Maluku

6 Atundu opo anyingila motyilongo tyae, iya ovalongwa vae avemulandula. 2 Etyi tyati Motyasapalo, ahimbika okulongesila mondyuo yokufendela, iya ovanyingi ankho vekahi nokumutehelela avahuvu, avati: “Opi omulume ou alongeswa ovipuka evi? Omokonda yatyi apelwa ounongo ou? Iya oityi alingila omahuviso? 3 Ou hakalupindelu omona wa Maliya, kavelikuai na Tiaku na Suse na Sunda na Simau? Iya onomphange mbae katuna-vo pokati ketu?” Ngotyo avehemutavela. 4 Mahi Sesusi evepopila okuti: “Omuuli ukala nomunkhima ponomphangu ambuho, mahi potyilongo tyae no meumbo liae nomombunga yae muene kakala nomunkhima.” 5 Moluotyo, kalingile ehuviso nalike potyilongo opo, wapaka vala omavoko ae kovavei vehehi evehakula. 6 Mahi, ahuvu etyi atala okuti vetupu ekolelo. Iya aende momaumbo aeho opotyilongo opo, otyo alongesa.

7 Pahe aongiya ono apositolu 12 iya evetumu vevali-vevali, eveavela epondolo liokutaata ovilulu. 8 Tupu evepopila opo vahatyinde natyike moungendi, vatyinde vala otyimuti, avahatyindi onombolo, nii otyipapo, nii onombongo* momapoha avo. 9 Evepopila vavale ononkhaku mahi vahavale ovikutu vivali.* 10 Tupu, evepopila okuti: “Meumbo muamanyingila omo mukala alo mutunda potyilongo opo. 11 Iya mepunda-umbo muamanyingila avehemutambula, ine avehemutehelela, tyina mutunda-mo laumunei ombuma konomphai mbenyi opo tyilekese okuti muevelondola.” 12 Ngotyo avaende iya avakapopila ovanthu okuti vena okulivela, 13 avataata ovilulu ovinyingi avawaveka omulela ovavei ovanyingi avevehakula.

14 Iya Ohamba Helode aityiivi, mokonda ankho ovanthu ponomphangu ambuho vapopia konthele ya Sesusi, okuti: “O Suau Omumbatisali wapindulua-po kononkhia, otyo alingila omahuviso.” 15 Mahi vamwe ankho vapopia okuti: “Ou o Eliya.” Ovakuavo ankho vati: “Ou omuuli ukahi ngovauli vo kohale.” 16 Mahi etyi Helode etyiiva, ati: “O Suau una natetele omutwe oe wapindulua-po.” 17 Helode ankho wanepa Helodiya omukai womukulu wae Filipe. Iya mokonda yomukai oo, atumu okukuata Suau emukutu, emupake mokaleya. 18 Mokonda ankho Suau upopila Helode okuti: “Katyaviukile okunepa omukai womukulu wove.” 19 Ngotyo Helodiya ankho una onkhongo na Suau iya ankho uhanda okumuipaa, mahi ankho ketyivili. 20 Mahi, Helode ankho una owoma na Suau, tyetyi ankho utyii okuti omulume omuviuki tupu omusukuki, moluotyo ankho umuamena. Helode ankho uhambukwa okutehelela etyi Suau apopia, iya apeho tyina amemutehelela ankho kei oityi memulingi.

21 Mahi monthiki Helode alinga otyipito tyokuhinangela onthiki atyitwa, atelekela ovalume vankhimana, novatumini vomafualali, nomanene atyo omo Galileia, Helodiya amono omphitilo yokufuisapo etyi ahandele. 22 Omona omuhikuena wa Helodiya anyane, ahambukiswa unene Helode na vana ankho alia navo.* Ohamba aipopila omuhikuena oo okuti: “Ndyite etyi uhanda, ame mandyikupe-tyo.” 23 Iya aane okuti: “Kese etyi mondyiti, ame mandyikupe-tyo, alo umwe onthele imwe youhamba wange, mandyikupe-yo.” 24 Moluotyo, omona aende akapula ku ina okuti: “Ndyimuita-tyi?” Ina akumbulula okuti: “Ita omutwe wa Suau Omumbatisali.” 25 Iya akanyauka okuenda kohamba emuiiti okuti: “Nahanda umphe pahetyino omutwe wa Suau Batisita pelonga.” 26 Namphila ankho tyanumanesa unene ohamba, mahi kayaanyene etyi omuhikuena aita mokonda yokuaana, novaenda vae ankho veli-po.* 27 Ngotyo, ohamba aitumu liwa-liwa umwe povayungi vayo aete omutwe wa Suau. Iya aende mokaleya ekemuteta omutwe 28 eutyindi pelonga. Ewaavela omuhikuena, iya omuhikuena eutuala ku ina. 29 Etyi ovalongwa vae vetyiiva, aveya okupola olutu lwae, avekelupaka melangalo.

