PHUNZILO 6

Kumveketsa Bwino Cifukwa Coŵelengela Lemba

Yohane 10:33-36

ZOFUNIKILA: Osangoŵelenga lemba basi n’kupita pa mfundo yotsatila iyai. Onetsetsani kuti omvela anu akuona bwino-bwino kugwilizana kwa lemba imene mwaŵelenga na mfundo imene mukufotokoza.

MOCITILA:

Onetsani mawu ofunikila. Mukaŵelenga lemba, onetsani mawu okhudzana na mfundo yanu yaikulu. Mungacite zimenezi mwa kuwabweleza mawu amenewo, kapena kufunsapo funso lopangitsa omvela anu kuwachula mawu ofunikilawo.

Ngati muchula mawu osiyana-siyana pofuna kumveketsa mfundo ya lembalo, onetsetsani kuti omvela anu akuonabe bwino-bwino kuti mawu a m’Baibo amenewo akugwilizana na mfundo yanu yaikulu.
Gogomezani mfundo yanu. Ngati poŵelenga lemba mwamveketsa bwino cifukwa coliŵelengela, fotokozani mmene mawu ofunikila a pa lembalo amaonetsela cifukwaco.

Pokambilana lembalo, Baibo yanu ikhale yotsegula. Izi zimathandiza omvela anu kugwilizanitsa zimene mukamba na lemba limene mwaŵelenga.
Mveketsani mosavuta colinga ca lembalo. Pewani kufotokozapo mfundo zina zosathandiza kweni-kweni kumveketsa mfundo yaikulu. Malinga na zimene omvela anu akudziŵa kale pa nkhaniyo, onani kuti ni mfundo zingati zimene mungafunike kufotokoza kuti mumveketse mfundo yanu.