ng go Sathane Diabolo, gomme ka baka la’ng?

⁵ Nakong ya ge drakone e kgolo e hwibidu e be e lahlelwa lefaseng e e-tšwa legodimong, e ile ya bolelwa e le “noga ya kgale, ye e bitšwago Diabolo le Sathane, ye e timetšago lefase ka moka le go agilwego go lona.” (Kutollo 12:3, 9) Bjale mo nakong ye ya go swarwa le go golegwa, o hlaloswa gape ka botlalo e le “drakone noga ya kgale, yeo e lego Diabolo le Sathane.” Mometši yo yo mobe, mofori yo, mothomeletši yo le moganetši yo o tlemilwe le go lahlelwa “sekoting” seo se tswaletšwego le go tiišwa e le ka kgonthe ka seka, ‘gore a se hlwe a timetša ditšhaba.’ Go lahlelwa mo ga Sathane sekoting ke ga nywaga e sekete, e lego nako yeo ka yona tutuetšo ya gagwe bathong e ka se kego ya hlwa e sa ba gona, go etša ge mogolegwa a lahletšwe kgolegong ya ka tlase ya lefsifsi. Morongwa wa sekoti o tloša Sathane ka mo go feletšego gore a se ke a hlwa a dira se sengwe go Mmušo wa go loka. A kimollo e kaakang bathong!

6. (a) Ke bohlatse bofe bjo bo lego gona bja gore batemona le bona ba lahlelwa sekoting? (b) Ke’ng seo bjale se kago go thoma, gomme ka baka la’ng?

⁶ Go direga’ng go batemona? Le bona ba ‘boloketšwe kahlolo.’ (2 Petro 2:4) Sathane o bitšwa “Beletsebubu, mmuši wa batemona.” (Luka 11:15, 18; Mateo 10:25) Ka baka la go dirišana ga bona le Sathane ka nako e telele, na ga se ba swanela go ahlolwa ka kahlolo e swanago? Ke kgale batemona ba tšhaba sekoti; ka nako e nngwe ge Jesu a be a gahlana le bona, ba ile ba “dulela go mo lopa gore a se ke a ba laela gore ba ye sekoting.” (Luka 8:31) Eupša nakong ya ge Sathane a lahlelwa sekoting, barongwa ba gagwe le bona ba tla lahlelwa sekoting le yena. (Bapiša le Jesaya 24:21, 22.) Ka morago ga go lahlelwa ga Sathane le batemona ba gagwe sekoting, gona Pušo ya Nywaga e Sekete ya Jesu Kriste e ka thoma.

7. (a) Sathane le batemona ba gagwe ba tla ba boemong bofe ge ba le sekoting, gomme re tseba bjang? (b) Na Hadese le sekoti di a swana? (Bona mongwalo wa ka tlase).

⁷ Na Sathane le batemona ba gagwe ba tla ba ba sa dutše ba dira se sengwe ge ba le sekoting? Gopola ka sebata se sehwibidu sa dihlogo tše šupago, “se be se le gona, eupša ga se sa le gona, fela se tla tloga se rotoga sekoting.” (Kutollo 17:8) Nakong ya ge se be se le sekoting, ‘se be se se gona.’ Se be se sa dire selo, se sa šikinyege ka ge se be se hwile maikemišetšong a sona ka moka le mererong ya sona. Ka mokgwa o swanago, moapostola Paulo ge a bolela ka Jesu o itše: “Ke mang yo a tlago go theogela sekoting?’ ke gore, go yo rotoša Kriste bahung.” (Baroma 10:7) Jesu ge a be a le sekoting seo, o be a hwile.a Ka gona, ke mo go kwagalago go fetša ka gore Sathane le batemona ba gagwe ba tla ba boemong bja go se dire selo bja go swana le lehu ka nywaga e sekete ya go lahlelwa ga bona sekoting. A ditaba tše dibotse gakaakang bakeng sa barati ba go loka!

Baahlodi ka Nywaga e Sekete

8, 9. Johane bjale o re botša’ng ka bao ba dutšego didulong tša bogoši, gomme ba ke bomang?

⁸ Ka morago ga nywaga e sekete, Sathane o lokollwa sekoting ka nakonyana. Ka baka la’ng? Johane pele ga ge a ka nea karabo, o re gopotša morago kua mathomong a nako yeo. Re bala gore: “Ka bona didulo tša bogoši, gomme go e-na le bao ba dutšego go tšona, ba newa matla a go ahlola.” (Kutollo 20:4a) Ke bomang ba bao ba dutšego didulong tša bogoši gomme ba ahlola ba le magodimong gotee le Jesu yo a tagafaditšwego?

