Luka

4 Etyi Sesusi eyulwa nononkhono mba Huku, atundu po Solondau, ononkhono ombo ambumutuala no moluhandya 2 akala-mo ononthiki 40, alolwa Neliapu. Mononthiki ombo kalile natyike, iya etyi mbapwa aliwa nondyala. 3 Eliapu alimupopila okuti: “Inkha umona wa Huku, popila emanya eli likale ombolo.” 4 Mahi Sesusi elikumbulula okuti: “Tyahonekwa okuti: ‘Omunthu kakala vala nomuenyo mokonda yombolo.’”

5 Pahe alimutuala no keulu liomphunda alimulekesa omauhamba aeho omouye mokamuvo kehehi. 6 Eliapu alimupopila okuti: “Mandyikuavela ounene wokutumina omauhamba aa aeho nomunkhima wao, mokonda nevipewa iya ame ndyiviavela ou nahanda. 7 Inkha ufenda ku ame, aviho mavikala viove.” 8 Sesusi elikumbulula okuti: “Tyahonekwa okuti: ‘Una okufenda Siovaa Huku yove, oe vala una okuumbila.’”

9 Alimutuala ko Selusalei alimupake keulu* liondyuo ya Huku, alimupopila okuti: “Inkha umona wa Huku, lomboka, 10 mokonda tyahonekwa okuti: ‘Huku matumu onoandyu mbae ku ove opo mbukuaamene,’ 11 iya ambukutyindi pomavoko, opo uhavete omphai yove kemanya.’” 12 Sesusi akumbulula Eliapu okuti: “Tupu tyahonekwa okuti: ‘Uhalole Siovaa, Huku yove.’” 13 Ngotyo, etyi Eliapu liamana okumulola novipuka ovio aviho alimusi-po, alikevela omphitilo onkhuavo ikahi nawa.

14 Pahe Sesusi akondoka no ko Galileia kepondolo liononkhono mba Huku. Iya ovipuka oviwa ankho vipopiwa konthele yae aviliyandyana motyilongo atyiho. 15 Tupu, ahimbika okulongesila monondyuo mbavo mbokufendela, iya aveho ankho vemuhilivika.

16 Aende no ko Nasalee, kuna ankho ekulila, iya ngetyi alinga-linga monthiki Yotyasapalo, anyingila mondyuo yokufendela, atalama opo atange. 17 Avemuavela ombuingwa yomuuli Isaiya, eiwingulula avasi apa pahonekwa okuti: 18 “Ononkhono mba Siovaa mbukahi ku ame, mokonda wanaka opo ndyiivise onondaka onongwa kovahepi. Wanthuma opo ndyiivise eyovo kononkhuatwa, nokupatula omaiho ovamphoki, nokuyovola vana vamoneswa ononkhumbi, 19 nokuivisa omuvo wonkhenda ya Siovaa.” 20 Etyi amana okutanga awingi ombuingwa, eikondola komukuatesiko wo mondyuo yokufendela, apumphama. Iya ovanthu aveho mondyuo yokufendela ankho vatala vala kwe. 21 Konyima ahimbika okuvepopila okuti: “Ovihonekwa evi namana okutanga, viafuiswapo hono.”

22 Iya aveho avahimbika okupopia nawa konthele yae, avahuvu mokonda yonondaka onongwa mbuhika komutima ankho mbutunda momulungu wae, avati: “Ou hamona wa Suse?” 23 Moluotyo, evepopila okuti: “Tyotyili ndyimupopila okuti mamukamphopia okuti: ‘Muhakuli, lihakula ove muene. Tueiva ovipuka ovinyingi walinga mo Kafalanau, tupu linga-vo vimwe muno motyilongo tyove.’” 24 Moluotyo, ati: “Tyotyili ame ndyimupopila okuti, omuuli ketavelwa motyilongo tyae. 25 Mongeleka, ame ndyimupopila otyili okuti: Mo Isilayeli ankho muna ovahepe ovanyingi pononthiki mba Eliya, etyi ombila yakalele omanima etatu no nohanyi epandu tyihaloko, iya motyilongo atyiho amukala ondyala onene. 26 Mahi Eliya katuminwe komukai nawike puovo, watuminue vala komuhepe wo ko Salefaa motyilongo tyo Sindone. 27 Tupu mo Isilayeli ankho muna ovanthu ovanyingi vena otyilundu pomuvo womuuli Eliseu. Mahi nawike wahakulilue,* o Naama vala omu Silia.” 28 Ovanthu aveho ankho vemutehelela mondyuo yokufendela, avanumana unene, 29 avakatuka, avemutuala liwa-liwa kondye yepunda-umbo, avemupake kondyendyi yomphunda ankho kuatungwa epunda-umbo liavo opo vemukunyunine mombuelo. 30 Mahi akuate pokati kavo, aende nondyila yae.

31 Iya alauka no ko Kafalanau, epunda-umbo limwe lyo Galileia. Ankho ukahi nokuvelongesa Motyasapalo, 32 iya avahuvu nonkhalelo yae yokulongesa, mokonda etyi ankho alongesa tyitunda ku Huku. 33 Mondyuo yokufendela ankho muna omulume umwe una otyilulu, eliyavela unene peulu, ati: 34 “Oityi uhanda ku onthue Sesusi omu Nasalee? Weya okutunyima-ko? Ame ndyikwii umwe nawa, ove Umusukuki wa Huku.” 35 Mahi Sesusi etyikandukila, ati: “Uti filuu, tunda mwe.” Ngotyo, etyi tyemutokehila pokati kavo, otyilulu atyitundu-mo atyihemulingi omapita. 36 Moluotyo, avahuvu avahimbika okulipopila poyavo, okuti: “Onondaka ombu mbuhangununa tyi? Tehelelei vala ononkhono nepondolo likahi monondaka ombo! Alo umwe ovilulu vimutavela, avitundu movanthu!” 37 Iya etyi alinga atyiyandyana kononthele mbatyo ambuho okuliseta notyilongo.

38 Etyi atunda mondyuo yokufendela, anyingila meumbo lya Simau. Iya inaivi ya Simau ankho una elema iya avemuiti emukuateseko. 39 Ngotyo eya ponthele yae, emuhakula ouvela wae. Liwa-liwa akatuka, ahimbika okuvelingila-po okulia.

40 Mahi etyi ekumbi lianyingila, ovanthu aveho ankho vokuna ovavei vena omauvela elikalaila, aveveeta kwe. Ngwe ankho upaka vala omavoko ae kuvo, otyo vaveluka. 41 Tupu Sesusi ataata ovilulu movanthu ovanyingi, otyo viliyavela okuti: “Ove Umona wa Huku.” Mahi ngwe ankho uvikandukila keviyeke vipopie, mokonda ankho vimwii okuti o Kilisitu.

42 Mahi, etyi kuatya, atundu-po aende no komphangu kuhena ovanthu. Mahi ovaunyingi avahimbika okumuovola,* aveya apa ankho ekahi, avaovola okumutyilika opo ehevese-po. 43 Mahi evepopila okuti: “Ame tupu ndyina okukaivisa onondaka onongwa Mbouhamba wa Huku komapunda-umbo omakuavo, mokonda otyo Huku anthumina.” 44 Ngotyo, atualako okuivisila monondyuo mbokufendela mo Sundeia.