Lešaba le Legolo Leo le Neelago Tirelo e Kgethwa

“Ba Mo hlankêla [“tirelo e kgethwa,” NW] mosexare le bošexo bà le Ntlong e kxêthwa ya xaxwe.”—KUTOLLO 7:15.

1. Ke tiragalo efe e bohlokwa ya kwešišo ya moya yeo e ilego ya fihlelelwa ka 1935?

KA May 31, 1935, go ile gwa ba le lethabo le legolo gare ga bao ba bego ba tlile kopanong ya Dihlatse tša Jehofa kua Washington, D.C. Moo ka lekga la mathomo, lešaba le legolo la Kutollo 7:9 le ile la hlaolwa ka mo go kwagalago ka go dumelelana le Beibele ka moka ga yona le ka go dumelelana le ditiragalo tšeo di bego di šetše di thomile go tšwelela.

2. Ke’ng seo se bontšhitšego gore palo e oketšegago e ile ya lemoga gore Modimo o be a se a ba biletša bophelong bja legodimong?

² Mo e ka bago dibeke tše tshelelago pele ga moo, monyanyeng wa Selalelo sa Morena diphuthegong tša Dihlatse tša Jehofa, ba 10 681 ba bao ba bego ba le gona (mo e ka bago o tee go ba tshelelago) ga se a ja senkgwa le beine tša diswantšhetšo, gomme ba 3 688 ba ba e be e le bagoeledi ba mafolofolo ba Mmušo wa Modimo. Ke ka baka la’ng ba ile ba efoga go ja diswantšhetšo? Ka gobane motheong wa seo ba bego ba ithutile sona go tšwa Beibeleng, ba ile ba lemoga gore Modimo o be a se a ba biletša bophelong bja legodimong eupša gore ba be ba ka ba le karolo ditokišetšong tše lerato tša Jehofa ka tsela e nngwe. Ka gona, kopanong yeo ge seboledi se be se kgopela gore: “Anke bohle bao ba nago le kholofelo ya go phela ka mo go sa felego lefaseng ba eme,” go ile gwa direga’ng? Ba dikete-kete ba ile ba ema, gwa latela legoa la batheetši leo le swareletšego nako e telele.

3. Ke ka baka la’ng go hlaolwa ga lešaba le legolo go ile gwa nea matla a mafsa bodireding bja tšhemo, gomme Dihlatse di ile tša ikwa bjang ka se?

³ Seo ba-tla-kopanong ba ithutilego sona kopanong yeo se ile sa ba nea tutuetšo e mpsha bodireding bja bona. Ba ile ba thoma go lemoga gore gona bjale, pele ga bofelo bja tshepedišo ya kgale, e be e se feela ba dikete tše sego kae eupša e be le lešaba le legolo la batho leo le bego le tla neelwa sebaka sa go tla ka gare ga thulaganyo ya Jehofa ya go phološa bophelo, ka tebelelo ya go phela ka mo go sa felego lefaseng la paradeise. Woo e be e le molaetša o ruthetšago pelo gakaakang go barati ba therešo! Dihlatse tša Jehofa di ile tša lemoga gore go be go e-na le modiro o mogolo wo o bego o swanetše go dirwa—modiro o thabišago. Nywaga ka morago, John Booth, yo a ilego a ba setho sa Sehlopha se Bušago, o ile a elelelwa gore: “Kopano yeo e ile ya re nea go gontši mo re ka go thabelago.”

4. (a) Go kgoboketšwa ga lešaba le legolo go be go šetše go fihlile bokgoleng bofe go tloga ka 1935? (b) Ba lešaba le legolo ba hlatsela ka tsela efe gore tumelo ya bona ke e phelago?

