Ke Bomang Bao Ba Tlago ‘Go Phologa’?
“Yo mongwe le yo mongwe yo a bitšago leina la Jehofa, o tlo phološwa.”—DITIRO 2:21, NW.
1. Ke ka baka la’ng Pentekoste ya 33 C.E. e bile letšatši la phetogo e kgolo historing ya lefase?
PENTEKOSTE ya 33 C.E. e bile letšatši la phetogo e kgolo historing ya lefase. Ka baka la’ng? Ka gobane letšatšing leo go ile gwa tswalwa setšhaba se sefsa. Mathomong e be e se setšhaba se segolo kudu—e le barutiwa ba Jesu ba 120 feela bao ba bego ba bokane ka phapošing ya ka godimo kua Jerusalema. Eupša lehono, ge ditšhaba tše dintši tšeo di bego di le gona morago kua ka nako yeo di lebetšwe, setšhaba seo se ilego sa tswalwa phapošing yeo ya ka godimo se sa dutše se le gona. Therešo ye ke ya bohlokwa bjo bogolo go rena ka moka, ka ge se e le setšhaba seo se kgethilwego ke Modimo gore e be hlatse ya gagwe pele ga batho.
2. Ke ditiragalo dife tša mohlolo tšeo di ilego tša swaya go tswalwa ga setšhaba se sefsa?
2 Nakong ya ge setšhaba seo se sefsa se be se thoma go ba gona, ditiragalo tše bohlokwa tšeo di bego di phethagatša mantšu a Joele a boporofeta di ile tša direga. Re bala ka ditiragalo tše go Ditiro 2:2-4 gore: “Ba thšoxa xò kwala modumô o tšwaxo lexodimong, e ke ké wa ledimo le matla le le tšutlaxo, wa tlala ngwakô ka moka wo ba dutšexo xo wôna. Ba bôna xò hlahlamoloxa maleme a kaxo dikxabo tša mollô; a tla a dula xodimo xa e mongwê le e mongwê wa bôná. Ka moka ba tlala Môya-mokxêthwa; ba thôma xo bolêla ka maleme a šele, ka mo Môya ó ba faxo xo bolêla ka xôna.” Ka tsela ye banna bao le basadi ba botegago ba 120 ba ile ba fetoga setšhaba sa moya, e lego ditho tša pele tša seo moapostola Paulo ka morago a ilego a se bitša “Ba-Isiraele ba Modimo.”—Ba-Galatia 6:16.
3. Ke boporofeta bofe bja Joele bjo bo ilego bja phethagatšwa ka Pentekoste ya 33 C.E.?
3 Mašaba a ile a bokana bakeng sa go hlahlobišiša “ledimo le matla le le tšutlaxo,” gomme moapostola Petro a ba hlalosetša gore bjo bongwe bja boporofeta bja Joele bo be bo phethagala. Boporofeta bofe? Aga, theetša seo a se boletšego: “Tšeo di tl’o xo dirêxa mehleng yeo ya bofelô ši-di: O r’yalo Modimo, ó re: Nama yohle ke tlo e thšêla Môya wa-ka; ’me barwa ba lena le barwedi ba lena ba tlo porofeta; masoxana a lena a tlo bôna dipônô; ba baxolo ba lena ba tlo lôra dilôrô; le balata ba lena ba banna le ba basadi ke tlo ba thšêla Môya wa-ka mehleng yeo, ba tlo porofeta. ’Me ke tlo dira mehlôlô kwa lexodimong le mo lefaseng, madi le mollô le mekubêxô ya meuši. Letšatši le tlo fetoxa lefsifsi, kxwedi ya ba madi, xe xo fihla ’tšatši le lexolo le le šiišaxo la Morêna. Xomme ba ba tl’o xo phološwa ké ba ba [bitšago leina la Jehofa, NW].” (Ditiro 2:17-21) Mantšu ao Petro a a tsopotšego a hwetšwa go Joele 2:28-32, gomme go phethagatšwa ga ona go be go bolela gore setšhaba sa ba-Juda se be se felelwa ke nako. “’Tšatši le lexolo le le šiišaxo la Morêna,” e lego nako ya kahlolo ya Isiraele e sa botegego, le be le le kgaufsi. Eupša ke bomang bao ba bego ba tla phološwa? Le gona se se be se swantšhetša eng?
