“Boifang Modimo, Gomme le mo Nee Letago”

“Boifang Modimo, gomme le mo nee letago.”—KUTOLLO 14:7, Phetolelo ya Kgale.

1. Ke mang yo re swanetšego go mmoifa, gomme ke’ng seo re sa swanelago go se boifa?

KE MANG YO RE SWANETŠEGO GO MMOIFA? Ruri ga se noga e khubedu, Sathane le madira a gagwe a batemona! Kriste Jesu o ile a ba lahlela ka ntle ga legodimo ka morago ga go tswalwa ga Mmušo ka 1914. Eupja se se latelago dipono tša Apocalypse di utolla phuthego yeo Sathane a e dirišago mo lefaseng boitekong bja gagwe bja mafelelo bja go thibela merero ya Modimo. Selo se segolo diponong tše ke dibata tše pedi tše šoro le seotswa se se tagilwego—Babele o Mogolo. Na re swanetše go di boifa? Le gatee! Go e na le moo, re swanetše go boifa Jehofa le Kriste wa gagwe, yoo Mmušo wa gagwe mo nakong ye o tlišitšego lefase le le gobogilego la Sathane kahlolong ya lona ya mafelelo.—Diema 1:7; Mateo 10:28; Kutollo 12:9-12.

Dibata tša Maroga

2. Ke sebata sefe seo se bonalago ponong ya boseswai, gomme se emela’ng?

² Ge pono ya boseswai ya Kutollo e utologa, sebata se tsoga lewatleng le bilokanago la batho. Se na le dihlogo tše šupago le dinaka tše lesome le mefapahlogo e lesome, go bontšha matla a go buša ao se a neilwego ke Sathane. Se rogaka Jehofa, se tlaiša bahlanka ba Gagwe bjalo ka ge nkwe, bera, goba tau e be e tla dira; eupja matla a sona ke a nakonyana, ka ge a e-tšwa go noga, e lego Sathane yoo se mo ekišago e le ka kgonthe. Moporofeta Daniele pejana o be a ile a hlalosa mebušo ya bopolitiki ya lefase e le dibata, gomme mebušo ka boyona gantši e ile ya kgetha dibata e le dika tša yona tša setšhaba, bjalo ka tau ya Brithania le lenong la Amerika. (Daniele 8:5-8, 20-22) Ka gona re bona sebata seo se bopanego se akaretšago mebušo ka moka ya bopolitiki ya histori ya Beibele yeo gantši kudu e ilego ya gatelela bahlanka ba therešo ba Modimo mo lefaseng. “Dihlôxô” tše di tumilego kudu gare ga tše e bile Egipita, Asiria, Babele, Ba-Meda le ba-Peresia, Gerika, Roma gomme mafelelong ya ba Mmušo wa Lefase wa Mohlakanelwa wa Maisemane le ma-Amerika.—Kutollo 13:1, 2; 12:3, 7-9.

3. (a) Ke bjang e nngwe ya dihlogo tša sebata e ilego ya ba le ‘ntho ya lerumo’? (b) Sebata sa dinaka tše pedi se etelela pele bjang go direleng sebata sa pele seswantšho? (c) Leina la sebata sa pele le bohlokwa bja leina leo ke’ng?

³ Nakong ya ntwa ya lefase ya 1914-18, Great Britain, e le mmušo wa lefase wa bošupa e ile ya ba le ‘ntho ya lerumo’ yeo e bego e ka iša lehung. Eupja United States of America e ile ya e namolela. Ga e sa le go tloga nakong yeo, Amerika le Brithania di ile tša dirišana e le mmušo wa lefase wa mohlakanelwa, woo Johane a tšwelago pele go o hlalosa e le sebata sa dinaka tše pedi seo se tšwago lekokong la batho le le theilwego, e lego “lefase.” Sebata se sa dinaka tše pedi se etelela pele go direleng sebata sa pele seswantšho le go budulela bophelo ka go sona, go swantšhetša kamoo Mmušo wa Lefase wa Maisemane le ma-Amerika e bilego mothekgi o mogolo le monei wa bophelo go Kgwerano ya Ditšhaba gotee le mohlatlami wa yona Ditšhaba tše Kopanego. Sebata sa pele se na le leina la palo, 666. Tshela ke palo e sa felelago e fetwago ke šupa ya Beibele yeo e phethagetšego, ka gona tshela gararo e bontšha go se phethege mo go šoro ga babuši ba lehono ba batho. Gaešita lege Dihlatse tša Jehofa di hlompha mmušo gomme e bile di bea mohlala tabeng ya go kwa melao ya naga yeo ba dulago go yona, eupja ka sebete ba gana go rapela “sebata” goba seswantšho sa sona.—Kutollo 13:3-18; Ba-Roma 13:1-7.

