Kgaolo 29

Go Opela Kopelo e Mpsha ya Phenyo

Pono 9—Kutollo 14:1-20

Taba: Ba 144 000 ba na le Kwana Thabeng ya Tsione; ditsebišo tša barongwa di kwala lefaseng ka moka; go a bunwa

Nako ya phethagatšo: 1914 go fihla masetlapelong a magolo

1. Re šetše re ithutile’ng mabapi le Kutollo dikgaolo 7, 12 le 13, gomme bjale re tla ithuta’ng?

GO LAPOLOŠA gakaakang go retologela ponong e latelago ya Johane! Ka go fapana le mekgatlo e tšhošago yeo e swanago le dibata tša drakone, bjale re bona bahlanka ba botegago ba Jehofa le ditiro tša bona nakong ya letšatši la Morena. (Kutollo 1:10) Kutollo 7:1, 3 e šetše e re boditše gore diphefo tše nne tša phedišo di thibetšwe go fihlela go swailwe bohle ba 144 000 ba bahlanka ba ba tloditšwego. Kutollo 12:17 e tsebišitše gore mo nakong yeo, ba “ba ba šetšego ba peu ya mosadi” ke bona bao ba tlaišwago ka mo go kgethegilego ke Sathane, yena drakone. Kutollo kgaolo ya 13 e hlalositše gabotse mekgatlo ya bopolitiki yeo e tšweleditšwego ke Sathane lefaseng gore e bake kgateletšo e kgolo le tlaišo e šoro go bahlanka ba botegago ba Jehofa. Eupša lenaba leo le legolo le ka se ke la thibela morero wa Modimo! Bjale re tla ithuta gore go sa šetšwe maikemišetšo a mabe a Sathane, bohle ba 144 000 ba tla bokanywa ka mokgwa wa phenyo.

2. Johane go Kutollo 14:1 o re bontšha’ng e sa le pele ka mafelelo a thabišago, gomme ke mang yo e lego Kwana?

² Johane le sehlopha sa Johane seo se lego gotee le yena lehono, ba neilwe sebaka sa go bona e sa le pele mafelelo ao a thabišago: “Ka lebelela, gomme, bonang! Kwana e eme Thabeng ya Tsione e na le ba dikete tše lekgolo-masome-nne-nne ba ngwadilwego leina la yona le leina la Tatago yona diphatleng.” (Kutollo 14:1) Bjalo ka ge re bone, Kwana ye ke motho o tee le Mikaele yo a ilego a hlatswa magodimo ka go raka Diabolo le batemona ba gagwe. Ke Mikaele yo Daniele a mo hlalosago a ‘emetše bana ba setšhaba sa Modimo,’ ge a itokišetša go “tsoga” gore a phethe dikahlolo tša Jehofa tša go loka. (Daniele 12:1, PK; Kutollo 12:7, 9) Kwana ye yeo e ilego ya ikgafa ya Modimo e ile ya ema Thabeng ya Tsione e le Kgoši yeo e lego Mesia, ga e sa le go tloga ka 1914.

3. “Thaba ya Tsione” yeo Kwana le ba 144 000 ba ‘emego’ go yona ke’ng?

³ Go bjalo ka ge Jehofa a ile a bolela e sa le pele gore: “Nna ya-ka Kxoši ke e beile fá Tsione, fá thabeng e kxêthwa ya-ka.” (Psalme 2:6; 110:2) Polelo ye ga e sa hlwa e lebišwa Thabeng ya Tsione ya lefaseng, lona lefelo la kgonthe la Jerusalema ya lefaseng, motse wo dikgoši tša batho tša moloko wa Dafida di bego di buša go wona. (1 Koronika 11:4-7; 2 Koronika 5:2) Aowa, ka gobane Jesu ka morago ga lehu la gagwe le tsogo ya gagwe ka 33 C.E., o ile a hlongwa e le lefsika la motheo Thabeng ya Tsione ya legodimong, e lego lefelo la legodimong moo Jehofa a ikemišeditšego go aga “motse wa Modimo yo a phelago, Jerusalema wa legodimong.” Ka gona, “Thaba ya Tsione” mo e emela boemo bjo bo phagamišitšwego bja Jesu le bajabohwa-gotee le yena bao ba bopago Jerusalema ya legodimong, yeo e lego Mmušo. (Baheberu 12:22, 28; Baefeso 3:6) Ke boemo bja letago bja legodimong bjo Jehofa a ba phagamišetšago go bjona nakong ya letšatši la Morena. Ka nywaga e makgolo Bakriste ba tloditšwego ka ge e le “mafsika a phelago,” ba ile ba lebelela pele e le ka kgonthe gore ba eme Thabeng yeo ya Tsione ya legodimong ba e-na le Morena Jesu Kriste yo a tagafaditšwego a le Mmušong wa gagwe wa letago.—1 Petro 2:4-6; Luka 22:28-30; Johane 14:2, 3.

