Okutunda

39 Avatungu omuvalo ukahi nawa mavaundapa nao momphangu ikola, nomulinya omungole, nomulinya womainya ongi wotyivala tyonkhula, nomulinya wakuhuka.+ Avalingi omuvalo ukola wa Alau+ ngeetyi Siovaa atumine Mwisesi.

2 Alingi otyikutu tyounakwa+ tyoolu nomulinya omungole, nomulinya womainya ongi wotyivala tyonkhula nomulinya wakuhuka, nomulinya ukahi nawa wapohwa. 3 Avalingi ovimphemu vioolu viatyopwa nohamala, eviteta-teta omilinya, avevipande nomulinya omungole, nomulinya womainya ongi wotyivala tyonkhula nomulinya wakuhuka, nomulinya ukahi nawa, avatungu otyikutu otyo. 4 Avalingila ounyanga uvali, komapepe wahonyeka ononthele onombali, mbotyikutu tyomunakwa no yo komutwe no yo konyima. 5 Otyinyanga tyo* peimo tyokwakutwa motyikutu tyomunakwa opo tyeheliviye,+ natyo atyitungwa novipuka ovio: oolu nomulinya omungole, nomulinya womainya ongi wotyivala tyonkhula nomulinya wakuhuka, nomulinya ukahi nawa wapohwa, ngeetyi Siovaa atumine Mwisesi.

6 Avapake oumanya wo onikisi poupato woolu, avahoneka-po omanyina ovana va Isilayeli, aveehoneka ngeetyi tyilingwa otyilimbo.+ 7 Eepake povinyanga viokomapepe aakala omamanya okuhinangela ovana va Isilayeli,+ ngeetyi Siovaa atumine Mwisesi. 8 Pahe alingi otyinyanga tyo ponthulo+ ngeetyi alinga otyikutu tyounakwa: Tyatungwa noolu, nomulinya omungole, nomulinya womainya ongi wotyivala tyonkhula, nomulinya wakuhuka, nomulinya ukahi nawa wapohwa.+ 9 Otyinyanga tyo ponthulo nga tyaputikwa tyikala nomavindi ekwana. Otyipuka tyatungwa nga tyaputikwa tyilifwe potyikanda tyokuvoko* moule no mounthanda. 10 Avetyipake omamanya elienda omitete vikwana. Omutete wo tete aveulingi nomamanya o lumbi, notopasiu nosimelanda. 11 Omutete wa vali aveulingi nomamanya o tulukesa nosafila nosasipe. 12 Omutete wa tatu aveulingi nomamanya o léshem,* no angata, no ametesita. 13 Omutete wa kwana aveulingi nomamanya okilisolitu, no onikisi, no sande. Omamanya aveepake poupato woolu. 14 Omamanya oo elifwe pomanyina ovana va Isilayeli 12, omamanya oo aeho aveehoneka ngeetyi tyihonekwa otyilimbo. Emanya like, enyina like liomihoko 12.

15 Pahe avalingila otyinyanga tyo ponthulo oulienge woolu yatyo mwene+ wapotaikwa, ukahi ngotyilanda. 16 Tupu avalingi oupato uvali woolu, nomayulu evali oolu, omayulu evali oolu eepake komavava evali otyinyanga tyo ponthulo. 17 Avahake oulienge uvali woolu, momayulu o pomavava otyinyanga tyo ponthulo. 18 Oulienge oo uvali aukwata poumphana woupato uvali aukutilwa komapepe, motyinyanga tyomunakwa komutwe. 19 Avalingi omayulu evali oolu, aveepake komavava evali otyinyanga tyo ponthulo, omayulu oo aveepakela mokati apilukila motyikutu tyomunakwa.+ 20 Avalingi omayulu evali oolu, aveepake kondye yotyikutu tyomunakwa, pombwelo younyanga wopomapepe apa tyahonyena, peulu liotyinyanga tyaunda-unda tyokukuta peimo. 21 Akutila otyinyanga tyo ponthulo motyikutu tyomunakwa, nokapanda okangole avekekutila momayulu, opo otyinyanga tyo ponthulo tyahahondovoke kotyikutu tyomunakwa peulu liotyinyanga tyaunda-unda tyokukuta peimo, ngeetyi Siovaa atumine Mwisesi.