⁴ Nywageng yeo e latetšego, palo ya Dihlatse tša Jehofa e ile ya oketšega o šoro. Go sa šetšwe tlaišo yeo gantši e bego e le e šoro kudu yeo e bego e ba wela nakong ya Ntwa ya II ya Lefase, fela dipalo tša bona di ile tša oketšega gararo lebakeng la ngwaga-some. Le gona bagoeledi ba 56 153 bao ba bego ba nea bohlatse phatlalatša ka 1935 ba ile ba oketšega ka 1994 go ya ka godimo ga bagoeledi ba Mmušo ba 4 900 000 bao ba hwetšwago dinageng tše fetago 230. Bontši bja ba bo lebeletše pele ka phišego tabeng ya go akaretšwa gare ga bao Jehofa a ba gaugelago ka bophelo bjo bo phethagetšego lefaseng la paradeise. Ge ba bapišwa le mohlatswana o monyenyane, ruri ba fetogile lešaba le legolo. Ga se batho bao ba rego ba na le tumelo eupša ba sa e bontšhe. (Jakobo 1:22; 2:14-17) Ka moka ga bona ba abelana le ba bangwe ditaba tše di lokilego ka Mmušo wa Modimo. Na o yo mongwe wa lešaba leo le le thabilego? Go ba Hlatse e mafolofolo ke seka se bohlokwa se hlaolago, eupša go akaretšwa go gontši.

“Bà Eme Pele xa Sedulô sa Boxoši”

5. Ke’ng seo se bontšhwago ke therešo ya gore lešaba le legolo le “pele xa sedulô sa boxoši”?

⁵ Ponong yeo e neilwego moapostola Johane, o ba bone “bà eme pele xa sedulô sa boxoši sa Kwana.” (Kutollo 7:9) Go ema ga bona pele ga sedulo sa bogoši sa Modimo, bjalo ka ge go hlaloswa mokong wo wa taba, go bontšha gore ba nea bogoši bja Jehofa tlhompho e feletšego. Se se akaretša go gontši. Ka mohlala: (1) Ba amogela tshwanelo ya Jehofa ya go kgethela bahlanka ba gagwe se se lokilego le se sebe. (Genesi 2:16, 17; Jesaya 5:20, 21) (2) Ba theetša Jehofa ge a bolela le bona ka Lentšu la gagwe. (Doiteronomio 6:1-3; 2 Petro 1:19-21) (3) Ba lemoga bohlokwa bja go ikokobeletša bao Jehofa a ba gafetšego boikarabelo bja bolebeledi. (1 Ba-Korinthe 11:3; Ba-Efeso 5:22, 23; 6:1-3; Ba-Hebere 13:17) (4) Gaešita le ge ba se ba phethagala, ba katana ka matla gore ba amogele tlhahlo ya pušo ya Modimo, e sego ka go ngunanguna, eupša ka go ikemišetša le ka go tšwa pelong. (Diema 3:1; Jakobo 3:17, 18) Ba pele ga sedulo sa bogoši bakeng sa go nea Jehofa tirelo e kgethwa, yo ba mo hlomphago ka mo go tseneletšego le go mo rata kudu. Ge e le ka lešaba le legolo, go ‘ema’ ga lona pele ga sedulo sa bogoši go bontšha kamogelo ya Yo a dutšego sedulong sa bogoši. (Bapiša le Kutollo 6:16, 17.) Kamogelo e theilwe go eng?

“Bà Apere ’Kobô tše Dithšweu”

6. (a) Ke’ng seo se bolelwago ke gore lešaba le legolo “le apere ’kobô tše dithšweu”? (b) Lešaba le legolo le amogela boemo bja go loka bjang pele ga Jehofa? (c) Go ba le tumelo mading a tšholotšwego a Kriste go tutuetša maphelo a batho go fihla bokgoleng bofe?

⁶ Tlhaloso ya moapostola Johane ya seo a se bonego e bolela gore ditho tša lešaba le legolo di “apere ’kobô tše dithšweu.” Dikobo tšeo tše ditšhweu di swantšhetša boemo bja bona bja go hlweka le go loka pele ga Jehofa. Ba hweditše bjang boemo bjo bjalo? Re šetše re hlokometše gore ponong ya Johane ba be ba ‘eme pele ga Kwana.’ Ba amogela Jesu Kriste e le “Kwana ya Modimo e rwelexo sebe sa lefase.” (Johane 1:29) Ponong Johane o ile a kwa yo mongwe wa bagolo yo a bego a le gona sedulong sa bogoši sa Modimo a hlalosa gore: “Ba hlatswitše mašela a bôná ba a taxafatša mading a Kwana. Ké xôna ba lexo pele xa sedulô sa boxoši sa Modimo.” (Kutollo 7:14, 15) Ka tsela ya seswantšhetšo ba hlatswitše dikobo tša bona ka go bontšha tumelo mading a Kriste a lopollago. Ga ba fo dumela ka tlhaologanyo thutong ya Beibele ya mabapi le topollo. Go e leboga go kgoma motho yo ba lego yena ka gare; ka go rialo ba bontšha tumelo “ka pelo.” (Ba-Roma 10:9, 10) Se se na le mafelelo ao a išago kgole go seo ba se dirago ka maphelo a bona. Ka tumelo ba ineela go Jehofa motheong wa sehlabelo sa Kriste, ba bontšha boineelo bjoo ka kolobetšo ya meetseng, ba phela e le ka kgonthe ka go dumelelana le boineelo bja bona, gomme ka go rialo ba thoma go thabela tswalano ya go amogelwa ke Modimo. A tokelo e botse gakaakang—e lego yeo e swanetšego go hlokomelwa!—2 Ba-Korinthe 5:14, 15.