⁹ Ke “bakxêthwa” bao Daniele a ba hlalosago e le ba bušago Mmušong gotee le Motho yo “e kexo ké Morwa-motho.” (Daniele 7:13, 14, 18) Bona ke selo setee le bagolo ba 24 bao ba dutšego didulong tša bogoši pele ga Jehofa. (Kutollo 4:4) Ba akaretša baapostola ba 12 bao Jesu a ilego a ba nea kholofetšo ya gore: “Nakong ya go bopša lefsa ga dilo, ge Morwa wa motho a dula sedulong sa gagwe sa bogoši sa letago, lena ba le ntatetšego le lena le tla dula didulong tše lesome-pedi tša bogoši, le ahlola meloko e lesome-pedi ya Isiraele.” (Mateo 19:28) Le gona ba akaretša Paulo gotee le Bakriste ba Korinthe bao ba ilego ba dula ba botega. (1 Bakorinthe 4:8; 6:2, 3) Le gona ba tla akaretša le ditho tša phuthego ya Laoditsea tšeo di fentšego.—Kutollo 3:21.

10. (a) Johane bjale o hlalosa bjang dikgoši tše 144 000? (b) Go tšwa go seo Johane a re boditšego sona pele, dikgoši tše 144 000 di akaretša bomang?

¹⁰ Didulo tša bogoši—tšeo e lego tše 144 000—di lokišeditšwe bafenyi ba ba tloditšwego bao ba ‘rekilwego gare ga batho ba le bjalo ka dithakangwaga go Modimo le go Kwana.’ (Kutollo 14:1, 4) Johane o tšwela pele ka gore: “Ee, ka bona meoya ya bao ba bolailwego ka selepe ka baka la bohlatse bjo ba bo neilego ka Jesu le ka baka la go bolela ka Modimo, bao ba sa kago ba rapela sebata le ge e le seswantšho sa sona, bao ba sa kago ba amogela leswao diphatleng tša bona le diatleng tša bona.” (Kutollo 20:4b) Le gona gare ga dikgoši tšeo go na le bahwela-tumelo ba tloditšwego ba Bakriste bao nakong ya ge go be go kgaolwa lehuto la bohlano, ba ilego ba botšiša Jehofa gore o tla tšea nako e kaakang a letetše gore a lefetše madi a bona. Ka nako yeo, ba ile ba newa dikobo tše ditšhweu gomme ba botšwa gore ba lete ka nakwana. Eupša bjale ba lefeleditšwe ka go senywa ga Babilona o Mogolo, go fedišwa ga ditšhaba ke Kgoši ya dikgoši le Morena wa marena gotee le go lahlelwa ga Sathane sekoting.—Kutollo 6:9-11; 17:16; 19:15, 16.

11. (a) Re swanetše go kwešiša bjang polelwana e rego go ‘bolawa ka selepe’? (b) Ke ka baka la’ng go ka bolelwa gore ba 144 000 ka moka ba hwile lehu la sehlabelo?

¹¹ Na baahlodi ba ka moka ba botegago ba bogošing ba 144 000 ba ile ba ‘bolawa ka selepe’? Mohlomongwe ke ba sego kae ba bona ba ilego ba bolawa ka tsela yeo e le ka kgonthe. Eupša polelwana ye ka ntle le pelaelo e reretšwe go akaretša Bakriste ka moka ba tloditšwego bao ba kgotlelelago go bolaelwa tumelo ka ditsela tše di sa swanego.b (Mateo 10:22, 28) Ruri, Sathane o be a tla rata ge ka moka ga bona ba ka bolawa ka selepe, eupša ge e le gabotse, ga se bana babo Jesu ka moka ba tloditšwego bao ba hwago e le bahwela-tumelo. Ba bantši ba bona ba hwa ka baka la bolwetši goba botšofadi. Lega go le bjalo, ba bjalo le bona ba balelwa sehlopheng seo Johane bjale a se bonago. Lehu la bona ka moka ke leo ka tsela e itšego e lego la sehlabelo. (Baroma 6:3-5) Go oketša mo, ga go le o tee wa bona yo e bego e le karolo ya lefase. Ka gona, ka moka ga bona ba be ba hloilwe ke lefase gomme ge e le gabotse ba fetoga ba hwilego mahlong a lona. (Johane 15:19; 1 Bakorinthe 4:13) Ga go le o tee wa bona yo a ilego a rapela sebata le seswantšho sa sona, gomme nakong ya ge ba be ba e-hwa, go be go se na le o tee wa bona yo a bego a e-na le leswao la sebata. Ka moka ga bona ba hwile e le bafenyi.—1 Johane 5:4; Kutollo 2:7; 3:12; 12:11.

