Okutunda

28 “Pova Isilayeli pola-po Alau omukulu wove kumwe novana vae, vakale ovanakwa vange, ihana+ Alau+ novana vae: O Nandambe, na Ambiyuu+ na Eliyasale,+ na Itamale.+ 2 Una okulingila Alau omukulu wove, ovikutu vikola, opo efiwe ankhimana.+ 3 Popila ovanthu aveho ovanongo,* vana napa omphepo younongo,+ valingile Alau omivalo vimulinga omunthu ukola, alinge omunakwa andyundapele.

4 “Omivalo mavalingi ovievi: Otyinyanga tyo monthulo,+ otyikutu tyounakwa,+ esanya liehena omavoko,+ nomuvalo omule una omandoe-ndoe,*+ nombuya,+ notyinyanga tyokulikuta peimo, ovikutu ovio vikola mavevilingila omukulu wove Alau, novana vae, akale omunakwa wange. 5 Ovaundapi ovo ovanongo mavatungu noolu, nomulinya omungole, nomulinya womainya ongi wotyivala tyonkhula, nomulinya wakuhuka, nomulinya ukahi nawa.

6 “Valinge otyikutu tyounakwa noolu, nomulinya omungole, nomulinya womainya ongi wotyivala tyonkhula, nomulinya wakuhuka, nomulinya ukahi nawa wapohwa, otyikutu otyo tyounakwa vetyuundaise.+ 7 Matyikala nounyanga uvali komapepe, mauhonyeka ononthele onombali, no yo komutwe no yo konyima. 8 Otyinyanga tyo*+ peimo,* tyokwakutwa motyikutu tyounakwa opo tyiheliviye, natyo tyitunga novipuka ovio: oolu nomulinya omungole, nomulinya womainya ongi wotyivala tyonkhula, nomulinya wakuhuka, nomulinya ukahi nawa wapohwa.

9 “Ovola omamanya evali o onikisi,+ ohoneka-mo omanyina ovana va Isilayeli:+ 10 omanyina epandu, ehoneka mulimwe, omanyina omakwavo epandu, oehoneka mekwavo, omu velilandulila pokwatyitwa. 11 Una wokuhoneka komamanya mahoneka omanyina ovana va Isilayeli komamanya oo evali, okwehoneka ngeetyi tyilingwa otyilimbo.+ Epaka poupato wo olu. 12 Ove mopake omamanya oo evali, pounyanga wotyikutu tyounakwa uli pomapepe, aakala omamanya okuhinangela ovana va Isilayeli,+ Alau makatyinda-tyinda omamanya oo evali potyipepe, eetwala ku Siovaa, aakala okuhinangela. 13 Ove una okulinga oupato woolu, 14 olingi oulienge uvali wawingwa-wingwa woolu yatyo mwene,+ ukahi ngotyilanda, oulienge oo ouhake moupato oo uvali.+

15 “Ove una okutuma omunongo wokupaka omandoe-ndoe, atunge otyinyanga tyo ponthulo tyokukoyesa.+ Otyinyanga otyo, tyina okulingwa ngo tyomunakwa, noolu, nomulinya omungole, nomulinya womainya ongi wotyivala tyonkhula, nomulinya wakuhuka, nomulinya ukahi nawa wopohwa.+ 16 Nga tyaputikwa matyikala nomavindi ekwana, elifwe potyikanda* moule, nomounthanda. 17 Otyinyanga otyo tyipaka omamanya elilandulila omitete vikwana. Omamanya omutete wo tete elinga nolumbii, notopasio, nosimelanda. 18 Omutete wa vali ulinga nomamanya o tulukesa, nosafila, nosasipe. 19 Omutete wa tatu ulinga nomamanya o leshem,* no angata, no ametisita. 20 Omutete wa kwana una okuulinga nomamanya okilisolitu, no onikisi, no sande. Omamanya oo aeho ena okupakwa poupato woolu. 21 Omamanya oo, elifwe pomanyina ovana va Isilayeli 12. Omamanya aeho ena okuhonekwa ngeetyi tyilingwa otyilimbo, emanya like enyina like liomuhoko, omihoko 12.

