Mateusi

27 Etyi kuatya, ovanene-nakwa aveho novakulu aveliongiya avelipakelamo opo vaipae Sesusi. 2 Etyi vemukuta, avemutuala komutumini Pilatu.

3 Etyi Sunda wokuayondyele Sesusi etyimona okuti maipawa, elivele akondola onombongo 30 mbo palata kovanene-nakwa novakulu, 4 ati: “Nalinga onkhali etyi nayondya omunthu omuviuki.” Ngwe avati: “Onthue tuesuka natyo? Otyo otyove!”* 5 Ngotyo onombongo mbovivela embuyumbu mondyuo ya Huku alupuka-mo. Iya aende ekeliyendya. 6 Mahi ovanene-nakwa avapolo-po onombongo ombo mbovivela avati: “Katyaviukile okumbupaka molumono lwa Huku, mokonda onombongo mbohonde.” 7 Etyi velipakela-mo, onombongo ombo avembulande ohika opo ikale yomaendo ovanthu vatunda kovilongo ovikuavo. 8 Moluotyo, ohika oyo aihanwa okuti Ohika Yohonde alo hono. 9 Ngotyo etyi tyapopile omuuli Selemiya atyifuisuapo: “Iya avapolo onombongo mbovivela 30, onombongo valandesa omulume, onombongo ovana vamwe vo Isilayeli vemunakela, 10 avembulande ohika* ngetyi Siovaa anthumine.”

11 Sesusi ankho uli pomutumini, omutumini emupulu okuti: “Ove Hamba yova Sundeu?” Sesusi akumbulula okuti: “Muene ove ukahi nokutyipopia.” 12 Mahi, etyi ankho ekahi nokutendeleyua novanene-nakwa vavilapo novakulu, kakumbululile. 13 Pilatu emupulu okuti: “Kuiivite ovipuka vekahi nokukupopia?” 14 Mahi tupu ehemukumbulula, ngotyo omutumini ahuvu unene.

15 Pomuvo wovipito, ankho omutumini uyelula mokaleya onkhuatwa ike, una ovanthu vahanda. 16 Ankho vena onkhuatwa imwe itiwa o Balabasi iiwe unene. 17 Etyi veliongiya Pilatu evepulu okuti: “Olie ndyimuyelulila-mo, o Balabasi ine o Sesusi una wiihanua okuti o Kilisitu?” 18 Pilatu ankho utyii okuti vaeta Sesusi mokonda yonkhi. 19 Tupu puetyi ankho epumphi mombonge, omukai wae atumu okumupopila okuti: “Uhalinge natyike omulume oo uhena etyi alinga, hono nalele nondyoi yamonesa ononkhumbi mokonda yae.” 20 Mahi ovanene-nakwa novakulu avahindila ovanthu opo vaite Balabasi, mahi Sesusi aipawe. 21 Omutumini evepulu vali okuti: “Puvo vevali olie ndyiyelula-mo?” Avati: “O Balabasi.” 22 Pilatu evepulu okuti: “Iya Sesusi una wiihana okuti o Kilisitu ndyimulinga ñgeni?” Aveho avati: “Aipaelwe momuti!” 23 Ngwe ati: “Omokonda yatyi? Otyipuka patyi otyivi alinga?” Avapopila vali peulu okuti: “Aipaelwe momuti!”

24 Etyi Pilatu atala okuti utupu vali etyi apondola okulinga, mokonda ovanthu vekahi nokuyaya, apolo omaande elikoho peke otyo ovanthu vemutala ati: “Ame hivelwa onombei mbohonde yomunthu ou. Otyo o tyenyi muene.” 25 Moluotyo, ovanthu avakumbulula okuti: “Ononkhia mbae haa mbupulwa ku onthue no kovana vetu.”* 26 Konyima eveyelulila-mo Balabasi, mahi Sesusi atumu vekemuvete, evepakulila-e opo vekemuipaele momuti.

27 Iya omafualali omutumini aende na Sesusi keumbo liomutumini, iya omafualali aeho aaihanwa, aelisete nae. 28 Avemululu ovikutu viae, avemukutu otyinyanga otyinkhuhu. 29 Tupu avawingi ekolowa liomakete avemupake-lio komutwe, avemupatekesa olumbungu kokuvoko kuokulio. Iya avaikila konongolo komutwe wae, otyo vemulinga omukuele, avati: “Tusapele, Hamba yova Sundeu!” 30 Avemunthili omate, avemupolo olumbungu avahimbika okumuveta nalo momutwe. 31 Okuhulilila-ko, etyi vamana okumulinga omukuele, avemupolo otyinyanga vemuvalekele, avemuvaleka ovikutu viae, avemutuala opo akapapelwe momuti.