Diphethagatšo tše Pedi tša Boporofeta
4, 5. Ka baka la ditiragalo tšeo di tlago, ke keletšo efe yeo Petro a ilego a e nea gomme ke ka baka la’ng keletšo yeo e be e šoma go ba go feta le mehleng ya gagwe?
4 Nywageng ya ka morago ga 33 C.E., Isiraele ya moya ya Modimo e ile ya atlega, eupša setšhaba sa nama sa Isiraele ga se sa atlega. Ka 66 C.E., Isiraele ya nama e be e e-lwa le Roma. Ka 70 C.E., go ile gwa nyaka eka Isiraele e kgaoditše go ba gona gomme Jerusalema gotee le tempele ya yona di ile tša fišwa lore-lore. Ka Pentekoste ya 33 C.E., Petro o ile a nea keletšo e botse ka baka la kotsi yeo e bego e e-tla. A tsopola Joele gape, o ile a re: “Yo mongwe le yo mongwe yo a bitšago leina la Jehofa, o tla phološwa.” (NW) Mo-Juda yo mongwe le yo mongwe o be a swanetše go dira phetho ya motho ka noši ya go bitša leina la Jehofa. Se se be se akaretša go kwa ditaelo tše di tšwelago pele tša Petro tše rego: “Sokoloxang; ka moka Le kolobetšwê Leineng la Jesu Kriste, e bê xôna xo lebalêlwa dibe.” (Ditiro 2:38) Batheetši ba Petro ba be ba swanetše go amogela Jesu e le Mesia, yoo Isiraele e le setšhaba e mo gannego.
5 Mantšu ao a Joele a boporofeta a be a e-na le tutuetšo e kgolo go bao ba ikokobeditšego lekgolong la pele la nywaga. Lega go le bjalo, a na le tutuetšo e kgolo kudu le go feta lehono, ka gobane go etša ge ditiragalo tša lekgolong la bo-20 la nywaga di bontšha, go bile le phethagatšo ya bobedi ya boporofeta bja Joele. Anke re boneng kamoo se se bilego ka gona.
6. Go tsebja ga Isiraele ya Modimo go ile gwa bonala gabotse bjang ge 1914 e be e dutše e batamela?
6 Ka morago ga lehu la baapostola, Isiraele ya Modimo e ile ya khupetšwa ke mefoka ya Bokriste bja maaka. Lega go le bjalo, nakong ya bofelo yeo e thomilego ka 1914, go tsebja ga setšhaba se sa moya go ile gwa buša gwa bonala gabotse gape. Se ka moka e be e le go phethagatšwa ga seswantšho sa Jesu sa mabele le mefoka. (Mateo 13:24-30, 36-43) Ge 1914 e be e dutše e batamela, Bakriste ba tloditšwego ba ile ba thoma go ikarola go Bojakane bjo bo sa botegego, ka sebete ba gana dithuto tša bjona tša maaka gomme ba bolela ka go tla ga bofelo bja “mabaka a ba-ntlê.” (Luka 21:24) Eupša ntwa ya pele ya lefase yeo e ilego ya phulega ka 1914, e ile ya rotoša ditaba tšeo ba bego ba sa itokišeletša tšona. Ka tlase ga kgateletšo e tseneletšego, ba bantši ba ile ba nyefiša gomme ba bangwe ba kwanantšha. Ka 1918 modiro wa bona wa boboledi o be o nyakile o kgaoditše.
7. (a) Ke tiragalo efe e swanago le ya Pentekoste ya 33 C.E. yeo e ilego ya direga ka 1919? (b) Go thoma ka 1919, go tšhollwa ga moya wa Modimo go ile gwa ba le mafelelo afe go bahlanka ba Jehofa?
