Selemiya

44 Ondaka ayeendela Selemiya yatumwa kova Sundaa aveho vakala motyilongo tyo Isitu,+ no vokukala ko Mingindole,+ no ko Tafene,+ no ko Nofe,*+ no kotyilongo tyo Patolo,+ yati: 2 “Etyi otyo tyapopia Siovaa womambamba ovita, Huku ya Isilayeli, wati: ‘Onwe mwevimona ovihuna aviho naetela o Selusalei+ nomapunda-umbo aeho o mo Sundaa, hono ahanyauka, petupu ou ukala-mo.+ 3 Atyiho otyo o mokonda yovipuka ovivi valinga, vandeva, valingila ovilikutila+ ono huku ononkhwavo, o kumbo vafenda, ono huku vehei, noonwe kamumbwii, nii onombwale mbenyi.+ 4 Ame ndyikalela vala okumutuma ovaundapi vange ovauli, ndyiti andyivetumu andyipaleka,* otyo ndyiti: “Mwahalingei-vo ovipuka ovio vitoyesa, ovipuka ame ndyiyele.”+ 5 Mahi onwe amwahatehela, amwahayendeleka okutwi, muyeke-po ovivi mulinga viokulingila ovilikutila ono huku ononkhwavo.+ 6 Otyo onyengo yange yauyukila, nolunuma lwange lwauyukila aluyoko-po omapunda-umbo o Sundaa nomatapalo o Selusalei aayake, pahe alinga omphile, alinga ekongola, ngeetyi ekahi hono.’+

7 “Pahe etyi otyo tyapopia Siovaa Huku womambamba ovita, Huku ya Isilayeli wati: ‘Oityi mulietelela* ovihuna ñgaa, soka pahe novalume, novakai, nononkhupula nomalukembe, aveho mo Sundaa mavanyimi-mo, kamamusala omunthu nawike? 8 Oityi mundevela novilinga vyo pomavoko enyi, mulingila ono huku ononkhwavo ovilikutila motyilongo tyo Isitu, omu mwakakala? Onwe mamunkhi, ovanthu avekemutumbula pononkhano, mamukatoywa pokati kovanthu vovilongo aviho.+ 9 Okuti mwalimbwa ovivi onombwale mbenyi mbalingile, ovivi onohamba mbo Sundaa,+ novakai vavo,+ noonwe mwene, novakai venyi mulinga,+ ovivi vialingwa motyilongo tyo Sundaa no momatapalo o Selusalei? 10 Na hono kavelikondolele koututu,* kavatilile owoma,+ nii kavaendelele motyitumino tyange, kavalingile etyi natuma, etyi napa onwe nonombwale mbenyi.’+

11 “Etyi otyo tyapopia Siovaa womambamba ovita, Huku ya Isilayeli wati: ‘Ame nati umwe ndyina okumutuma ovihuna, ndyihanye-po o Sundaa aiho. 12 Mandyikakwata vokwahupa mo Sundaa, ava vatesa onkhango vahanda okwenda kotyilongo tyo Isitu vakakale-ko, ovo aveho mavakakotela umwe kotyilongo tyo Isitu.+ Mavakatoka komutunga, avankhi kondyala; okuhimbikila komona atee komukulu, mavakankhia komutunga no kondyala. Mavakateyelwa onkhano, avalingwa etyi tyitilisa owoma, avakapenywa, avakalingwa omukwele.+ 13 Mandyimonesa emone ava vakala motyilongo tyo Isitu, ngeetyi namonesa emone o Selusalei nomutunga, nondyala, nomukihi.*+ 14 Vokwesala mo Sundaa vakakala kotyilongo tyo Isitu, kamavakahupa, nii kamavakayovoka, motyilongo tyo Sundaa kavakakondoka-mo vali. Mavekesuka umwe nokukondoka,* vakakale-mo, mahi kamavakondoka, mavakandoka-mo nkhwali ovava vala vokwakahombokele vehehi-ale.’”

15 Ovalume aveho vetyii okuti ovakai vavo valingilile ovilikutila ono huku ononkhwavo, novakai aveho vanepwa vatalamene-po, vali otyiumbe-umbe tyimwe otyinene, novanthu aveho vakalaile ko Patolo,+ kotyilongo tyo Isitu,+ avakumbulula Selemiya avati: 16 “Kamatutavela ondaka wetupopila menyina lya Siovaa. 17 Mahi, onthwe matukwatepo umwe vala ondaka yatunda momilungu vietu, matulingila ovilikutila Onkhai-hamba yo Keulu,* atumutili oviawa viokunwa,+ ngeetyi twalingile, noonthwe nonombwale mbetu, nonohamba mbetu, novanene vatyo, momapunda-umbo o Sundaa no momatapalo o Selusalei, etyi twali nokulia okunyingi, etyi twahakambele natyike, pweetyi twehenemone ovihuna. 18 Etyi twayekapo okulingila ovilikutila Onkhai-hamba yo Keulu,* nokumutila oviawa viokunwa, atutokela moluhepo, atunyimwa-ko nomutunga, nondyala.”

