Ovilinga

3 Petulu na Suau ankho veka hi nokuinduka kondyuo ya Huku koola yokulikuambela, ankho oola ya tyive.* 2 Iya omulume umwe watyitua otyilema ankho ukahi nokutualwa no kombundi Yondyuo ya Huku. Ononthiki ambuho ankho vemupaka popepi nombundi yondyuo ya Huku itiwa Ongwa, opo aite osimola ku vana vanyingila mondyuo ya Huku. 3 Etyi amona Petulu na Suau vekahi nokunyingila mondyuo ya Huku, ahimbika okuita osimola. 4 Mahi Petulu na Suau avemutale iya avati: “Tala ku onthue.” 5 Moluotyo, evetale otyo akevela vemupe tyimwe. 6 Mahi Petulu ati: “Ame ndyitupu opalata no olu, mahi etyi ndyina-tyo, otyo mandyikuavela. Menyina lya Sesusi Kilisitu omu Nasalee, katuka enda!” 7 Ngotyo, emukuate mokuvoko kuokulio iya emukatula. Liwa-liwa onomphai mbae novikalo viae avionyonoka. 8 Iya alomboka atalama, ahimbika okueenda, anyingila navo mondyuo ya Huku, otyo aenda nokulombauka otyo ankhimaneka Huku. 9 Iya ovanthu aveho avemumono weenda otyo ankhimaneka Huku. 10 Avahimbika okumuimbuka okuti omulume una ankho uhole okupumphama Kepito Ewa liondyuo ya Huku okukevela osimola iya avahuvu unene konthele yetyi tyemumonekela.

11 Putyina nkhele omulume oo akuata mu Petulu na Suau, ovanthu aveho nokuahuva unene avahatekela kuvo momuvanda utiwa Omuvanda wa Salomau. 12 Etyi Petulu etyimona, apopila ovanthu okuti: “Vanthu vo Isilayeli, omokonda yatyi muahuvila unene notyipuka etyi? Iya oityi mutalela ku onthue, ngatyina tuahakula omulume ou kepondolo lietu ine mokonda yonthilo tuna na Huku? 13 Huku ya Ambalaiau na Isake na Sakoo, Huku yovakuaukulu vetu, wankhimaneka Omuumbili wae Sesusi, una onwe muapakula iya amumuaanye kotyipala tya Pilatu, namphila ankho atokola okumuyovola. 14 Enga, onwe muaanya omulume omusukuki, omuviuki, amuiti opo mupewe omulume omuipai, 15 amuipaa Onkhalamutwe Yavilapo yomuenyo. Mahi Huku wemupindula-po pokati ko vokuankhia iya onthue tunombangi. 16 Iya mokonda yenyina liae, nekolelo lietu menyina liae, omulume ou mueete tupu mwii, otyo akalela nawa. Ekolelo menyina lya Sesusi liavelukisa omulume ou onwe amuho mueete. 17 Iya pahe, vakuatate ame ndyityii okuti etyi ankho mukahi nokulinga kamutyii, novatumini venyi ankho kavetyii. 18 Mahi monkhalelo oyo, Huku wafuisapo ovipuka apopile momulungu wovauli aveho, okuti Kilisitu yae makamoneswa ononkhumbi.

19 “Livelei, amukondoka ku Huku, opo ononkhali mbenyi mbunyimuepo iya Siovaa emupe ononthiki mbomapole,* 20 emutumikisa Kilisitu emuholovonena, Sesusi. 21 Una eulu lina okukuata alo komivo ovipuka aviho mavilingwa ovipe, vina Huku apopia menyina liovauli vae vo kohale. 22 Moluotyo, Moisesi wati: ‘Siovaa Huku yenyi makakatula pokati kovakuatate venyi omuuli ukahi nga ame. Muna okutehelela ovipuka aviho memupopila. 23 Mahi una* uhatehelela Omuuli oo makahanyua pokati kovanthu.’ 24 Iya ovauli aveho okutuka ku Samuele na ava valandula kwe, no vakuavo vali, tupu vapopia unene ononthiki ombo. 25 Onwe muvana vovauli no vomphango Huku alingile novakuaukulu venyi, etyi apopila Ambalaiau okuti: ‘Onombunga ambuho kombanda yohi mambukapewa ononkhano onongwa mokonda yombuto yove.’ 26 Etyi Huku apindula-po kononkhia Omuumbili wae, tete wemutumine ku onwe opo emukanene nawa, mokuhondovola kese umwe pu onwe kovituwa vienyi ovivi.”