32 Puetyi ankho vekahi nokuenda, avahonyena nomulume umwe omu Silene utiwa o Simau. Iya avakuluminya omulume oo okutyinda omuti wemone* wa Sesusi. 33 Etyi vehika pomphangu itiwa Gologota, tyihangununa okuti Otyikola Tyomutwe, 34 avemuavela ovinyu yahonyekwa nomeva otyifo tyilula* opo anwe. Mahi etyi eimakela ehetavela okuinwa. 35 Etyi vemupapela momuti, konyima aveliyapaulila ovikutu viae mokuyumba owela vatale olie una elao. 36 Iya avapumphama otyo vemuyunga. 37 Tupu, peulu liomutwe wae avahoneka-po onondaka mbulekesa etyi aipaelwa, mbati: “Ou o Sesusi Ohamba yova Sundeu.”

38 Ovimphulu vivali ankho viapapelwa momiti ponthele yae, tyimwe kokulio kwae otyikuavo kokumbili kwae. 39 Iya vana ankho valambela-po vapuka komutwe otyo vemupenya 40 okuti: “Ove wokuti moteye-po ondyuo ya Huku oitungu mononthiki ononthatu, liyovola ove muene! Inkha ove umona wa Huku, tuluka momuti wemone!”* 41 Tupu ovanene-nakwa, kumwe novahoneki vovitumino novakulu avahimbika okumulinga omukuele, avati: 42 “Vakuavo weveyovola; ngwe ketyivili okuliyovola! Ngwe Ohamba yo Isilayeli; pahe atuluke momuti wemone* opo onthue tumutavele. 43 Wayumba onthumbi mu Huku, pahe emuyovole inkha wemupanda, mokonda wati: ‘Ame Ndyimona wa Huku.’” 44 Alo umwe ovimphulu ankho viokuapapelwa kumwe nae momiti, navio avimupopi omapita.

45 Okuhimbikila poola 12* potyilongo opo apakala enthiki, alo koola 15.* 46 Tyina tyiti poola 15 Sesusi, akaluluka ati: “Eli, Eli, lama sabactâni?” Tyihangununa okuti: “Huku yange, Huku yange, omokonda yatyi wandyekela andyike?” 47 Etyi ovanthu vetai-po veiva otyipuka otyo, avahimbika okupopia okuti: “Omulume ou ukahi nokuihana Eliya.” 48 Iya umwe puvo liwa-liwa ahateka akapola esipondya, eliyave movinyu elipake kolumbungu emuavela opo anwe. 49 Mahi ovanyingi puvo avati: “Muyekei! Tutalei inkha Eliya meya okumuyovola.” 50 Sesusi awane vali okukaluluka peulu, ankhi.

51 Otyinyanga tyo momphangu onthyukuki atyitanduka pokati, okuhimbikila keulu alo pombuelo, ohi aihiñginya, omamanya avambauka. 52 Iya omaendo aiikuka, ovivimbi viovasukuki ankho vankhia aviya kombanda, 53 avimoneka kovanthu ovanyingi, (iya etyi Sesusi atutila ovanthu vamwe vaile momaendo, avanyingila mepunda-umbo esukuki). 54 Mahi etyi onkhalamutwe yomafualali na vana ankho ena-vo pokuyunga Sesusi vamona otyinimawe novipuka viamoneka-po, avatili unene owoma, avati: “Tyotyili ou ankho Omona wa Huku.”

55 Ankho pena ovakai ovanyingi vekahi nokutalela kokule, valandulile Sesusi okutunda ko Galileia opo vemukuateseko. 56 Puvo ankho pena Maliya Madalena na Maliya ina ya Tiaku na Susesi, na ina yovana va Sebedeu.

57 Mokonda ankho lietaka, akuya omulume umwe omuhona wo ko Alimateya utiwa Suse, ankho nae omulongwa wa Sesusi. 58 Omulume oo, eya pu Pilatu, emuiti olutu lwa Sesusi. Pilatu atumu elupewe. 59 Suse apolo olutu olo, eluwingila motyinyanga tyolinyu tyasukuka, otyiwa. 60 Iya elupake melangalo liae epe, ankho atemba monkhanda, iya akulungutisa emanya enene elipate pombundi yelangalo olio, aende. 61 Mahi Maliya Madalena na Maliya omukuavo avahatundu-po, avapumphama ponthele yelangalo.

62 Oyo ankho onthiki Yokulifuiika pala Otyasapalo. Onthiki onkhuavo, ovanene-nakwa nova Faliseu avekeliongiya ku Pilatu.* 63 Avati: “Tatekulu, tuahinangela okuti puetyi onkhembi ina ankho ina omuenyo ankho ipopia okuti: ‘Monthiki ya tatu mandyitutiliswa.’ 64 Moluotyo, tuma ovanthu vayunge pelangalo alo monthiki ya tatu, opo ovalongwa vae veheye okumuvaka-mo, avapopila ovanthu okuti: ‘Wapindulua-po pokati ko vokuankhia!’ Iya omatutu oo maalingi vali omanene tyipona o tete.” 65 Pilatu evepopila okuti: “Ovolei omakakunye. Endei, kayungei-po ngetyi muhanda.” 66 Ngotyo avaende, avapameka peendo nemanya, avapake-po ovayungi.