4. Ba 144 000 ba eme Thabeng ya Tsione ka kwešišo efe?

⁴ Johane ga a bone Jesu feela, eupša le sehlopha se se feletšego sa bajabohwa-gotee le yena ba Mmušo wa legodimong ba 144 000 ba eme Thabeng ya Tsione. Nakong yeo e emelwago ke pono ye, ba bantši ba ba 144 000 ba šetše ba le legodimong, eupša e sego ka moka ga bona. Johane ka morago gona ponong yeo, o botšwa gore ba bangwe ba bakgethwa ba sa dutše ba swanetše go kgotlelela le go hwa ba botagetše. (Kutollo 14:12, 13) Ka fao, go molaleng gore ba bangwe ba ba 144 000 ba sa dutše ba le lefaseng. Ka gona, go tla bjang gore Johane a ba bone ka moka ga bona ba eme le Jesu Thabeng ya Tsione?a Lebaka ke gore ka ge e le ditho tša phuthego ya Bakriste ba tloditšwego, bjale ba “batametše Thaba ya Tsione le motse wa Modimo yo a phelago, Jerusalema wa legodimong.” (Baheberu 12:22) Ka go swana le Paulo nakong ya ge a be a sa dutše a le lefaseng, ka kgopolo ya moya ba šetše ba tsošitšwe gore ba be gotee le Kriste Jesu madulong a legodimong. (Baefeso 2:5, 6) Go oketša moo, ka 1919 ba ile ba amogela taletšo ya gore, “Rotogelang mono” gomme ba “rotogela legodimong ka leru” ka kwešišo ya moya. (Kutollo 11:12) Ka baka la mangwalo a, re ka bona gore ba 144 000 ka moka ga bona ba šetše ba le Thabeng ya Tsione gotee le Jesu Kriste, ge re bolela ka mokgwa wa moya.

5. Ke maina a bomang ao a ngwadilwego diphatleng tša ba 144 000, gomme ke’ng seo se bolelwago ke leina le lengwe le le lengwe?

⁵ Ba 144 000 ga ba kopanele le barapedi ba sebata, bao ba swailwego ka palo ya seswantšhetšo ya 666. (Kutollo 13:15-18) Ka mo go fapanego, babotegi ba ba ngwadilwe leina la Modimo le la Kwana diphatleng tša bona. Johane ka ntle le pelaelo ka ge e be e le Mojuda, o be a bone leina la Modimo le le ka ditlhaka tša Seheberu tša יהוה.b Ka ge ba ngwadilwe leina la Tatago Jesu ka mokgwa wa seswantšhetšo diphatleng tša bona, ba bao ba swailwego ba tsebiša bohle gore ke dihlatse tša Jehofa, bona bahlanka ba Gagwe. (Kutollo 3:12) Go ba ga bona le leina la Jesu le le ngwadilwego diphatleng tša bona, go bontšha gore ba dumela gore ke ba gagwe. Yena ke “monna” wa bona yo a ba beeleditšego, gomme bona ke “monyadiwa” wa gagwe wa ka moso, “sebopiwa se sefsa” seo se hlankelago Modimo se holofetše go hwetša bophelo bja legodimong. (Baefeso 5:22-24; Kutollo 21:2, 9; 2 Bakorinthe 5:17) Tswalano ya bona ya kgaufsi le Jehofa gotee le Jesu Kriste e kgoma dikgopolo tša bona ka moka le ditiro tša bona ka moka.