22 “Una okulinga otyinyanga tyo ponthulo, noulienge woolu welipondainga, woolu watyo mwene ukahi ngotyilanda.+ 23 Una okulingila otyinyanga tyo ponthulo omayulu evali oolu, oepake komavava evali otyinyanga otyo. 24 Una okulinga oulienge uvali woolu ouhake momayulu evali, komavava otyinyanga tyo ponthulo. 25 Oulienge oo uvali aukwata poumphana woupato uvali, oukutila komapepe, pounyanga wo kotyikutu tyomunakwa komutwe. 26 Una okulinga omayulu evali oolu, oepake komavava evali otyinyanga tyo ponthulo, oepake mokati apilukila motyikutu tyomunakwa.+ 27 Tupu linga vali omayulu evali oolu, oepake kondye yotyikutu tyomunakwa, pombwelo younyanga uvali wo pomapepe, ponthele apa viahonyenena peulu liotyinyanga tyaunda-unda, tyokukuta* peimo kotyikutu tyomunakwa.+ 28 Opo otyinyanga tyo ponthulo tyihahondovoke-po, una okutyihaka mo tyounakwa, nokapanda okangole. Okulinga ngootyo otyinyanga tyo ponthulo kamatyihondovoka kotyikutu tyounakwa, peulu liotyinyanga tyaunda-unda tyokukuta peimo.

29 Tyina Alau anyingila momphangu ikola ende nomanyina ovana va Isilayeli, kotyikutu tyokukoyesa tyomonthulo, tyili pomutima wae, tyikale tyokuhinangelesa Siovaa apeho-apeho. 30 Ove paka motyikutu tyokukoyesa tyomonthulo, o Ulii, no Tumii,*+ ovipuka ovio vina okukala pomutima wa Alau tyina anyingila omu Siovaa eli, ngootyo Alau matyinda-tyinda ovipuka ovio aviho pomutima wae, mavikala viokukoyesa ova Isilayeli apeho tyina enda ku Siovaa.

31 “Linga esanya lihena omavoko liotyikutu tyomunakwa, aliho lilinga nomulinya omungole.+ 32 Likale nomunyino keulu pokati-nakati, apa liahonyena konthele likale nomwoyo wapamphwa, omunyino watyo ukale ngo wotyikutu tyondyakulilo tyomafwalali, opo tyahatanduke. 33 Linga omalomaa nomulinya omungole, nomulinya womainya ongi wotyivala tyonkhula, nomulinya wakuhuka aelisete kovindyendyelela aviho viesanya, pokati opakapaka-po onongendyo mbo olu. 34 Una okutyokaika-po onongendyo mboolu pomalomaa, ongendyo yoolu elomaa like, ongendyo ike yoolu elomaa like, oipake okuliseta nomwoyo wesanya aliho lihena omavoko. 35 Alau mavale esanya olio tyina akalinga otyilinga tyounakwa, ovanthu aveivi onongendyo tyina enda ku Siovaa momphangu ikola, na tyina atunda-mo opo ahankhie.+

36 “Linga omulami woolu yatyo mwene oulingi ngeetyi tyilingwa otyilimbo, omate-ko okuti: ‘Ousukuki owa Siovaa.’+ 37 Ukutila mombuya nomulinya omungole,+ omulami ukale komutwe wombuya. 38 Omulami ukale momphomo ya Alau, tyina omunthu umwe alinga otyipuka tyapenga kovipuka vikola, vina ova Isilayeli vaava vikale ovipuka vikola,+ Alau ngae utetulula omphela, omulami oo, apeho una okukala momphomo ya Alau opo ova Isilayeli vetavelwe na Siovaa.

39 “Tunga omuvalo omule, una omandoe-ndoe nomulinya ukahi nawa, otungu ombuya nomulinya ukahi nawa, notyinyanga tyokulikuta peimo.+

40 “Tupu tungila omuvalo omule ovana+ va Alau notyinyanga tyokulikuta peimo, nombuya yo komutwe opo vefiwe avankhimana.+ 41 Valeka omukulu wove Alau novana vae, ovelembula,+ ovenake*+ ovesukukisa vakale ovanakwa vange. 42 Velingila ovikalasau* viomulinya opo vafike omapenge avo.+ Vina okufika okuhimbikila peimo aviti ponongolo. 43 Alau novana vae mavavala-vala omuvalo oo tyina vanyingila mohinge yefendelo, no putyina venda komutala wovilikutila momphangu ikola, opo vahalinge onkhali avankhi. Otyo otyitumino ena okutavela, nae nava vakatuka mwe mavekeya.*