Ke ka Baka La’ng re Swanetše go Boifa Modimo?

4. (a) Ke bomang bao ba bonwago ba eme Thabeng ya Sione ya legodimong, gomme ke bomang bao ba swantšhetšago bagolo ba 24 ba lego pele ga sedulo sa bogoši sa Modimo? (b) Phapano ke efe magareng ga “sefela se sefsa” seo se opelwago ke batlotšwa le “sefela se sefsa” seo se opelwago ke lešaba le legolo?

⁴ Ga bjale go lekane ka dibata tšeo! Ka mo go lapološago, pono ya bosenyane e lebiša tlhokomelo go Kwana. O eme Thabeng ya Sione, gotee le ba 144 000 bao a ilego a ba reka e le dithaka-ngwaga bathong. Gaešita lege ba bangwe ba bona ba sa dutše ba le lefaseng, ka kgopolo ya moya ba 144 000 ka moka ba “tlile thabeng ya Tsione . . . Jerusalêma wa lexodimong.” (Ba-Hebere 12:22) Ka mo go swanetšego, bagolo ba 24 le bona ba bonwa ba le pele ga sedulo sa bogoši sa Modimo ka gobane ba swantšhetša sona sehlopha seo sa batlotšwa boemong bjo bo fapanego—e lego ge ba šetše ba tsošitšwe gomme ba beilwe e le dikgoši le baperisita. Ba 144 000 ba opela “sefela se sefsa.” Se tšwa phihlelong ya bona e kgethegilego ka ge ba rekilwe lefaseng gore e be maja-bohwa a Mmušo. Lešaba le legolo le lona ‘le opelela Jehofa sefela se sefsa,’ eupja se se fapana ka gore ba opela ka kholofelo ya go hwetša bophelo bjo bo sa felego lefelong la lefaseng la Mmušo.—Kutollo 7:9; 14:1-5; Psalme 96:1-10; Mateo 25:31-34.

5. (a) Ke ditaba dife tšeo di goeletšwago ke morongwa yo a fofago bogareng bja legodimo, gomme ke ka baka la’ng e le tša neng le neng? (b) Ke taelo efe yeo morongwa a e goeletšago ka lentšu le le phagamego, gomme ke ka baka la’ng e le e swanetšego gakaakaa?

⁵ Pono bjale e a katologa. Johane o bona morangwa o mongwe a fofa bogareng bja legodimo. Ke ditaba tše di thabišago gakaakang tšeo a tlago go di bolela! Ke ditaba tše di lokilego tša neng le neng, ka gobane di bolela bophelo bjo bo sa felego go bao ba tšwago ditšhabeng le merafong le malemeng le bathong ka moka, bao ba kwago Modimo nakong ye ya kahlolo ya gagwe. Ka go fapana le sebata se šoro seo Johane a sa tšwago go se hlalosa, ke ka baka la’ng Modimo yo wa letago a swanetše go rapelwa le go hlompšha? Ke Yena yo a bopilego legodimo le lefase. Ke yena Mothopo wa selo se sengwe le se sengwe seo se lego gona, se se phelago le se se sa phelego. Ka gona, go na le lebaka le le tiilego la gore morongwa a laele ka lentšu le le phagamego gore: “BOIFANG MODIMO, GOMME LE MO NEE LETAGO!” Lentšu la morongwa le kwewa go dikologa lefase, gomme Dihlatse tša Jehofa di boeletša taletšo ya gagwe e tutuetšago go batho ka moka ka maleme ao e ka bago a 200.—Kutollo 14:6, 7; Jesaya 45:11, 12, 18.