7 Lega go le bjalo, seo ga se sa tšea nako e telele. Go thoma ka 1919, Jehofa o ile a thoma go tšhollela moya wa gagwe go batho ba gagwe ka tsela yeo e bego e gopotša motho ka Pentekoste ya 33 C.E. Ee, ka 1919 ga se gwa ba le go bolela ka maleme le go tšutla ga ledimo le matla. Re kwešiša go tšwa mantšung a Paulo a ngwadilwego go 1 Ba-Korinthe 13:8 gore nako ya mehlolo e be e šetše e le kgale e fetile. Lega go le bjalo, moya wa Modimo o bonagetše gabotse ka 1919 ge kopanong ya kua Cedar Point, Ohio, U.S.A., Bakriste ba botegago ba ile ba matlafatšwa lefsa gomme ba thoma gape modiro wa go bolela ditaba tše di lokilego tša Mmušo. Ka 1922 ba ile ba boela Cedar Point gomme ba tutuetšwa ke boipiletšo bja gore, “Tsebatšang, tsebatšang, tsebatšang Kgoši le mmušo wa yona.” Go etša ge go ile gwa direga lekgolong la pele la nywaga, lefase le ile la gapeletšega go lemoga mafelelo a go tšhollwa ga moya wa Modimo. Mokriste yo mongwe le yo mongwe yo a ineetšego—wa monna le wa mosadi, yo mogolo le yo monyenyane—ba ile ba thoma go “porofeta,” ke gore go bolela “matete a Modimo.” (Ditiro 2:11) Ka go swana le Petro ba ile ba kgothatša ba ikokobeditšego ka gore: “Tlang Le phološwê, Le tšwê molokong o kxopamilexo wó.” (Ditiro 2:40) Ba arabelago ba be ba ka dira seo bjang? Ka go kwa mantšu a Joele ao a hwetšwago go Joele 2:32 (PK): ‘Yo mongwe le yo mongwe yo a bitšago leina la Jehofa o tlo phološwa.’
8. Dilo di tšwetše pele bjang bakeng sa Isiraele ya Modimo ga e sa le go tloga ka 1919?
8 Ga e sa le go tloga nywageng yeo ya pele, ditaba tša Isiraele ya Modimo di gatetše pele. Go bonagala go swawa ga batlotšwa go šetše go tšwetše pele kudu, gomme ga e sa le go tloga ka bo-1930 lešaba le legolo la ba ikokobeditšego bao ba nago le kholofelo ya lefaseng le ile la tšwelela. (Kutollo 7:3, 9) Ka moka ba na le maikwelo a go akgofa ga mehla, ka gobane phethagalo ya bobedi ya Joele 2:28, 29 e bontšha gore re kgaufsi le letšatši leo e bilego e le le legolo ka go fetišiša le le boifišago la Jehofa ge tshepedišo ya dilo ya lefase ka bophara ya bodumedi, ya tša dipolitiki le kgwebo e tla fedišwa. Re na le mabaka ka moka a go ‘bitša leina la Jehofa’ ka tumelo e tletšego ya gore o tla re phološa!
Re Bitša Leina la Jehofa Bjang?
9. Dilo tše dingwe tšeo di akaretšwago go bitšeng leina la Jehofa ke dife?
9 Go bitša leina la Jehofa go akaretša’ng? Taba e dikologilego Joele 2:28, 29 e re thuša go araba potšišo yeo. Ka mohlala, Jehofa ga a theetše mang le mang yo a mmitšago. Ka moporofeta yo mongwe e lego Jesaya, Jehofa o ile a re go Isiraele: “Xe Le emiša matsôxô Lè mpitša, ke tla Le xerula; le xe Le ka atiša dithapêlô, nka se kê ka Le kwa.” Ke ka baka la’ng Jehofa a ile a gana go theetša setšhaba sa gagwe ka noši? Yena ka noši o hlalosa gore: “Diatla tša lena di tletše madi.” (Jesaya 1:15) Jehofa a ka se ke a theetša le ge e le mang yo a nago le molato wa madi goba yo a dirago sebe mokgwa. Ke ka baka leo Petro a ilego a botša ba-Juda ka Pentekoste gore ba sokologe. Tabeng yeo e dikologilego Joele 2:28, 29 re hwetša gore Joele le yena o gatelela tshokologo. Ka mohlala, go Joele 2:12, 13 re bala gore: “Le byale Morêna ó sa re: Boêlang xo Nna ka ’pelo tša lena ka moka, le ka xo ikôna, le ka xo lla, le ka xo ithsêtla pelo. Lesang xo xarola ’aparô tša lena; Le xaroleng dipelo tša lena; Le boêlê xo Morêna Modimo wa lena, xobane Yêna ké Moxauxedi, Yo lešôkô, Mo-se-fêle-pelo, Yo botho-boxolo.” Go thoma ka 1919, Bakriste ba tloditšwego ba ile ba gata mogato ka go dumelelana le mantšu a. Ba ile ba itshola diphošong tša bona gomme ba ikemišetša gore le ka mohla ba se ke ba kwanantšha gape goba go nyefiša. Se se ile sa bula tsela ya gore moya wa Modimo o tšhollwe. Motho yo mongwe le yo mongwe yo a nyakago go bitša leina la Jehofa gomme a kwewe o swanetše go latela tsela e swanago.
