Okutunda

11 Siovaa atolela Mwisesi okuti: “Mandyietela vali Falaoo ovihuna* notyilongo tyo Isitu. Tyina namalingi ngootyo, ovanthu meveyeke vatunde muno.+ Tyina ameveyeke vende, mevetaata muno.+ 2 Pahe popila ovanthu aveho, tyilinge ovalume tyilinge ovakai, vena okwiita ko vomunthele yavo ovipuka vyo palata no vioolu.”+ 3 Siovaa akwatesako ovanthu vae, avahumbwa nova Isitu. Tyihe-otyo vala, Mwisesi ankho ulingwa onthilo motyilongo tyo Isitu, tyilinge ovaundapi va Falaoo tyilinge ovanthu ova Isilayeli.

4 Mwisesi apopi okuti: “Siovaa wati: ‘Tyina tyiti kombimba mandyikwata mo Isitu,+ 5 oviveli aviho vyo motyilongo tyo Isitu mavinkhi,+ okuhimbikila kotyiveli tya Falaoo upumphi kotyipundi tyoutumini atee kotyiveli tyomupika ukunkha kemanya; noviveli viovipako aviho mavinkhi.+ 6 Motyilongo atyiho tyo Isitu mamukakala omaluyave omanyingi, ehenekale-ko nkhele tya kohale, ahakakalakala-ko vali.+ 7 Notyimbwa vala kamatyikaweya* ova Isilayeli, tyilinge ovanthu tyilinge ovipako viavo, opo munoñgonoke okuti etyi Siovaa alinga ova Isitu tyelikalela neetyi alinga ova Isilayeli.’+ 8 Ovaundapi vove aveho tyili maveya kwaame, avelipetamena kwaame, avati: ‘Enda, noove novanthu vove vekulandule.’+ Tyina vamapopi ngootyo ame andyiende.” Etyi amana okupopia, atundu pu Falaoo tyanumana unene.

9 Siovaa atolela Mwisesi okuti: “Falaoo kamemutavela+ opo komaelema nalinga motyilongo tyo Isitu+ kuyawiswe vali.” 10 Ovo Mwisesi na Alau avalingila omaelema oo aeho Falaoo,+ mahi Siovaa ayeke Falaoo atene omutima, Falaoo ahayeke ova Isilayeli vatunde motyilongo.+