Esitala

1 Menima lyo tete lioutumini wa Silu+ ohamba yo Pelesa, opo Siovaa afwisepo onondaka apopilile Selemiya,+ Siovaa aavela ondundo Silu, ohamba yo Pelesa ipopie otyitumino kovanthu aveho moutumini wae aityihoneka momukanda. Otyitumino otyo,+ tyati:

2 “Silu ohamba yo Pelesa wati: ‘Siovaa Huku komaulu, wampha omauhamba atyo aeho kombanda yohi,+ wandyavela otyilinga tyokumutungila ondywo ko Selusalei,+ mo Sundaa. 3 Ou pwoonwe wahula kovanthu vae, Huku yae akale nae. Alondeke no ko Selusalei, mo Sundaa akapindula-po ondywo ankho ikala mo Selusalei, ondywo ya Siovaa,* Huku yo Isilayeli, Huku yotyotyili. 4 Aveho ononthunda-vilongo oku vekahi,+ vakwatesweko naava velitungaila navo,* vapewe opalata, noolu, nomalumono, novipako, kumwe noviawa ovikwavo valinga nomutima auho, viondywo ya Huku yotyotyili,+ ankho ikala ko Selusalei.’”

5 Pahe onohongoi mbonombunga momuhoko wa Sundaa, no wa Mbesamii, novanakwa, nomuhoko wa Levii, novanthu aveho ankho Huku yotyotyili aavelele ondundo — avalongela vainduke opo vakapindule-po ondywo ya Siovaa, ankho ikala ko Selusalei. 6 Aveho ankho vakala navo pomaumbo, avevekwatesako mokuvepa* opalata, noolu, nomalumono, noviunda, novipuka oviwa kumwe noviawa ankho valinga nomutima auho.

7 Ohamba Silu nayo aitumu okukapola ovityuma viondywo ya Siovaa, vina Nambukondonosole apolele ko Selusalei, evipake mondywo yotyika-huku tyae.+ 8 Silu ohamba yo Pelesa, alingi Mitilendate omupaki womalumono, akale onkhalamutwe yokukapola ovityuma ovio, ngwe ahoneka ovityuma aviho, eviaavela Sesimbasale,*+ ohongoi yo Sundaa.

9 Ovityuma ahoneka ovievi: Ovityuma vioolu vikahi ngosesu 30, novityuma 1.000 viopalata vikahi ngosesu, novityuma 29 viokupinga povikwavo, 10 novilindo vioolu 30, novilindo viopalata 410, novityuma ovikwavo vali 1.000. 11 Ovityuma aviho vioolu, no viopalata, ankho vituuka 5.400. Sesimbasale evityindi aviho etyi ovikonde+ viatunda ko Mbambilonia okukondoka ko Selusalei.