10. (a) Go itshola ga kgonthe ke eng? (b) Jehofa o arabela bjang boitsholong bja kgonthe?
10 Gopola gore go itshola ga kgonthe ke selo seo se fetago go fo re, “Ke kgopela tshwarelo.” Ba-Isiraele ba be ba tlwaetše go gagola diaparo tša bona tša ka ntle go bontšha go tsenelela ga maikwelo a bona. Eupša Jehofa o re: “Lesang xo xarola ’aparô tša lena; Le xaroleng dipelo tša lena.” Go itshola ga kgonthe go tšwa pelong, bogare-gareng bja borena. Go akaretša go furalela phošo, go etša ge re bala go Jesaya 55:7 gore: “E mobe a a lahlê tsela y’axwe; motho yo kxôpô a lahlê dikêlêlô tš’axwe, a boêlê xo Morêna.” Go akaretša go hloya sebe, go fo swana le ge Jesu a dirile. (Ba-Hebere 1:9) Ke moka re bota Jehofa gore a re lebalele motheong wa sehlabelo sa topollo, ka gobane Jehofa ke “Moxauxedi, Yo lešôkô, Mo-se-fêle-pelo, Yo botho-boxolo.” O tla amogela borapedi bja rena, e lego dibego tša rena tša dilewa le dinwewa tša moya. O tla theetša ge re bitša leina la gagwe.—Joele 2:14.
11. Borapedi bja therešo bo swanetše go tšea boemo bofe maphelong a rena?
11 Thutong ya Thabeng, Jesu o ile a re nea selo se sengwe seo re swanetšego go nagana ka sona ge a be a re: “Sa pele Le tsomê mmušô wa Modimo le tokô ya wôna.” (Mateo 6:33) Borapedi bja rena ga se bja swanelwa go tšewa gabohwefo, e le selo seo re se dirago ka tsela ya go ithola kgwara bjalo ka go okobatša letswalo la rena. Go hlankela Modimo go swanetše go newa boemo bja pele bophelong bja rena. Ka gona Jehofa o tšwela pele go bolela ka Joele gore: “Letšang diphalafala motseng wa Tsione. Le phuthê sethšaba, Le kxêthê phuthêxô, Le kxobokanyê ba baxolo, Le bothê le masea a anywaxo. Monyadi a tšwê mo ntlong ya xaxwe; le monyalwa a tšwê phapošing ya xaxwe.” (Joele 2:15, 16) Ke ga tlhago gore banyalani ba bafsa ba arošwe tlhokomelo, e le ge ba šetšana seng sa bona feela. Eupša gaešita le go bona, go hlankela Jehofa go swanetše go tla pele. Ga go na selo seo se swanetšego go tla ka pele ga go bokana ga rena go Modimo wa rena, re bitša leina la gagwe.
