Omukanda wo Tete wa Samuwele

17 Ova Filisitiya+ avaongiya omaswalali avo* opo vahimbike okulwa. Aveliongiya ko Sokoo,+ yo ko Sundaa, avaongo onthanda pokati ko Sokoo no Aseka,+ ko Efesi-Ndamii.+ 2 Saulu novalume vo Isilayeli aveliongiya, avaongo onthanda Mevota* lyo Elaa,+ avelionganeka opo vakalwise ova Filisitiya. 3 Ova Filisitiya avakala nthele imwe yomphunda, ova Isilayeli avakala konthele onkhwavo, evota alikala pokati kavo.

4 Monthanda yova Filisitiya amutundu eswalali limwe liapama unene; litiwa o Ngoliya+ wo ko Ngate,+ liali nonokovandu epandu neke like* moule. 5 Ankho livala ekapasete liotyivela tyotyitasu notyikutu tyondyakulilo* tyalingwa notyitasu. Otyikutu tyondyakulilo tyilema+ onosikulu 5.000.* 6 Liavala ondyakulilo yotyitasu kovikalo,+ liatyinda otyivela tyotyitasu tyatwa ngeonga momwongo. 7 Omupii weonga lialio ankho ukahi ngomuti wovokutunga*+ otyivela tyeonga lialio tyilema onosikulu 600.* Wondyakulilo yalio ulikala komutwe walio. 8 Ngoliya atalama alaveleya omaswalali o Isilayeli+ ati: “Omokonda yatyi onwe mweliongiyila opo mulwe noonthwe? Okuti ame hame-ko omu Filisitiya, onwe kamuvaundapi va Saulu? Holovonei omunthu opo eye tulwe nae. 9 Ine utyivila okulwa naame andyipaa, onthwe matukala ovapika venyi. Mahi, ine ame ndyimuvila andyimwiipaa, onwe mamukala ovapika vetu amutuundapela.” 10 Omu Filisitiya ayawisa-ko okuti: “Hono ame nahanda okutala* olie pomafwalali o Isilayeli+ malu naame. Tumei omunthu opo tulwe nae!”

11 Etyi Saulu nomafwalali aeho o Isilayeli veiva onondaka ombo mbo mu Filisitiya, avatili unene owoma, avateketa.

12 Ndaviti ankho omona wo mu Efalata+ wo ko Mbelei+ yo Sundaa, utiwa o Sesee+ una ovana etyinana,+ pononthiki mba Saulu opo wakulupa-le. 13 Ovana vetatu va Sesee, ovakulu vatyo, vaile kovilwa na Saulu.+ Ovana vae vetatu vokwaile kovilwa, otyiveli tyatyo o Eliyambe,+ wa vali o Ambinandambe,+ wa tatu o Samaa.+ 14 Ndaviti omututu watyo,+ ovakulu vatyo vetatu vaile na Saulu.

15 Ndaviti uti aende ku Saulu akondoka akalisa onongi+ mba he ko Mbelei. 16 Mokweenda kwononthiki 40 komuhuka no kokangulohi, omu Filisitiya ufwena-po otyo evekwela.

17 Onthiki imwe Sesee apopila Ndaviti omona wae okuti: “Pola o efa* ei yononkhange no nombolo ombu 10, twaila liwa-liwa ovakulu vove monthanda. 18 Twala ononthonthi ombu 10,* kononkhalamutwe mbo 1000. Tupu tala ovakulu vove etyi vekahi, oeta otyipuka tyimwe tyilekesa okuti vekahi nawa.” 19 Ovakulu vae ankho vena Saulu novalume ovakwavo vo Isilayeli Mevota* lyo Elaa,+ vekahi nokulwa nova Filisitiya.+

20 Ndaviti apinduka-po komuhuka, onongi embusila omunthu umwe opo embuyunge. Ngwe alongela ovipuka aende, ngeetyi Sesee emutuma. Etyi ehika monthanda, omaswalali ekahi nokwenda no motyipembe tyovilwa, otyo vaulula onkhu yovilwa. 21 Ova Isilayeli nova Filisitiya, avaende motyipembe tyovilwa avelitalamena opo valwe. 22 Liwa-liwa Ndaviti asi-po ovityuma viae nomuyungi wovityuma, ahateka atee motyipembe tyovilwa. Etyi ehika-mo apulu ovakulu vae vekahi nawa.+

