Eholololo

1 Eholololo* lya Sesusi Kilisitu, apewa na Huku opo alekese kovapika vae ovipuka vina okumoneka apa katutu. Sesusi Kilisitu atumu oandyu yae komuumbili wae Suau opo imulekese nomanyingilikilo ovipuka vina okumoneka komutwe. 2 Iya Suau aave oumbangi wondaka Huku aava, noumbangi Sesusi Kilisitu aava, yoo, wovipuka aviho amona. 3 Una ehambu, oyo una utangela peulu, na vana vatehelela onondaka mbeulo eli, iya avaendela movipuka viahonekwa-mo, mokonda omuvo wanakua ukahi popepi.

4 Ame Suau ndyihonekela omawaneno epandu-vali ekahi motyilongo tyo Asia okuti:

Kalei nokankhenda okanene nombembwa vitunda “ku Una ukahi-ko, wali-ko iya ukahi nokuya,” no kononkhono epandu-vali mbukahi komutwe wotyipundi tya Huku tyoutumini, 5 no ku Sesusi Kilisitu “Ombangi Omukuatyili,” “watetekela okupindulwa-po po vokuankhia,” “Omutumini wonohamba mbo pohi.”

Una utuhole iya wetuyovola kononkhali mbetu nohonde yae muene — 6 iya etukalesa onohamba, novanakwa va Huku yae, Tate yae — yoo, apewe omunkhima nepondolo apeho. Amem.

7 Tala! Ngwe ukahi nokuya nomakaka iya omaiho aeho maemumono, okukutikinya-mo vana vemutomene; iya ovanthu vomihoko aviho mavekeliveta mononthulo otyo valila mokonda yae. Yoo, Amem.

8 “Ame, ame Nthyimbi, ame Nthyulilo,”* otyo tyapopia Siovaa Huku, “Una ukahi-ko, wali-ko iya ukahi nokuya, Wepondolo Aliho.”

9 Ame Suau, omukuatate wenyi umona ononkhumbi kumwe no onwe, una mamukakala nae mouhamba, iya ukoleleya no onwe kumwe na Sesusi, ankho ndyikahi pokalongo kakala pokati komeva katiwa Patamu, mokonda yokuapopia konthele ya Huku nokuaava oumbangi konthele ya Sesusi. 10 Kononkhono mba Huku andyitualwa monthiki ya Tatekulu, iya andyiivi ondaka onene konyima yange ikahi ngonkhuino, 11 aiti: “Etyi weete tyihoneka mombuingwa iya oitumu komawaneno aa epandu-vali: Mo Efesu, no mo Similina, no mo Pelegamu, no mo Tiatila, no mo Salede, no mo Filadelefia no mo Laodiseia.”

12 Ame andyipiluluka opo ndyitale olie upopia na ame, iya etyi napiluluka, andyimono ovikandiyelo vyo olu epandu-vali ovilaale, 13 iya pokati kovikandiyelo ankho pena omunthu ukahi ngomona womulume, wavala otyikutu tyehika alo konomphai, iya welikuta otyinyanga tyo olu monthulo. 14 Tupu omutwe wae nonohuki mbae mbutuela ngomusinya omunthuelu, ngoti ongandyi, iya omaiho ae ekahi ngomutemo wotupia. 15 Onomphai mbae mbukahi ngotyivela otyinkhuhu putyina tyasengululwa mofolono iya ondaka yae ikahi ngomuvielo womaande omanyingi. 16 Iya ankho una ononthungululu epandu-vali peke liae liokulio, iya komulungu wae kuna omutunga omulaale watwa, iya otyipala tyae tyaliaima ngekumbi liatema unene. 17 Etyi nemumona, andyiambuka iya andyitokela ponomphai mbae.

Iya ngwe ankhuate nokuvoko kwae kuokulio ati: “Uhatile owoma. Ame Tete, ame Nahulilila, 18 wokuna omuenyo, nankhile, mahi tala! Ame pahe ndyina omuenyo apeho-apeho, iya ndyina onosapi mbononkhia no Mbelangalo.* 19 Ngotyo honeka ovipuka wamona, novipuka vikahi nokumoneka, novipuka mavikamoneka konyima yo ovio. 20 Otyipuka tyaholekwa tya Huku konthele yononthungululu epandu-vali wamona peke liange liokulio, novikandiyelo epandu-vali ovilaale vyo olu, otyetyi: Ononthungululu epandu-vali, onoandyu epandu-vali mbomawaneno, iya ovikandiyelo epandu-vali omawaneno epandu-vali.