1 Ova Kolindu

5 Tyatiwa pokati kenyi pekahi nokulingwa ouhayo wotyihola,* ouhayo* umwe uhalingwa-le alo umwe novanthu veheva Kilisitau — omulume umwe ukahi nokulala nomukai wa tate yae. 2 Onwe mulimphandela otyipuka otyo? Ñgeno katyimunumanesa iya omunthu wokualinga otyipuka otyo apolwa pokati kenyi? 3 Namphila neheli oko, mahi nomutima ndyili oko, nakoyesa-le omulume walinga ngotyo ngatyina ndyikahi oko. 4 Tyina muameliongiya menyina lya Tatekulu Sesusi, noñgonokei okuti na ame ndyikahi no onwe momutima kumwe nepondolo lya Tatekulu yetu Sesusi, 5 omulume oo mupakulei ku Satanasi opo ovituwa viae ovivi aeta mewaneno vipolwe-mo, opo onkhalelo ongwa yewaneno iyovolwe monthiki ya Tatekulu.

6 Etyi mulimphandela katyikahi nawa. Kamutyii okuti onkhiso ihehi itutumukisa enthapi* aliho? 7 Polei pokati kenyi onkhiso onkhulu opo mukale enthapi epe, amukala tyihena onkhiso.* Mokonda Kilisitu ondyona yetu Yopasikwa walingua-le otyilikutila. 8 Ngotyo, tuhinangelei otyipito, ha-nonkhiso onkhulu, nii onkhiso ilekesa onkhali novivi. Mahi tuliei vala onombolo mbuhena onkhiso, mbulekesa otyiwa notyili.

9 Momukanda wange nemuhonekela opo muyekepo okulihonyeka* novanthu valinga ouhayo wotyihola,* 10 hikahi nokupopia ovanthu vomouye uno vokulinga ouhayo wotyihola,* ine ovanthu velungavi ine vokupunda ine vokufenda ovilolo. Inkha ongotyo, opo ñgeno mouye muatunda-mo. 11 Mahi nemuhonekela opo muyekepo okulihonyeka* na kese munthu wihanwa okuti omukuatate mahi ulinga ouhayo wotyihola,* ine una elungavi ine ufenda ovikahuku ine omunthu wokutukana* ine wokunua unene ine wokupunda, nii muhaliei nomunthu oo. 12 Omokonda yatyi ame ndyikoyesila vokondye? Onwe kamukoyesa vomokati, 13 putyina Huku akoyesa vokondye? “Polei omunthu ondingavivi pokati kenyi.”