12. Johane o bega eng ka dikgoši tše 144 000, gomme go boela ga tšona bophelong go direga neng?

¹² Bjale bafenyi ba boetše ba a phela! Johane o bega gore: “Ba phela gomme ba buša e le dikgoši le Kriste ka nywaga e sekete.” (Kutollo 20:4c) Na se se bolela gore baahlodi ba ga ba tsošwe go fihlela ka morago ga go fedišwa ga ditšhaba le go lahlelwa ga Sathane le batemona ba gagwe sekoting? Aowa. Ba bantši ba bona ba šetše ba phela, ka ge ba bile gotee le Jesu ge a e-lwa le ditšhaba ka Haramagedone. (Kutollo 2:26, 27; 19:14) Ka kgonthe Paulo o bontšhitše gore tsogo ya bona e thoma gatee-tee ka morago ga go thoma ga go ba gona ga Jesu ka 1914, le gore ba bangwe ba tsošwa pele ga ba bangwe. (1 Bakorinthe 15:51-54; 1 Bathesalonika 4:15-17) Ka gona, go boela ga bona bophelong go direga ka nako e itšego ge yo mongwe le yo mongwe wa bona a amogela mpho ya bophelo bja go se hwe magodimong.—2 Bathesalonika 1:7; 2 Petro 3:11-14.

13. (a) Re swanetše go lebelela bjang nywaga e sekete yeo ka yona ba 144 000 ba bušago, gomme ka baka la’ng? (b) Papias wa Hierapolis o ile a lebelela bjang nywaga e sekete? (Bona mongwalo wa ka tlase.)

¹³ Di tla buša le go ahlola ka nywaga e sekete. Na ye ke nywaga e sekete ya kgonthe, goba na re swanetše go e lebelela ka tsela ya seswantšhetšo e le nako e telele ka mo go sa hlalosegego? “Dikete” mo gongwe di ka bolela palo e kgolo yeo e sa tsebjego go etša go 1 Samuele 21:11 (NW). Eupša “sekete” mo ke sa kgonthe, ka ge se tšwelela gararo go Kutollo 20:5-7 e le “nywaga e sekete,” yeo e eteletšwego pele ke lebopi-kgetho ka Segerika (Seisemane, the). Paulo o biditše nako ye ya kahlolo “letšatši” ge a be a re: “O [Modimo] beile letšatši leo ka lona a rerago go ahlola ka toko lefase leo go agilwego go lona.” (Ditiro 17:31) Ka ge Petro a re botša gore letšatši le tee go Jehofa le etša nywaga e sekete, gona ke mo go swanetšego ge Letšatši le la Kahlolo e le nywaga e sekete ya kgonthe.c—2 Petro 3:8.

Bahu ba Bangwe ka Moka

14. (a) Ke polelwana efe yeo Johane a e bolelago ka “bahu ba bangwe ka moka”? (b) Dipolelwana tše di boletšwego ke moapostola Paulo di hlalosa bjang polelwana e rego, “ba phela”?

¹⁴ Ke bomang bao dikgoši tše di tlago go ba ahlola, ka ge moapostola Johane a bolela mo gore, “(bahu ba bangwe ka moka ga se ba ka ba phela go fihla ge nywaga e sekete e fedile)”? (Kutollo 20:5a) Le gona mo, polelwana e rego “ba phela” e swanetše go kwešišwa go ya ka ditemana tšeo di dikologilego temana ye. Polelwana ye e ka ba le ditlhaloso tše di fapa-fapanego maemong a fapa-fapanego. Ka mohlala, Paulo o boletše ka Bakriste-gotee le yena ba tloditšwego gore: “Ke lena bao Modimo a le phedišitšego gaešita le ge le be le hwetše dikarogong le dibeng tša lena.” (Baefeso 2:1) Ee, Bakriste ba tloditšwego ka moya ba ile ba ‘phedišwa’ gaešita le lekgolong la pele la nywaga, ka go bolelwa ba lokile motheong wa tumelo ya bona sehlabelong sa Jesu.—Baroma 3:23, 24.

15. (a) Dihlatse tša Jehofa tša pele ga Bokriste di bile le boemo bofe le Modimo? (b) Dinku tše dingwe di “phela” bjang, gomme ke neng mo di tlago go rua lefase ka mo go tletšego?

