Omukanda wa Vali Ehipululo

29 Isekiya+ wali nomanima 25 etyi akala ohamba, atumina omanima 29 mo Selusalei. Ina utiwa o Ambiya, omona wa Sakaliya.+ 2 Walingile etyi tyaviuka komaiho a Siovaa+ ngeetyi Ndaviti he-mbwale yavo alingile.+ 3 Mohanyi yo tete, yenima lyo tete ahimbika okutumina, aikula omapito ondywo ya Siovaa, eepangiya nawa.+ 4 Konyima, aihana ovanakwa, no vomuhoko wa Levii, eveongiya popalasa, koutundilo. 5 Evepopila ati: “Vana va Levii nthehelelei. Pahe lisukulei,+ amukoho ondywo ya Siovaa, Huku yovakwaukulu venyi, momphangu ikola, atyiho tyokwasila tyipolei-mo.+ 6 Ovo tate kavakalele ovakwatyili, valingile etyi tyapenga komaiho a Siovaa, Huku yetu.+ Vemuyekele-po, avapolo ovipala viavo kekaka liefendelo lya Siovaa, avemutyindamena.+ 7 Tupu vaikile omapito ondywo yo kombundi,+ avanyimi ovikandiyelo.+ Vayekelepo okuyoka onombao,*+ nokulingila Huku yo Isilayeli ovilikutila viokuyokwa+ momphangu ikola. 8 Mokonda yotyo, Siovaa anumanena o Sundaa no Selusalei.+ Ngeetyi onwe mweete nomaiho enyi mwene, ovanthu aveho vatala ovilongo evi, vatila owoma, vatumphuluka, vahika omwelwa.*+ 9 Ovakwaukulu vetu vankhia komutunga,+ ovana vetu ovakwendye novafikwena, novakai vetu, vatwalwa koupika mokonda yovipuka ovio.+ 10 Pahe etyi nahanda komutima wange, okulinga omphango na Siovaa, Huku yova Isilayeli,+ opo onyengo yae onene ituhondovoke. 11 Vana vange, ou hamuvo wokukala nondende,* mokonda Siovaa wemukoya opo mutalame ponthele yae, opo mukale ovaundapi vae,+ amuyoko ovilikutila viae.”+

12 Vomuhoko wa Levii vahimbikile okuundapa, tyati: Pomuhoko wa Kowate,+ o Maate, omona wa Amasai, na Sowele omona wa Asaliya. Pomuhoko wa Melali,+ o Kisi omona wa Ambindi, na Asaliya omona wa Seyaleleli. Pomuhoko wa Seleso,+ o Sowaa omona wa Sima, na Endene omona wa Sowaa. 13 Povana va Elisafaa, o Sinili na Seweli. Povana va Asafe,+ o Sakaliya na Mataniya. 14 Povana va Hemaa,+ o Seyeli na Simei. Povana va Sendutuu,+ o Semaiya na Usiyeli. 15 Vaongiyile ava velilandula navo, avelisukukisa, tupu avasukukisa ondywo ya Siovaa, ngeetyi ohamba yatuma, tyapopilwe na Siovaa.+ 16 Ovanakwa avanyingila mondywo ya Siovaa opo veisukukise, avapolo ovipuka aviho viasila vili mondywo ya Siovaa, avevitwala potyitali+ tyondywo ya Siovaa. Vomuhoko wa Levii avevipolo-po, avevitwala kondye, Kelola lyo Kindoloo.+ 17 Monthiki yo tete yohanyi yo tete, avahimbika otyilinga tyokusukula, avehiki kotyimato tyokwaya peulu tya Siovaa+ monthiki ya tyinana kohanyi. Vasukukile ondywo ya Siovaa mokweenda kwononthiki etyinana, avamane monthiki 16 yohanyi yo tete.

18 Pahe aveya kohamba Isekiya, avemupopila okuti: “Twasukula ondywo aiho ya Siovaa, nomutala woviawa viokuyokwa+ novityuma viao,+ nomesa yonombolo mbotyiawa+ novityuma viayo. 19 Tweiviukisa, atusukula ovityuma+ ohamba Akasi apolele-mo etyi atumina, pweetyi ahakalele omukwatyili,+ novipuka aviho vili komutwe womutala wa Siovaa.”

