PHUNZILO 2

Kukambilana Mwacibadwa

2 Akorinto 2:17

ZOFUNIKILA: Muzikamba mwacibadwa ndiponso moona mtima, poonetsa mmene nkhaniyo imakukhudzilani imwe komanso omvela anu.

Mwa pemphelo, konzekelani bwino. Pemphelani kuti Mulungu akuthandizeni kuika maganizo anu pa uthenga wanu, osati pa inu mwini. Sumikani maganizo anu pa mfundo zazikulu zimene mufuna kuzimveketsa. Fotokozani mfundozo m’mawu anu-anu; osati kukamba mawuwo ndendende mmene awalembela iyai.

Ngati mufuna kukaŵelenga Baibo kapena cofalitsa cina, konzekelani bwino kuti mukaŵelenge bwino-bwino, osati molumila-lumila. Ngati muŵelenga mawu ogwidwa a munthu wina, ŵelengani na mzimu wake, koma osati mopambanitsa.
Kukamba mocokela pa mtima. Ganizilani cifukwa cake kuli kofunika kuti omvela anu amve nkhani yanu. Lunjikitsani maganizo anu pa iwo. Mukatelo, kaimidwe kanu, magesca, nkhope yanu, zonse zidzaonetsa kuona mtima kwanu, komanso mzimu waubwenzi.

Kukamba mwacibadwa sikutanthauza kukamba mosasamala. Sungani ulemu wa uthenga wanu mwa kulankhula momveka bwino, komanso kukamba Cinyanja cabwino.
Yang’anani omvela anu. Muziyang’ana omvela anu pokamba nawo. Pokamba nkhani, muziti mwayang’anako uyu, mwapita pa wina, basi telo, m’malo mongomwaza maso cisawawa pamwamba pa mitu ya omvela anu.