¹⁵ Ka mo go swanago, dihlatse tša Jehofa tša pele ga Bokriste di ile tša bolelwa di lokile ge e le mabapi le bogwera bja tšona le Modimo; Aborahama, Isaka le Jakobo ba ile ba bolelwa e le ba “phelago” gaešita le ge ba be ba hwile. (Mateo 22:31, 32; Jakobo 2:21, 23) Lega go le bjalo, bona le ba bangwe ka moka bao ba tsošitšwego gotee le lešaba le legolo la dinku tše dingwe tše di botegago tšeo di phologago Haramagedone, le bana le ge e le bafe bao mo gongwe ba ka ba belegago lefaseng le lefsa, ba tla ba ba sa swanetšwe ke go išwa phethegong. Se se tla dirwa ke Kriste a e-na le dikgoši le baperisita-gotee le yena, motheong wa sehlabelo sa topollo sa Jesu nakong ya Letšatši la Kahlolo la nywaga e sekete. Bofelong bja Letšatši leo, “bahu ba bangwe ka moka” ba tla “phela” ka kwešišo ya gore e tla ba e le batho ba phethagetšego. Bjalo ka ge re tla bona, ba swanetše go fenya molekong wa mafelelo, eupša ba tla lebana le moleko woo e le batho ba phethagetšego. Ge ba fentše molekong wo, Modimo o tla ba bolela e le ba ba swanetšwego ke go phela ka mo go sa felego, gomme e le ba ba lokilego ka mo go tletšego. Ba tla bona phethagatšo e tletšego ya kholofetšo ya gore: “Baloki e ba beng ba naxa, ba dula mo xo yôna ka mehla le ka mehla.” (Psalme 37:29) A bokamoso bjo bo thabišago gakaakang bjo bo boloketšwego batho ba ba kwago!

Tsogo ya Pele

16. Johane o hlalosa bjang tsogo ya bao ba bušago e le dikgoši gotee le Kriste, gomme ka baka la’ng?

¹⁶ Johane bjale ge a boela go bao ba ilego “ba phela gomme ba buša e le dikgoši le Kriste ka nywaga e sekete,” o ngwala gore: “Ye ke tsogo ya pele.” (Kutollo 20:5b) Ke ya pele bjang? Ke “tsogo ya pele” ge e le ka nako, ka gobane bao ba tsošwago ke “dithakangwaga go Modimo le go Kwana.” (Kutollo 14:4) Le gona ke ya pele ge e le ka bohlokwa bja yona, ka ge bao ba tsošwago go yona ba e-ba babuši-gotee le Jesu Mmušong wa gagwe wa legodimong gomme ba ahlola batho ba bangwe ka moka. Sa mafelelo, e bohlokwa ge e le ka sebopego sa yona. Ka ntle le Jesu Kriste, bao ba tsošwago tsogong ya pele ke bona feela dibopiwa tše di bolelwago ka Beibeleng e le tšeo di amogelago go se hwe.—1 Bakorinthe 15:53; 1 Timotheo 6:16.

17. (a) Johane o hlalosa bjang kholofelo e kgahlišago ya Bakriste ba tloditšwego? (b) “Lehu la bobedi” ke’ng, gomme ke ka baka la’ng le se na “matla” go bafenyi ba 144 000?

¹⁷ A kholofelo e kgahlišago gakaakang ya batlotšwa ba! Bjalo ka ge Johane a bolela: “Yo a thabago le yo mokgethwa ke mang le mang yo a nago le kabelo tsogong ya pele; lehu la bobedi ga le na matla go bona.” (Kutollo 20:6a) Bjalo ka ge Jesu a holofeditše Bakriste ba Simirina, bafenyi ba bao ba tsošwago “tsogong ya pele,” ba ka se ke ba hlokofatšwa ke “lehu la bobedi,” leo le bolelago go fedišwa ka ntle le kholofelo ya tsogo. (Kutollo 2:11; 20:14) Lehu la bobedi ga “le na matla” go bafenyi ba bjalo, ka gobane ba tla ba ba apere go se senyege le go se hwe.—1 Bakorinthe 15:53.