Go Opela Kopelo Yeo Ekego ke e Mpsha

6. Johane o kwa go opelwa ga eng, gomme o go hlalosa bjang?

⁶ Johane o bega ka go dumelelana le se gore: “Ka kwa modumo o tšwago legodimong o e kego ke modumo wa meetse a mantši le o e kego ke modumo o mogolo wa pula; gomme modumo wo ke o kwelego e be eka ke wa baopedi bao ba opelago ka go sepedišana le harepa ba letša diharepa tša bona. Ba opela seo ekego ke kopelo e mpsha pele ga sedulo sa bogoši le pele ga dibopiwa tše phelago tše nne le bagolo; ga go na motho yo a bego a kgona go opela kopelo yeo, ge e se ba dikete tše lekgolo-masome-nne-nne bao ba rekilwego lefaseng.” (Kutollo 14:2, 3) Ga go makatše ge Johane ka morago ga go kwa mantšu a ba 144 000 ba opela ka modumo o tee, a gopola diphororo tše di dumago le ditladi tše di galalago. A modumo o kgahlišago gakaakang o swanago le wa harepa! (Psalme 81:2) Ke sehlopha sefe lefaseng sa baopedi seo se ka opelago ka bothakga bjo bo swanago le bja sehlopha seo se segolo sa baopedi?

7. (a) Kopelo e mpsha ya Kutollo 14:3 ke’ng? (b) Ke bjang mo kopelo ya Psalme 149:1 e lego e mpsha mehleng ya rena?

⁷ ‘Kopelo e mpsha’ ke’ng? Go etša ge re hlokometše ge re be re bolela ka Kutollo 5:9, 10, kopelo ye e sepedišana le merero ya Mmušo wa Jehofa le tokišetšo ya gagwe e makatšago e dirilwego ka Jesu Kriste, bakeng sa go dira Isiraele ya moya “mmušo le baperisita ba Modimo.” Ke kopelo ya go tumiša Jehofa yeo e phatlalatšago dilo tše difsa tšeo a di dirago ka Isiraele ya Modimo e bile a di direla yona. (Bagalatia 6:16) Ditho tša Isiraele ye ya moya di amogela taletšo ya mopsalme ya gore: “Haleluya! Hlabêlang Morêna sefela se sefsa, thêtô ya xaxwe phuthexong ya baxauxêlwa. A Isiraele a thabêlê Yeo a mo dirilexo, ba Tsione ba xolokê Kxoši ya bôná.” (Psalme 149:1, 2) Ke therešo gore mantšu ao a ngwadilwe makgolong a nywaga a fetilego, eupša a opetšwe mehleng ya rena ka kwešišo e mpsha. Mmušo wa Mesia o ile wa tswalwa ka 1914. (Kutollo 12:10) Batho ba Jehofa lefaseng ba ile ba thoma go tsebatša “lentšu la mmušo” ka 1919, ka phišego e mpshafaditšwego. (Mateo 13:19) Ka go tutuetšwa ke temana ya ngwaga ya 1919 (Jesaya 54:17), le ka go kgothatšwa ke go tsošološetšwa ga bona paradeiseng ya moya, ba ile ba thoma ngwageng wona woo go ‘opelela Jehofa dikopelo dipelong tša bona.’—Baefeso 5:19.

