‘Ditaba tše Lokilego’ Tšeo ba Ratago Gore o di kwe

Ge Jesu a be a le mo lefaseng barutiwa ba gagwe ba ile ba tla go yena gomme ba mmotšiša gore: ‘Pontšho ya go ba gona ga gago le ya bofelo bja tshepedišo ya dilo ke efe?’ O ile a araba ka gore go be go tla ba le dintwa tšeo di akaretšago ditšhaba tše dintši, ditlala, malwetši, ditšhišinyego tša lefase, go oketšega ga bokgopo, baruti ba bodumedi ba maaka bao ba tlago go aroša ba bantši, go hloiwa ga balatedi ba gagwe ba therešo le go tlaišwa ga bona gomme go rata toka go be go tla tapa bathong ba bantši. Ge dilo tše di be di tla thoma go direga, go be go tla ba go bontšha go ba gona ga Kriste ka mo go sa bonagalego le gore Mmušo wa legodimo o batametše. Tše e be e tla ba ditaba tše di lokilego e le ka kgonthe! Ka gona Jesu o ile a oketša ka mantšu a latelago e le karolo ya pontšho: ‘Ditaba tše tše di lokilego tša mmušo di tla bolelwa lefaseng ka moka le le agilwego gore e be bohlatse go ditšhaba ka moka; gomme e tla ba gona bofelo bo fihlago.’—Mateo 24:3-14.

Ditiragalo tša lefase tšeo di sa tšwago go direga e tloga e le tše mpe, eupja seo di se swantšhetšago, e lego go ba gona ga Kriste ke se sebotse. Ka gona, Jesu o itše: “E re xe tšeo di thôma xo dirêxa, Le inamoloxê, Le tsošê dihlôxô tša lena, ka xobane xo tlo ba xò batamêla topollô ya lena.” (Luka 21:28) Dilo tše di thomile go direga ngwageng woo o ilego wa tsebatšwa ka gohle wa 1914! O ile wa swaya bofelo bja Mabaka a Ba-ntle gotee le go swaya go thomega ga nako ya phetogo go tloga pušong ya batho go ya pušong ya Kriste ya nywaga e 1 000.

Gore go be go tla ba le nako ya phetogo go bontšhitšwe ke Psalme ya 110, ditemana 1 le 2 gotee le Kutollo 12:7-12. Moo go bontšhwa gore Kriste o be a tla dula ka letsogong le letona la Modimo legodimong go fihla ka nako ya go tla ga gagwe la bobedi. Ka gona ntwa yeo e bilego legodimong e be e tla feleletša ka gore Sathane a lahlelwe lefaseng, go be le madimabe lefaseng gomme Kriste o be a tla buša gare ga manaba a gagwe ka nako yeo e sa fetego ya moloko o tee. Mafelelo a kgonthe a bokgopo a tla tla ka ‘masetla-pelo a magolo,’ ao a tlago go feleletša ka ntwa ya Haramagedone gomme gwa latela pušo ya Kriste ya khutšo ya nywaga e 1 000.—Mateo 24:21, 33, 34; Kutollo 16:14-16.

Beibele e re, “Tseba xore mehleng ya bofêlô xo tlo tla mabaka a mathata. Batho e tlo ba ba xo ithata, ba mexabaru, ba lenyatšô le baikxoxomoši, le ba maroxa, le ba xo se kwe batswadi, ba xo se leboxe, ba xo se ile selô. E tlo ba ba-hlala-leratô, babata-sekxoro, e tlo ba dihwirihwiri, le ba ba sa tsebexo xo ithswara, manaba a tše boló; e tlo ba baeki, baipuši, baikxanthši, ba xo iphsina ba lahlile Modimo. Xe O ba bôna, O tlo re ba n’e borapedi; anthe matla a byôna xa ba a dumele. Ba ba byalo O ba xerulê.” (2 Timotheo 3:1-5) Ee, ba bangwe mo gongwe ba ka ganetša ka gore dilo tše di ile tša direga nakong ya pele historing ya motho.

Lega go le bjalo, bjalo ka ge bo-ra-dihistori gotee le babegi ba ditaba ba bolela, le ka mohla ga se gwa ka gwa ba le nako lefaseng ye e swanago le yeo e bilego gona go tloga ka 1914 go ya pele. Madimabe e ile ya ba a magolo kudu go feta lege e le neng pele. Go oketša se, ge e le ka dibopego tše dingwe tša ‘pontšho’ ya Kriste ya mehla ya bofelo, ruri ditherešo tše di swanetše go elwa hloko: Go bolelwa ga go ba gona ga Kriste le Mmušo lefaseng ka bophara e bile ga bogolo bjo bo ka se lekanywego le selo historing. Go tlaišetšwa go bolela le ka mohla ga se gwa ka gwa lekana le mo go ilego gwa dirwa godimo ga Dihlatse tša Jehofa. Ba makgolo ba bona ba ile ba bolawa dikampeng tša tshwenyo tša Hitler. Go fihlela le lehono ba thibetšwe dinageng tše dintši, gomme dinageng tše dingwe ba a swarwa, ba a golegwa, ba a hlokofatšwa gaešita le go bolawa. Tše ka moka ke karolo ya ‘pontšho’ yeo Jesu a e neilego.