18. Johane bjale o bolela’ng ka babuši ba bafsa ba lefase, gomme ba tla dira’ng?

¹⁸ Se ke seo se fapanego gakaakang le dikgoši tša lefase tša nakong yeo Sathane a e filwego ya go buša! Tšona di bušitše mo e ka bago nywaga e 50 goba e 60, gomme tše dintši tša tšona di bušitše nywaga e sego kae feela. Tše dintši tša tšona di gateletše batho. Ge e le gabotse, ditšhaba di ka holega bjang ka mo go sa felego tlase ga babuši bao ba fetogago ka mehla ba ba nago le melao yeo e fetogago ka mehla? Ka go fapana le se, Johane o bolela ka babuši ba bafsa ba lefase gore: “Eupša e tla ba baperisita ba Modimo le ba Kriste, gomme ba tla buša le yena ka nywaga e sekete.” (Kutollo 20:6b) Bona gotee le Jesu, ba tla bopa mmušo o tee ka nywaga e sekete. Modiro wa bona wa boperisita ka go diriša mohola wa sehlabelo sa motho yo a phethagetšego Jesu, o tla iša batho ba kwago phethegong ya moya, ya boitshwaro le ya mmele. Modiro wa bona wa bogoši o tla feleletša ka go tšweletša lekoko la batho la lefase ka moka leo le bonagatšago go loka ga Jehofa le bokgethwa bja gagwe. Bjalo ka baahlodi bao ba ahlolago ka nywaga e sekete, bona gotee le Jesu ba tla hlahla ka lerato batho ba kwago gore ba fihlelele pakane ya bophelo bjo bo sa felego.—Johane 3:16.

Moleko wa Mafelelo

19. Boemo bja lefase le bja batho e tla ba bofe bofelong bja Pušo ya Nywaga e Sekete, gomme Jesu bjale o dira’ng?

¹⁹ Bofelong bja Pušo ya Nywaga e Sekete, lefase ka moka le tla ba le swana le Edene ya mathomong. E tla ba paradeise ya kgonthe. Batho ba ba phethagetšego le ka mohla ba ka se sa nyaka moperisita yo mogolo gore a ba boelanye le Modimo, ka ge mašaledi ka moka a sebe sa Adama a tla ba a tlošitšwe gomme lenaba la mafelelo, lehu le tla ba le fedišitšwe. Mmušo wa Kriste o tla ba o phethile morero wa Modimo wa go bopa lefase le tee leo le nago le mmušo o tee. Mo nakong ye, Jesu o “gafela mmušo go Modimo wa gagwe le Tatagwe.”—1 Bakorinthe 15:22-26; Baroma 15:12.

20. Johane o re botša gore go tla direga’ng ge e le nako ya moleko wa mafelelo?

²⁰ Bjale ke nako ya moleko wa mafelelo. Ka go fapana le batho ba pele kua Edene, na batho bao ba phethagetšego ba tla ema ba tiile potegong ya bona? Johane o re botša seo se diregago: “Bjale gatee-tee ge nywaga e sekete e fedile, Sathane o tla lokollwa kgolegong ya gagwe, o tla tšwela go timetša ditšhaba tšeo di lego dikhutlong tše nne tša lefase, Gogo le Magogo, go di rapela ntwa. Palo ya bona e etša lešabašaba la lewatle. Ba tšwela lefaseng ka bophara gomme ba dikanetša mešaša ya bakgethwa le motse wo o rategago.”—Kutollo 20:7-9a.

21. Sathane o gata megato efe boitekong bja gagwe bja mafelelo, gomme ke ka baka la’ng re se ra swanela go makatšwa ke gore ba bangwe ba tla latela Sathane gaešita le ka morago ga Pušo ya Nywaga e Sekete?

²¹ Boiteko bja mafelelo bja Sathane bo tla sepela bjang? O fora “ditšhaba tšeo di lego dikhutlong tše nne tša lefase, Gogo le Magogo” gomme o di iša ‘ntweng.’ Ke bomang bao ruri ba ka emago ka lehlakoreng la Sathane, ka morago ga nywaga e sekete ya pušo ya mmušo wa Modimo e thabišago le e holago? O se ke wa lebala gore Sathane o ile a kgona go fapoša Adama le Efa bao ba bego ba phethagetše, nakong ya ge ba be ba thabela bophelo Paradeiseng ya Edene. Le gona o ile a kgona go fapoša barongwa ba legodimong bao ba bego ba bone dilo tše mpe tše di bego di tlišitšwe ke bohlanogi bja mathomong. (2 Petro 2:4; Juda 6) Ka gona, ga se ra swanela go makatšwa ke gore batho ba bangwe ba ba phethagetšego ba tla gokeletšwa go latela Sathane, gaešita le ka morago ga nywaga e sekete ya lethabo ya pušo ya Mmušo wa Modimo.