Go wa ga Babele o Mogolo

6. Ke ditaba dife tše kgahlišago tšeo morongwa o mongwe a di goeletšago?

⁶ Go tšwelela morongwa o mongwe. Molaetša wo a o goeletšago o a makatša: “O wile! O wile! motse o moxolo wa Babele, wa xo noša ‘thšaba tšohle sebelá sa kxalefô ya bootswa bya wôna!” (Kutollo 14:8) Babele o Mogolo ke mang, ge a bile a kgona go fapoša ditšhaba le go di dira gore di tagwe?

7. Babele o Mogolo ke eng, gomme e ile ya tšwelela bjang?

⁷ Babele ya bogologolo e be e le mothopo o mogolo wa bodumedi bja maaka, bjo bo ilego bja katologela lefaseng ka bophara go ba mmušo wa lefase wa botemona, wo o bitšwago ka mo go swanetšego e le “Babele o Moxolo.” Ge nako e dutše e e-ya, Roma e ile ya thoma go tuma mmušong woo wa bodumedi, ka gobane e bile ka tlase ga Roma moo go ilego gwa tšwelela Bokriste bja bohlanogi. Roma e tšwela pele e le mothopo wa lefase wa bodumedi bja Babele. Se se ile sa bonala gabotse ka 1986 nakong ya ge baetapele ba bodumedi ba lefase ba arabela pitšo ya mopapa wa Roma ka go bokana le yena Assisi, kgaufsi le Roma go rapelela Ngwaga wa Khutšo wa Ditšhaba ka Moka wo o goeleditšwego ke Ditšhaba tše Kopanego.

8. (a) Ke bjang Babele o Mogolo a ilego a wa o šoro, gomme se se thomile go bonala neng? (b) Ke’ng seo se bontšhago gore dithapelo tša baetapele ba bodumedi tša khutšo ga di arabje?

⁸ Lega go le bjalo, Babele o Mogolo o ile a wa o šoro! Ga e sa le go tloga ka 1919 se se ile sa bonala ka thekgo e fokolago ya go thekga bodumedi bja maaka lefaseng ka bophara. Bokomanisi bja boila-Modimo bjale bo laola dikarolo tše kgolo tša lefase. Bafsa ba lehono ba rutwa tlhagelelo yeo e ganetšanago le Lentšu la Modimo. Kua Yuropa ya Boprotestanta batho ba mmalwa ga ba sa hlwa ba tsena kereke, gomme mopapa yo a ralalago o katanela go bopa mmušo wa gagwe wa Katholika ngata e tee. Dithapelo tša go rapela medimo e mentši tša mehuta ya bodumedi ya lefase go molaleng gore ga di arabje. Ruth L. Sivard o begile gore: “Ka 1987 go be go lwewa dintwa tše masomepedi-pedi e lego dintwa tše fetago tšeo di kilego tša ba gona nywageng e fetilego historing e begilwego. Palo-moka ya mahu dintweng tše go ba go fihla ga bjale bonyenyane ke 2 200 000—gomme e hlatloga ka lebelo.”a Seboka sa thapelo sa Assisi se ipontšhitše e le se se hlokago mohola gakaakang! Eupja mopapa o swaile go fetša ngwaga ka 1987 ga seboka seo ka go tšweletša mentlele o nago le seswantšho sa gagwe ka lehlakoreng le lengwe le seka sa seboka sa thapelo ka go le lengwe. Ba tšwela pele “ba re: Khutšô! Khutšô! mola xo se khutšô.”—Jeremia 6:14.

