Modimo ga a Bebe Sefahlego

“Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.”—DITIRO 10:34, 35.

1. Kua Athene ya bogologolo, ke polelo efe e bohlokwa e boletšwego ke Paulo mabapi le morafo?

“MODIMO yo a dirilego lefase le tšohle tšeo di lego go lona, e lego Morena wa Legodimo gotee le lefase, ga a dule ditempeleng tšeo di dirilwego ke batho. . . . Go tšwa go rakgolo-khukhu o tee o ile a bopa morafo o mongwe le o mongwe wa batho gore ba phele godimo ga lefase ka moka.” (Ditiro 17:24-26, Phillips) Mantšu ao a boletšwe ke mang? A boletšwe ke moapostola wa Mokriste Paulo nakong ya polelo ya gagwe yeo e tsebegago kudu kua Mmotong wa Kahlolo goba Areopagus, wo o lego Athene, Gerika.

2. Ke’ng seo se thušago go dira gore bophelo e be bjo bobotse le bjo bo kgahlišago, gomme ke’ng seo se ilego sa kgahla moeng o mongwe yo a tšwago Japane yo a bego a etetše Afrika Borwa?

² Polelo ya Paulo mo gongwe e ka re dira gore re nagane ka mehuta-huta e makatšago ye e lego gona tlholong. Jehofa Modimo o bopile batho, diphoofolo, dinonyana, dikhunkhwane gotee le dimela tša mehuta e mentši le e fapanego gakaakang. Bophelo e be e tla ba bjo bo lešago bodutu gakaakang ge e ba dilo tše ka moka di be di swana! Go se swane ga tšona go thuša go dira gore bophelo bo be botse le go kgahliša. Ka mohlala, moeng wa go tšwa Japane yo a bego a le gona kopanong ya Dihlatse tša Jehofa Afrika Borwa o ile a kgahlišwa kudu ke ditšhaba le merafo e fapa-fapanego yeo a e bonego fao. O ile a bolela kamoo kua Japane go fapanego ka gona, moo bontši bjo bogolo bja batho e lego bja morafe o tee.

3. Ba bangwe ba lebelela bjang batho ba mmala o šele gomme se se rotoša eng?

³ Eupja go fapa-fapana ga mebala gare ga merafo gantši go baka mathata a magolo. Ba bantši ba lebelela ba mmala o fapanego e le ba nyatšegago. Se se tsoša dikgopi gaešita le lehloyo le kotlo ya kgethollo ya merafo. Na Mmopi wa rena o ile a rera se? Na merafe e mengwe ke yeo e phagamego ka pele ga mahlo a gagwe? Na Jehofa o beba sefahlego sa motho?

Na Mmopi wa Rena o Beba Sefahlego?

4-6. (a) Ke’ng seo kgoši Josafate a ilego a se bolela ka go beba sefahlego? (b) Moše le Paulo ba ile ba tiiša bjang polelo ya Josafate? (c) Ke dipotšišo dife tšeo ba bangwe ba ka di rotošago?

⁴ Re ka kgona go hwetša kgopolo ya Mmopi wa rena ka batho ka moka ge re ka gadima morago historing. Kgoši Josafate yo a ilego a buša Juda go tloga ka 936 go ya go 911 Pele ga Mehla ya Rena, o ile a lokiša dilo tše dintši gomme a rulaganya tshepedišo e botse ya go ahlola yeo e bego e theilwe molaong wa Modimo. O ile a nea baahlodi keletšo ye e botse: “Lebêlêlang se Le se diraxo; xobane xa Le ahlole Lè dirêla batho; Le ahlola Lè dirêla Morêna. . . . Le hlôkômêlê se Le se diraxo; xobane xe Le na le Modimo wa lena, xo ka se kê xwa ba le bokxôpô, le xo beba sefahloxô sa motho.”—2 Koronika 19:6, 7.