7, 8. Mokgatlo wa Jehofa o thušitše bjang lešaba le legolo gore le dire gore dikobo tša lona di dule di se tša šilafala?

⁷ Ka go kgomega mo go lerato bakeng sa katlego ya bona ya ka mo go sa felego, mokgatlo wa Jehofa o ile wa šupa leboelela boitshwaro le boemo bja kgopolo bjoo bo ka šilafatšago dikobo tša motho tše di mo hlaolago, go sa šetšwe boipolelo bja ka ntle, motho ruri a ka se swanele tlhaloso ya boporofeta yeo e lego go Kutollo 7:9, 10. (1 Petro 1:15, 16) Go tiiša seo se boletšwego pejana, The Watchtower ka 1941 le ka morago ga moo, e ile ya bontšha leboelela gore e tla ba mo go tlogago go sa swanela go bolela go ba bangwe, gomme dinakong tša ge re se bodireding, ra kopanela boitshwarong bjo bjalo ka bootswa goba bohlotlolo. (1 Ba-Thesalonika 4:3; Ba-Hebere 13:4) Ka 1947 go ile gwa gatelelwa gore ditekanyetšo tša Jehofa tša manyalo a Bakriste di šoma dinageng ka moka; go sa šetšwe seo meetlo ya lefelong leo e se amogelago, bohle bao ba ilego ba tšwela pele ba nyala segadikane e be e ka se be Dihlatse tša Jehofa.—Mateo 19:4-6; Tito 1:5, 6.

⁸ Ka 1973, Dihlatse tša Jehofa lefaseng ka bophara di ile tša bontšhwa gore di swanetše go efoga selo le ge e le sefe seo se lego mabapi le mekgwa yeo ka mo go sa ganetšegego e lego e šilafatšago e bjalo ka go diriša motšoko gampe, go sa šetšwe moo ba ka bago ba le gona—e sego feela Holong ya Mmušo goba tirelong ya tšhemo eupša gape le modirong wa boiphedišo goba mafelong a ka thopeng moo ba sa bonwego ke batho. (2 Ba-Korinthe 7:1) Ka 1987 dikopanong tša selete tša Dihlatse tša Jehofa, bafsa ba Bakriste ba ile ba eletšwa ka matla gore, e le gore ba dule ba le boemong bjo bo hlwekilego pele ga Modimo, ba swanetše go itiša malebana le go phela maphelo a mabedi. (Psalme 26:1, 4) Morokami o ile wa eletša leboelela malebana le dibopego tše fapa-fapanego tša moya wa lefase ka gobane “borapedi byo Modimo Tata-wešo a bônaxo bò se na thšila le senyalô” bo akaretša ‘go itota gore lefase le se go šilafatše.’—Jakobo 1:27.

9. Ke bomang bao ruri ba tlago go ema e le ba amogetšwego pele ga sedulo sa bogoši sa Modimo ka morago ga masetla-pelo a magolo?

⁹ Ke bao tumelo ya bona e ba tutueletšago gore ba phele ka tsela ya gore ba dule ba hlwekile moyeng le boitshwarong bao ba tlago go ba ba “eme pele xa sedulô sa boxoši” e le bahlanka ba amogetšwego ba Modimo ka morago ga masetla-pelo a magolo ao a tlago. Ba ke batho bao ba sa thomego feela go phela bophelo bja Bokriste, eupša ba phegelela go bjona ka potego.—Ba-Efeso 4:24.