8. Ke ka baka la’ng ge ba 144 000 e le bona feela bao ba kgonago go ithuta kopelo e mpsha ya Kutollo 14:3?

⁸ Ke ka baka la’ng e le feela ba 144 000 bao ba kgonago go ithuta kopelo yeo e bolelwago go Kutollo 14:3? Ke ka gobane e bolela ka diphihlelo tša bona e le bajabohwa ba kgethilwego ba Mmušo wa Modimo. Ke bona ba nnoši bao ba amogetšwego e le barwa ba Modimo, gomme ba tloditšwe ka moya o mokgethwa. Ke bona ba nnoši bao ba rekilwego lefaseng gore e be karolo ya Mmušo woo wa legodimo, gomme ke bona ba nnoši bao e tlago ‘go ba baperisita gomme ba tla buša e le dikgoši’ le Jesu Kriste ka nywaga e sekete gore ba tliše batho phethegong. Ke bona ba nnoši ba bonwago ba “opela seo ekego ke kopelo e mpsha” pele ga Jehofa.c Diphihlelo tše tša moswananoši le dikholofelo tšeo ba nago le tšona di ba nea tebogo e kgolo ya go leboga Mmušo, gomme di ba dira gore ba kgone go opela ka wona ka tsela yeo go sego motho le ge e le ofe yo a kgonago go opela ka gona.—Kutollo 20:6; Bakolose 1:13; 1 Bathesalonika 2:11, 12.

9. Lešaba le legolo le arabetše bjang kopelong ya batlotšwa, gomme ke kgothatšo efe yeo le e phethagaditšego?

⁹ Lega go le bjalo, ba bangwe ba a theetša gomme ba thabela go opela ga bona. Ga e sa le go tloga ka 1935, lešaba le legolo leo le golago la dinku tše dingwe le kwele kopelo ya bona ya phenyo gomme le tutuetšegile go ba tlatša tabeng ya go tsebatša Mmušo wa Modimo. (Johane 10:16; Kutollo 7:9) Ke therešo gore batho ba ba sa tšwago go tlatša babuši ba ba ka se ke ba kgona go ithuta go opela gabotse kopelo yona yeo e mpsha ye babuši ba nako e tlago ba Mmušo wa Modimo ba e opelago. Eupša le bona ba opela kopelo e bose ya go tumiša Jehofa yeo e lego kopelo ya go reta Jehofa ka baka la dilo tše difsa tšeo a di dirago. Ka gona, ba phetha kgothatšo ya mopsalme ya gore: “Hlabêlang Morêna sefela se sefsa, lena mafase ohle! Hlabang sefela sa Morêna. Hlabang sefela sa Morêna, Le rêtê leina la xaxwe, le bexê phološô ya xaxwe ka mehla le mehla. Le anêxêlê ba dithšaba borêna bya xaxwe; le mehlolo ya xaxwe Le e anêxêlê ba dilete tšohle. Hee lena melokô ya batho, lobang Morêna ka dirêtô le ka xore: Matla ké a xaxwe. Le botše ba dithšaba Le re: Kxoši ké Yêna Morêna!”—Psalme 96:1-3, 7, 10; 98:1-9.

10. Go kgonega bjang go ba 144 000 go opela “pele” ga bagolo ba seswantšhetšo ba 24?

¹⁰ Ba 144 000 ba ka opela bjang “pele” ga bagolo, ka ge bagolo ba 24 e le bona ba 144 000 ge ba le madulong a bona a letago a legodimong? Bao ba “hwilego boteeng le Kriste” ba ile ba tsošwa e le dibopiwa tša moya mathomong a letšatši la Morena. Ka gona, Bakriste ba tloditšwego ba botegago bao ba fentšego bjale ba legodimong, gomme ba dira ka mokgwa wa seswantšhetšo mediro yeo e bapišwago le ya dihlopha tše 24 tša bagolo bao e lego baperisita. Ba akaretšwa ponong ya mokgatlo wa Jehofa wa legodimong. (1 Bathesalonika 4:15, 16; 1 Koronika 24:1-18; Kutollo 4:4; 6:11) Ka gona, mašaledi a ba 144 000 ao a sa dutšego a le lefaseng a opela kopelo e mpsha ka pele ga bana babo bona bao ba tsošitšwego ba ba lego legodimong goba mo ba bonwago ke bona.

