Nywageng ya morago bjale go ile gwa bolelwa kudu mabapi le sebaki se sengwe gape sa tlalelo: go senya ga batho tikologo. Ešita lege Jesu a se a ka a šupa se ka go lebanya boporofeteng bja gagwe, Kutollo 11:18 e bontšha gore pele ga tshenyego yeo e tlago, batho ba be ba tla ba ba ‘senya lefase.’ Bohlatse bja gore tshenyo ye e a dirwa ke bjo bontši. Bjalo ka ge a tsopotšwe ka pukung ya State of the World 1988, moeletši wa tša tikologo Norman Myers o nea molaetša wo o tšhošago: “Ga go na moloko woo nakong e fetilego o ilego wa lebeletšana le lebaka la tshenyego e kgolo kudu lebakeng la nako ya go phela ga wona. Ga go na moloko woo nakong e tlago le ka mohla o tlago go lebeletšana le tlhohlo e swanago: ge e ba moloko wo o lego gona gona bjale o palelwa ke go rarolla bothata bjo, go tla ba go dirilwe tshenyo gomme go ka se be le ‘sebaka sa go itekela gape.’”

Ela hloko pego ye e lego tokollong ya February 17, 1992 ya makasine wa Newsweek mabapi le go senyega ga legapi la ozone leratadimeng. Setsebi sa tša ozone sa mokgatlo wa Greenpeace e lego Alexandra Allen o ile a tsopolwa a be a lemoša gore go timelela ga ozone “bjale go dirile gore bokamoso bja diphedi ka moka tše di lego mo lefaseng bo be kotsing.”—Bona lepokisi letlakaleng le bakeng sa bohlatse bjo bo oketšegilego bja go senywa ga tikologo ya lefase.

[Lepokisi go letlakala 6]

Mathata a Tikologo—Pontšho ya Mehla

◻ Sefahlelo sa ozone yeo e šireletšago mafelong ao a nago le badudi ba bantši-ntši a Karolong ya Lefase ya ka Leboa e sesefala ka lebelo leo le ipoeletšago gabedi go feta kamoo bo-ra-thutamahlale ba bego ba nagana ka gona nywageng e sego kae e fetilego.

◻ Tekanyo ya tlase ya mehuta e 140 ya dimela le diphoofolo e a hwelela letšatši le lengwe le le lengwe.

◻ Ditekanyetšo tša lefaufau tša carbon dioxide yeo e swarago phišo bjale di ka tekanyo e phagamego ya 26 lekgolong go feta tekanyo ya nakong ya pele ga ge diintaseteri di thoma go ata, gomme ditekanyetšo di gare di a hlatloga.

◻ Bokagodimo bja lefase bo fišitše kudu ka 1990 go feta ngwageng lege e le ofe ga e sa le go tloga ge go bolokwa ga pego go thoma nakong ya gare ga lekgolo la nywaga la bo-19; e tshelelago ya nywaga e šupa e e bego e fiša kudu-kudu e bile gona ga e sa le go tloga ka 1980.

◻ Dithokgwa di nyamela ka lebelo la mo e ka bago diheketare tše 17 000 000 ka ngwaga, e lego tikologo ya bogolo bjo e nyakilego go ba seripa-gare sa bogolo bja naga ya Finland.

◻ Palo ya badudi ba lefase e gola ka batho ba dimilione tše 92 ka ngwaga le ngwaga—e lego mo e nyakilego go ba go oketša ka palo e lekanago le ya badudi ba Mexico ngwaga o mongwe le o mongwe; go palo-moka ye, koketšego ya ba dimilione tše 88 e direga dinageng tšeo di hlabologago.

◻ Batho ba ka bago dimilione tše sekete tše 1,2 ga ba na meetse ao a hlwekilego a go nwewa.

Go ya ka puku ya State of the World 1992, ka Mokgatlo wa Worldwatch, matlakala 3, 4, W. W. Norton & Company, New York, London.