Okutunda

29 “Opo uvesukukise vakale ovanakwa vange, una okulinga ñgaa: Taindya onthane nonongi onombali mbehena tyinthembia,+ 2 nonombolo mbehena onkhiso, nonombolo mbeliseta elola mbalingwa nomulela mbehena onkhiso, nonombolo mbelisipata mbehena onkhiso mbawaekwa omulela.+ Onombolo mbulinga nohinde yanyetuka yotiliku. 3 Mbupaka mosesu, ombeeta kwaame,+ nonthane ike, nonongi onombali.

4 “Eta Alau novana vae pombundi yohinge yomaliongiyo+ ovekoho.+ 5 Nga wevekoha veetela ovikutu,+ omuvalo omule, nesanya liehena omavoko omale, notyikutu tyomunakwa,* notyinyanga tyo monthulo vivaleka Alau. Otyinyanga tyo peimo tyaunda-unda,* tyotyikutu tyomunakwa mukuta-tyo nawa.+ 6 Mukuta ombuya omupake enyingilikilo likola lielipakulo* kombuya;+ 7 pahe opolo omulela wokulembula,+ omutili-o momutwe, omulembula.+

8 “Oeta ovana vae popepi ovevaleka omivalo omile,+ 9 aveho vekuta ovinyanga vyo peimo na Alau novana vae, ovekutu onombuya; ngootyo otyilinga tyounakwa matyilingi tyavo, otyo otyitumino vena okulandula atee-tee.+ Otyo una okulinga ngootyo Alau novana vae vakale ovanakwa.*+

10 “Konyima oeta onthane pohinge yomaliongiyo, Alau novana vae avapake omavoko komutwe wayo.+ 11 Onthane oyo, iipaela Siovaa pombundi yohinge yomaliongiyo.+ 12 Lunga omunwe mohonde yonthane oiwaveka konombinga mbuli komutala wovilikutila.+ Ohonde aiho yokwahupa-po inengulila pomutala wovilikutila.+ 13 Pola ovilenga vyo komala,+ notyilenga tyo kehuli, nonoso novilenga viatyo, viyokela komutala wovilikutila ngako vitwimina.+ 14 Ohitu yonthane, nombandwa yayo, notyandya tyatyo, vitwala kokule na apa mukala, ovipake otupia. Otyo otyiawa tyononkhali mbenyi.

15 “Ponongi onombali pola-po ike, Alau novana vae avapake omavoko komutwe wayo.+ 16 Ipaa ongi opolo ohonde yatyo oinyanye kononthele ambuho mbomutala wovilikutila.+ 17 Teta-teta ovinthimbu ongi aiho, omala atyo oekoho,+ novikalo viatyo, ovinthuli ovipake vilipilukile novikwavo atee komutwe. 18 Ongi aiho iyoka aitwimina komutala wovilikutila. Otyo otyiawa tyokuyokwa tyomuniko omuwa*+ tya Siovaa. Otyiawa otyo tyokuyokwa tyilingilwa Siovaa.

19 “Konyima oeta ongi onkhwavo ovo Alau novana vae, avapake omavoko komutwe wayo.+ 20 Ipaa ongi oeta kapii ohonde yongi, oipake kokutwi kwokulio kwa Alau, no kokutwi kwokulio kwovana vae, no komutundanu wokuvoko kwokulio, no komutundanu womphai yo kokulio, ohonde oinyanye kononthele ambuho mbomutala wovilikutila. 21 Oeta kapii ohonde yokuli komutala wovilikutila, nomulela wokulembula+ oinyanye ku Alau no komuvalo wae no kovana vae no komivalo viovana vae, opo ovo Alau novana vae nomivalo viavo vikale tyasukuka.+

22 “Kongi oyo waipaa opolo-ko ovilenga viatyo, nomutyila watyo wokwavondoka, novilenga vyo komala novilenga vyo kehuli, nonoso novilenga viambo,+ notyikalo tyo kokulio, mokonda ongi oyo oyokuveavela ovilinga.+ 23 Mosesu ina onombolo mbahaile onkhiso ili pu Siovaa pola-mo ombolo ike yelivolonga nombolo ike yeliseta elola yalingwa nomulela nombolo ike yelisipata. 24 Ovipuka ovio vipaka pomavoko a Alau, no pomavoko ovana vae, ovetumu veviendaise avatwala noku omavoko avatwala noku omavoko, avikala oviawa viokwendaiswa vya Siovaa. 25 Ove ovipolo pomavoko avo, oviyokela komutala wovilikutila kombanda yotyiawa tyokuyokwa avilingila omuniko omuwa* Siovaa. Otyo otyiawa tyokuyokwa tyilingilwa Siovaa.