11. Ke ka baka la’ng bafenyi ba tloditšwego ba bolelwa e le bagolo ba 24 gape e le ba 144 000?

¹¹ Mo gongwe re ka botšiša le ntlheng ye gore: Ke ka baka la’ng ge bafenyi ba ba tloditšwego ba bolelwa e le bagolo ba seswantšhetšo ba 24 e bile e le ba 144 000? Ke ka gobane Kutollo e lebelela sehlopha se ka ditsela tše pedi tše di sa swanego. Bagolo ba 24 ka mehla ba bontšhwa ba le madulong a bona a dikologilego sedulo sa bogoši sa Jehofa, gomme ba beilwe e le dikgoši le baperisita magodimong. Ba swantšhetša sehlopha ka moka sa ba 144 000 madulong a bona a legodimong, gaešita le ge mo nakong ye ba sego kae ba mašaledi ba sa dutše ba le lefaseng. (Kutollo 4:4, 10; 5:5-14; 7:11-13; 11:16-18) Lega go le bjalo, Kutollo kgaolo 7 e bolela ka ba 144 000 e le bao ba ntšhitšwego bathong, gomme e gatelela morero o mogolo wa Jehofa wa go swaya palo e feleletšego ya Baisiraele ba moya, le go phološa lešaba le legolo leo le se nago palo. Kutollo kgaolo 14 e nea seswantšho se se tiišago gore sehlopha se se feleletšego sa Mmušo sa bafenyi ba 144 000, se tla ba gotee le Kwana Thabeng ya Tsione. Ditshwanelego tšeo di swanetšego go fihlelelwa e le gore ba tle ba balwe gotee le ba 144 000 le tšona di tsebišitšwe, go etša ge re tla bona.d

Balatedi ba Kwana

12. (a) Johane o iša pele bjang tlhaloso ya gagwe ka ba 144 000? (b) Ke ka kgopolo efe mo ba 144 000 ba bolelwago e le bao ba hlwekilego?

¹² Johane ge a tšwetša pele tlhaloso ya gagwe ya ba 144 000 bao ba “rekilwego lefaseng,” o re botša gore: “Ba ke bao ba sa kago ba itšhilafatša ka basadi; ge e le gabotse ke ba hlwekilego. Ba ke bao ba latelago Kwana kae le kae mo e yago gona. Ba ba rekilwe gare ga batho ba le bjalo ka dithakangwaga go Modimo le go Kwana, gomme ga se gwa hwetšwa maaka melomong ya bona; ba hloka bosodi.” (Kutollo 14:4, 5) Taba ya gore ba 144 000 “ke bao ba hlwekilego” ga e bolele gore ditho tša sehlopha se ke tšeo ka tlhago di sa kago tša nyala le go nyalwa. Moapostola Paulo o ile a ngwalela Bakriste bao ba bego ba bileditšwe legodimong gore, gaešita le ge go e-na le mehola ka go se nyale le go se nyalwe ga Bakriste, fela lenyalo le be le sa dutše le swanelega tlase ga maemo a itšego. (1 Bakorinthe 7:1, 2, 36, 37) Seo se kgethollago sehlopha se ke bohlweki bja moya. Ba širogile bootswa bja moya le dipolitiki tša lefase gotee le bodumedi bja maaka. (Jakobo 4:4; Kutollo 17:5) Ka ge bona e le monyadiwa yo a beeleditšwego wa Kriste, ba ipolokile ba sekile, e le “ba hlokago sekodi gare ga moloko o kgopamego le o phetlegilego.”—Bafilipi 2:15.

13. Ke ka baka la’ng ba 144 000 e le monyadiwa yo a swanetšego wa Jesu Kriste, gomme ke bjang ba “latelago Kwana kae le kae mo e yago gona”?

¹³ Le gona, “ga se gwa hwetšwa maaka melomong ya bona.” Ba swana le Kgoši ya bona, Jesu Kriste go se. Ka ge e be e le motho yo a phethagetšego, “ga se a ka a dira sebe, le gona bofora ga se bja hwetšwa molomong wa gagwe.” (1 Petro 2:21, 22) Ka go ba bao ba se nago bosodi le bao ba nago le therešo, ba 144 000 ba itokišitše bjalo ka monyadiwa yo a hlwekilego wa Moperisita yo Mogolo kudu wa Jehofa. Nakong ya ge Jesu a be a le lefaseng, o ile a laletša batho ba dipelo tše di lokilego gore ba mo latele. (Mareka 8:34; 10:21; Johane 1:43) Bao ba ilego ba arabela ba ile ba ekiša tsela ya gagwe ya bophelo gomme ba theetša dithuto tša gagwe. Ka gona, nakong ya bophelo bja bona bja lefaseng, ba ‘latela Kwana kae le kae mo e yago gona,’ ge e dutše e ba hlahla ba le lefaseng la Sathane.