Bootswa bja Babele bo a Utollwa

9. Baruti ba Babele o Mogolo e bile ba tumilego ka mekgwa efe e gobogilego?

⁹ Kutollo 14:8 e bontšha gore Babele o Mogolo ke seotswa. Baruti ba gagwe e bile ba tumilego ka boitshwaro bja bona bjo bo gobogilego. Baebangedi ba thelebišene ba ile ba kota mehlape ya bona makgolo a dimilione a diranta, mola ka nako e swanago ba be ba dira boitshwaro bjo bo gobogilego ka boomo. Boperisita bja Katholika le bjona bo belaelwa kudu, ka ge go bontšhitšwe ke pego e latelago ka go The Beacon journal ya Philadelphia, Pennsylvania, January 3, 1988: “Batswadi, batsebi ba tša monagano, bahlankedi ba maphodisa le batsebi ba molao bao ba kgongwago ke ditaba tše ba bolela gore bana ba makgolo-kgolo bao ba sentšwego ka botona le botshadi ke baperisita ba Katholika kua United States lebakeng la nywaga e mehlano e fetilego ba ile ba tlaišwa ke maikwelo a tshwenyegilego o šoro.” Boitshwaro bjo bo gobogilego bja botona le botshadi bo sentše botumo bja baruti ba bantši ba Babele o Mogolo.

10. (a) Go Kutollo 18:3, ke’ng seo se bolelwago ke “bootswa” bja Babele o Mogolo? (b) Ka ge go ngwadilwe go Kutollo 18:24, ke ka baka la’ng baruti ba Babele o Mogolo ba e-na le karolo molatong o mogolo wa madi?

¹⁰ Lega go le bjalo, “sebelá sa kxalefô ya bootswa bya sôna,” se šupa kudu-kudu go go fereya ga bodumedi bja maaka babuši, go thekga masolo a bona a bopolitiki le a dintwa gotee le go gapeletša batho gore ba rapele karolo ya botšhaba ya sebata. Bo-ra-dipolitiki gantši ba ile ba hwetša bodumedi e le molekane yo a holago yo a lego ka lehlakoreng la bona, bjalo ka ge go ka bonwa kgweranong ya Hitler le Vatican ka 1933 le Ntwa ya Selegae ya Spain ya 1936-39. Nakong ya Ntwa ya II ya Lefase baruti ba Katholika, Protestanta, Buddha le mehuta e mengwe ya bodumedi ka mahlakoreng ohle ba ile ba dira bjalo ka ge eka ba tagilwe ke phišego ya botšhaba ya ntwa. Ba na le karolo molatong o mogolo wa madi wa madira a masome a dimilione le bao e sego madira bao ba ilego ba hwa ntweng go tloga ka 1914. Baruti bao ba ilego ba thekga Mafasi le ma-Nazi le bona ba na le molato wa madi ka baka la Dihlatse tša Jehofa le ba bangwe bao ba ilego ba bolawa goba ba hwa dikampeng tša tshwenyo.—Jeremia 2:34; Kutollo 18:3, 24.

11. (a) Ke’ng seo Bakriste ba tloditšwego ba ilego ba gana go se rapela? (b) Ke ditebelelo dife tše botse tšeo di neago lebaka le matla bakeng sa go boifa Modimo le go mo nea letago?

¹¹ Nywageng e 74 e fetilego, Bakriste ba botegago ba tloditšwego, gotee le dipalo tše oketšegago tša lešaba le legolo ba ile ba tšwela pele go BOIFA MODIMO LE GO MO NEA LETAGO. Re ile ra gana ka go tia go rapela karolo lege e le efe ya botšhaba ya sebata. Re ganne go tumiša seswantšho sa sebata, e lego Kgwerano ya Dithaba le UN—ka gobane re lemoga gare ke ‘Mmuõ wa Mong’a rena [Jehofa] le wa Kriste wa gagwe’ o nnoi wo o ka tlišago khutõ ya kgonthe le polokego. Re ile ra ikemišetša go ela hloko ‘melao ya Modimo le tumelo ya Jesu.’ Kgotlelelo yeo e na le moputso wa yona! Bakriste ba tloditšwego bao “ba hwilexo bà le Moreneng” go boletšwe gore ba lehlogonolo ka gobane “medirô ya bôna e a ba latêla.” Ge e le ka mang le mang wa lešaba le legolo yoo mo gongwe a ka hwago ka tlase ga ditlaišo, ka baka la bolwetši, goba ka kotsi, bogwera bjo ba bo hlagoletšego le Modimo bo ba kgonthišetša tsogo ya ka pela ya go tsogela lekokong la “lefase le lefsa.” Dikholofelo tše tša letago di nea lebaka le matla e le ka kgonthe bakeng sa GO BOIFA MODIMO LE GO MO NEA LETAGO.—Kutollo 11:15, 17; 12:10; 14:9-13; 21:1.

