Ova Hembeleu

6 Moluotyo, mokonda pahe tualamba-le ovipuka vyo tete konthele ya Kilisitu, tutualeiko okulongoka, atuhakalela vala ovipuka vyo tete, ngokulivela kovilinga vihasilivila,* nokukala nekolelo mu Huku, 2 nondongeso yo nombatisimu nokuyambeka omavoko, netutilo lyo vokuankhia, nekoyeso lihapu. 3 Iya otyo onthue matutyilingi, inkha Huku utyitavela.

4 Mokonda konthele ya vana vetavela otyimimi tya Huku vaimbuka-le otyiawa tyo tyali tyo keulu, iya vatambula ononkhono mba Huku, 5 iya vatambulile ondaka ya Huku ikahi nawa, novipuka oviwa* maviawa mouye* mauya, 6 mahi vayapuka mekolelo, pahe katyitavela vali okuvekuatesako velivele mokonda vapapela vali Omona wa Huku momuti pala-vo iya avemulekesa kovanthu vemulinge omukuele. 7 Mokonda, ohi ipola ouwa ku Huku putyina inwa omeva ombila apeho tyina iloka iya konyima ayaave ovikuna vina esilivilo ku vana vialiminwa. 8 Mahi inkha yaava omakete, nomankhondo yaanyua, iya ihungi kokuhinganwa, konyima maiyokwa.

9 Mahi onwe, nonthyolwe, namphila tukahi nokupopia ngotyo, mahi tuna onthumbi yokuti onwe mukahi vali nawa, onwe muna ovipuka vituala keyovo. 10 Mokonda Huku omuviuki iya kamalimbwa ovilinga vienyi, nohole muna nenyina liae, mokuundapela ovasukuki nokutualako okuveundapela. 11 Mahi tuhanda opo kese wike pu onwe alekese ombili ngo oyo opo akale nonthumbi yekevelelo alo konthyulilo, 12 opo muhakale ovanangi, mahi lingei nga vana vatambula etyi Huku apopia mokonda yekolelo noumphua-lundo.

13 Mokonda etyi Huku alingile omulao wae na Ambalaiau, Huku waanene nae muene tyetyi kutupu nawike omunene vali kwe, 14 ati: “Ame tyotyili mandyikuyambe, ame tyotyili mandyikukalesa ovanyingi.” 15 Ngo otyo etyi Ambalaiau akala noumphua-lundo, atambula omulao oo. 16 Tyina omunthu alinga omulao waana enyina lya umwe omunene vali. Otyo tyitetulula onondyaya mokonda omulao oo ulekesa okuti etyi apopia otyili. 17 Tyelifwa notyo, etyi Huku atokola okulekesa vali nawa konomphinga mbomulao okuti ehando liae kalipiluluka, nae aane. 18 Ovipuka ovio vivali Huku alinga* nalumwe vipondola okupiluluka, iya Huku kapondola okukemba; ovipuka ovio vitupameka onthue vokuatilila motyiholamo opo tukale nonthumbi mekevelelo tuapewa. 19 Etyi tukevelela tyipameka omuenyo wetu ngatyina ohako ikuata owato. Ekevelelo olio kamaliponyo, malifuisuapo iya liapama, iya ekevelelo olio malitutuala konyima yotyinyanga tyayapaula ondyuo ya Huku, 20 Sesusi watetekela ku onthue okunyingila-mo, aikula ondyila eipongiya pala onthue, akala omunene-nakwa wavilapo monkhalelo yelifwa no ya Melekisedeke apeho-apeho.