23 Etyi ekahi nokupopia navo, Ngoliya+ eswalali limwe liapama unene lyo va Filisitiya lyo ko Ngate, alitundu motyipembe tyova Filisitiya tyovilwa, awane onondaka apopile-ale,+ Ndaviti emwivi. 24 Etyi ova Isilayeli aveho vamona Ngoliya avakala nowoma avakahateka.+ 25 Ovalume vo Isilayeli avapopi okuti: “Mulwete omulume oo, ukahi nokuya? Uya okukwela* ova Isilayeli.+ Omulume umwipaa, ohamba maimwavela omalumono omanyingi, tupu maimwavela omona wae omufikwena,+ ovanthu vomeumbo lya tate yae mo Isilayeli kamavakuluminywa okufeta elilimu nokuundapa.”

26 Ndaviti apulu ovalume vekahi ponthele yae okuti: “Oityi matyipewa omulume maipaa omu Filisitiya oo, amane-ko emone lyo Isilayeli? Olie omu Filisitiya oo, wahapitile ekwendye opo alinge omukwele* omaswalali a Huku una omwenyo?”+ 27 Avemupopila etyi vapopile-ale, avati: “Otyo matyipewa omulume memwipaa.” 28 Etyi Eliyambe omukulu wae+ emwiva ukahi nokutomphola novalume, anumana unene na Ndaviti emupulu okuti: “Weya okupola-tyi kuno? Olie wasa nonongi mbuna mbuhehi moluhandya?+ Ame ndyityii nawa okuti ove una elungavi, wahanda vala ovivi momutima wove; weya vala okutala ovilwa.” 29 Ndaviti akumbulula okuti: “Oityi ñgoo nalinga hono? Ame napula vala!” 30 Aende vali ko vakwavo ngatyo ñgoo evepula,+ ngwe ngatyo ñgoo vemukumbulula.+

31 Vamwe aveivi onondaka mba Ndaviti, avekembupopila Saulu. Mokonda yotyo, Saulu atumu vekemwihane. 32 Ndaviti apopila Saulu okuti: “Muhakalei tyasoya* mokonda yo mu Filisitiya oo. Omuundapi wove makalwa nae.”+ 33 Mahi, Saulu apopila Ndaviti okuti: “Ove kupondola okukalwa no mu Filisitiya oo, mokonda ove nkhele umona+ ngwe wakala-le eswalali* tundee poukwendye.” 34 Ndaviti apopila Saulu okuti: “Ame omuundapi wove, ndyimunthita wonongi mba tate; etyi nthiki imwe onkhulika+ (tupu nehambaungu) yapolele motyunda ongi, 35 andyiilandula andyiilwisa, andyiyovola ongi komulungu wayo. Etyi yeya no kwaame, andyiikwate momunyino,* andyiikame, andyiipaa. 36 Omuundapi wove waipaele onkhulika nehambaungu* tupu otyo malingi omu Filisitiya oo wahapitile ekwendye mokonda wakwela* omaswalali a Huku una omwenyo.”+ 37 Ndaviti ayawisa-ko okuti: “Siovaa, wokwandyovolele kenkhanya lionkhulika no liehambaungu, tupu mandyovola pomavoko omu Filisitiya oo.”+ Saulu apopila Ndaviti okuti: “Enda, Siovaa akale noove.”

38 Pahe Saulu avaleka Ndaviti ovikutu viae viovilwa. Emupake ekapasete liotyitasu komutwe, emuvaleka otyikutu tyondyakulilo. 39 Ndaviti amaneka omutunga movikutu aende, mahi ehetyivili okweenda mokonda ketyiliyile ovipuka ovio. Ndaviti apopila Saulu okuti: “Himetyivili okweenda novipuka evi, mokonda hevityiliyile.” Ndaviti elipolo-vio. 40 Akwata otyimuti tyae, akoyo omamanya etano ekahi nawa mondongi,* eepake motyipapo tyae tyokulisa,+ onthwala yae una-yo peke. Ahimbika okufwena ko mu Filisitiya.