12. Ke dipuno dife tše pedi tšeo di diregago, gomme neng?

¹² Ge kahlolo e dutše e tšwela pele, barongwa ba laela gore go bunwe dipuno tše pedi. Mmuni wa mathomo go molaleng gore ke Jesu yo a beilwego sedulong sa bogoši sa letago la Mmušo go tloga ka 1914, ka gobane o kata godimo ga leru le lešweu, o apere mphapahlogo, gomme o “byalo ka Morwa-motho.” Bjale letšatšing la Morena o buna lefase la pele la mašaledi a tloditšwego a Bakriste gomme ka morago dimilione tša lešaba le legolo. (Bapiša le Mateo 24:31-34; Johane 15:1, 5, 16.) Ka mo go fapanego, puno ya bobedi ke ya ‘morara wa lefase,’ wo o lahlelwago ka ‘bofotlelong bja bogale bja Modimo.’ Ye ke kahlolo yeo e dirwago ka Haramagedone, ge lekoko le lebe la batho le tomolwa gomme dienywa tša lona tša mpholo di šilaganywa. Eka Jehofa a ka tumišwa ka baka la go tloša morara wo wa mpholo lefaseng!—Kutollo 14:14-20; 16:14, 16.

‘Jehofa o Lokile Gomme o a Rereša’

13. (a) Ponong ya bolesome, ke kopelo efe yeo batlotšwa ba tsošitšwego ba e opelago gomme mantšu a yona ke afe? (b) Dikahlolo tša Modimo tša go loka di bontšhwa bjang gabotse ponong ye?

¹³ Ponong ya bolesome ya Kutollo re bona ditiragalo tša legodimong pele ga sedulo sa bogoši sa Modimo gape. Ke lethabo le le kaakang leo le lego pele ga sefahlego sa gagwe! Batlotšwa ba tsošitšwego bao ba tšwilego e le bafenyi ka baka la GO BOIFA MODIMO LE GO MO NEA LETAGO, ba opela ‘kopelo ya Moše le ya Kwana’: “Ké e mexolo, ké e tlabaxo, medirô ya xaxo Morêna Modimo Ra-matla-ohle. ‘Tsela tša xaxo ké tša xo loka, tša xo rereša, Wene Kxoši ya dithšaba. Wa xo se šiê Wene Morêna e ka ba mang? Mokxêthwa à nnoši ké Wene. Dithšaba ka moka di tlo tla, tša khunama pel’a xaxo; xobane xo loka xa xaxo xo bônaxetše kahlolong.” Dikahlolo tša Modimo ka kgonthe ke tša go loka le tša go rereša, bjalo ka ge go bontšhitšwe gabotse ponong ye ka moka! Barongwa ba tšholla merufsi e šupago ya bogale bja Modimo, e išago go kgoboketšweng ga ditšhaba ka moka Haramagedone le kgopotšo ya gore ‘Babele o Mogolo o be a gopotšwe mahlong a Modimo!’ Ka gona pitšo ya go BOIFA MODIMO LE GO MO NEA LETAGO e nakong.—Kutollo 15:1–16:21.

14. Diponong 11 le 12, ke karolo efe e tumilego yeo Babele o Mogolo a bago le yona, gomme ke ka baka la’ng go akgofile gore a širogwe?