⁵ Nywaga e makgolo-kgolo pele ga moo, moporofeta Moše o be a ile a botša meloko ya Isiraele gore: “Morêna Modimo wa lena ké . . . e a sa bebexo sefahloxô.” (Doiteronomio 10:17) Le gona, lengwalong la gagwe leo le yago go ba-Roma, Paulo o lemošitše ka gore: “Motho mang le mang yo e lego modira-bokgopo, go thoma ka mo-Juda le go mo-Gerika, o tla tlelwa ke tlaišego le tlalelo . . . ka gobane Modimo ga a na bao a ba ratago ka mo go kgethegilego.”—Ba-Roma 2:9-11, The New English Bible.

⁶ Eupja mo gongwe ba bangwe ba ka botšiša: ‘Go thwe’ng ka ba-Isiraele? Na e be e se batho bao ba kgethilwego ba Modimo? Na Modimo ga se a ba kgetholla? Na Moše ga a ka a bolela le ba-Isiraele a re: “Morêna Modimo wa xaxo ó Xo kxethile, xore O bê sethšaba-seruiwa sa xaxwe, se a se hlaotšexo dithšabeng tše di lexo lefaseng”?’—Doiteronomio 7:6.

7. (a) Mafelelo e bile afe ge ba-Juda ba gana Mesia? (b) Ke bomang bao lehono ba ka thabelago ditšhegofatšo tše di tšwago go Modimo gomme bjang?

⁷ Aowa, Modimo o be a sa kgetholle ka go diriša ba-Isiraele bakeng sa morero o kgethegilego. Ge a be a kgetha batho bao ka bona a bego a tla tšweletša Mesia, Jehofa o ile a kgetha ditlogolo tša bo-rakgolo-khukhu bao ba botegago ba ba-Hebere. Eupja ge ba-Juda ba be ba gana Mesia Jesu Kriste gomme ba re a bolawe, ba ile ba lahlegelwa ke kamogelo ya Modimo. Lega go le bjalo, lehono batho ba morafo ofe le ofe goba setšhaba bao ba bontšhago tumelo go Jesu ba ka thabela ditšhegofatšo tše di makatšago gomme ba ba le tebelelo ya bophelo bjo bo sa felego. (Johane 3:16; 17:3) Ka kgonthe, se se bontšha gore Modimo ga a na kgethollo. Go feta moo, Jehofa o ile a laela ba-Isiraele gore ba ‘rate modiiledi’ le gore ‘ba se ke ba mo swara gampe’ go sa šetšwe gore ke wa morafo goba setšhaba sefe. (Doiteronomio 10:19; Lefitiko 19:33, 34) Ka gona, ruri Tatawešo e a nago le lerato wa legodimo ga a bebe sefahlego.

8. (a) Ke’ng seo se bontšhago gore Jehofa ga se a ka a bontšha ba-Isiraele lerato le le kgethegilego? (b) Jehofa o ile a diriša ba-Isiraele bjang?

⁸ Ke therešo gore ba-Isiraele ba ile ba thabela ditokelo tše kgethegilego. Eupja gape ba be ba e-na le boikarabelo bjo boima. Ba be ba tlamegile go phetha melao ya Jehofa gomme bao ba bego ba palelwa ke go e-kwa ba be ba tlelwa ke thogako. (Doiteronomio 27:26) Ge e le gabotse, ba-Isiraele ba ile ba otlwa leboelela ka baka la go se kwe Molao wa Modimo. Ka gona, Jehofa ga se a ka a ba bontšha lerato le le kgethegilego. Go e na le moo, o ile a ba diriša bakeng sa go ba mehlala ya boporofeta le ya go nea ditemošo. Ka mo go thabišago, ke ka Isiraele moo Modimo a ilego a tšweletša Molopolodi Jesu Kriste bakeng sa go šegofatša batho ka moka.—Ba-Galatia 3:14; bapiša le Genesi 22:15-18.

Na Jesu o be a Beba Sefahlego?

9. (a) Jehofa le Jesu ba swana bjang? (b) Ke dipotšišo dife tšeo di rotogago mabapi le Jesu?