41 Omu Filisitiya ahimbika okufwenaina vali ku Ndaviti, wondyakulilo yae otyo eli komutwe wae. 42 Etyi omu Filisitiya amona Ndaviti, atale okuti omona vala omututu una otyivala otyiwa, ahimbika okumukwela.+ 43 Omu Filisitiya apopila Ndaviti okuti: “Okuti ame ndyityimbwa+ etyi uya na kuno notyinthimbu tyotyimuti?” Omu Filisitiya, ahimbika okuteyela onkhano Ndaviti, otyo aihana ono huku mbae. 44 Omu Filisitiya apopila Ndaviti okuti: “Endyu kuno, ohitu yove mandyiavela oviila novinyama viofika.”

45 Ndaviti akumbulula omu Filisitiya okuti: “Ove ukahi nokuya no kwaame nomutunga, neonga,+ notyivela tyatwa ngeonga, mahi ame ndyiya kwoove menyina lya Siovaa womambamba ovita,+ Huku yomafwalali o Isilayeli, una ove walinga omukwele.*+ 46 Hono, Siovaa mekupakula pomavoko ange;+ ame mandyikwipaa andyikutete omutwe. Hono mandyiavela ovivimbi viomaswalali ova Filisitiya oviila novinyama viohika. Ovanthu aveho kombanda yohi, mavanoñgonoka okuti mo Isilayeli muna Huku.+ 47 Ovanthu aveho veliongiya pano* mavanoñgonoka okuti, Siovaa kayovola nomutunga nii neonga,+ mokonda ovilwa ovia Siovaa,+ memupakula amuho pomavoko etu.”+

48 Ngootyo omu Filisitiya afwene vali ku Ndaviti na emulwise, mahi Ndaviti ahateka no momutete wovilwa, opo alwise omu Filisitiya. 49 Ndaviti apake okuvoko motyipapo tyae, apolo-mo emanya like elipake monthwala, ayumbu. Emanya alivete mombamba yo mu Filisitiya alinyingila, atoko aiki otyipala pohi.+ 50 Ngootyo, Ndaviti afindi omu Filisitiya nonthwala, nemanya like. Ndaviti atokesa omu Filisitiya, emwipaa namphila ankho ehena omutunga pomavoko.+ 51 Ndaviti ahateka aliatelela ko mu Filisitiya. Pahe apolo-mo omutunga wo mu Filisitiya motyilalo,+ amanuhula okumwipaa etyi emuteta omutwe. Etyi omaswalali ova Filisitiya amona okuti efwalali liavo liokwapama liankhia avakahateka.+

52 Ovanthu vo Isilayeli novo Sundaa avahimbika okuulula onkhu, avataata ova Filisitiya aveho okutuka komulola+ atee konombundi mbo Ekoloo.+ Ovivimbi viova Filisitiya aviliyandyana okutuka mondyila yo Saalaii+ atee ko Ngate no ko Ekoloo. 53 Etyi ova Isilayeli vakondoka kokutaata ova Filisitiya, avapundu ovipuka ankho vikahi mononthanda mbavo.

54 Ndaviti apolo omutwe wo mu Filisitiya, eutwala ko Selusalei mahi ovihongati viomu Filisitiya evipake mekaka liae.+

55 Pononthiki Saulu amona Ndaviti ukahi nokwenda no ko mu Filisitiya, apulu Ambinele+ omutumini womafwalali okuti: “Ambinele olie he yomona+ oo?” Ambinele ati: “Nekutukaila umwe, tatekulu hamba una omwenyo,* he himwii!” 56 Ohamba aiti: “Ovola okunoñgonoka olie he yomona oo.” 57 Etyi Ndaviti aipaa omu Filisitiya akondoka, Ambinele emutwala ku Saulu, Ndaviti ankho una omutwe wo mu Filisitiya+ pomavoko. 58 Saulu emupulu okuti. “Mona wange, ho olie?” Ndaviti akumbulula okuti: “Tate omuundapi wove Sesee+ omu Mbelei.”+