14. (a) Ke bjang mo ba 144 000 e lego “dithakangwaga go Modimo le go Kwana”? (b) Ke ka kgopolo efe mo lešaba le legolo le lona e lego dithakangwaga?

¹⁴ Ba 144 000 ba ‘rekilwe lefaseng,’ “ba rekilwe gare ga batho.” Ba amogelwa e le barwa ba Modimo, gomme ka morago ga tsogo ya bona ba ka se ke ba hlwa ba sa ba batho ba nama le madi. Go etša ge go bolelwa Kut 14 temaneng ya 4, ba ba “dithakangwaga go Modimo le go Kwana.” Ke therešo gore morago kua lekgolong la pele la nywaga Jesu e be e le “thakangwaga ya bao ba robetšego lehung.” (1 Bakorinthe 15:20, 23) Eupša ba 144 000 ke “dithakangwaga tše itšego” tša batho bao ba sa phethagalago bao ba rekilwego ka sehlabelo sa Jesu. (Jakobo 1:18) Lega go le bjalo, go kgoboketšwa ga dienywa tše di tšwago bathong ga go felele ka bona. Puku ya Kutollo e šetše e boletše ka go bunwa ga lešaba le legolo leo le sa balegego, leo le bolelago ka lentšu le legolo gore: “Phološo e tšwa go Modimo wa rena yo a dutšego sedulong sa bogoši, le go Kwana.” Lešaba le le legolo le tla phologa masetlapelo a magolo, gomme ge le dutše le lapološwa “methopong ya meetse a bophelo,” le tla išwa phethegong ya batho lefaseng. Ka morago ga masetlapelo Hadese e tla ahlamišwa gomme batho ba bangwe ba dimilione tšeo di sa balegego ba tla tsošwa gomme ba ba le sebaka sa go nwa meetseng ao a bophelo. Go gopotšwe ka se, e tla ba mo go nepagetšego go bitša lešaba le legolo gore ke dithakangwaga tša dinku tše dingwe, ke gore ke bona ba pele ba go ‘hlatswa dikobo tša bona gomme ba di šweufatša mading a Kwana’ ba e-na le kholofelo ya go phela ka mo go sa felego lefaseng.—Kutollo 7:9, 10, 14, 17; 20:12, 13.

15. Ke maemo afe a swanago ao a lego gona magareng ga dithakangwaga tše di sa swanego tše tharo le menyanya e bego e binwa tlase ga Molao wa Moše?

¹⁵ Dithakangwaga tše tše tharo (Jesu Kriste, ba 144 000 le lešaba le legolo) di na le maemo a kgahlišago a swanago le ao a bego a le menyanyeng e bego e binwa go ya ka Molao wa bogologolo wa Moše. Nakong ya Monyanya wa Dinkgwa tše di sa Omelwago ka Nisani 16, ngata ya dithakangwaga tša puno ya garase e be e neelwa go Jehofa. (Lefitiko 23:6-14) Nisani 16 e bile letšatši leo Jesu a ilego a tsošwa ka lona bahung. Baisiraele letšatšing la bo-50 go tloga ka Nisani 16, kgweding ya boraro, ba be ba bina monyanya wa go bunwa ga mabele a pele. (Ekisodo 23:16; Lefitiko 23:15, 16) Monyanya wo o ile wa tla wa bitšwa Pentekoste (e tšwago lentšung la Segerika le le bolelago “ya masome a mahlano”), gomme e bile ka Pentekoste ya 33 C.E. moo ditho tša pele tša ba 144 000 di ilego tša tlotšwa ka moya o mokgethwa. Mafelelong, kgweding ya bošupa ge go feditšwe go kgoboketša puno ka moka, go be go e-ba le Monyanya wa Mešaša, e lego nako ya ditebogo ya ge Baisiraele ba be ba fetša beke ba dutše mešašeng yeo e dirilwego ka makala a melala. (Lefitiko 23:33-43) Ka go dumelelana le se, lešaba le legolo leo e lego karolo ya go kgoboketšwa mo gogolo, le tliša ditebogo pele ga sedulo sa bogoši le swere “makala a mopalema ka diatleng.”—Kutollo 7:9.