⁹ Ka ge Jehofa a sa bebe sefahlego, na Jesu o be a ka beba sefahlego? Anke o nagane ka se: Jesu ka nako e nngwe o ile a re: “Xa ke nyake se Nna ke se rataxo, ke nyaka se se ratwaxo ke E a nthomilexo.” (Johane 5:30) Go na le botee bjo bo phethagetšego magareng ga Jehofa le Morwa wa gagwe e a rategago gomme Jesu o dira thato ya Tatagwe dilong ka moka. Ge e le gabotse, ba swana kudu ka kgopolo le morero moo Jesu a bego a ka re: “E a bonexo Nna ó bone Tate.” (Johane 14:9) Ka nywaga e fetago 33, Jesu o ile a ba le phihlelo ya go phela e le motho mo lefaseng gomme Beibele e utolla kamoo a ilego a swara batho ba bangwe ka gona. Kgopolo ya gagwe e be e le efe ka merafo e mengwe? Na o be a e hloile goba a e kgetholla? Na Jesu e be e le yo a ratago morafo wa gabo kudu?

10. (a) Jesu o ile a araba ka go re’ng ge mosadi wa mo-Kanana a kgopela thušo? (b) Ka go lebiša go Ba-ntle e le “dimpyanyana,” na Jesu o be a bontšha lehloyo? (c) Mosadi o ile a fenya go gana ga Jesu bjang gomme ka mafelelo afe?

¹⁰ Jesu o ile a diriša karolo e kgolo ya bophelo bja gagwe bja lefaseng le batho ba ba-Juda. Eupja ka letšatši le lengwe o ile a batamelwa ke mosadi wa mo-Kanana, e lego wa Ba-ntle, gomme a mo rapela gore a fodiše morwedi wa gagwe. Jesu ge a araba o itše: “Xa k’a rongwa xošele xe e se xo dinku tše di lahlexilexo tša moloko wa Isiraele.” Lega go le bjalo, mosadi o ile a mo kgopela: “Morêna, Nthušê!” Ge a e-kwa seo, a oketša: “Xa xo botse xe motho a tšea boxôbê bya bana, a bo lahlêla dimpyanyana.” Go ba-Juda dimpja e be e le diphoofolo tšeo di sa hlwekago. Ka gona, na Jesu o be a bontšha lehloyo ka go šupa Ba-ntle e le “dimpyanyana”? Aowa, ka gobane o be a sa tšwa go bolela ka taelo e kgethegilego ya Modimo go yena ya go hlokomela ‘dinku tšeo di timetšego tša Isiraele.’ Go feta moo, ka go swantšha bao e sego ba-Juda le “dimpyanyana,” e sego diphukubje, Jesu o ile a nolofatša papišo. Ke therešo gore seo a se boletšego se ile sa leka mosadi. Ka boikokobetšo gaešita lege a be a ikemišeditše go fenya go gana moo, o ile a araba ka bohlale ka gore: “Xo byalo, Morêna, xomme dimpyanyana di e di je marathana a waxo majelong a beng ba tšôna.” Jesu a kgahlišitšwe ke tumelo ya mosadi, o ile a fodiša morwedi wa gagwe ka yona nako yeo.—Mateo 15:22-28.

11. Bjalo ka ge go bontšhitšwe tiragalong yeo e akaretšago Jesu, ba-Juda le ba-Samaria ba be ba lebelelana bjang?

¹¹ Gopola gape le ka diphihlelo tša Jesu le ba-Samaria ba bangwe. Go be go e-na le lehloyo le legolo magareng ga ba-Juda le ba-Samaria. Ka nako e nngwe, Jesu o ile roma balata go ya go mo direla ditokišetšo motsaneng o mongwe wa ba-Samaria. Eupja ba-Samaria bao “ba xana xo mo amoxela, ka xobane a lebišitše sefahlexo Jerusalema.” Se se ile sa befediša Jakobo le Johane go fihlela mo ba ilego ba nyaka go laela gore mollo o tšwago legodimong o ba fediše. Eupja Jesu o ile a kgalema barutiwa ba ba babedi gomme ka moka ga bona ba ile ba leba motsaneng o mongwe.—Luka 9:51-56.

