Go Ubulwa

Tlhaloso: Tumelo ya gore Bakriste ba botegago ba tla tlošwa lefaseng ka mebele ya bona gomme ba tlošwe gatee-tee go lona, go ya go ba gotee le Morena “sebakeng sa xodimo.” Lentšu “go ubulwa” le kwešišwa ke batho ba bangwe eupja e sego batho ka moka, e le leo le bolelwago ke 1 Ba-Thesalonika 4:17. Lentšu “go ubulwa” ga le tšwelele Mangwalong a buduletšwego.

Ge moapostola Paulo a be a bolela gore Bakriste ba tla “rotošetšwa” e le gore ba be le Morena, ruri ke taba efe yeo e bego e bolelwa?

1 Ba-Thes. 4:13-18: “Bana bešo! Xa re rate xe Le hlôka tsebô tabeng ya ba ba ithôbaletšexo [“bao ba robetšego lehung,” NE; “bao ba hwilego,” TEV, JB], xore Le se kê la hlokofala bo-ka ba bangwê bao ba hlôkaxo kholofêlô. Xe re dumêla xore Kriste ó hwile ’me a tsoxa, le ba ba ithôbaletšexo ka Jesu, Modimo ó tlo ba iša le Yêna. Fao re Le botša Lentšu la [Jehofa] xe re re: Rena ba re phelaxo ra šadišetšwa maboô a Morêna, re ka se kê ra raka bao pele ba ithôbaletšexo. Xobane Morêna Yêna mong ó tlo foloxa lexodimong ka mokxoši, ka kxowa ya Morongwa-moxolo, ka phalafala ya Modimo; ké mo bao ba hwetšexo xo Kriste ba tl’o xo tsoxa pele. Xwa tlo latêla rena ba re šetšexo rè phela, ra rotošetšwa marung xammôxô le bôná, ra y’o xahlanetša Morêna sebakeng sa xodimo, ya tlo ba xôna xo ba le Morêna xo ya xo ile. Homotšanang ka tšôna ditaba tšé.” (Ge e le gabotse, ditho tše dingwe tša phuthego ya Bokriste kua Thesalonika di be di šetše di hwile. Paulo o ile a kgothatša ba ba šetšego gore ba homotšane ka kholofelo ya tsogo. O ba gopoditše gore Jesu o ile a tsošwa ka morago ga lehu la gagwe; ka mo go swanago le go tleng ga Morena, ruri Bakriste bao ba botegago gare ga bona bao ba bego ba hwile ba be ba tla tsošwa gore ba be gotee le Kriste.)

Ke bomang bao ba tlago go “rotošetšwa marung,” ka ge go bolelwa go 1 Ba-Thesalonika 4:17?

1Th 4 Temana ya 15 e hlalosa gore ke ba ba botegago ‘bao ba šadišeditšwego maboo a Morena,’ ke gore, ba tla ba ba sa dutše ba phela nakong ya go tla ga Kriste. Na ba be ba tla ba ba hwa? Ka go ya ka Ba-Roma 6:3-5 le 1 Ba-Korinthe 15:35, 36, 44 (tšeo di tsopotšwego matlakaleng 196, 197), ruri ba swanetše go hwa pele ga ge ba ka hwetša bophelo bja legodimo. Eupja ga go nyakege gore ba dule ba hwile go letela go boa ga Kriste. Ba tla “rotošetšwa” gatee-tee ka “panya-xa-tee” gore ba be le Morena.—1 Ba-Kor. 15:51, 52; gape le Kutollo 14:13.

Na Kriste o tla tšwelela ka go bonagala marung gomme a tšeele Bakriste ba botegago magodimong, ge lefase le dutše le lebeletše?

Na Jesu o kile a bolela ge e ba lefase mo gongwe le tla mmona gape ka mahlo a nama?

Joh. 14:19: “Xo šetše lebakanyana, ’me lefase le ka se hlwê le mpôna. Xe e le lena [barutiwa ba gagwe ba botegago] Le tlo mpôna, xobane ke a phela, ’me le lena Le tlo phela.” (Mongwalo o sekamego o okeditšwe.) (Bapiša le 1 Timotheo 6:16.)