20 Ohamba Isekiya apinduka-po komuhuka-huka, aongiya ovakwatesiko vohamba vomepunda-umbo, avalondeka kondywo ya Siovaa. 21 Avaeta onongombe epandu-vali ononthwei, nonongi epandu-vali, nonondyona epandu-vali, novinkhombo epandu-vali ovitwei, opo valinge oviawa viononkhali mbouhamba, no mbomphangu onthyukuki, no mbo Sundaa.+ Isekiya apopila ovanakwa vokwatuka mu Alau, opo vevilinge ovilikutila komutala wovilikutila wa Siovaa. 22 Avaipaa onongombe,+ ovanakwa avapolo ohonde yatyo aveinyanye komutala wovilikutila,+ avaipaa onongi, ohonde yatyo aveinyanye komutala wovilikutila, tupu avaipaa onondyona, ohonde yatyo aveinyanye komutala wovilikutila. 23 Konyima, avaeta ovinkhombo ovitwei vioviawa viononkhali komutwe wohamba, no wovanthu aveho, aveviyambeka omavoko. 24 Ovanakwa aveviipaa, avalingi ovilikutila nohonde yavio komutala wovilikutila, opo vapate ononkhali mbo Isilayeli aiho. Mokonda, ohamba yapopile okuti, ovilikutila viokuyokwa, noviawa viononkhali vina okulingilwa o Isilayeli aiho.

25 Pononthiki opo, vomuhoko wa Levii ankho wevepaka ponomphangu mbavo mondywo ya Siovaa, otyo vena omalata okuhika, novihumba, novisandyi,+ ngeetyi tyatumine Ndaviti,+ na Ngande+ omutali wohamba, nomuuli Nataa,+ mokonda o Siovaa wapele ovauli vae ovitumino ovio. 26 Ngootyo, vomuhoko wa Levii ankho vetai noviti viokuhika vya Ndaviti, ovanakwa ankho vena ononkhwino.+

27 Isekiya atumu valingile komutala wovilikutila otyiawa tyokuyokwa.+ Tyina vahimbika okulinga otyiawa tyokuyokwa, avahimbika okwimbila Siovaa otyiimbo, otyo vahika ononkhwino noviti viokuhika vya Ndaviti Ohamba yo Isilayeli. 28 Tyina otyiimbo tyiimbwa otyo ononkhwino mbuhikwa, ewaneno aliho alilipetamena-po. Avatwalako okulinga ngootyo atee otyiawa tyokuyokwa tyapwa. 29 Etyi vamana okulinga otyilikutila, ohamba, novanthu aveho ankho ina-vo, avanyongama, avelipetamena-po. 30 Ohamba Isekiya, nononkhalamutwe, avatumu vomuhoko wa Levii vahilivike Siovaa nonondaka mba Ndaviti,+ no mbomutali Asafe.+ Nehambu enene avahilivika Huku noviimbo, avaikila konongolo, avelipetamena-po.

31 Isekiya ati: “Pahe mokonda onwe mwakoywa* mulinge va Siovaa, endywei, etei ovilikutila noviawa viokupandula mondywo ya Siovaa.” Ngootyo, ewaneno alihimbika okweta ovilikutila, noviawa viokupandula. Aveho ankho vokwahanda nomutima auho, avaeta oviawa viokuyokwa.+ 32 Oviawa viokuyokwa viaetelwe newaneno, onongombe 70, nonongi 100, nonondyona 200 ononthwei. Aviho ovio, viaavelwe, avilingilwa Siovaa ovilikutila viokuyokwa.+ 33 Oviawa vikola vaavele, onongombe 600, nonongi 3.000. 34 Mahi, ovanakwa ankho kavehi, avehetyivili okuyuva ovinyama aviho vioviawa viokuyokwa. Vana velikwai navo vomuhoko wa Levii avevekwatesako+ atee ovilinga viapwa, atee ovanakwa velisukula,+ mokonda vomuhoko wa Levii ankho valunguka* vali pokulisukukisa tyipona ovanakwa. 35 Tupu ankho pena oviawa ovinyingi viokuyokwa,+ novilenga viovilikutila viombembwa,+ noviawa viovikunwa ankho vilingilwa kumwe noviawa viokuyokwa.+ Ngootyo, ovilinga viondywo ya Siovaa, avipindulwa-po.* 36 Isekiya kumwe novanthu aveho, avahambukwa unene etyi Huku yotyotyili alingila ovanthu,+ mokonda ovipuka ovio aviho vialingwa vala liwa-liwa.