12. Ke ka baka la’ng ge mosadi o mongwe wa mo-Samaria a ile a makatšwa ke kgopelo ya Jesu?

¹² Na Jesu o ile a kopanela maikwelong a lehloyo ao a bego a le gona magareng ga ba-Juda le ba-Samaria? Ela hloko seo se ilego sa direga nakong e nngwe. Jesu le barutiwa ba gagwe ba be ba le tseleng ya bona ya go tloga Judea go leba Galilea gomme ba be ba swanelwa ke go phatša Samaria. Jesu ka ge a be a lapile ka baka la leeto, o ile a dula kgaufsi le sediba sa Jakobo gore a khutše ge barutiwa ba gagwe ba sa ile motseng wa Sikara go ya go reka dijo. Nakong yeo, mosadi wa mo-Samaria o ile a tla go ga meetse. Jesu ka noši ka nako e nngwe o be a kile a kgetholla ba-Samaria e le ba “mohuta o šele.” (Luka 17:16-18, The Kingdom Interlinear Translation of the Greek Scriptures) Eupja o ile a re go yena: “Mphê ke nwê.” Ka ge ba-Juda ba be ba sa dirišane le ba-Samaria, mosadi yo a maketšego o ile a araba ka gore: “O re’ng Ò le Mo-Juda wa nkxopêla meetse, kè le mosadi wa Mo-Samaria?”—Johane 4:1-9.

13. (a) Jesu o ile a araba bjang pelaelong ya mosadi wa mo-Samaria gomme mosadi o ile a itshwara bjang? (b) Mafelelong go ile gwa direga’ng?

¹³ Eupja Jesu o ile a hlokomologa go gana ga mosadi. Go e na le seo, o ile a nyaka sebaka sa go mo nea bohlatse gaešita le go mo tsebiša gore ke yena Mesia! (Johane 4:10-26) Mosadi yo a maketšego o ile a tlogela moeta wa gagwe wa meetse sedibeng, a kitimela morago motseng gomme a thoma go botša ba bangwe ka seo se diragetšego. Gaešita lege a be a ile a phela bophelo bjo bo gobogilego, o ile a bontšha kgahlego ya gagwe dilong tša moya ka go bolela gore: “Tlang . . . Le bônê xe e ka se bê Yêna Kriste.” Mafelelo e bile afe? Bontši bja batho ba lefelong leo ba ile ba dumela go Jesu ka baka la bohlatse bjo bobotse bjo mosadi a ilego a bo nea. (Johane 4:27-42) Ka mo go kgahlišago, pukung ya gagwe ye e rego A Biblical Perspective on the Race Problem, moruti wa Phuthego Thomas O. Figart o ile a bolela se: “Ge e ba Morena wa rena a ile a bona e le mo go bohlokwa go tloša mokgwa wa morafo o arogilego ka go bontšha botho, ruri le rena re swanetše go hlokomela gore re se nwelele ka gare ga go rata morafo lehono.”