Ke’ng seo se bolelwago ke ‘go fologa ga Morena legodimong’?

Na Morena o be a ka “foloxa lexodimong” go etša ge go bolelwa go 1 Ba-Thesalonika 4:16, ka ntle le gore a bonwe ka mahlo a nama? Jehofa mehleng ya Sodoma le Gomora tša kgale o boletše gore o be a tla ‘fologela gona gomme a bone’ tšeo batho ba bego ba di dira. (Gen. 18:21) Eupja ge Jehofa a dira tlhahlobo yeo, ruri ga go na motho yo a ilego a mmona gaešita lege ba ile ba bona baemedi ba barongwa bao a bego a ba romile. (Joh. 1:18) Ka mokgwa o swanago, Jesu ka ntle le go boa nameng ruri o be a ka hlokomela balatedi ba gagwe ba botegago lefaseng e le gore a tle a ba putse.

Ke ka tlhaloganyo efe moo batho ba tlago go “bôna” Morena “à e-tla ka leru”?

Jesu o boletše e sa le pele gore: “Ké moo ba tl’o xo bôna Morwa-motho [Jesu Kriste] à e-tla ka leru le ka matla le ka letaxô le lexolo.” (Luka 21:27) Polelo ye goba tše dingwe tše di swanago le yona tše di lego ditemaneng tše dingwe, ruri ga go na kamoo di ganetšanago le seo Jesu a se boletšego go etša ge se ngwadilwe go Johane 14:19. Akanya: Go diregile’ng Thabeng ya Sinai ge Modimo a be a ‘e-tla bathong a le lerung le leso,’ go etša ge go bolelwa go Ekisodo 19:9? Modimo o be a le gona ka go se bonagale; batho ba Isiraele ba bone bohlatse bjo bo bonagalago bja go ba gona ga gagwe, eupja ga go le o tee wa bona yo a ilego a bona Modimo ka mahlo a gagwe. Ka gona, ge Jesu le yena a be a bolela gore o be a tla tla “ka leru,” ruri o swanetše go ba a be a bolela gore o be a ka se ke a bonwa ke mahlo a batho, eupja gore batho ba be ba tla ela hloko go ba gona ga gagwe. Ba be ba tla ‘mmona’ ka mahlo a bona a kelello, e lego go ela hloko therešo ya gore o gona. (Bakeng sa ditlhaloso tše dingwe, hle bona hlogo ya ditaba e kgolo ya “Go Boa ga Kriste.”)

Na go a kgonega gore Bakriste ba išwe legodimong ka mebele ya bona ya nama?

1 Ba-Kor. 15:50: “Se nna ke se bolêlaxo, lena Bana bešo, ke re: Nama le madi xa se tšôna di tl’o xo ja lefa mmušong wa Modimo. Le tša xo bôla di ka se je lefa la tše di sa bolexo.”

Na phihlelo ya moporofeta Eliya e ganetša se? Le gatee-tee. E swanetše go ba e ile ya kwešišwa seetšeng sa polelo e kwalago ya Jesu makgolong a nywaga ka morago: “Xa xo e a kilexo a rotoxêla lexodimong, xe e se e a foloxilexo a e-tšwa xôna, Yêna Morwa-motho wa xo ba lexodimong.” (Joh. 3:13) Gaešita lege Eliya a ile a bonwa ge a be a “rotoxêla lexodimong ka ledimo,” ruri se ga se bolele gore o ile a ya sebakeng sa moya. Ke ka baka la’ng go se bjalo? Ka gobane ka morago o begwa a ile a romela lengwalo la go sola kgoši ya Juda. (2 Dikx. 2:11; 2 Kor. 21:1, 12-15) Pele ga ge batho ba ka dira difofane ruri Jehofa moo o ile a diriša mokgwa wa gagwe (koloi ya mollo le ledimo) gore di tloše Eliya lefaseng gomme di mo rotošetše legodimong moo dinonyana di fofago gona, gomme di mo fetišetše lefelong le lengwe.—Bapiša le Genesi 1:6-8, 20.

