Eholololo Swau Amona

4 Pahe, tala! ndyikati ñgaa epito liaikuka keulu, ondaka yo tete umwe neiva ipopia naame uti vala onkhwino; aiti: “Endyu na kuno londa, mandyikulekesa ovipuka vina okumoneka.” 2 Nati vala monee otyo, nkhati ñgaa ndyili mononkhono mbomphepo, tala! kuna otyipundi tyounene tyili keulu, kotyipundi tyatyo kuna ou upumphi-ko.+ 3 Ou upumphi-ko otyivala tyae tyilinga ngo tyemanya liosasipe,+ no lyo salundiu,* kononthele mbotyipundi tyatyo kuna omphumba* yotyivala tyemanya liosimelanda.+

4 Otyipundi tyounene tyili pokati kovipundi 24 viounene, kwapumphama ovakulu 24,+ vavala ovikutu vitwela, vena onohala mboolu komitwe. 5 Potyipundi tyounene peli nokutunda omiliakulo,+ nonondaka, nomititimo;+ pena ovikandiyelo epandu-vali viatema vieliseta notyipundi otyo, ovikandiyelo ovio, onomphepo epandu-vali mba Huku.+ 6 Komutwe wotyipundi kuna otyipuka tyimwe tyilinga ngelunga liovitulu,+ likahi ngokilisitale.

Pokati potyipundi tyounene* pena ovipuka vikwana vina omwenyo vieyula momaiho,+ no komutwe no konyima, vieliseta notyipundi. 7 Otyipuka tyotete tyina omwenyo, uti onkhulika,+ tya vali uti ondume-tane,+ tya tatu otyipala uti o tyomunthu,+ etyi tyakwana+ uti onkhombe inthanana.+ 8 Ovipuka viokuna omwenyo aviho vina omavava epandu-epandu; vieyula vala momaiho eliseta navio no mombwelo.+ Apeho, tyitenya na tyinthiki viti: “Omusukuki, omusukuki, omusukuki o Siovaa*+ Huku, Wokuvila Atyiho, ou wali-ko, uli-ko, uli nokuya.”+

9 Apeho tyina ovipuka viokuna omwenyo vihilivika, avipe omunkhima, otyo vipandula Ou upumphi kotyipundi tyounene, Ou ukala-ko umwe apeho,+ 10 ovakulu 24+ velipetamena ku Ou upumphi kotyipundi tyounene, avafende Ou ukala-ko umwe apeho, avayumbu onohala mbavo ponthele potyipundi tyounene, otyo vati: 11 “Ove Siovaa* Huku yetu, ove watamo mokuhilivikwa,+ mokupewa omunkhima,+ nounene,+ mokonda ove watunga ovipuka aviho,+ viatungwa tupu vili kouye, o kokwahanda kwove.”