22 Pahe alingi esanya lihena omavoko liotyikutu tyomunakwa, aliho elilingi nomulinya omungole.+ 23 Omunyino wesanya liehena omavoko aukala pokati nakati, ngomunyino wotyikutu tyondyakulilo tyovakwa-vita, omunyino watyo ankho una omwoyo wapamphwa opo tyahatanduke. 24 Komwoyo wesanya lihena omavoko alingilako omalomaa nomulinya omungole, nomulinya womainya ongi wotyivala tyonkhula, nomulinya wakuhuka apohelwa kumwe. 25 Alingi oungendyo woolu yatyo mwene, pokati koungendyo atyokaika-po omalomaa, okuliseta nesanya aliho lihena omavoko. 26 Atyokaika oungendyo nomalomaa, ongendyo ike, elomaa like, okuliseta nomwoyo wesanya aliho lihena omavoko, livalwa novanakwa opo valinge ovilinga, ngeetyi Siovaa atumine Mwisesi.

27 Avalingila Alau, novana vae,+ ovikutu ovile nomulinya ukahi nawa. 28 Avalingila Alau ombuya+ nomulinya ukahi nawa; avalingila vali ovana va Alau onombuya+ nomulinya ukahi nawa, avalingi ovikalasau viti ponongolo*+ nomulinya ukahi nawa wapohwa; 29 tupu avalingi otyinyanga tyokulikuta peimo, nomulinya ukahi nawa wapohwa, nomulinya omungole, nomulinya womainya ongi wotyivala tyonkhula, nomulinya wakuhuka, ngeetyi Siovaa atumine Mwisesi.

30 Avalingi omulami woolu yatyo mwene waliaima, wenyingilikilo likola lielipakulo,* ngeetyi tyilingwa otyilimbo avamate-ko onondaka mbati: “Ousukuki owa Siovaa.”+ 31 Avapake momulami okapanda kalingwa nomulinya omungole, opo veukutile mombuya, ngeetyi Siovaa atumine Mwisesi.

32 Avamane otyilinga atyiho tyokutunga ekaka liefendelo, nohinge yomaliongiyo, ova Isilayeli avalingi atyiho Siovaa atumine Mwisesi.+ Avetyilingi umwe nawa.

33 Pahe avatwala ku Mwisesi ekaka liefendelo,+ ohinge+ novityuma aviho: ovikongo,+ nomalukweyo,+ nomaluvala,+ nonomphandyi, novipundi vionombundi;+ 34 notyiyambelo tyombandwa yongi ombambi,+ notyiyambelo tyombandwa yotyinyama otyikwavo, notyinyanga tyili komutwe wotyikasa;+ 35 Notyikasa Tyoumbangi, nomitengi viatyo,+ notyipato tyatyo;+ 36 nomesa novityuma viatyo aviho,+ nonombolo mbokulekesa; 37 nokandiyelo+ konomphalavinga koolu yatyo mwene, novikandiyelo viako, viaenda omutete, novityuma viako aviho,+ nomulela wokuketemesa;+ 38 nomutala+ wovilikutila woolu, nomulela wokulembula,+ nombao+ yokunika nawa, notyinyanga+ tyo pombundi yohinge; 39 nomutala wovilikutila wotyitasu,+ notyivela tyatyo tyotyitasu, nomitengi viatyo,+ novityuma viao aviho+ nombasia nokamutala katyo;+ 40 novinyanga viopepata nonomphandyi mbatyo, novipundi viatyo vionombundi,+ notyinyanga+ tyo pombundi yepata, nonongoi mbatyo, nonomphehe mbatyo,+ novityuma aviho viokuundapa mekaka liefendelo, ohinge yomaliongiyo; 41 nomivalo viatungwa nawa mavivalwa no vokuundapa momphangu ikola, nomivalo vikola vya Alau omunakwa,+ nomivalo viovana vae ovanakwa.

42 Ova Isilayeli avalingi ovilinga aviho+ Siovaa atumine Mwisesi. 43 Etyi Mwisesi atala atyiho vaundapa amono okuti valinga ngeetyi Siovaa atumine; Mwisesi eveitila ku Huku eveyambe.