2 Timotiu

3 Mahi noñgonoka okuti kononthiki mbahulilila makukakala omivo vialema unene, viepuiya okukala. 2 Mokonda ovanthu mavakakala ovanthu velihole ovo muene, vehole onombongo, vokulihapa, vomalityindailo, vapopia omapita Huku, vokuhetavela kovohe, vokuhapandula, vehevakuatyili, 3 vehena oluembia novanthu, vehetavela okulipakela-mo, vokutendeleya, ovakalavi, vehena ohole notyiwa, 4 ovapakuli, vokuna onkhango, vokulipakako, vokuhole evi vivehambukiswa tyipona Huku, 5 pokati ka vakuavo velilekesa ngatyina ovafendi va Huku, mahi kavaendela muetyi tyelikuata nefendelo liavo; tunda pokati kovanthu ngovo. 6 Povanthu ovo pena ovalume vokuliyombeleka monombunga, avayapula ovakai vokuhapamene, vana valemenwa no nonkhali, vokuhongolelwa nomahando omanyingi. 7 Velilongesa apeho, mahi otyo vehetyivili okukala nenoñgonoko liaviuka liotyili.

8 Pahe ngetyi Sane na Sambele vayalele Moisesi, tupu no ovo vatualako okuyala otyili. Ovalume vatyo ovo vena omalusoke asila unene, iya Huku kapande ovanthu ovo mokonda kavaendela mekolelo. 9 Mahi, kamavaende kokule, mokonda owova wavo maumoneka nawa kovanthu aveho, ngetyi tyaendele novalume vana vevali. 10 Mahi ove walandula nawa etyi ndyilongesa, nonkhalelo natyinda omuenyo wange, netyi ame ndyihanda, nekolelo liange, noumphua-lundo wange, nohole yange, nekoleleyo liange, 11 nokuhataikiswa kuange no nonkhumbi mbange nga mbuna nalamba nambo mo Antiokia no mo Ikoniu no mo Lisitala. Ame nakoleleya ononkhumbi ombo iya Tatekulu wandyovola mumbo ambuho. 12 Tyotyili, aveho vahanda okufenda Huku kumwe na Kilisitu Sesusi tupu navo mavakahataikiswa. 13 Mahi ovanthu onondingavivi no vomatutu mavakavilapo okulinga ovivi, okuyapula vakuavo nokuyapulwa.

14 Mahi ove, tualako movipuka walongesua iya ovitavela, mokonda ove wii ovalie vekulongesa-vio 15 iya tunde poututu ove wanoñgonoka ovihonekwa ovisukuki, vina vipondola okukukalesa omunongo pala eyovo menyina lya Kilisitu Sesusi. 16 Ovihonekwa aviho viahonekwa kononkhono mba Huku iya vina esilivilo pala okulongesa, nokuviyula, nokuviukisa ovipuka, nokutulonga opo tulinge etyi tyaviuka, 17 opo omunthu wa Huku akale tyafuapo nawa, nokuamanekeswa nawa pala ovilinga aviho oviwa.