14. Ke bohlatse bofe bja go se bebe sefahlego ga Jehofa bjo bo iponaditšego nakong ya bodiredi bja moebangedi Filipi?

¹⁴ Go se bebe sefahlego ga Jehofa Modimo go ile gwa dumelela batho ba merafo e fapa-fapanego go ba basokologi ba ba-Juda. Nagana gape le ka seo se ilego sa direga nywageng e makgolo a 19 a fetilego tseleng yeo e lego lešokeng ya magareng ga Jerusalema le Gatsa. Monna o moso yo e bego e le modiredi wa mohumagadi wa Ethopia o be a nametše ka koloing ya gagwe gomme a bala boporofeta bja Jesaya. Letona le e be e le mosokologi e a bolotšego ka gobane “ó be a tlile Jerusalêma xo rapêla.” Morongwa wa Jehofa o ile a tla go moebangedi wa mo-Juda Filipi gomme a mmotša gore: “Batamêla O bapê lê le koloi yeo.” Na Filipi o ile a re: “Aowa hle! Monna yo ke wa morafo o šele”? Le gatee-tee! Filipi o ile a thabela taletšo ya mo-Ethopia ya gore a namele gomme a dule le yena koloing ya gagwe a mo hlalosetše boporofeta bja Jesaya bjoo bo lego mabapi le Jesu Kriste! Ge ba fihla moo go nago le meetse, mo-Ethopia a botšiša: “Ke sa dibya ke’ng xo kolobetšwa?” Ka ge go be go se na se se šitišago se, Filipi o ile a kolobetša mo-Ethopia ka lethabo gomme Jehofa o ile a amogela monna yo yo a thabilego bjalo ka molatedi yo a tloditšwego wa Morwa wa Gagwe Jesu Kriste. (Ditiro 8:26-39) Eupja bohlatse bjo bo oketšegilego bja go se hlaole ga Modimo kapejana bo ile bja bonala.

Phetogo e Kgolo

15. Ke phetogo efe yeo e ilego ya direga ka morago ga lehu la Jesu gomme Paulo o e hlalosa bjang?

¹⁵ Go hwa ga Kriste ga se gwa tloša kgethollo ya morafo ya lefase. Eupja ka lehu leo la sehlabelo, Modimo o ile a fetola tswalano ya barutiwa ba Jesu ba ba-Juda le balatedi ba Jesu ba Ba-ntle. Moapostola Paulo o ile a bontšha se ge a be a ngwalela Bakriste ba Ba-ntle kua Efeso gomme a re: “Le se kê la lebala xore ka nama Le be Le le ba-ntlê kxalê . . . xore lebakeng leo Le be Le se na Kriste; Le be Le se ba mmušô wa Isiraele; Le be Le se ba dikxwêranô tša dikholofedišô; Le be Le phela lefaseng Lè se na kholofêlô, Lè se na Modimo. Byale lena ba Le bexo Le le kxolê, Le batameditšwe ka Kriste Jesu, ka madi a Kriste. Ké Yêna Mokhutšiši wa lena; ba e bexo e le ba babedi, ó ba dirile batee, a phušôla lebôtô le le bexo le thibile.” “Lebôtô” leo goba seka sa karogano, e be e le thulaganyo ya kgwerano ya Molao yeo e bego e dira bjalo ka legora magareng ga ba-Juda le Ba-ntle. E ile ya fedišwa motheong wa lehu la Kriste gore ka yena ba-Juda gotee le Ba-ntle ba ka kgona go “batamêla Tata-wešo ka Môya o tee.”—Ba-Efeso 2:11-18.

16. (a) Ke ka baka la’ng Petro a ile a newa dikgonyu tša Mmušo? (b) E be e le dikgonyu tše kae gomme go di diriša go ile gwa feleletša ka’ng?

¹⁶ Go feta moo, moapostola Petro o ile a newa “dikxonyu tša mmušô wa maxodimo” gore batho ba morafo lege e le ofe ba ka kgona go ithuta ka merero ya Modimo, ba ‘tswalwe lefsa’ ka moya o mokgethwa le go ba majabohwa a moya le Kriste. (Mateo 16:19; Johane 3:1-8) Petro o ile a diriša dikgonyu tše tharo tša seswantšhetšo. Sa pele e be e le sa ba-Juda, sa bobedi e le sa ba-Samaria gomme sa boraro e le sa Ba-ntle. (Ditiro 2:14-42; 8:14-17; 10:24-28, 42-48) Ka gona Modimo yo a sa bebego sefahlego, e lego Jehofa, o ile a bulela bao ba kgethilwego ba merafo ka moka sebaka sa go ba banababo Jesu ba moya le majabohwa gotee le yena a Mmušo.—Ba-Roma 8:16, 17; 1 Petro 2:9, 10.