Na Bakriste ba botegago mo gongwe ba ka išwa legodimong ka mokgwa wa sephiri, moo ba ka nyamelelago lefaseng ka ntle le go hwa?

Ba-Roma 6:3-5: “A xa Le tsebe xobane bohle ba re kolobeleditšwexo Kriste, re kolobeleditšwe lehu la xaxwe? . . . Xobane xe re hlomaxane naê’ ka xo swana naê’ lehung la xaxwe, xôna re tlo hlomaxana naê’ ka xo swana naê’ le tsoxong ya xaxwe.” (Seo se diregilego tabeng ya Jesu se bea mohlala. Barutiwa ba gagwe gotee le ba bangwe ba be ba tseba gore o hwile. Ga se a ka a išwa bophelong bja legodimo go fihlela ka morago ga lehu le tsogo ya gagwe.)

1 Ba-Kor. 15:35, 36, 44: “Xe xo le e a rexo: Bahu ba ka tsoxa bya’ng? A re: Ba tlo boa ka mmele o bya’ng? Lešilo-towe! Se O se byalaxo xa se phedišwe xe se sa hwe. O byalwa è le mmele wa nama; o tlo tsoxa è le mmele wa môya.” (Ka gona, lehu le tla pele ga ge motho a ka amogela mmele wa moya, na ga go bjalo?)

Na Bakriste ka moka ba botegago ba tla tlošwa ka mohlolo lefaseng ke Morena pele ga masetla-pelo a magolo?

Mat. 24:21, 22: “Ma-setla-pelo a mohla woo e tlo ba a maxolo, a a sešoxo a bônwa xo tloxa mola lefase lè thôma xo ba xôna, a a ka se kexo a ba xôna le ka mohla o mongwê. Xomme xe mehla yeo e ka be e sa fokotšwe, xo ka be xo sa pholoxe motho. Fêla, e tlo fokotšwa ka ’baka la bakxêthwa.” (Se ga se bolele gore “bakxêthwa” ka moka ga bona ba tla ba ba išitšwe legodimong pele ga masetla-pelo a magolo a thoma, na se bolela seo? Go e na le moo, se ka bontšha gore ba bangwe ba bona, gotee le bagwera ba gona ba lego nameng, ba tla phologa masetla-pelo ao a magolo lefaseng.)

Kut. 7:9, 10, 14: “Ka buša ka ba le pônô, ka bôna lešaba le lexolo la batho ba xo sexo motho e a kxônaxo xo ba bala, ba dithšaba ka moka, le meloko ka moka, le merafô ka moka, le maleme ka moka; ka bôna bà eme pele xa sedulô sa boxoši sa Kwana, bà apere ’kobô tše dithšweu, bà swere mahlare a molala ka diatla tša bôná. Ba hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši, ké xa Kwana. . . . Ké bôná ba ba tšwaxo tlaišexong e kxolo.” (‘Go tšwa’ go se sengwe, ruri motho o swanetše go tsena ka go sona goba go ba ka go sona. Ka gona, lešaba le le legolo e swanetše go ba batho bao ba bilego e le ka kgonthe masetla-pelong a magolo gomme ba tšwile go ona e le baphologi.) (Mabapi le go ba ga bona lefaseng, hle bona matlakala 246, 247.)

Ke tšhireletšo efe yeo e tlago go ba gona go Bakriste ba therešo nakong ya masetla-pelo a magolo?

Ba-Roma 10:13, PK: “E mongwe le e mongwe e a tlogo go bitša leina la Jehofa, o tlo bolokega.”

Tsef. 2:3: “Nyakang [Jehofa], lena babôtla bohle ba lefase, lena Le yaxo ka molaô w’axwe. Tsomang tokô, Le tsomê boikokobetšô; mohlomongwê Le ka efošwa mohla woo wa boxale bya [Jehofa].” (Gape le Jesaya 26:20)

Na Bakriste ka moka ba therešo mo gongwe ba tla išwa legodimong ka morago ga masetla-pelo a magolo?