“Bà Swere Mahlare a Molala ka Diatla tša Bôná”

10. Mahlare a molala ao Johane a a bonego ka diatleng tša lešaba le legolo a bolela’ng?

¹⁰ Gare ga dibopego tše di kgethegilego tša lešaba le legolo, bjalo ka ge le bonwe ke moapostola Johane, ke gore “bà swere mahlare a molala ka diatla tša bôná.” Seo se bolela’ng? Ga go pelaelo gore mahlare ao a molala a gopotša Johane monyanya wa ba-Juda wa mešaša, e lego monyanya o thabišago kudu almanakeng ya Sehebere, woo o swarwago ka morago ga puno ya selemo. Ka go dumelelana le Molao, mahlare a molala gotee le makala a dihlare tše dingwe, a be a dirišetšwa go dira mešaša yeo go bego go dulwa ka go yona nakong ya monyanya. (Lefitiko 23:39-40; Nehemia 8:14-18) A be a bile a tšokotšwa ke barapedi tempeleng nakong ya go opelwa ga Hallel (Psalme 113-118). Go tšokotšwa ga mahlare a molala ke lešaba le legolo mohlomongwe le gona go gopotša Johane lebaka la ge Jesu a be a kata a lebile Jerusalema mola lešaba la barapedi le be le tšokotša mahlare a molala ka lethabo le go goeletša ka gore: “Hosiana, xo rêtwê e a tlaxo ka Leina la Morêna, Kxoši ya Isiraele.” (Johane 12:12, 13) Go tšokotšwa ga mahlare a molala go bontšha gore lešaba le legolo le tumiša Mmušo wa Jehofa ka lethabo gotee le Kgoši ya gagwe e tloditšwego.

11. Ke ka baka la’ng bahlanka ba Modimo ba hwetša lethabo e le ka kgonthe go hlankeleng Jehofa?

¹¹ Ke moya o bjalo wa lethabo woo lešaba le legolo le o bonagatšago gaešita le mo nakong ye ge le dutše le hlankela Jehofa. Se ga se bolele gore ga le lebeletšane le mathata le ge e le afe goba gore ga le welwe ke manyami goba bohloko. Eupša kgotsofalo yeo e tlišwago ke go hlankela le go kgahliša Jehofa e thuša go leka-lekanya dilo tšeo. Ka go rialo, moromiwa yo a ilego a hlankela le monna wa gagwe ka nywaga e 45 kua Guatemala o ile a laodiša ka maemo ao a sa hlabologago ao a bego a ba dikologile, modiro o thata le mokgwa wa go sepela o thata tšeo e bego e le karolo ya bophelo ge ba be ba katanela go fihlelela metsana ya segae ya ma-India ka molaetša wa Mmušo. O ile a phetha ka gore: “E ile ya ba nako ya bophelo bja rena yeo ka yona re bego re thabile kudu.” Gaešita le ge a be a e-kwa ditla-morago tša botšofadi le bolwetši, fela gare ga dilo tša mafelelo tšeo a ilego a di ngwala ka pukutšatšing ya gagwe e bile mantšu a: “E bile bophelo bjo bobotse le bjo bo putsago kudu.” Lefaseng ka bophara Dihlatse tša Jehofa di ikwa ka mo go swanago ka bodiredi bja tšona.

“Tirelo e Kgethwa Mosegare le Bošego”

12. Go sa šetšwe gore ke mosegare goba ke bošego, ke’ng seo Jehofa a se hlokomelago mo lefaseng?

¹² Barapedi ba ba thabilego ba neela Jehofa “tirelo e kgethwa mosegare le bošego tempeleng ya gagwe.” (Kutollo 7:15, NW) Go dikologa lefase, ba dimilione ba ba le karolo tirelong ye e kgethwa. Ge e le nako ya bošego dinageng tše dingwe, gomme batho ba robetše moo, dinageng tše dingwe letšatši le hlabile gomme Dihlatse tša Jehofa di swaregile ka go nea bohlatse. Ge lefase le dutše le dikologa ka mo go tšwelago pele, mosegare le bošego di opela ditumišo tša Jehofa. (Psalme 86:9) Eupša tirelo e kgethwa ya mosegare le bošego yeo go bolelwago ka yona go Kutollo 7:15 ke yeo e tlogago e le ya motho ka noši kudu.