Go Bolela Ditaba tše Dibotse tša ka mo go sa Felego

16, 17. (a) Johane o bona morongwa a fofa kae, gomme ke tsebišo efe yeo morongwa a e neago? (b) Ke bomang bao ba akaretšwago modirong wa go bolela ka Mmušo, gomme ke diphihlelo dife tšeo di bontšhago se?

¹⁶ Johane o tšwela pele ka go ngwala gore: “Ka bona morongwa yo mongwe a fofa gare ga legodimo a e-na le ditaba tše dibotse tša ka mo go sa felego gore a di tsebiše e le ditaba tše di thabišago go bao ba dulago lefaseng, le go ditšhaba tšohle le meloko yohle le maleme ohle le batho bohle, a bolela ka lentšu le le hlabošago a re: ‘Boifang Modimo gomme le mo nee letago, gobane nako ya kahlolo ya gagwe e fihlile, ka gona rapelang Yo a dirilego legodimo le lefase le lewatle le methopo ya meetse.’” (Kutollo 14:6, 7) Morongwa yo o fofa “gare ga legodimo” moo dinonyana di fofago gona. (Bapiša le Kutollo 19:17.) Ka gona, lentšu la gagwe le ka kwewa lefaseng ka moka. Mokgoši wo wa go kwala lefaseng ka bophara wa morongwa ke wo o nago le matla gakaakang go feta go gašwa ga ditaba le ge e le gofe ka thelebišene!

¹⁷ Batho bohle ba kgothaletšwa go boifa e sego sebata le seswantšho sa sona, eupša go boifa Jehofa yo e lego yo matla kudu go feta sebata le ge e le sefe sa seswantšhetšo seo se laolwago ke Sathane. Ee, Jehofa o bopile legodimo le lefase, gomme bjale nako e tlile ya gore a ahlole lefase! (Bapiša le Genesi 1:1; Kutollo 11:18.) Jesu nakong ya ge a be a le lefaseng, o ile a porofeta mabapi le mehla ya rena gore: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” (Mateo 24:14) Phuthego ya Bakriste ba tloditšwego e phetha thomo ye. (1 Bakorinthe 9:16; Baefeso 6:15) Kutollo mo e utolla gore barongwa ba ba sa bonagalego le bona ba akareditšwe modirong wo wa boboledi. Ke gantši gakaakang mo tlhahlo ya barongwa e ilego ya bonwa tabeng ya go tliša yo mongwe wa Dihlatse tša Jehofa legaeng leo go lona motho yo a tlaletšwego a bego a nyaka thušo ya moya gaešita le go e rapelela!

18. Go fihlile nako ya eng ka go ya ka morongwa yo a fofago gare ga legodimo, gomme ke bomang bao ba tlago go nea ditsebišo tše dingwe?

¹⁸ Go etša ge morongwa yo a fofago gare ga legodimo a boletše, nako ya kahlolo e fihlile. Ke kahlolo efe yeo Modimo bjale a tlago go e phetha? Ditsebe di tla tsirinywa ke ditsebišo tšeo ga bjale di tlago go dirwa ke morongwa wa bobedi, wa boraro, wa bone le wa bohlano.—Jeremia 19:3.

[Mengwalo ya ka tlase]

[Diswantšho go letlakala 202, 203]

144 000

bagolo ba 24

Bajabohwa-gotee le Kwana, Kriste Jesu ge ba lebelelwa ka ditsela tše pedi tše di sa swanego