17. (a) Ke pono efe e sego ya tlwaelega yeo e ilego ya newa Petro gomme ka baka la’ng? (b) Banna ba bangwe ba ile ba iša Petro lapeng la mang gomme ke bomang bao ba bego ba mo letetše fao? (c) Petro o ile a gopotša Ba-ntle bao ka eng gomme ke’ng seo Modimo a bego a mo rutile sona ka go kwala?

¹⁷ Bakeng sa go lokišeletša Petro gore a tle a diriše sekgonyu sa boraro bakeng sa Ba-ntle, o ile a newa pono ye e makatšago ya diphoofolo tše di sa hlwekago gomme a botšwa gore: “Petro, tsoxa O hlabê O jê!” Thuto e be e le gore: “Tše Modimo a di hlatswitšexo O se kê wa re di na le dithšila.” (Ditiro 10:9-16) Petro o be a makaditšwe kudu ke gore pono e bolela’ng. Eupja kapejana go ile gwa goroga banna ba bararo bao ba bego ba tlile go mo tšea le go mo iša lapeng la Koronelio letona la bahlabani la mo-Roma leo le dulago Kesarea. Ka ge motse woo e be e le wona lefelo le legolo la madira a ba-Roma kua Judea, e bile lona lefelo leo Koronelio a bego a e-na le ngwako go lona. Lefelong leo la Ba-ntle, Petro o be a letetšwe ke Koronelio a e-na le metswalo ya gagwe gotee le bagwera ba gagwe ba pelo-bohloko. Moapostola o ile a ba gopotša: “Le a tseba; monna wa Mo-Juda xa xo a mo swanêla xe a ka kôpana le motho wa mohuta o šele, le xo tla xa xaxwe. Xe e le nna, Modimo ó nthšupeditše xore ke se kê ka re: xo ya xo motho e mongwê xo a ila, ke se kê ka re ké wa dithšila. Ké xôna ke tlilexo; ka se kê ka xana xe ke bitšwa.”—Ditiro 10:17-29.

18. (a) Ke tsebišo efe e kgolo yeo Petro a ilego a e dira go Koronelio le baeng ba gagwe? (b) Ka morago ga gore Petro a nee bohlatse mabapi le Jesu, ke tiragalo efe e kgolo yeo e ilego ya direga? (c) Go ile gwa gatwa mogato ofe mabapi le Ba-ntle bao ba amogetšwego?

¹⁸ Ka morago ga gore Koronelio a hlalose kamoo Modimo a ilego a sepediša ditaba ka gona, Petro o ile a re: “Ka kxonthe, ke lemoxa xore Modimo xa a bebe motho. Anthe dithšabeng ka moka ó kxahlwa ke ba ba mmoifaxo, xe ba dira tše di lokilexo.” (Ditiro 10:30-35) Ge moapostola a tšwela pele ka go nea bohlatse mabapi le Jesu Kriste, go ile gwa direga selo se sengwe se segolo! “Ya re Petro à sa bolêla ditaba tšé, Môya-mokxêthwa wa tla xodimo xa bohle ba ba bexo ba theetša Lentšu leo.” Bagwera ba Petro ba ba-Juda “ba tlabêxa xe neô ya Môya-mokxêthwa e thšêlwa le ba-ntlê. Xobane ba be ba e-kwa xe ba bolêla ka maleme a šele, bà xodiša Modimo.” Petro a araba ka gore: “Ké mang a kaxo diba meetse a xo kolobetša batho bá, xe ba filwe Môya-mokxêthwa bo-ka rena?” Ke mang yo a bego a ka belaela ka ge moya o mokgwethwa wa Modimo wa legodimo yo a sa bebego sefahlego o be o tšholletšwe go Ba-ntle bao ba dumetšego? Ka gona Petro o ile a laela gore “ba kolobetšwe Leineng la Morena.”—Ditiro 10:36-48.