19 Ovakai navo avapopi avati: “Pweetyi apa tulingila ovilikutila Onkhai-hamba yo Keulu,* tumutila oviawa viokunwa, okuti twalingaile omungome wotyilikutila welifwa nonkhai-hamba, atumutili oviawa viokunwa otyo ovalume vetu vehetyihandele?”

20 Pahe Selemiya apopila ovalume aveho, novakai vavo, novanthu aveho eli nokupopia navo ati: 21 “Ovilikutila onwe, nonombwale mbenyi, nonohamba mbenyi, novanene vatyo, novanthu votyilongo mwalingila momapunda-umbo o Sundaa, no momatapalo o Selusalei+ — Siovaa wevihinangela, vieya komutima wae! 22 Pahe Siovaa ketyivilile vali okumuyeka vala novipuka ovivi onwe mulinga, ovipuka vitoyesa onwe mwalinga, otyilongo tyenyi tyahanyauka-po, tyalinga ekongola, otyilongo tyitilisa owoma, vetyitumbula pokuliteyela ononkhano, kamukala vali munthu, ngeetyi tyikahi ñgaa hono.+ 23 O kombanda yenyi umwe onwe mwalinga ovilikutila ovio, mwalinga onkhali ku Siovaa, mwehetavelele ondaka ya Siovaa, mwahalandulile otyitumino tyae, neetyi apopia, neetyi alondola,* otyo ovihuna ovio viemutumbukilila, ngeetyi tulwete ñgaa hono.”+

24 Selemiya apopila vali ovanthu aveho, novakai aveho ati: “Tehelelei ondaka ya Siovaa amuho onwe vo Sundaa muli motyilongo tyo Isitu. 25 Etyi otyo tyapopia Siovaa womambamba ovita, Huku ya Isilayeli wati: ‘Etyi onwe novakai venyi mwapopia nomilungu vienyi, mwetyilinga umwe nomavoko enyi, onwe mwatile: “Mwene matutyilingi etyi twapopile, tyokulingila ovilikutila Onkhai-hamba yo Keulu,* nokumutila oviawa viokunwa.”+ Onwe vakai mamulingi umwe etyi mwapopile, mamulingi umwe etyi mwapanga.’

26 “Pahe tehelei ondaka ya Siovaa amuho onwe vomo Sundaa mukala motyilongo tyo Isitu: ‘“Ame ndyiana, ndyitukaila enyina liange enene,” o Siovaa wetyipopia, “okuti motyilongo atyiho tyo Isitu mutupu vali omunthu womo Sundaa+ makaana atukaila enyina liange ati: ‘Na Tatekulu umwe Ohamba Onene Siovaa una omwenyo!’+ 27 Ame ndyikahi nokuvetala nawa ndyiveetele ovihuna, hiveetela otyiwa;+ ovalume aveho vomo Sundaa veli motyilongo tyo Isitu mavakanyimwa-ko nomutunga, nondyala, avakavomba-ko.+ 28 Kavehi mavakahupa komutunga, mavakatunda kotyilongo tyo Isitu avakakondoka kotyilongo tyo Sundaa.+ Ovanthu vomo Sundaa vokwahupa-po veya okukala motyilongo tyo Isitu mavakanoñgonoka oipi ondaka yalinga otyili, oyange ine oyavo!”’”

29 “‘Oku oko mutalela,’ o Siovaa wetyipopia, ‘okuti mandyikemutyepesako pomphangu ei, opo munoñgonoke okuti onondaka mbange mbokwati mandyimweetela ovihuna, matyilingi umwe otyili. 30 Etyi otyo tyapopia Siovaa wati: “Ame mandyipakula Falaoo Hofala ohamba yo Isitu, peke lionondyale mbae, ku ava vesuka nokumupola omwenyo,* ngeetyi napakulile Sendekiya ohamba yo Sundaa peke lya Nambukondonosole* ohamba yo Mbambilonia, ondyale yae ankho wesuka nokumupola omwenyo.”’”*+