1 Timotiu

3 Onondaka ombu ombotyotyili: Inkha omulume umwe wovola okukala omukulu weuaneno, ukahi nokuovola ovilinga oviwa. 2 Omukulu wewaneno una okukala omunthu uhalingi ovipuka vimupopisa omapita, una vala okunepa omukai wike, una okukala novituwa oviwa, omuna-ndunge,* wonganeka nawa ovipuka, uyakula nawa ovaenda, utyivila okulongesa nawa, 3 uhenkholwa, uhehole omaluei,* mahi una okupola pokati, hamunthu uhanda vala okutañguna, uhehole unene onombongo. 4 Una okuhongolela nawa ombunga yae, una okukala novana vetavela, vena ovituwa oviwa. 5 (Mokonda inkha omulume umwe ketyivili okuhongolela ombunga yae, oñgeni mahongolela ewaneno lya Huku?), 6 hamupe-ko mekolelo, opo ehelimphande akoyeswa ngetyi Eliapu lialingwa. 7 Tupu, una okupopiwa nawa* novanthu vo kondye, opo ahatombwe atokela meliva lye Liapu.

8 Ovakuatesiko vovakulu vewaneno navo vena okukala ovanthu valingwa onthilo,* vahapilulula omalaka, vahanu unene, vahamonena mounkhembi. 9 Vatualako nekolelo movipuka viaholekwa vya Huku nomutima wasukuka.

10 Tupu, nkhele vena okutalwa nawa inkha vafuapo umwe, iya pahe avapewa otyilinga otyo, inkha kavahungwa natyike.

11 Ovakai navo vena okukala ovanthu valingwa onthilo,* vahatendeleya, vapola pokati muevi valinga, ovakuatyili ku Huku movipuka aviho.

12 Ovakuatesiko vovakulu vewaneno vena okunepa vala omukai wike, nokuhongolela nawa ovana vavo, nombunga yavo. 13 Mokonda ovalume vaundapa nawa, vapopiwa nawa iya vapondola okupopia tyihena owoma konthele yekolelo mu Kilisitu Sesusi.

14 Ame ndyikuhonekela ovipuka ovio, namphila apa katutu mandyiya oko, 15 mahi inkha ndyiseta, opo unoñgonoke oñgeni mokala mombunga ya Huku, ewaneno lya Huku una omuenyo, omphandyi nondyakulilo yotyili. 16 Tyotyili ovipuka viaholekwa vya Huku, viokufenda* Huku ovinene unene: ‘Sesusi wakalele nolutu ngo luovanthu, apopiwa okuti omuviuki kononkhono mba Huku, amonekela onoandyu, aiviswa movanthu, etavelwa mouye, atambulwa keulu nenkhimano.’