Luka

1 Ovanthu ovanyingi valinga ononkhono mbokuovolola ovipuka aviho vihole okumoneka iya avevihoneka, ovipuka ovio no onthue tueviyumba unene onthumbi.* 2 Iya ngetyi tuevipopilwa no nombangi vokuetyimona tunde konthyimbi, na vana vaivisa ondaka ya Huku, 3 tupu ame, naovolola nawa ovipuka aviho, tunde konthyimbi, iya andyitokola okukuhonekela-vio, monkhalelo omu vielilandulila, tatekulu Teofilu, 4 opo unoñgonoke nawa ovipuka walongesua okuti oviotyotyili.

5 Pononthiki mba Helode* ohamba yo Sundeia, ankho kuna omunakwa umwe utiwa o Sakaliya wotyikundyi tya Abiya. Omukai wae ankho utiwa o Elisabete umwe povana va Alau. 6 Aveho ankho ovaviuki ku Huku, mokonda ankho vaendela movitumino aviho vya Siovaa tyihavelwa onombei. 7 Mahi Elisabete ankho utupu ovana, mokonda ankho utupu olutyito iya aveho ankho vakulupa.

8 Puetyi ankho ekahi nokulinga ovilinga vya Huku viounakwa motyikundyi tyae, 9 ngetyi ankho tyilingwa* movilinga viounakwa, ankho pahe otyikando tyae tyokuava oisesu. Moluotyo, anyingila momphangu ikola ya Siovaa. 10 Iya ovanthu aveho ankho veli pondye, vekahi nokulikuambela poola yokuava oisesu.* 11 Oandyu ya Siovaa aimumonekela, aitalama ponthele yomutala woisesu. 12 Mahi Sakaliya atumphuluka, atili unene owoma. 13 Mahi oandyu aipopila Sakaliya okuti: “Uhatile owoma Sakaliya, mokonda Huku watehelela omalikuambelo ove, iya omukai wove Elisabete mekutyitila omona omukuendye, omuluku okuti o Suau. 14 Mokakala nehambu enene, iya ovanyingi mavakahambukwa tyina amatyitwa, 15 mokonda makakala omunene komaiho a Siovaa. Mahi omona oo, kapondola okunwa ovinyu, ine ovikunwa ovikuavo vikoleswa, makakala tyeyula ononkhono mba Huku alo umwe tyina ehenetyitwe.* 16 Makakondola ova Isilayeli ovanyingi ku Siovaa, Huku yavo. 17 Tupu, makapita komutwe wa Huku nomutima nononkhono ngo mba Eliya, opo apilulule omitima vyo vohe avikala ngo viovana,* iya vokuhetavela avakala nonondunge mbovaviuki, opo apongiye ovanthu pala Siovaa.”

18 Sakaliya apopila oandyu, ati: “Oñgeni mandyiyumbu onthumbi monondaka ombo? Ame nakulupa iya omukai wange una omanima omanyingi.” 19 Oandyu aimukumbulula okuti: “Ame, ame Gabiliyeli, ndyikahi ponthele ya Huku, natumwa opo ndyipopie no ove, opo ndyikupopile onondaka onongwa. 20 Mahi, pahe mokala otyihita-mulungu, kumapopi alo ovipuka ovio aviho vikamoneka, mokonda kuetavelele onondaka mbange, mambufuiswapo momuvo wanakua.” 21 Ovanthu ankho vatualako okukevelela Sakaliya, avahuvu mokonda ankho ukahi nokuseta momphangu ikola. 22 Etyi alupuka-mo, ehetyivili okupopia navo, iya avaimbuka okuti wamona otyipuka tyihuvisa* momphangu ikola. Ankho uyelaula vala omankhanya otyo ahapopi. 23 Etyi ononthiki mbovilinga* viae mondyuo ya Huku mbapwa, aende no keumbo liae.

24 Etyi palamba ononthiki mbumwe, omukai wae Elisabete akala omulemi, akala onohanyi ononthano tyihaende povanthu, apopi okuti: 25 “Ongetyi Siovaa andinga ononthiki ombu. Wanthyinangela opo amphole monkhalelo ikundisa pokati kovanthu.”

26 Etyi eimo liae lina onohanyi epandu, oandyu Gabiliyeli aitumwa na Huku ko Galileia mepunda-umbo litiwa Nasalee, 27 komuhikuena umwe omumphembela ankho manepwa* nomulume utiwa o Suse weumbo lya Daviti ankho utiwa o Maliya. 28 Iya oandyu aiya kwe aimupopila okuti: “Oñgeni, wokuapandua unene, Siovaa ukahi no ove.” 29 Mahi, omuhikuena asukalala unene nonondaka ombo, ahimbika okusokolola nawa oityi tyilekesa okukukunyua ngotyo. 30 Iya oandyu aimupopila okuti: “Uhatile owoma Maliya, mokonda wapandua na Huku. 31 Tala! Ove mokala omulemi,* okutula omona omukuendye, iya omuluku okuti o Sesusi. 32 Omona oo, makala omunene, aihanwa okuti Omona Womukulami, iya Siovaa Huku, memupe otyipundi tyoutumini wa tate yae Daviti. 33 Makakala Ohamba mondyuo ya Sakoo apeho, iya Ouhamba wae kamaukapwa.”