30 Ono apositolu mba Sesusi aveliongiya pwe iya avemupopila ovipuka aviho valinga nevi valongesa. 31 Iya evepopila okuti: “Tuendei pomphangu pehena ovanthu opo mukapululukwe-po katutu.” Mokonda ankho pena ovanthu ovanyingi veya otyo vaya, iya ankho vetupu nii omuvo wokulia. 32 Ngotyo, avalondo mowato opo vaye pomphangu pehena ovanthu. 33 Mahi ovanthu vevemona etyi vekahi nokuenda, iya ovanyingi avetyiivi. Moluotyo, avaendela pohi okutunda momapunda-umbo aeho, avapiti komutwe wavo. 34 Etyi Sesusi atuluka mowato, amono ovanthu ovanyingi, akala nokankhenda navo, mokonda ankho vekahi ngonongi mbehena omunthita. Ahimbika okuvelongesa ovipuka ovinyingi.

35 Etyi ekumbi lietaka, ovalongwa vae aveya pwe, avati: “Pano petupu omaumbo, ngwe ekumbi lietaka. 36 Popila ovanthu opo vaye konopalasa mbukahi popepi, no komaumbo vakalande okulia.” 37 Evekumbulula okuti: “Veavelei onwe etyi okulia.” Moluotyo avemupopila okuti: “Okuti uhanda tuende tukalande onombolo mbonondenaliu 200 opo ovanthu ava aveho valie?” 38 Evepulu okuti: “Muna onombolo onoñgapi? Endei katalei!” Etyi vatala ombu vena, avemupopila okuti: “Tuna onombolo ononthano no nombisi onombali.” 39 Iya ngwe apopila ovanthu aveho vapumphame peholi, ovikundyi-ovikundyi. 40 Moluotyo, aveliongiya ovikundyi-ovikundyi viovanthu 100 vimwe ovanthu 50. 41 Apolo onombolo ononthano no nombisi onombali, atale peulu elikuambela. Konyima avembaula onombolo, ahimbika okuavela ovalongwa iya ovalongwa opo vembuavele ovanthu, iya ngatyo alinga vali onombisi onombali. 42 Ngotyo aveho avali, avekuta, 43 avaongiya ovimbembu vionombolo viahupa-po aviyula monosesu 12, avaongiya vali viombisi. 44 Ovalume aveho valile ankho vena 5.000.

45 Konyima, liwa-liwa atumu ovalongwa vae valonde mowato, opo vapite komutwe vaye no ko Betesaita, konthele onkhuavo yelunga, ngwe nkhele esala nokulekela ovaunyingi. 46 Mahi etyi evelekela, aende no komphunda ekelikuambela. 47 Etyi kuanthikovela, owato ankho ikahi pokati kelunga, mahi ngwe ankho ukahi aike koluhimba. 48 Kombimba* etyi atala okuti kavetyivilile okuendesa owato mokonda ankho omphepo itunda oku vaya nako, aende no kuvo okuendela kombanda yomeva; mahi alingi ngatyina ekahi nokuvelamba. 49 Etyi vemumona weendela kombanda yomeva, avati: “Otyo oityi tyiya ngotyo?”* Aveliyavela. 50 Mokonda aveho ankho vatila owoma etyi vemumona. Mahi liwa-liwa evepopila okuti: “Kolei omutima! Ame; muhatilei owoma.” 51 Konyima alondo mowato iya omphepo aitulu. Otyo atyivehuvisa unene, 52 mokonda kavanoñgonokele etyi ehuviso lionombolo lilekesa, ankho katyayandyulukile nawa momitima viavo.

53 Etyi vatauluka konthele onkhuavo, avehiki ko Genesalee avahake owato. 54 Mahi, vati vala tulukee mowato, ovanthu avemuimbuka. 55 Avahimbika okueenda motyilongo otyo atyiho, otyo vatyinda ovavei kovinthandala, avevetuala oku Sesusi eivalela. 56 Kese pomaumbo amaende no momapunda-umbo, ankho vaeta ovavei vavo ponopalasa, iya avemuiiti opo vakuate vala komuoyo wotyikutu tyae. Iya aveho ankho vakuata-ko avakala nawa.