Eholololo

8 Etyi aikula oselu ya pandu-vali, keulu akukala onominutu mbuhungi po 30 tyati vala filuu. 2 Andyimono onoandyu epandu-vali mbutai ponthele ya Huku, mbapewa ononkhuino epandu-vali.

3 Akuya oandyu onkhuavo yakuata otyilindo* tyokuyokela oisesu, aitalama pomutala wovilikutila iya aipewa oisesu onyingi-nyingi pala okuava kumwe nomalikuambelo ovasukuki aveho komutala wovilikutila wo olu, ukahi komutwe wotyipundi tyoutumini. 4 Omuihi woisesu watunda peke lioandyu aweende no ku Huku kumwe nomalikuambelo ovasukuki. 5 Mahi liwa-liwa oandyu aikuate otyilindo tyokuyokela oisesu, aityiyulisa otupia two komutala wovilikutila, aityiyumbu kombanda yohi. Iya akuivala omititimo, nonondaka, nomiliakulu, notyinimawe. 6 Iya onoandyu epandu-vali mbokuna ononkhuino epandu-vali mbelipongiya pala okumbuhika.

7 Oandyu yo tete aihiki onkhuino yayo. Iya akumoneka ongandavila notupia tuahonya nohonde, aviyumbwa kombanda yohi; iya onthele ya tatu yohi aipi, nonthele ya tatu yomiti aipi, iya eholi aliho liatalala alipi.

8 Oandyu ya vali aihiki onkhuino yayo. Iya otyipuka tyimwe tyikahi ngomphunda onene ikahi nokupia, atyiyumbwa melunga. Iya onthele ya tatu yelunga aityituka ohonde; 9 onthele ya tatu yovipuka vina omuenyo* vikahi melunga ainkhi iya onthele ya tatu yo nombapolo aihanyauka.

10 Oandyu ya tatu aihiki onkhuino yayo. Iya keulu akutoko onthungululu imwe onene yatema ngokandiyelo, aitokela konthele ya tatu yonondongi no ponondyivi-ndyivi mbomaande. 11 Onthungululu oyo itiwa Otyifo Tyilula Unene. Iya onthele ya tatu yomaande ailulu, iya ovanthu ovanyingi avankhi mokonda yomaande aluliswa.

12 Oandyu ya kuana aihiki onkhuino yayo. Iya onthele ya tatu yekumbi nonthele ya tatu yohanyi no yononthungululu ainthikoveleswa, opo onthele yatatu yotyinthiki nonthele ya tatu yotyitenya vinthikoveleswe.

13 Iya ame andyitale, iya andyiivi onkhombe inthanana pokati keulu aipopila peulu okuti: “Tatiei, tatiei, tatiei vana vakala kombanda yeheke, mokonda onoandyu ononthatu mbahupa-po apa katutu nambo mambuhiki ononkhuino mbambo!”