Mat. 5:5: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.”

Ps. 37:29: “Baloki e ba beng ba naxa [“lefase,” Ro, NW], ba dula mo xo yôna ka mehla le ka mehla.” (Gape le Ps 37 ditemana 10, 11, 34)

1 Ba-Kor. 15:50: “Nama le madi xa se tšôna di tlo xo ja lefa mmušong wa Modimo.”

Bona gape le hlogo ya ditaba e kgolo ya “Legodimo.”

Ke ka baka la’ng Bakriste ba bangwe ba išwa legodimong gore ba be gotee le Kriste?

Kut. 20:6: “Sa bôná ké xo ba baperisita ba Modimo le ba Kriste; ba tlo buša le Yêna nywaxa e sekete.” (Ka ge ba tla buša gotee le Kriste, gona go swanetše go ba le batho bao ba ba bušago. Ba ke bomang? Bona Mateo 5:5 le Psalme 37:29.)

Bona gape le hlogo ya ditaba e kgolo ya “Go Tswalwa Lefsa.”

Na bao ba išwago legodimong ba tla bušetšwa ka morago lefaseng gore ba tle ba phele ka mo go sa felego mo Paradeiseng?

Die. 2:21: “Ba ba tl’o xo dula mo naxeng [“lefaseng,” NE], ké baloki; ba ba tl’o xo šala ba le xôna, ke bôná ba-ila-bokxôpô.” (Hlokomela gore lengwalo ga le bolele gore batho ba bjalo ba lokilego ba tla boela lefaseng, eupja gore ba tla šala moo.)

1 Ba-Thes. 4:17: “Rena [Bakriste ba tlago go rotošetšwa legodimong] ba re šetšexo . . . [re tlo] ba le Morêna xo ya xo ile.”

Ge e ba o Mongwe a Bolela Gore

‘Na o dumela go go ubulwa?’

Mo gongwe o ka araba ka gore: ‘Ke hwetša gore ga se batho bohle bao ba nago le kgopolo e swanago ge e le ka seo go ubulwa go se bolelago. Na nka go botšiša seo o se tsebago ka se? . . . Ditabeng ka moka, ruri ke mo go holago go bapiša megopolo ya rena le seo Beibele e se bolelago. (Diriša dikarolo tša taba e lego ka mo godimo tšeo di swanelago.)’

Goba o ka re: ‘Go ubulwa ke go hlaloseditšwe e le maano a go phologa ao a logetšwego Bakriste. Ba bantši ba bona gore ye ke yona tsela yeo ba tlago go phologa masetla-pelo a magolo a tlago ka yona. Na ke kamoo o ikwago ka gona?’ Mo gongwe o ka oketša ka gore: (1) ‘Ruri, re nyaka go šireletšwa ke Modimo nakong yeo gomme ke hwetša mangwalo a mangwe ao a bontšhago kamoo re ka holwago ke seo ka gona, e le a kgothatšago kudu. (Tsef. 2:3)’ (2) ‘Beibele ka mo go kgahlišago e bontšha gore Modimo o tla šireletša batho ba bangwe ba botegago gona moo lefaseng. (Die. 2:21, 22) Se se dumelelana le morero wa Modimo ge a be a thoma go bopa Adama gomme a mmea Paradeiseng, na ga se dumelelane le wona?’

Tsela e nngwe ya go araba: ‘Ka go ubulwa o bolela gore Bakriste ba phelago bofelong bja tshepedišo ya dilo ba tla išwa legodimong, na ga o bolele bjalo? . . . Na o šetše o kile wa rata go tseba seo ba tlago go se dira ge ba fihla legodimong? . . . Hlokomela seo Kutollo 20:6 (le Kut 5:9, 10) e se bolelago. . . . Eupja ba tla buša godimo ga bomang? (Ps. 37:10, 11, 29)’