2 Timotiu

4 Komaiho a Huku na Kilisitu Sesusi, una makoyesa vokuna omuenyo no vokuankhia tyina amamoneka nawa na tyina ameya Mouhamba wae, ame ndyikutuma okuti: 2 Ivisa ondaka; linga ngotyo nondyanga, momivo vikahi nawa no momivo viepuiya; lekesa apa umwe apengesa, viyula, londola noumphua-lundo auho nounongo wokulongesa. 3 Mokonda, makukeya omuvo umwe ovanthu mavakaanya ondongeso yokuaviuka,* mahi ngetyi muene vahanda, mavekeliongiyila ovalongesi opo vevenyualaleke momakutwi avo.* 4 Mavayeke-po okutehelela otyili iya avatehelela omahipululo omatutu. 5 Mahi, ove tualako okukala nonondunge movipuka aviho, koleleya movitateka, linga ovilinga viomuivisi,* uundapela nawa Huku.

6 Mokonda, ame ndyikahi-ale nokuuyulwa ngotyilikutila tyo kunwa, iya omuvo weyovo liange ukahi unene popepi. 7 Ame nalwa ovilwa oviwa, namana okuhateka, naendela mekolelo. 8 Okutunda apa okuenda no komutwe, ekolowa liange liouviuki liapakwa nawa, lina Tatekulu omukoyesi omuviuki makampha, ngatyina ondyambi monthiki ina, iya hame vala, mahi tupu na aveho vana vapanda okuhololoka kwae.

9 Linga ononkhono mbokukanyauka okuya kuno. 10 Tyetyi Dema wanthya-po mokonda uhole vali ouye uno,* iya waya no ko Tesalonika, Kelesende waya ko Galasia, Titu waya ko Dalematia. 11 O Luka vala ukahi na ame. Endyu na Maluku mokonda mankhuatesako unene movilinga viange ndyilingila Huku. 12 Mahi, ame natuma Tikiku ko Efesu. 13 Tyina uya etelela ekapote liange nasa na Kalupu ko Toloade, no nombuingwa, haunene mbombandwa.

14 Alesandele omunthili wovivela wandinga ovipuka ovinyingi ovivi. Siovaa memufete tyatokala movilinga viae. 15 No ove una okumulavesa, mokonda uyele unene onondaka tupopia.

16 Puetyi ankho ndyikahi nokuliamena kovatumini otyikando tyo tete, nawike wakalele konthele yange, aveho vanthya-po — Huku ehevepule mokonda yotyo. 17 Mahi Tatekulu akala ponthele yange iya amphameka, opo mokonda yange ovilinga viokuivisa vifuisuepo iya ovanthu vomalongo aeho vetyiive; iya ame andyiyovolwa momulungu wonkhulika. 18 Tatekulu mandyovola movilinga aviho ovivi iya mandyovola pala Ouhamba wae keulu. Apewe omunkhima apeho-apeho. Amem.

19 Nkhukunyinei-po Pilisika na Akila no vomeumbo lya Onesifolu.

20 Elasitu ukahi mo Kolindu, mahi Tolofimu ame nemusa ko Miletu wavela. 21 Linga ononkhono opo uhike tyina outalala nkhele uheneye.

Eubulu utuma okumukukunya-po, na Pundende na Linu na Kalaudia novakuatate aveho vemukukunya-po.

22 Tatekulu akanene nawa ononkhono mulinga. Okankhenda kae okanene kakale no onwe.