Wo Tete Wahonekelwa Ova Kolindu

8 Pahe, ndyipopie okuyemba kokulia kupewa ovika-huku:+ Otyo onthwe atuho twetyinoñgonoka-le.+ Enoñgonoko lipa omunthu okulipakako, mahi olwembia lutunga.+ 2 Ine omunthu usoka ati otyipuka ndyityii, opo oo nkhele ketyinoñgonokele-ale nawa ngeetyi ankho ena okutyinoñgonoka. 3 Omunthu uhole Huku, oo wiiwe na Huku.

4 Etyi pahe tyokulia kupewa ovika-huku, tutyii okuti otyika-huku tyitupu-ale etyi tyilinga+ mouye, Huku wike vala, kutupu vali omukwavo.+ 5 Namphila kuna evi vati ono huku, tyilinge vili keulu tyilinge vili kombanda yohi,+ ngeetyi kuna “ono huku” ononyingi novo “tatekulu” ovanyingi, 6 onthwe mwene Huku yetu wike vala,+ Tate,+ kwe oko kutunda ovipuka aviho, noonthwe twakala-ko tupu oe;+ kuna vala Tatekulu wike Sesusi Kilisitu, mwe omo mwalingilwa ovipuka aviho,+ noonthwe twakala-ko tupu oe.

7 Mahi otyo ha aveho vetyii.+ Ava vamwe tyokwetyiliyile unene ovilolo, okulia valia vekutala ngatyina kwapakulilwa ovilolo,+ tyomutima wavo wahakolele, tyivesilisa umwe komutima.+ 8 Ngwe hakulia-le kutufweneka ku Huku;+ kamatweetesa-le onkhenda okwehekuli, atwahamatiwa-le tuli vali nawa tyokwekulia.+ 9 Elowei, tyenyi tyokulinga etyi mwene mwahanda, tyahalinge tyokutokesisa vakwenyi vokwahapamene.+ 10 Ine umwe ukumona, ove wokwanoñgonoka ovipuka uli mondywo yokufendela ovilolo ulia, opo ou wahakolele, omutima wae kamaumuti umwe neevi viapakulwa kovilolo ndyilia? 11 Pahe ove mokonda wanoñgonoka ovipuka, atyinyono mukwenyi wahakolele, unyona mukwenyi, ou Kilisitu ankhila.+ 12 Vakwenyi tyina muvelinga ngootyo, muvepaka otyipute kombungo ngwe omitima viavo kaviakolele,+ muli nokukwata onkhali ku Kilisitu. 13 Otyo ame ndyitila, tyina okulia ohitu tyitokesa mukwetu, opo hili umwe vali ohitu, nahatokese mukwetu.+