22. (a) Ke’ng seo se bolelwago ke polelwana e rego, “ditšhaba tšeo di lego dikhutlong tše nne tša lefase”? (b) Ke ka baka la’ng marabele a bitšwa “Gogo le Magogo”?

²² Beibele e bitša marabele a gore ke “ditšhaba tšeo di lego dikhutlong tše nne tša lefase.” Se ga se bolele gore batho ba tla ba ba arotšwe gape ka dihlopha tša ditšhaba tšeo di ikemetšego. Se bontšha feela gore ba ba tla ikarola go batho ba lokilego le ba botegago ba Jehofa, gomme ba bonagatša moya o swanago o mobe, woo ditšhaba di o bontšhago lehono. Ba tla “tsênwa ke moxopolô o mobe,” go etša ge Gogo wa Magogo a ile a dira boporofeteng bja Hesekiele, ka go ikemišetša go senya mmušo wa pušo ya Modimo mo lefaseng. (Hesekiele 38:3, 10-12) Ka baka leo, ba bitšwa “Gogo le Magogo.”

23. Ke’ng seo se bolelwago ke taba ya gore palo ya marabele e “etša lešabašaba la lewatle”?

²³ Palo ya bao ba emago gotee le Sathane borabeleng bja gagwe e tla “etša lešabašaba la lewatle.” Yeo ke palo e kaaka’ng? Ga go na palo e rulagantšwego e sa le pele. (Bapiša le Jošua 11:4; Baahlodi 7:12.) Palo-moka ya mafelelo ya marabele e tla ithekga ka gore motho yo mongwe le yo mongwe o arabela bjang maanong a bofora a Sathane. Lega go le bjalo, ga go na pelaelo gore go tla ba le palo e kgolo ka ge ba tla ikwa ba tiile kudu gore ba ka fenya “mešaša ya bakgethwa le motse o rategago.”

24. (a) “Motse o rategago” ke’ng, gomme o ka dikanetšwa bjang? (b) Ke’ng seo se emelwago ke “mešaša ya bakgethwa”?

²⁴ “Motse o rategago” e swanetše go ba e le motse woo Jesu Kriste yo a tagafaditšwego a botšago balatedi ba gagwe ka wona go Kutollo 3:12, gomme e le woo a o bitšago “motse wa Modimo wa-ka, Jerusalema e mpsha e fologago e e-tšwa legodimong go Modimo wa-ka.” Ka ge wo e le mokgatlo wa legodimong, madira ao a lefaseng a ka o “dikanetša” bjang? A dira bjalo ka gore a dikanetša “mešaša ya bakgethwa.” Mešaša e ka ntle ga motse; ka go re’alo “mešaša ya bakgethwa” e swanetše go emela bao ba lego lefaseng ka ntle ga lefelo la legodimong la Jerusalema e Mpsha, bao ka go botega ba thekgago thulaganyo ya mmušo ya Jehofa. Ge marabele ao a laolwago ke Sathane a hlasela bao ba botegago, Morena Jesu o lebelela se e le ge go hlaselwa yena. (Mateo 25:40, 45) “Ditšhaba tšeo” di tla leka go fediša dilo ka moka tšeo Jerusalema e Mpsha ya legodimong e di dirilego ge e dira lefase paradeise. Ka gona ka go hlasela “mešaša ya bakgethwa,” ba bile ba hlasela le “motse o rategago.”

Letsha la Mollo le Sebabole

25. Johane o hlalosa bjang seo se tlago go tšweletšwa ke go hlasela ga marabele “mešaša ya bakgethwa,” gomme se se tla bolela’ng go Sathane?

²⁵ Na boiteko bjo bja mafelelo bja Sathane bo tla atlega? Le gatee-tee, go etša ge go hlasela moo Gogo wa Magogo a ikemišeditšego go go dira go Isiraele ya moya mehleng ya rena go ka se ke gwa atlega! (Hesekiele 38:18-23) Johane o hlalosa gabotse seo se tlago go tšwelela: “Eupša mollo wa theoga legodimong wa ba tšhuma. Diabolo yo a bego a ba timetša a lahlelwa letsheng la mollo le sebabole, moo sebata gotee le moporofeta wa maaka ba bego ba šetše ba le gona.” (Kutollo 20:9b-10a) Go e na le go fo lahlelwa sekoting, mo nakong ye Sathane, e lego Noga ya kgale, o tla pšhatlwa e le ka kgonthe gore a se ke a hlwa a sa ba gona, a šilakanywa gomme a fedišetšwa ruri go etša ge eka ke ka mollo.

