Mmušo wona wo wa Lefase wa Maisemane le ma-Amerika o hlaloswa pelenyana pukung ya Kutollo e le sebata se nago le “dinaka tše pedi.” Mmušo wo wa lefase wa dikarolo tše pedi ‘o botša bao ba agilego lefaseng gore ba betle seswantšho’ bakeng sa sebata sa bopolitiki seo se emelago mebušo e šupago ka moka ya lefase.—Kutollo 13:11, 14.

GE BOŠORO bjo bo šiišago bja nywaga e mene ya Ntwa ya I ya Lefase bo dutše bo batamela bofelong, mookamedi wa Amerika Woodrow Wilson, le tona-kgolo ya Brithania David Lloyd George ba ile ba šišinya gore go be le Kgwerano ya Ditšhaba. Pakane ya yona e be e le “go fihlelela khutšo le polokego ya ditšhaba ka moka” gomme ka tsela yeo ba thibele gore bošoro bjo bo bjalo bja ntwa bo se direge gape.

Ke mo go kgahlišago go bona gore ke mang yo a ilego a thoma se. Baetapele ba ba babedi e be e le dihlogo tša dikarolo tše pedi tša Mmušo wa Lefase wa Maisemane le ma-Amerika wo o bolelago Seisemane, e lego wa bošupa wa Histori ya Beibele. Therešo ye gotee le tše dingwe tšeo di lego mabapi le mokgatlo wa ditšhaba ka moka wa khutšo le polokego e dumelelana ka mo go makatšago le seo puku ya Beibele ya Kutollo e bego e se boletše ka go ba gona ka nako e kopana ga “kxoši . . . ya seswai” ye e bego e tla ema le go wa mehleng ya rena. Go swana mo gongwe mo go kgahlišago e bile gofe?—Kutollo 17:11.

Boporofeta bja Kutollo bo utolotše gore “sebata,” se nago le “dinaka tše pedi tše e kexo ke tša Kwana” se be se tla ‘botša bao ba agilego lefaseng go betla seswantšho’ bakeng sa sebata seo se bego se dutše se etilwe pele ke mebušo e šupago e megolo ya lefase ya histori ya Beibele.

Se e tloga e le sona seo Mmušo wa Lefase wa Maisemane le ma-Amerika o ilego wa se dira. O kgothaditše “ba ba axilexo lefaseng” go dira Kgwerano ye e bego e swana gomme e dira ka tsela e swanago le ya mebušo e megolo. Eupja ge e le gabotse e be e fo ba feela “seswanthšô sa Sebata.” E be e se na matla ao e lego a yona, ge e se ao e a neilwego ke dithšhaba tšeo e lego ditho tša yona. Ga e hlaloswe e le yeo e hwetšago matla ka tsela ya phenyo e kgolo ya tša bohlabani go etša kamoo mebušo ya lefase e ilego ya dira ka gona. Go e na le moo, e ile ya hloga goba ya tšwa go mebušo ya lefase e šupago. E bile gona e sego ka baka la wa bošupa wa yona feela, eupja le ka baka la ditšhaba tše dingwe tšeo e lego ditho tšeo di akaretšago mašaledi a [dikgoši] tše tshelelago tša pele. Na seswantšho se sa bopolitiki se be se tla fihlelela dipakane tše kgolo tšeo bathei ba sona ba bego ba di holofetše?—Kutollo 17:11, 14.