13. Mangwalo a bontšha bjang seo se bolelwago ke go hlankela “mosegare le bošego”?

¹³ Batho ka o tee ka o tee bao ba bopago lešaba le legolo ba neela tirelo e kgethwa mosegare le bošego. Na se se bolela gore se sengwe le se sengwe seo ba se dirago se lebelelwa e le tirelo e kgethwa? Ke therešo gore go sa šetšwe selo le ge e le sefe seo ba se dirago, ba ithuta go se dira ka tsela yeo e godišago Jehofa. (1 Ba-Korinthe 10:31; Ba-Kolose 3:23) Lega go le bjalo, “tirelo e kgethwa” e šoma feela go seo se kgomago ka go lebanya borapedi bja motho go Modimo. Go kopanela modirong “mosegare le bošego” go bolela go ba ka mehla goba go tsepama gotee le maiteko a tseneletšego.—Bapiša le Jošua 1:8; Luka 2:37; Ditiro 20:31; 2 Ba-Thesalonika 3:8.

14. Ke’ng seo se tlago go dira gore tirelo ya rena ya tšhemo ya motho ka noši e swanele tlhaloso ya tirelo ya “mosegare le bošego”?

¹⁴ Ge ba dutše ba hlankela lapeng la lefaseng la tempele e kgolo ya Jehofa ya moya, bao ba bopago lešaba le legolo ba katanela go ba le karolo ka mehla le ka mo go tsepamego bodireding bja tšhemo. Ba bantši ba go dirile pakane ya bona go ba le karolo bodireding bja tšhemo beke le beke. Ba bangwe ba ikgafa bjalo ka babulamadibogo ba ka mehla goba babulamadibogo ba go thuša. Gantši ba ba swaregile ka go nea bohlatse ditarateng le mabenkeleng e sa le mesong. E le gore di amogele batho ba thabelago, Dihlatse tše dingwe di swara dithuto tša Beibele bošego-gare. Di nea bohlatse ge di le mabenkeleng, ge di le maetong, dinakong tša dijo tša mosegare le ka mogala.

15. Ka ntle le bodiredi bja tšhemo, ke’ng seo se akaretšwago tirelong ya rena e kgethwa?

¹⁵ Go ba le karolo dibokeng tša phuthego le gona ke karolo ya tirelo ya rena e kgethwa; go bjalo le ka modiro wo o akaretšago go aga le go hlokomela mafelo a dikopano tša Bokriste. Maiteko ao a dirwago bakeng sa go kgothatša le go thuša banababo motho le dikgaetšedi ba Bakriste moyeng le ka dilo tše di bonagalago gore ba tšwele pele ba phela tirelong ya Jehofa le ona a a akaretšwa. Se se akaretša modiro wa Dikomiti tša rena tša go Dira Kwano le Dipetlele. Tirelo ya Bethele dibopegong tša yona ka moka tše di fapa-fapanego gotee le tirelo ya go ithapa dikopanong tša rena ka moka ke tirelo e kgethwa. Ka kgonthe ge maphelo a rena a dikologa tswalanong ya rena le Jehofa, gona a tletše ka tirelo e kgethwa. Go etša ge lengwalo le bolela, batho ba Jehofa ba neela “tirelo e kgethwa mosegare le bošego,” gomme ba hwetša lethabo le legolo ge ba dira bjalo.—Ditiro 20:35; 1 Timotheo 1:11.

‘Go tšwa Ditšhabeng ka Moka, Melokong ka Moka, Merafong ka Moka le Malemeng ka Moka’

16. Go ipontšha bjang e le therešo gore lešaba le legolo le tšwa ‘ditšhabeng ka moka’?

¹⁶ Ba lešaba le legolo ba tšwa ditšhabeng ka moka. Modimo ga a bebe sefahlego, gomme tokišetšo ya topollo yeo e dirilwego ka Jesu Kriste ke e lekanego go ka ba hola ka moka ga bona. Ge lešaba le legolo le be le thoma go hlaolwa ka Mangwalo ka 1935, Dihlatse tša Jehofa di be di le mafolofolo dinageng tše 115. Ka bo-1990 lesolo la go tsoma batho ba swanago le dinku le fihleletše dinaga tše di fetago tšeo ka makga a fetago gabedi.—Mareka 13:10.