34 Mahi, Maliya apulu oandyu okuti: “Otyo matyiende ñgeni, tyina ame nehenelale nomulume?” 35 Oandyu aimukumbulula okuti: “Ononkhono mba Huku mambukulaukila, iya epondolo Liomukulami malikuhiki. Mokonda, omona matyitwa maihanwa okuti omusukuki, Omona wa Huku. 36 Tala! Elisabete ombunga yove nae una onohanyi epandu noulemi, namphila akulupa-le, ngwe ovanthu vemupopia okuti utupu olutyito. 37 Mokonda Huku utupu ondaka* naike, ahapondola okufuisapo.” 38 Iya Maliya ati: “Ame ndyimupika wa Siovaa! Tyiende na ame ngetyi wapopia.” Iya oandyu aiyende.

39 Moluotyo, pononthiki opo Maliya akanyauka okulinga oungendi motyilongo tyo nomphunda, aende kepunda-umbo lyo Sundaa. 40 Iya anyingila meumbo lya Sakaliya, akukunya Elisabete. 41 Etyi Elisabete eiva Maliya wakukunya, omona meimo liae apikita, Elisabete akala tyeyula ononkhono mba Huku, 42 apopi nondaka yakaluluka okuti: “Ove wapandua vali pokati kovakai, tupu omona ukahi meimo liove wapandua unene! 43 Ame, ame-lie opo ndyipahulwe na ina ya Tatekulu yange? 44 Etyi wankhukunya, liwa-liwa omona meimo liange ahomboka mokonda yehambu. 45 Tupu ove una ehambu tyetyi wetavela, mokonda ovipuka wapopilua na Siovaa, aviho mavifuisuapo.”

46 Iya Maliya apopi okuti: “Ame* ndyinkhimaneka Siovaa, 47 ame hipondola okuyeka-po okuhambukilwa Huku Omuyovoli wange. 48 Mokonda watala nawa onkhalelo yomupika wae. Iya okupolelela hono ovanthu aveho vomuvo uno mavandyihana okuti, wokuna ehambu. 49 Mokonda Wepondolo wandingila ovipuka ovinene, iya enyina liae esukuki. 50 Iya apeho una okankhenda novanthu aveho vokuna onthilo nae. 51 Walekesa epondolo liae nokuvoko kwae, ayandyanesa vokuna omalusoke omalityindailo momitima viavo. 52 Ovanthu vepondolo wevepola kovipundi viavo vioutumini iya apake kounene vana veliola omitima. 53 Vokuna ondyala wevekutisa novipuka oviwa, iya ovahona evetaata mankhanya. 54 Weya okukuatesako Isilayeli omuumbili wae, okuhinangela onkhenda yae apeho, 55 ngetyi apopilile ovakuaukulu vetu, Ambalaiau novatekula* vae.” 56 Maliya akala nae onohanyi ononthatu iya akondoka keumbo liae.

57 Pahe omuvo Elisabete makutula auhiki-po, akutula omona omukuendye. 58 Iya ovomunthele yae, nombunga yae aveivi okuti Siovaa wakala nonkhenda onene nae. 59 Monthiki ya tyinana, yokupitisa omona ekuendye aveya, avahande okumuluka enyina lya tate yae, Sakaliya. 60 Mahi me yae akumbulula okuti: “Au! Maihanwa okuti o Suau.” 61 Moluotyo, avemupopila okuti: “Mombunga yove petupu ou una enyina olio.” 62 Iya avapulu ku tate yae enyina emuhandela, mokulekaisa nomavoko. 63 Moluotyo, ngwe aiti okavai ahoneka-ko okuti: “Enyina liae o Suau.” Etyi evepopila ngotyo aveho avahuvu. 64 Liwa-liwa omulungu wae awikuka iya elaka liae alikala nawa, ahimbika okupopia, ankhimaneka Huku. 65 Iya ovanthu aveho ankho vakala navo pomaumbo avatili owoma, ovipuka ovio aviho avihimbika okupopiwa potyilongo atyiho tyo nomphunda tyo Sundeia. 66 Aveho ankho vetyiiva, avetyipake nawa momitima viavo, avati: “Omona oo, makala omunthu patyi?” Ankho vapopia ngotyo, mokonda Siovaa ankho wemupanda.

67 Konyima, tate yae Sakaliya akala tyeyula ononkhono mba Huku iya apopi eulo, ati: 68 “Siovaa ankhimanekwe, Huku yo Isilayeli, mokonda wakala nokankhenda novanthu vae iya eveetela eyovo. 69 Wetuavela omuyovoli wepondolo* meumbo lya Daviti omuumbili wae, 70 ngetyi apopile menyina liovauli ovasukuki vo kohale, 71 okuti metuyovola konondyale mbetu no ku vana vetuyele. 72 Makala nokankhenda no onthue ngetyi alaele ovakuaukulu vetu, ahinangela omphango yae onthyukuke. 73 Omulao aanenene Ambalaiau omukuaukulu wetu, 74 okuti tyina ametuyovola konondyale mbetu, Huku metuavela elao liokulinga ovilinga viae nomutima wakola, 75 noukuatyili nouviuki komaiho ae ononthiki ambuho mbomuenyo wetu. 76 Mahi ove, mokatiwa umuuli wo Mukulami, tyetyi mokapita komutwe wa Siovaa opo upongiye onondyila mbae, 77 nokunoñgonokesa ovanthu vae eyovo neevelo liononkhali mbavo, 78 mokonda yokankhenda ka Huku yetu. Okankhenda oko katunda keulu, makakala ngotyitei tyiliaima tyina ekumbi litunda, 79 pala okumimikila vana vekahi menthiki na vana vekahi mokahi kononkhia, nokuviukisa onomphai mbetu mondyila yombembwa.”

80 Omona ekulu iya akala tyapama mononkhono mba Huku, akala moluhandya alo omuvo wae wokuivisa movanthu velongo lyo Isilayeli wehika-po.