¹⁴ Babele o Mogolo o thoma go bolelwa leboelela ka go Kutollo. Re mmona gape e le moanegwa-thwadi diponong 11 le 12. O ‘dutše godimo ga meetse a mantši,’ o laola batho le go ba dira gore ba tagwe ka dithuto tša gagwe tša mpholo le tša maaka. Le yena ka noši o tagilwe ke “madi a bakxêthwa,” bao a ba bolailego ditlaišong, gomme o na le molato wa madi mabapi le ‘bohle ba bolailwego lefaseng,’ ka baka la bo-ntwa-dumela bja gagwe bja boradia. Ditswalano tša gagwe tša go ananya le kgwebo e kgolo le go amogela ga gagwe tšhelete go batho di tlišitše lehumo le legolo le le hweditšwego ka bofora. Se se solegago kudu e be e le go otswa ga gagwe le bopolitiki go ba go fihla boemong bja go namela sebata sa khutšo le polokego e lego UN ka go inyakela botumo. Eupja dinaka tše bogale tša sona sebata seo di loketše go mo arola ka bogare le go mo fediša. Go akgofile bakeng sa bohle bao ba BOIFAGO MODIMO LE GO MO NEA LETAGO gore ba mo široge, “xobane dibe tša wôna di fihla xodimong, ’me Modimo ó xopola makxôpô a wôna.”—Kutollo 17:1–18:24.

15. Go fedišwa ga seotswa se segolo go lebiša go dikopelo dife tša theto gomme go latelwa ke tiragalo efe e nngwe e thabišago?

¹⁵ Ka gona go fedišwa ga Babele o Mogolo go tla e le kahlolo ya go loka e tšwago go Jehofa. Bakeng sa go leboga se ‘di-Haleluya’ di kwala magodimong gomme ka morago lefaseng, e lego seo se bolelago gore phološo, letago le matla ke tša Jehofa. Megobelo ye ya ‘Retang Jah, lena batho!’ e bontšha lethabo le legolo mabapi le go fedišetšwa ruri ga seotswa se segolo. Go senywa ga sona go fapana gakaakang le tiragalo e thabišago kudu ya legodimong e lego lenyalo la Kwana, Kriste Jesu le monyadiwa wa gagwe wa bafenyi ba botegago ba 144 000! Kopelo ya modumo o mogolo ya theto e lebišwa go ‘Jehofa Modimo wa rena, Ra-matla-ohle,’ ee, “a re thabeng, re hlalaleng, re mo reteng, xobane monyanya wa tšeô ya Kwana o tlile, monyalwa wa xaxwe ó thšephile”!—Kutollo 19:1-10.

16. Go ya ka pono 13, ke kgang efe yeo e tlago go lokišwa mafelelong, gomme bjang?

¹⁶ Lega go le bjalo, pele ga ge lenyalo leo la legodimong le direga, pono 13 e bontšha kamoo kgang yeo e akaretšago bogoši bja Jehofa e lokišwago ka gona. Kgoši ya gagwe ya dikgoši le Morena wa marena, Jesu a e-na le madira a barongwa ‘ba ahlola le go hlabana ka toka,’ ba gataka bofotlelo bja bogale bja Modimo Ra-matla-ohle. Karolo e nngwe le e nngwe e šetšego ya tshepedišo ya lefaseng ya Sathane e a pšhatlaganywa ya šilaganywa! (Kutollo 19:11-21) Ge re bona phenyo yeo e batamelago ka lebelo ka dipono tša Kutollo, ruri re na le lebaka le lengwe le le lengwe la go BOIFA MODIMO LE GO MO NEA LETAGO!

Go Tumiša Modimo ka mo go sa Felego

17. Ke’ng seo dipono 14 le 15 di se utollago mabapi le mafelelo a thabišago go bohle ba boifago Modimo gomme ba mo nea letago?

¹⁷ Dipono 14 le 15 tša Kutollo di utolla mafelelo a thabišago go bohle ba BOIFAGO MODIMO LE GO MO NEA LETAGO. Ka morago ga ge Sathane le batemona ba gagwe ba lahletšwe sekoting ka nywaga e sekete, lenyalo la legodimong la Kwana le monyadiwa wa gagwe le a direga, gomme dikgoši le baperisita ba ba 144 001 ba buša ka nywaga e sekete ge ba dutše ba iša batho phethegong. Ka morago ga teko ya mafelelo bao ba tšwelago pele go BOIFA MODIMO LE GO MO NEA LETAGO ba tla fenya gomme ba amogelwa bakeng sa bophelo bjo bo sa felego. Ba ba tla akaretša dikete tše dimilione tša bahu ba tsošitšwego “ba baxolo le [ba] banyane,” bao ba ilego ba ipontšha ba swanelegela gore maina a bona a ngwalwe ka pukung ya bophelo. “Lexodimo le lefsa le lefase le lefsa” di tla tliša ditšhegofatšo tše sa balegego go batho, e lego ditšhegofatšo tše di kgonthišeditšwego, ka gobane bjalo ka Modiri wa ‘dilo tsohle tše mpsha,’ Jehofa o a bolela: “Ngwala, xobane ‘taba tšé ké tša xo rereša le xo bôtêxa.”—Kutollo 20:1–21:8.