12. Ke kgonagalo efe ya kgolo yeo e bonalago pegong ya Segopotšo ya ngwagola?
12 Re sa dutše re nagana ka se, anke re hlahlobeng dipalo-palo tšeo di utolotšwego ke Pego ya Ngwaga wa Tirelo wa Dihlatse tša Jehofa wa 1997. Ngwagola go bile le tlhora ya bagoeledi ba Mmušo ba 5599 931—e lego lešaba le legolo e le ka kgonthe la bareti! Palo ya bao ba bilego gona Segopotšong e be e le 14 322 226—e lego mo e ka bago dimilione tše seswai le seripa go feta palo ya bagoeledi. Palo yeo e bontšha kgonagalo e botse ya go ba le kgolo. Bontši bja bao ba dimilione tše seswai le seripa ba be ba šetše ba ithuta Beibele le Dihlatse tša Jehofa e le batho ba thabelago goba bana ba batswadi ba kolobeditšwego. Palo e kgolo e be e thoma go ba gona sebokeng ka lekga la mathomo-thomo. Go ba gona ga bona go neile Dihlatse tša Jehofa sebaka se sebotse sa go ba tseba gakaone le go ithapela go ba thuša gore ba dire tšwelopele e oketšegilego. Ke moka go be go na le bao ba bago gona Segopotšong ngwaga o mongwe le o mongwe gomme mohlomongwe ba ba gona dibokeng tše dingwe tše sego kae, eupša ga ba dire tšwelopele e oketšegilego. Ee, batho ba bjalo ba tloga ba amogelegile go ba gona dibokeng. Eupša re ba kgothaletša gore ba naganišiše ka kelohloko ka mantšu a Joele a boporofeta gomme ba nagane ka megato e oketšegilego yeo ba swanetšego go e gata go kgonthišetša gore Jehofa o tla kwa ge ba bitša leina la gagwe.
13. Ge e ba re šetše re bitša leina la Jehofa, ke boikarabelo bofe bjo re nago le bjona go ba bangwe?
13 Moapostola Paulo o ile a gatelela sebopego se sengwe sa go bitša leina la Modimo. Lengwalong la gagwe leo le yago go ba-Roma o ile a tsopola mantšu a Joele a boporofeta a rego: “Ba xo tlo phološwa ké ba ba bitšaxo ’ina la Morêna.” Ke moka o ile a bolela gore: “Ba tlo bitša bya’ng xe ba sešo ba Mo dumêla? Ba tlo dumêla bya’ng xe ba sešo ba Mo kwa? Ba tlo kwa bya’ng, xe xo se sexoeledi?” (Ba-Roma 10:13, 14) Ee, ba bangwe ba bantši bao go fihla gabjale ba sa tsebego Jehofa go nyakega gore ba bitše leina la gagwe. Bao ba šetšego ba tseba Jehofa ba na le boikarabelo e sego bja go bolela feela, eupša le bja go katana le go ba nea thušo yeo.
Paradeise ya Moya
14, 15. Ke ditšhegofatšo dife tša paradeise tšeo batho ba Jehofa ba di thabelago ka baka la ge ba bitša leina la gagwe ka tsela yeo e mo kgahlišago?
14 Yeo ke tsela yeo batlotšwa gotee le dinku tše dingwe ba lebelelago dilo ka yona, gomme ka baka leo, Jehofa o a ba šegofatša. “Ké mo Morêna a tl’o xo pelofalêla naxa ya xaxwe, a kwêla sethšaba sa xaxwe bohloko.” (Joele 2:18) Ka 1919 Jehofa o ile a bontšha phišego ya gagwe le kwelobohloko bakeng sa batho ba gagwe ge a be a ba lopolla gomme a ba tliša tikologong ya gagwe ya modiro wa moya. Ye ke paradeise ya moya e le ka kgonthe yeo e hlaloswago gabotse ke Joele ka mantšu a rego: “Hee naxa, se boifê; O hlalalê O thabê, xobane Morêna ó dira tše kxolo. Hee lena diphôôfôlô tša lešôka, Le se boifeng! Xobane mafulô a naxa a tlo hloxa byang byo bonana, ’me dihlare di tlo enywa dikenyô tša tšôna; mexó le merara e tlo tšweletša matla a yôna. ’Me lena bana ba Tsione, hlalalang, Le thabê ka Morêna Modimo wa lena; xobane ó tlo Le fa pula ya thseola lebakeng la xôna; ó tlo Le nešetša pula ya medupe le ya kxoxola-moko byalo mohla-monene. Diboa di tlo tlala mabêlé; ’me bofôtlelong xo tlo tlôrôma morara le makhura.”—Joele 2:21-24.
15 A seswantšho se se kgahlišago gakaakang! Ditokišetšo tše dintši tša dinyakwa tše tharo tša motheo tša bophelo Isiraeleng—e lego mabele, makhura a mohlware le beine—gotee le mehlape e mentši. Mehleng ya rena mantšu ao a boporofeta a phethagatšwa e le ka kgonthe ka tsela ya moya. Jehofa o re nea dijo tša moya ka moka tšeo re di nyakago. Na ka moka ga re thabele motlalo o mobjalo o newago ke Modimo? Ka kgonthe, bjalo ka ge Maleaki a boletše e sa le pele, Modimo wa rena o ‘butše nthoba tša legodimo a re tšhollela tšhegofatšo wa go re golela.’—Maleaki 3:10.