26 “Pola olukolo lwongi+ lwotyiawa tyokwavela ovilinga Alau, aendaisa omavoko no komutwe no konyima, tyikale otyiawa tya Siovaa tyokwendaiswa. Ohitu oyo, oyo maikala yove. 27 Ongi yokwalingwa otyilikutila tyokunaka ovo Alau novana vae, sukukisa olukolo lwatyo lwalingwa+ otyilikutila tyokwendaiswa notyikalo tyatyo tyokwalingwa otyiawa tyikola, nohitu yokwaendaiswa nohitu yokwaawa. 28 Mokonda ovio ovipuka vikola mavilingi vya Alau novana vae, otyo otyitumino ova Isilayeli vena okulandula apeho-apeho. Ovio mavilingi oviawa vikola ova Isilayeli+ vena okwava-ava. Ovio ovipuka vikola vilingilwa Siovaa viovilikutila viombembwa.+

29 “Ovikutu vya Alau vikola+ mavikalinga viovana vae+ nga valembulwa avalingi ovanakwa. 30 Omona wae wamemupingi kounakwa anyingila mohinge yomaliongiyo akaundapa momphangu onthyukuki, una okuvala ovikutu ovio ononthiki epandu-vali.+

31 “Ipaa ongi yokulembula, oitelekela pomphangu imwe ikola.+ 32 Alau novana vae mavalila+ kombundi yohinge yomaliongiyo ohitu yongi, nombolo yo mosesu. 33 Vena okulia ovipuka viaetwa viotyilikutila tyokwevelwa ononkhali putyina valembulwa vakale ovanakwa* avasukukiswa. Omunthu wahatuminwe* kapondola okulia-ko, mokonda ovipuka ovio vikola.+ 34 Ine pahupa ohitu, povilikutila viokulembula no ponombolo, onthiki mailandulako vipaka otupia,+ kavipondola okuliwa mokonda ovio ovipuka vikola.

35 “Ovo Alau novana vae velinga atyiho nekutuma. Mokala ononthiki epandu-vali nokuvelinga ovanakwa.*+ 36 Ononthiki ambuho moeta onthane oilingi otyilikutila tyokwevelwa ononkhali, osukukisa omutala wovilikutila kononkhali; lembula omutala wovilikutila ausukuka.+ 37 Mokala ononthiki epandu-vali nokusukukisa omutala wovilikutila mononkhali; usukukisa aukala omutala wovilikutila wasukuka unene.+ Komutala wovilikutila kukwate vala omunthu wasukuka.

38 “Evi una okwaava nthiki na nthiki ovievi: Onongi onombali mbuna enima like apeho-apeho.+ 39 Ondyona imwe yaava komuhuka, ondyona onkhwavo oyaave tyina ekumbi liamanyingila kokangulohi.+ 40 Ondyona yo tete yaava nomapati evali ohinde yanyetuka, oihonyeka nolitulu ike yomulela womundyambi watyo mwene,* olingi otyiawa tyokunwa, olitulu ike yovinyu. 41 Ondyona ya vali oiipaa tyina ekumbi liamanyingila kokangulohi,* olingi notyiawa tyovilia notyiawa tyokunwa ngeetyi walinga komuhuka. Molingi otyiawa tyomuniko omuwa* otyiawa tya Siovaa tyokuyokwa. 42 Otyo matyikala otyiawa tyokuyokwa tyilingilwa Siovaa nthiki na nthiki novanthu vomivo viatyo aviho, tyilingilwa pombundi yohinge yomaliongiyo, apa ame mandyililekesila kwoonwe tyina ndyipopia noove.+

43 “Pombundi opo, opo mandyikelilekesila kova Isilayeli, omphangu oyo aisukukiswa nomunkhima wange.+ 44 Mandyisukukisa ohinge yomaliongiyo, nomutala wovilikutila, andyisukukisa Alau novana vae,+ vakale ovanakwa vange. 45 Ame mandyikala nova Isilayeli, andyilingi Huku yavo.+ 46 Mwene mavanoñgonoka nawa-nawa okuti, ame, ame Siovaa Huku yavo nevepola kotyilongo tyo Isitu ndyikahi pokati kavo.+ Ame, ame Siovaa Huku yavo.