18. Go ya ka pono 16, seremo sa puku ya Kutollo ke’ng?

¹⁸ Pono 16 e tšweletša seremo sa Kutollo. Ke’ng seo? Ke pono ya motse. Motse wo, e lego Jerusalema o Mofsa ke o fapanego kudu le motse lege e le ofe wo o kilego wa agwa ke motho mo lefaseng—wo o tlogago o fapane kudu le Babele o Mogolo, motse woo bohlanogi bja wona, boitshwaro bjo bo gobogilego le bootswa bja bopolitiki di hlompholotšego Modimo kudu. Motse o mokgethwa ke o sekilego, o hlwekilego le o bohlokwa. Ke monyadiwa wa Kwana e lego mothuši wa gagwe go phatlalatšeng bophelo bjo bo sa felego lefaseng la batho. (Johane 3:16) Ga go pelaelo gore kgoeletšo e kwala gabotse kudu ka go hlaboša gore go tšwiwe motseng wa bofora, Babele o Mogolo!—Kutollo 18:4; 21:9–22:5.

19. (a) Ke taletšo efe yeo e tšweletšwago ka sehlopha sa monyadiwa, gomme ba boleta ba arabela bjang? (b) Go arabela ga rena ka mo go swanetšego taelong ya gore “boifang Modimo, gomme le mo nee letago” go tla feleletša ka eng?

¹⁹ Moya wa Jehofa o matla o fetiša taletšo e matla ka sehlopha sa monyadiwa: ‘Tlang!’ Ee, lena bohle ba boleta ba kganyogago bophelo bjo sa felego lefaseng la paradeise, tlang ‘nokeng ya meetse a bophelo,’ le amogele ditokišetšo ka moka tša Jehofa ka Kriste le monyadiwa wa gagwe tša go hwetša bophelo bjo sa felego! A tebelelo e kgahlišago gakaakang—bophelo bja motho phethegong lefaseng la paradeise! E tla ba moputso go ba bantši bao ba arabelago ka mo go swanetšego taelong e rego: “BOIFA MODIMO, GOMME O MO NEE LETAGO”!—Kutollo 22:6-21.

[Mongwalo wa tlase]

O TLA ARABA BJANG?

◻ Ke thuto efe e lego nakong e lego gona bakeng sa rena ponong ya dibata tše pedi?

◻ Re swanetše go arabela bjang kgoeletšong ya morongwa yo a fofago bogareng bja legodimo?

◻ Babele o Mogolo o akaretšwa bjang bootsweng, gomme se se lebelelwa bjang ke bao ba boifago Modimo?

◻ Lefase le bunwa bjang nakong ya letšatši la Morena?

◻ Ke ditiragalo dife tše thabišago tšeo di phethago Kutollo, gomme batho ba Modimo ba ka ba bjang le karolo go tšona?

[Seswantšho go letlakala 23]

Mentlele wo wa koporo o ile wa ntšhwa ka October 1987 monyanyeng wa go fetša ngwaga ga Thapclo ya Khutšo ya kua Assisi. Ka lehlakoreng le lengwe go na le seswantšho sa “Tate o Mokgethwa” se se dikologilwego ke tšatši-kgwedi le mongwalo o rego: “John Paul II Pontifex Maximus.” Ka lehlakoreng le lengwe “Mokgethwa Francis” o goeletša “Khutšo Mpho ya Modimo” Sebokeng sa Thapelo ya Khutšo sa Assisi