26. Ke ka baka la’ng ‘letsha la mollo le sebabole’ e ka se ke ya ba lefelo la kgonthe la tlhokofatšo?

²⁶ Re šetše re boletše gore ‘letsha la mollo le sebabole,’ e ka se ke ya ba lefelo la kgonthe la tlhokofatšo. (Kutollo 19:20) Ge e ba Sathane a be a tla hlokofatšwa o šoro moo ka mo go sa felego, gona Jehofa o be a tla swanelwa ke go mo tlogela a phela. Le gona bophelo ke mpho, e sego kotlo. Lehu ke kotlo bakeng sa sebe gomme go ya ka Beibele, dibopiwa tše di hwilego ga di kwe bohloko. (Baroma 6:23; Mmoledi 9:5, 10) Go feta mo, ka morago re bala gore lehu ka bolona gotee le Hadese di lahlelwa letsheng lona leo la mollo le sebabole. Ruri, lehu le Hadese di ka se ke tša kwa bohloko!—Kutollo 20:14.

27. Seo se diragaletšego Sodoma le Gomora se re thuša bjang go kwešiša polelwana e rego, letsha la mollo le sebabole?

²⁷ Tše ka moka di tiiša kgopolo ya gore letsha la mollo le sebabole ke ya seswantšhetšo. Le gona, go bolelwa ga mollo le sebabole go re gopotša ka kahlolo ya Sodoma le Gomora tša bogologolo ge Modimo a be a di fediša ka baka la bobe bja tšona bjo bo šiišago. Ge nako ya tšona e fihla, “Morêna a nešetša Sodoma le Gomora thsêbêla le mollô, di e-tšwa xodimo xo Morêna.” (Genesi 19:24) Seo se ilego sa wela metse ye e mebedi se bitšwa “go otlwa ka kahlolo ya mollo o sa felego.” (Juda 7) Fela, metse yeo e mebedi ga se ya ka ya hlokofatšwa ka mo go sa felego. Go e na le moo, e ile ya fedišetšwa ruri gotee le baagi ba yona ba gobogilego. Metse yeo ga e gona lehono, gomme ga go na motho yo a ka bolelago ka go kgonthiša gore e be e le kae.

28. Letsha la mollo le sebabole ke’ng, gomme ke bjang le sa swanego le lehu, Hadese le sekoti?

²⁸ Ka go dumelelana le se, Beibele e hlalosa seo se bolelwago ke letsha la mollo le sebabole ge e re: “Se se bolela lehu la bobedi, letsha la mollo.” (Kutollo 20:14) Ge e le gabotse letsha le ke selo setee le Gehenna yeo Jesu a boletšego ka yona, e lego lefelo leo go lona ba babe ba fedišwago, e sego go hlokofatšwa ka mo go sa felego. (Mateo 10:28) Ke phedišo ya kgonthe le ya sa ruri yeo go yona go se nago kholofelo ya tsogo. Ka gona, gaešita le ge go e-na le dinotlelo tša lehu, Hadese le sekoti, fela ga go na moo go bolelwago ka senotlelo sa go notlolla letsha la mollo le sebabole. (Kutollo 1:18; 20:1) Le ka mohla le ka se ke la lokolla bagolegwa ba lona.—Bapiša le Mareka 9:43-47.

Go Hlokofatšwa Mosegare le Bošego le ka mo go sa Felego

29, 30. Johane o re’ng ka Diabolo gotee le sebata le moporofeta wa maaka, gomme se se ka kwešišwa bjang?

²⁹ Johane ge a bolela ka Diabolo gotee le sebata le moporofeta wa maaka, o re botša gore: “Ba tla hlokofatšwa mosegare le bošego go iša mehleng ya neng le neng.” (Kutollo 20:10b) Se se ka ba se bolela’ng? Ka ge go šetše go boletšwe, ga se mo go kwagalago go bolela gore diswantšhetšo tše bjalo ka sebata le moporofeta wa maaka gotee le lehu le Hadese, di ka hlokofatšwa ka tsela ya kgonthe. Ka gona, ga re na lebaka la go dumela gore Sathane o tla hlokofatšwa ka mo go sa felego. O tla fedišwa.