17. Ke’ng seo se dirwago bakeng sa go thuša batho ba ‘ditšhaba ka moka, meloko ka moka le maleme ka moka’ gore ba akaretšwe lešabeng le legolo?

¹⁷ Ka go tsoma bao e ka bago ditho tša nakong e tlago tša lešaba le legolo, Dihlatse tša Jehofa ga se tša lebiša tlhokomelo feela go dihlopha tša ditšhaba, eupša gape le go dihlopha tša merafo le meloko le maleme gare ga ditšhaba tšeo. E le gore di fihlelele batho ba, Dihlatse di gatiša dipuku tša Beibele ka maleme a fetago 300. Se se akaretša go tlwaetša le go dira gore go dule go e-na le dihlopha tša bafetoledi ba swanelegago le go tšweletša ditlabelo tša di-computer tšeo di kgonago go šoma ka maleme a ka moka gotee le go gatiša ga kgonthe. Nywageng e mehlano feela e fetilego, maleme a 36, ao a bolelwago ke batho ba e ka bago ba 98 000 000 a ile a okeletšwa lelokelelong. Go oketša moo, Dihlatse di katanela go etela batho ka nama bakeng sa go ba thuša go kwešiša Lentšu la Modimo.—Mateo 28:19, 20.

“Ba ba Tšwaxo Tlaišexong e Kxolo”

18. (a) Ge masetla-pelo a magolo a phulega, ke bomang bao ba tlago go šireletšwa? (b) Ke dikgoeletšo dife tša lethabo tšeo di tlago go dirwa nakong yeo?

¹⁸ Ge barongwa ba lokolla diphefo tša tshenyo tšeo go bolelwago ka tšona go Kutollo 7:1, ga se feela “bahlanka ba Modimo” ba tloditšwego bao ba tlago go hwetša tšhireletšo e lerato ya Jehofa eupša le lešaba le legolo leo le kopanelago le bona borapeding bja therešo le tla e hwetša. Bjalo ka ge moapostola Johane a ile a botšwa, ba lešaba le legolo ba tla ‘tšwa tlaišegong e kgolo’ e le baphologi. A legoa le lekaakang la tebogo le tumišo leo ba tlago go le tšhela nakong yeo ge ba goeletša ka gore: “Xo phološa ké xa Modimo wa rena e a dutšexo sedulong sa boxoši, ké xa Kwana.” Bahlanka ka moka ba botegago ba Modimo magodimong ba tla okeletša mantšu a bona ka go bolela gore: “Amene! Thêtô le letaxô le bohlale, le teboxô le tumišô, le matla le xo kxôna, ké tša Modimo wa rena xo iša mehleng ya neng le neng. Amene!”—Kutollo 7:10-14.

19. Baphologi ba tla thabela go ba le karolo modirong ofe o thabišago?

¹⁹ Yeo e tla ba nako e thabišago gakaakang! Bohle ba ba phelago e tla ba e le bahlanka ba Modimo a nnoši wa therešo! Lethabo le legolo go a feta ka moka e tla ba go hlankela Jehofa. Go tla ba le modiro o montši wo o swanetšego go dirwa—modiro o thabišago! Lefase le swanetše go fetolwa Paradeise. Dikete tše dimilione tša bahu di tla tsošwa gomme di rutwe ditsela tša Jehofa. E tla ba tokelo e thabišago gakaakang go ba le karolo go wona!

Tlhaloso ya Gago ke Efe?

◻ Ditiragalo tša 1935 di bile le mafelelo afe bodireding bja tšhemo bja Dihlatse tša Jehofa?

◻ Ke’ng seo se bontšhwago ke therešo ya gore lešaba le legolo le “pele xa sedulô sa boxoši”?

◻ Go leboga madi a Kwana go swanetše go kgoma maphelo bjang?

◻ Ke’ng seo se bolelwago ke go šišinya ga bona mahlare a molala?

◻ Ke bjang lešaba le legolo le neelago tirelo e kgethwa mosegare le bošego?

[Pictures on page 16, 17]

Tirelo ya bona e kgethwa e bonagatša go ba ka mehla, mafolofolo le maiteko a matla