Bofelo bja Tshepedišo ya Dilo
16. (a) Go tšhollwa ga moya wa Jehofa go bontšha’ng bakeng sa mehla ya rena? (b) Bokamoso bo hupere eng?
16 Ke ka morago ga go bolela e sa le pele ka maemo a paradeise a batho ba Modimo moo Joele a porofetago ka go tšhollwa ga moya wa Jehofa. Ge Petro a be a tsopola boporofeta bjo ka Pentekoste, o ile a re bo phethagaditšwe “mehleng yeo ya bofelô.” (Ditiro 2:17) Go tšhollwa ga moya wa Modimo morago ka nako yeo go be go bolela gore mehla ya bofelo e be e thomile bakeng sa tshepedišo ya dilo ya Sejuda. Go tšhollelwa ga moya wa Modimo Isiraeleng ya Modimo lekgolong la bo-20 la nywaga go bolela gore re phela mehleng ya bofelo bja tshepedišo ya lefase ka bophara ya dilo. Ka baka la se, bokamoso bo hupere eng? Boporofeta bja Joele bo tšwela pele go re botša gore: “Ke tlo dira mehlôlô kwa lexodimong le mo faseng, madi le mollô le mekubêxô ya meuši. Letšatši le tlo fetoxa lefsifsi, kxwedi ya ba madi, xe xo fihla ’tšatši le lexolo le le šiišaxo la Morêna.”—Joele 2:30, 31.
17, 18. (a) Ke letšatši lefe le le boifišago la Jehofa leo le ilego la tlela Jerusalema? (b) Go ba ga kgonthe ga letšatši le le boifišago la Jehofa la nakong e tlago go re tutuetša gore re dire eng?
17 Ka 66 C.E., mantšu a a boporofeta a ile a thoma go phethagala Juda ge ditiragalo di be di lebile ka go se fetoge seremong sa letšatši le le šiišago la Jehofa ka 70 C.E. E be e le mo go tšhošago gakaakang nakong yeo go ba gare ga bao ba bego ba sa godiše leina la Jehofa! Lehono ditiragalo tše di šiišago ka mo go swanago di ka pele, ge tshepedišo ye ka moka ya dilo ya lefase e tla fedišwa diatleng tša Jehofa. Lega go le bjalo, go phologa go a kgonega. Boporofeta bo tšwela pele ka gore: “Ba tl’o xo phološwa ké ba rapêlaxo ’ina la Morêna; ’me bopholoxêlô e tlo ba thaba ya Tsione le motse wa Jerusalêma ka mokxwa wo Morêna a o boletšexo. Mo xo ba ba phološwaxo xo tlo ba ba tl’o xo bitšwa ke Morêna.” (Joele 2:32) Dihlatse tša Jehofa di leboga e le ka kgonthe go tseba leina la Jehofa gomme di bota ka mo go feletšego gore o tla di phološa ge di mmitša.
18 Eupša go tla direga’ng ge letšatši le legolo le la letago la Jehofa le wela lefase le ka bogale bja lona ka moka? Seo se tla ahla-ahlwa sehlogong seo se ithutwago sa mafelelo.
Na o a Gopola?
◻ Ke neng la mathomo mo Jehofa a ilego a tšhollela moya wa gagwe godimo ga batho ba gagwe?
◻ Dilo tše dingwe tšeo di akaretšwago go bitšeng leina la Jehofa ke dife?
◻ Letšatši le legolo le la letago la Jehofa le ile la tlela Isiraele ya nama neng?
◻ Jehofa o šegofatša bjang bao ba bitšago leina la gagwe lehono?
[Seswantšho go letlakala 15]
Setšhaba se sefsa se ile sa tswalwa ka Pentekoste ya 33 C.E.
[Seswantšho go letlakala 17]
Pejana lekgolong le la nywaga, Jehofa o ile a tšhollela moya wa gagwe gape bathong ba gagwe e le go phethagatša Joele 2:28, 29
[Seswantšho go letlakala 18]
Batho ba swanetše go thušwa gore ba bitše leina la Jehofa
[Seswantšho go letlakala 19]