“Bao ba Tšwago Sethšabeng se Sengwe le se Sengwe”

19. Ke ka baka la’ng lehloyo la merafo le gola gomme le fihla bokgoleng bofe?

¹⁹ Gona bjale re ikhwetša re le “mehleng ya bofêlô” gomme “mabaka a mathata” ka kgonthe ke ao a lego gona. Gare ga dilo tše dingwe, batho ke ba go ithata, ba lenyatšo, le baikgogomoši, ba se nago lerato, ba go se botege, ba go hloka boitshwaro, ba bogale, ba manganga le ba go ikgantšha. (2 Timotheo 3:1-5) Ka baka la maemo a bjalo setšhabeng, ga go makatše ge go hloyana ga merafo le diphapano di gola lefaseng ka bophara. Dinageng tše dintši, batho ba merafo le mebala e fapa-fapanego ba a nyatšana le go hloyana. Se se ile sa baka dintwa gaešita le bošoro bjo bogolo dinageng tše dingwe. Gaešita le dinageng tše go thwego ke tše di hlabologilego, batho ba bantši ba na le mathata a go ka fenya lehloyo la morafo. “Bolwetši” bjo bo bonala bo kekela le mafelong ao motho a bego a ka se bo letele go wona, go etša dihlakahlakeng tša lewatle tšeo ka nako e nngwe di ilego tša ba khutšong e kgolo.

20. (a) Johane o bone pono efe e buduletšwego? (b) Pono ye ya boporofeta e phethagaditšwe go fihla bokgoleng bofe? (c) Ke bothata bofe bjo ba bangwe ba sa swanetšego go bo fenya ka mo go feletšego gomme ba swanetše go nyaka tharollo kae?

²⁰ Lega go le bjalo, go sa šetšwe go hlaelela ga kwano magareng ga merafo dikarolong tše di fapa-fapanego tša lefase, Modimo yo a sa bebego sefahlego, e lego Jehofa, o tsebišitše e sa le pele ka go tlišwa ga batho ba dipelo tše di botegago ba merafo le ditšhaba ka moka boteeng bjo bo lemogegago bja lefase ka moka. Ka go budulelwa ke Modimo, moapostola Johane o ile a bona “palo e kgolo kudu ya batho bao go sa kgonegego go ba bala bao ba tšwago setšhabeng se sengwe le se sengwe, morafo, moloko le leleme le lengwe le le lengwe; ba be ba eme ka pele ga sedulo sa bogoši le pele ga Kwana,” ba reta Jehofa. (Kutollo 7:9, The Jerusalem Bible) Boporofeta bjo bo gare bo a phethega. Lehono, Dihlatse tša Jehofa tše fetago 3 300 000 tša ditšhaba ka moka le merafo dinageng tše 210 ba thabela botee le go kwana ga merafo. Eupja e sa dutše e le ba sa phethegago. Ba bangwe ba bona ba sa na le bothata bja go ka fenya ka mo go feletšego lehloyo la morafo, gaešita lege ba ka ba ba sa hlokomele seo. Bothata bjo bo ka fenywa bjang? Re tla boledišana ka taba ye sehlogong se se latelago seo se theilwego keletšong e holago ya Lentšu le le buduletšwego la Modimo yo a sa bebego sefahlego, Jehofa.

O ka Araba Bjang?

◻ Ke ka baka la’ng go ka bolelwa gore Jehofa o be a sa kgetholle ka go diriša ba-Isiraele?

◻ Ke bohlatse bofe bjo bo lego gona bja gore Jesu Kriste o be a se na lehloyo la morafo goba kgethollo?

◻ Petro o ile a thušwa bjang gore a bone gore “Modimo xa a bebe motho”?

◻ Go sa šetšwe go hlaelela ga kwano magareng ga merafo lefaseng le, ke boporofeta bofe bjo bo bolelago ka botee bjo bo phethegago mo nakong ye?

[Seswantšho go letlakala 10]

Moapostola Paulo o ile a botša batho ba Athene gore Modimo “o ile a bopa morafo o mongwe le o mongwe wa batho gore o phele godimo ga lefase ka moka”

[Seswantšho go letlakala 12]

Ka ge Jesu a be a sa bebe sefahlego, o ile a nea bohlatse go mosadi wa mo-Samaria sedibeng sa Jakobo kgaufsi le Sikara