1 Ova Kolindu

7 Pahe konthele yovipuka onwe muahoneka, hahe vali omulume ahayame* omukai, 2 mahi mokonda ouhayo wotyihola* ukahi nokuliyawisa unene, omulume akale nomukai wae muene iya omukai akale nomulume wae muene. 3 Omulume aavele omukai wae etyi tyemutokala iya omukai nae alinge ngotyo omulume wae. 4 Omukai katumina olutu lwae, mahi lutuminwa nomulume wae; tupu omulume katumina olutu lwae, mahi lutuminwa nomukai wae. 5 Muhelinuminei na mukuenyi, nkhuali oputyina muelipakela-mo, momuvo umwe vala opo mulinge omalikuambelo iya konyima amuhonyo vali, opo Satanasi ehemuyondyele mokuhetyivili kuenyi okulikondola omutima. 6 Mahi etyi nemupopila, mupondola okutyilinga mahi hatyitumino-ko. 7 Mahi ame nahandele ñgeno ovalume vakala vala nga ame. Mahi kese umwe una etyi muene apewa na Huku, otyo kuakalela vamwe vanepa ovakuavo kavanepe.

8 Pahe ndyipopila vana vahanepele novahepe, okuti tyikahi vali nawa inkha vatualako okukala vala nga ame. 9 Mahi inkha kavetyivili okulikondola omutima, hahe vanepe, mokonda hahe vali okunepa tyipona okukala nehando enene liokulala nomunthu.

10 Vana vokuanepa, ndyiveavela onondonga, ha-mbange mahi omba Tatekulu, mbokuti omukai ahayeke-po omulume wae. 11 Mahi inkha umuyeka-po, atualeko okukala tyihanepelwe, okuti hatyo, akondoke komulume wae; iya omulume ahayeke-po omukai wae.

12 Ovakuavo ame ndyivetolela okuti: Inkha omukuatate umwe una omukai uhetavela Huku iya omukai oo uhanda okutualako okukala nae, omulume ehemuyeke-po. Mahi ame napopia ha Tatekulu ko. 13 Iya inkha omukai umwe una omulume uhafende Huku iya omukai oo uhanda okutualako okukala nae, ahayeke-po omulume wae. 14 Mokonda omulume uhafende Huku usukukiswa mokonda yomukai wae, iya omukai uhafende Huku usukukiswa mokonda yomulume omukilisitau; inkha hatyo, ñgeno ovana vavo ha-vasukuki, mahi pahe ovasukuki. 15 Mahi inkha wokuhafende Huku uhanda okuenda,* muyeka aye; monkhalelo oyo omukuatate ine omphange kakutilwe vali, mahi Huku wekuihana opo ukale nombembwa. 16 Mokonda, ove mukai, oñgeni utyii inkha kumayovola omulume wove? Ine, ove mulume, oñgeni utyii inkha kumayovola omukai wove?

17 Mahi, kese umwe aende ngetyi Siovaa emuavela, ngetyi ankho ekahi puetyi Huku emuihana. Ngotyo ndyiavela onondonga ombu omawaneno aeho. 18 Okuti etyi omunthu umwe aihanwa ankho wapita-le ekuendye? Atualeko okukala ngotyo. Okuti etyi omunthu umwe aihanwa ankho kenepite ekuendye? Ahapite ekuendye. 19 Okupita ekuendye tyitupu esilivilo, okuhapitile ekuendye tyitupu esilivilo; tyina vala esilivilo okuendela movitumino vya Huku. 20 Kese onkhalelo omunthu avasiwa etyi aihanwa, atualeko ngotyo. 21 Etyi waihanua ankho umupika? Uhasukalale notyo; mahi inkha upondola okuyovoka, opo uhayeke omphitilo oyo. 22 Mokonda una waihanua mu Tatekulu puetyi ankho omupika, wayovoka iya akala wa Tatekulu; tupu una waihanua ankho uhemupika, pahe omupika wa Kilisitu. 23 Onwe mualandwa nofeto onene; yekei-po okukala ovapika vovanthu. 24 Vakuatate, kese onkhalelo omunthu avasiwa etyi aihanwa, atualeko okukala ngotyo komaiho a Huku.

25 Konthele yovamphembela,* ame ndyitupu otyitumino tyatunda ku Tatekulu, mahi ndyipopia etyi nasoka, tyetyi ndyimukuatyili mokonda yokankhenda ka Tatekulu. 26 Mahi, ame ndyisoka okuti otyiwa omulume atualeko okukala ngetyi ekahi mokonda yovitateka vyo hono. 27 Okuti wakutilua momukai? Yeka-po okuovola okuliyovola-mo. Okuti utupu omukai? Yeka-po okuovola omukai. 28 Mahi inkha unepa kulingi onkhali. Mahi inkha omunthu uhenenepe unepa kalingi onkhali. Mahi vana valinga ngotyo mavakala novitateka momuenyo. Ame ndyikahi nokumulondola.

29 Vakuatate, tupu nahanda okumupopila okuti, omuvo wahupa-ko kauhi. Okuhimbikila hono okuenda no komutwe, vana vena ovakai vakale ngatyina vehena, 30 vana valila vakale nga vana vahalili, vana vahambukwa, vakale nga vana vahahambukilwe, vana valanda vakale nga vana vehena, 31 vana vaundapesa ouye, vakale ngatyina veheuundapesa unene. Mokonda onkhalelo youye uno ikahi nokupiluluka. 32 Tyotyili, ame nahanda muhakale notyiho. Omulume uhanepele una otyiho novipuka vya Tatekulu, mokonda uhanda okuhambukiswa Tatekulu. 33 Mahi omulume wanepa una otyiho novipuka vyo mouye, mokonda uhanda okuhambukiswa omukai wae, 34 iya watepuka. Tupu omukai uhanepelwe, nomumphembela, vena otyiho novipuka vya Tatekulu, opo olutu lwavo nomalusoke avo vikale tyasukuka. Mahi, omukai wanepua una otyiho novipuka vyo mouye, mokonda uhanda okuhambukiswa omulume wae. 35 Mahi ame ndyikahi nokumupopila ngotyo pala ouwa wenyi, hikahi nokumuilika,* mahi ndyimulunda opo mulinge etyi tyikahi nawa opo muundapele apeho Tatekulu tyihatalukwa.

36 Mahi inkha omunthu uhanepele ulitehela okuti kametyivili okuyunga omahando ae okulala nomunthu, mahi inkha hamona-ko, hahe vali anepele. Hankhali-ko. 37 Mahi inkha omunthu umwe watokola umwe momutima wae iya kesukile, mahi utyivila okuyunga omahando ae iya atokola umwe momutima wae okuhanepe,* malingi nawa. 38 Ngotyo, una unepa ulinga etokolo ewa, mahi una uhanepe ulinga etokolo ewa vali.

39 Omukai wakutilua momulume wae omuvo auho omulume wae ena omuenyo. Mahi inkha omulume wae unkhia opo wayovoka, upondola okunepwa nou ahanda, mahi omu Tatekulu vala. 40 Mahi ku ame, ukala vali nehambu inkha utualako okukala ngetyi ekahi; iya ndyina onthumbi yokuti na ame ndyina ononkhono mba Huku.