Bjale ka ge go boletšwe e sa le pele go Kutollo 11:18, ‘Ditšhaba di galefetše’ dihlatse tše botegago tša Jehofa gomme se se bontšha gore ‘bogale bja Jehofa’ bo tla ba godimo ga ditšhaba tšeo. Lona lengwalo le le bolela gore Modimo o tla “senya basenya-lefase.” Le ka mohla ga se gwa ka gwa ba le nako historing ya motho yeo ka yona matla a lefase a go thekga bophelo a ilego a hlaselwa gakaakaa. Lega go le bjalo, mo nakong ye dilo di fetogile! Bo-ra-thutamahlale ba bantši ba lemošitše ka gore ge e ba motho a tšwela pele ka go senya lefase, e tla ba leo go ka se kego gwa dulwa go lona. Eupja Jehofa ‘o le diretše gore le dulwe ke batho,’ gomme o tla fediša basenyi ba lona pele ga ge ba feleletša tshenyo ya bona ya go senya lefase.—Jesaya 45:18.

DITŠHEGOFATŠO TŠA LEFASENG KA TLASE GA MMUŠO

Kgopolo ya gore go tla ba le batho bao ba dulago mo lefaseng e le balata ba Mmušo wa Modimo mo gongwe e ka bonala e makatša go batho ba bantši bao ba dumelago Beibele bao ba naganago ka batho bohle bao ba phološwago e le bao ba lego legodimong. Beibele e bontšha gore ke palo e lekanyeditšwego feela yeo e yago legodimong, le gore bao ba tlago go phela ka mo go sa felego mo lefaseng e tla ba lešaba le legolo la batho bao ba se nago palo. (Kutollo 14:1-5; 7:9; Psalme 37:11, 29) Gore Mmušo wa Modimo ka tlase ga Kriste o tla tlala lefase gomme wa le buša go bontšhwa ke boporofeta bjo bo lego pukung ya Beibele ya Daniele.

Mmušo wa Kriste moo o bontšhwa e le lefsika leo le kgomogilego bogošing bja Jehofa bjo bo swanago le thaba. Le itia le go pšhatlaganya seswantšho seo se emelago mebušo e matla ya lefase, gomme “lefsika lôna le le thubilexo seswanthšô seo, la ba thaba e kxolo, la tlala lefase ka moka.” Boporofeta bo tšwela pele ka gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:34, 35, 44.

Dihlatse tša Jehofa ba rata go go botša ka Mmušo wo le ka kholofelo yeo e thekgwago ke Mangwalo ya bophelo bjo bo sa felego lefaseng le le hlwekišitšwego le leo le thakgafaditšwego. Batho ba makgolo a dikete bao ba phelago mo nakong ye gotee le batho ba dimilione tše dintši bao mo nakong ye ba lego mabitleng ba tla ba le sebaka sa go dula go lona ka mo go sa felego. Ka gona, morero wa mathomo wa Jehofa wa go bopa lefase le go bea go lona batho ba babedi ba mathomo o tla lemogwa ka tlase ga pušo ya Kriste Jesu ya nywaga e 1 000. Paradeise ye ya lefase le ka mohla e ka se ke ya ba yeo e tenago. Go swana lege Adama a ile a abelwa modiro Tšhemong ya Edene, le batho ba tla ba le mediro e kgahlišago ya go hlokomela lefase gotee le dimela le diphoofolo tšeo di lego go lona. Ba “tlo phela ka tše ba itiretšexo tšôna, tša tlo bá tša ba ônalêla diatleng.”—Genesi 2:15; Jesaya 65:22.

Go ka bolelwa mangwalo a mantši go bontšha maemo ao a tlago go ba gona ge thapelo ye Jesu a re rutilego yona e arabja: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:10) Lega go le bjalo, anke le letee e be leo le kgotsofatšago mo nakong ye, e lego leo le rego: “Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile. E a dutšexo sedulong sa boxoši a re: Šidio; dilô tšohle ke di dira tše mpsha.—Nna a ntaêla a re: Ngwala, xobane ’taba tšé ké tša xo rereša le xo bôtêxa.”—Kutollo 21:3-5.

[Seswantšho go letlakala 15]

Go tla ba le “Mabaka a mathata” EUPJA “Xo tlo ba xo batamêla topollô ya lena”