Babadi ba Rena ba a Botšiša

Ntwa ya Haramagedone e tla Lwelwa Kae?

Ntwa ya Haramagedone e ka se lwelwe lefelong le itšego le le kgethegilego. Go e na le moo, e tla lwelwa lefaseng ka bophara. Ka baka la’ng? Ka gobane dihlopha tše pedi tše di lwantšhanago ke tše dikgolo kudu gomme di ka se lekane lefelong le ge e le lefe le tee.

Haramagedone, e tsebja gape e le ‘ntwa ya letšatši le legolo la Modimo Ra-matla-ohle.’ Jehofa Modimo o tla diriša Morwa wa gagwe, Kriste Jesu go kgobokanya madira a barongwa go lwa le madira a kopanego a babuši ka moka ba lefase ba kgopo.—Kutollo 16:14; 19:11-16.

Ditšhaba di goketšwa ka tsela e itšego ke madira a Sathane gore di kopanele ntweng. Beibele e bolela ka “dipolelo tše di buduletšwego ke batemona” e le tšeo di yago “go dikgoši [babuši] tša lefase ka moka le go agilwego go lona go di rapela . . . lefelong le le bitšwago Haramagedone ka Seheberu.”—Kutollo 16:14-16.

Ka go se swane le dipuku tše dingwe tša Beibele, Kutollo e tantše kgahlego ya babadi ba bantši ba Beibele. Batho ba bantši bao ba sa dumelego gore puku ya Kutollo e bolela ka dilo tša seswantšhetšo ba šupile lefelo le itšego leo ba dumelago gore ntwa e tla thoma go lona, gomme ba be ba dutše ba lebeletše ka kgahlego ditiragalo tšeo di diregago lefelong leo. Kgopolo ya gore Haramagedone ke lefelo le itšego le le kgethegilego e hwetšagala pukung ya bogologolo yeo e sa dutšego e le gona ya Segerika yeo e bolelago ka Kutollo, yeo e ngwadilwego ke Oecumenius lekgolong la botshela la nywaga C.E.

Ge a bolela pono e tlwaelegilego ya baruti bao ba swareletšego mehuteng ya setlogo ya bodumedi, John F. Walvoord, yo e kilego ya ba mopresidente wa Dallas Theological Seminary o re Haramagedone ke “ntwa ya makgaola-kgang yeo go se nago kholofelo ya gore batho ba tla phologa go yona, ya lefase ka bophara yeo e tlago go lwelwa Bohlabela bja Magareng.” Walvoord o re ntwa ye e kgolo ya nakong e tlago e tla lwelwa “‘Thabeng ya Megiddo,’ e lego thaba e nyenyane yeo e lego ka leboa la Palestina ka mafelelong a moedi o pharaletšego.”

Lega go le bjalo, puku ya Kutollo ga se mmapa wo o re lebišago lefelong la kgonthe leo le bitšwago Haramagedone. Mantšu a yona a matseno a bontšha gore pego ye e tšweleditšwe ka “dipontšho.” (Kutollo 1:1) Dihlatse tša Jehofa di boletše kgale ka kgatišong ya tšona yeo e bitšwago Studies in the Scriptures, Bolumo IV gore: “Ga se ra swanela go letela gore batho ba tla kgobokana ka tsela ya kgonthe Mmotong wa Megiddo.”

Ditiragalo tša kgale tša Megiddo di šišinya boemo bjoo go bjona manaba a Modimo a ka se phologego. Ka gona, nakong ya Haramagedone, Modimo o tla kgonthišetša gore kgobogo le bokgopo ka moka di fedišetšwa sa ruri, go sa šetšwe gore di hwetšagala kae mo lefaseng.—Kutollo 21:8.

Bao ba ratago Jehofa Modimo le Morwa wa gagwe, Jesu Kriste, ga se ba swanela go boifa Haramagadone. Ntwa ya Modimo e lebišitšwe feela go batho bao Modimo a ba ahlolago e le ba kgopo bao go se nago kholofelo ya gore ba tla fetoga. Ntwa ya gagwe e ka se fediše batho ka moka. Beibele e re: “Jehofa o tseba go hlakodiša batho ba boineelo go Modimo.” (2 Petro 2:9) Kholofetšo e kgahlišago yeo e lego go Psalme 37:34 e re: “Letêla Morêna, O swarê ka tsela ya xaxwe, a Xo xodišê O bê mong wa naxa; O bônê xe babe ba lôba.”