³⁰ Lentšu la Segerika le le dirišitšwego mo bakeng sa “tlhokofatšo,” ba·sa·niʹzo, le bolela kudu ka “go hlahloba (ditšhipi) ka lefsika la go gohla la tlhahlobo.” Tlhaloso ya bobedi ke “go botšološiša ka mokgwa wa go tlaiša.” (The New Thayer’s Greek-English Lexicon of the New Testament) Go dirišwa ga lentšu le la Segerika ditemaneng tše di dikologilego ye go bontšha gore seo se diregago go Sathane se tla dira bjalo ka lefsika la go gohla la tlhahlobo go kgang ya go ba le tshwanelo le go loka ga pušo ya Jehofa. Kgang yeo ya pušo ya mmušo e tla ba e rarolotšwe gomme ya ba moka. Go belaelwa ga bogoši bja Jehofa le ka mohla go ka se ke gwa swanelwa ke go lekwa gape ka nako e telele, e le gore go tle go hlatselwe e le mo go fošagetšego.—Bapiša le Psalme 92:1, 15.

31. Mantšu a mabedi a Segerika ao a tswalanago le leo le bolelago “tlhokofatšo,” a re thuša bjang go kwešiša kotlo yeo Sathane Diabolo a otlwago ka yona?

³¹ Go oketša mo, lentšu le le tswalanago le lona la ba·sa·ni·stesʹ, “mohlokofatši,” le dirišwa ka Beibeleng go bolela “mogolegi.” (Mateo 18:34, Kingdom Interlinear) Ka go dumelelana le se, Sathane o tla golegwa letsheng la mollo ka mo go sa felego; le ka mohla a ka se ke a lokollwa. Sa mafelelo, go Septuagint ya Segerika yeo e bego e tsebja kudu ke Johane, lentšu le le tswalanago le le la baʹsa·nos le a dirišwa go šupa go kokobetšwa moo go išago lehung. (Hesekiele 32:24, 30) Se se re thuša go bona gore kotlo yeo Sathane a otlwago ka yona ke e kokobetšago, e lego lehu la ka mo go sa felego letsheng la mollo le sebabole. Mediro ya gagwe e hwa le yena.—1 Johane 3:8.

32. Batemona ba tla otlwa ka kotlo efe, gomme re tseba bjang?

³² Le gona, mo temaneng ye ga go bolelwe ka batemona. Na ba tla lokollwa gotee le Sathane bofelong bja nywaga e sekete, gomme ba otlwa ka kotlo ya lehu la ka mo go sa felego gotee le yena? Go ya ka bohlatse bjo bo lego gona go tla ba bjalo. Jesu seswantšhong sa dinku le dipudi, o boletše gore dipudi di tla ya “mollong o sa felego o lokišeditšwego Diabolo le barongwa ba gagwe.” (Mateo 25:41) Polelwana “mollo o sa felego” e swanetše go šupa letsha la mollo le sebabole moo Sathane a tlago go lahlwelwa gona. Barongwa ba Diabolo ba ile ba rakwa legodimong le yena. Go molaleng gore ba ile ba lahlelwa sekoting gotee le yena mathomong a Pušo ya Nywaga e Sekete. Ka gona, le bona ba tla fedišwa le yena letsheng la mollo le sebabole.—Mateo 8:29.

33. Ke karolo efe ya mafelelo ya Genesi 3:15 yeo bjale e tlago go ba e phethagatšwa, gomme moya wa Jehofa bjale o dira gore Johane a ele hloko taba efe?

³³ Ka tsela ye, karolo ya mafelelo ya boporofeta bjo bo begilwego go Genesi 3:15 e phethagetše. Nakong ya ge Sathane a lahlelwa letsheng la mollo, o tla ba yo a hwilego go etša noga yeo hlogo ya yona e pšhatlilwego ka serethe sa tšhipi. Yena le batemona ba gagwe ba tla ba ba fedišeditšwe ruri. Ga ba sa bolelwa gape pukung ya Kutollo. Ka ge ba ba fedišitšwe ka mokgwa wa boporofeta, moya wa Jehofa bjale o lebiša tlhokomelo tabeng e bohlokwa kudu go batho bao ba thabelago kholofelo ya go phela lefaseng: Pušo ya legodimong ya “Kgoši ya dikgoši” le “ba biditšwego le go kgethwa le go botega gotee le yena,” e tla direla batho eng? (Kutollo 17:14) E le go araba se, Johane o re bušetša gape mathomong a Pušo ya Nywaga e Sekete.

[Mengwalo ya ka tlase]

[Seswantšho go letlakala 293]

Lewatle le le Hwilego. Lefelo leo mo gongwe e ka bago la Sodoma le Gomora

[Diswantšho go letlakala 294]

“Le xôna ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê”