Swau

6 Konyima yotyo, Sesusi aende konthele onkhuavo yelunga lyo Galileia, ine ko Tibeliyade. 2 Iya ovanthu ovanyingi avemulandula, mokonda ankho veete omahuviso ekahi nokulinga, okuhakula ovavei. 3 Ngotyo, Sesusi alondo komphunda imwe, ngako apumphama novalongwa vae. 4 Iya o Pasikwa, otyipito tyova Sundeu, ankho tyikahi popepi. 5 Etyi Sesusi ayelula omaiho amono ovanthu ovanyingi ankho vekahi nokuya no kwe, apulu Filipe okuti: “Opi matukalandela ovanthu ava onombolo opo valie?” 6 Mahi, ankho wapopia ngotyo na emulole, mokonda etyi malingi muene ankho utyii-ale. 7 Filipe emukumbulula okuti: “Alo umwe onombolo mbonondenaliu ovityita vivali kambutuuka opo kese umwe alie-po vala katutu.” 8 Umwe povalongwa vae, Andelee ondenge ya Simau Petulu, emupopila okuti: 9 “Apa pena omukuendye una onombolo ononthano mbosevata nonombisi onombali. Mahi, tyituuka-tyi pala ovanthu nga ava aveho?”

10 Sesusi ati: “Popilei ovanthu vapumphame.” Ankho pena eholi enyingi pomphangu yatyo opo, iya ovanthu avapumphama, ankho pena ovalume vehungi po 5.000. 11 Sesusi akuate onombolo, etyi elikuambela, embuavela ava ankho vepumphi-po, tupu eveavela ombisi avali avekuta. 12 Mahi etyi valia avatuuka, apopila ovalongwa vae okuti: “Ongiyei ovimbembu viahupa-po, opo vihapeseke.” 13 Moluotyo aveviongiya aveyulisa onosesu 12 mbovimbembu viahupiswa-po novanthu vokualia onombolo ononthano.

14 Etyi ovanthu vamona ehuviso alinga, avahimbika okupopia okuti: “Tyotyili ou oe Omuuli ankho una okuya mouye.” 15 Etyi Sesusi etyimona okuti maveya okumukuata opo vemulinge ohamba, atundu-po, aende vali no komphunda aike.

16 Etyi kuanthikovela, ovalongwa vae avalauka no melunga, 17 iya avavelama mowato, avayauka elunga okuenda no ko Kafalanau. Ankho kuanthikovela-le, mahi Sesusi ankho keneye kuvo. 18 Tupu, elunga ankho lianumana mokonda omphepo yalinga onene. 19 Mahi, etyi vaenda onokilometu ononthano ine epandu, avamono Sesusi weendela kombanda yelunga, ehiki popepi yowato, avatili owoma. 20 Mahi evepopila okuti: “Ame; muhatilei owoma!” 21 Pahe avakala nehambu liokumutambula mowato, iya owato aihiki koluhimba oku ankho vekahi nokuenda nako.

22 Monthiki onkhuavo, ovanthu vesalele konthele onkhuavo yelunga avamono okuti ankho petupu vali owato naike, ankho pena vala owato onthutu. Tupu vamona okuti Sesusi kanyingilile mowato novalongwa vae, mahi ovalongwa vae vapita aveke. 23 Mahi onowato mbo ko Tibeliyade, ambuhiki popepi na pana ovanthu ovo valila onombolo etyi Tatekulu elikuambela. 24 Ngotyo etyi ovanthu vetyimona okuti Sesusi novalongwa vae kavepo, avanyingila mo nowato mbavo avaende no ko Kafalanau okukaovola Sesusi.

25 Etyi vemuvasa konthele onkhuavo yelunga, avemupulu okuti: “Mulongesi, onalupi weya kuno?” 26 Sesusi evekumbulula okuti: “Ame ndyimupopila otyili okuti, kamukahi nokundyovola mokonda yomahuviso muamona, mahi mundyovola mokonda yonombolo mualia amukuta. 27 Muhaundapelei okulia kuvola, mahi undapelei okulia kutualako pala okueeta omuenyo uhapu, kuna Omona womulume mekemuavela; mokonda Huku, Tate, oe apaka enyingilikilo liokuti wemupanda.”

28 Ngotyo, avemupulu okuti: “Oityi onthue tuna okulinga opo tufuisepo ovilinga vya Huku?” 29 Sesusi evekumbulula okuti: “Ovilinga vya Huku okukala nekolelo mu una atuma.” 30 Pahe avemupulu okuti: “Ehuviso patyi molingi, opo no onthue tutyimone, atukutavela? Ovilinga patyi ove ukahi nokulinga? 31 Ovakuaukulu vetu valile omanaa moluhandya, ngetyi ovihonekwa vipopia okuti: ‘Weveavelele ombolo yo keulu opo valie.’” 32 Sesusi evepopila okuti: “Tyotyili ndyimupopila okuti, Moisesi kemuavelele ombolo yo keulu, mahi Tate yange umuavela ombolo yotyotyili yatunda keulu. 33 Mokonda ombolo ya Huku, oyo ina yatunda keulu, aiya okuava omuenyo mouye.” 34 Moluotyo, avemupopila okuti: “Tatekulu, apeho tuavele ombolo oyo.”

35 Sesusi evepopila okuti: “Ame, ame mbolo yomuenyo. Una uya ku ame, kamakala-kala vali nondyala iya una ukala nekolelo mu ame, kamakala-kala vali nohunga. 36 Mahi ngetyi nemupopila, onwe muamona ame, mahi no ngotyo kamutavela. 37 Aveho vana Tate ampha, maveya ku ame iya ame himaanye nawike uya ku ame. 38 Mokonda ame natunda keulu, hapala ndyilinge ehando liange muene, mahi opala ndyilinge ehando lya una wanthuma. 39 Ehando lya una wanthuma o liokuti, pu vana ampha nawike una okupeseka-po, mahi ndyikevetutilise monthiki yahulilila. 40 Mokonda eli olio ehando lya Tate yange, liokuti ovanthu aveho vanoñgonoka Omona avakala nekolelo mwe, mavakamona omuenyo uhapu iya ame mandyikevetutilisa monthiki yahulilila.”

41 Ova Sundeu avahimbika okulondovola konthele yetyi apopia, mokonda wati: “Ame, ame mbolo yatunda keulu.” 42 Avahimbika okulipula okuti: “Ou ha Sesusi omona wa Suse? Tyati umwe he tumwii ina tumwii. Oñgeni apopia okuti, ‘ame natunda keulu’?” 43 Sesusi evepopila okuti: “Yekei-po okulondovola poyenyi. 44 Nawike upondola okuya ku ame, Tate wanthuma ehemuetele ku ame iya ame mandyikemututilisa monthiki yahulilila. 45 Ovauli vahoneka okuti: ‘Iya aveho ovo mavakalongeswa na Siovaa.’ Kese una utehelela etyi Tate alongesa, etyitavela, uya ku ame. 46  Petupu omunthu wamuene Tate, ame vala natunda kwe. Ame, ame vala namuene Tate. 47 Tyotyili ame ndyimupopila okuti, una utavela makakala nomuenyo uhapu.

48 “Ame, ame mbolo yomuenyo.” 49 Ovakuaukulu venyi valile omanaa moluhandya, mahi no ngotyo avankhi. 50 Ei ombolo itunda keulu, kese una wamali-ko kankhi. 51 Ame, ame mbolo yomuenyo yatunda keulu. Inkha umwe ulia kombolo ei, makamona omuenyo uhapu. Iya ombolo ame mandyiave, olutu luange, opo ouye ukamone omuenyo.”

52 Ova Sundeu avahimbika okulipula poyavo okuti: “Oñgeni omulume ou apondola okutuavela ohitu yae tulie?” 53 Ngotyo, Sesusi evepopila okuti: “Tyotyili ndyimupopila okuti, inkha kamuli ohitu Yomona womulume, amuhanu ohonde yae, mutupu omuenyo mu onwe muene. 54 Una ulia ohitu yange, anu ohonde yange, una omuenyo uhapu iya ame mandyikemututilisa monthiki yahulilila. 55 Mokonda ohitu yange okulia kuotyotyili iya ohonde yange okunwa kuotyotyili. 56 Una wamali ohitu yange, anu ohonde yange utualako okukala kumwe na ame iya ame andyitualako okukala kumwe nae. 57 Mokonda ngetyi Tate wokuna omuenyo anthuma iya ame ndyina omuenyo mokonda ya Tate, ngotyo, na una ulia ohitu yange, makala nomuenyo mokonda yange. 58 Ei ombolo yatunda keulu. Kayelifuile nei ovakuaukulu venyi valile, avankhi. Una ulia ombolo ei makakala nomuenyo uhapu.” 59 Wapopia ovipuka ovio, puetyi ankho ekahi nokulongesila mondyuo yokufendela* mo Kafalanau.

60 Etyi ovalongwa vae veiva etyi apopia, ovanyingi puvo, avati: “Etyi ekahi nokupopia tyalema, olie upondola okutehelela otyipuka otyo?” 61 Mahi etyi Sesusi anoñgonoka okuti ovalongwa vae vekahi nokuñgoñga mokonda yotyo, evepulu okuti: “Otyo tyemunumanesa? 62 Iya pahe inkha mutala Omona womulume ulonda kuna ankho akala? 63 Ononkhono mba Huku ombo mbuava omuenyo. Olutu lutupu esilivilo nalike. Onondaka ndyikahi nokumupopila mbatuka mononkhono mba Huku iya o mbomuenyo. 64 Mahi pena vamwe pu onwe vehetavela.” Sesusi ankho utyii-ale tunde ponthyimbi, ava vehetavela na una memupakula. 65 Ayawisako vali ati: “Otyo nemupopilila okuti, nawike upondola okuya ku ame, nkhuali oputyina etyipewa na Tate.”

66 Mokonda yotyo, ovanyingi povalongwa vae avakondoka kovipuka vasile-po, avahaende vali nae. 67 Ngotyo, Sesusi apulu ono apositolu mbae 12 okuti: “Ine hamwe no onwe muhanda okuenda?” 68 Simau Petulu emukumbulula okuti: “Tatekulu, okulie matwii nako? Ove una onondaka mbomuenyo uhapu. 69 Onthue tuetavela, tupu tuanoñgonoka okuti ove Umusukuki wa Huku.” 70 Sesusi evekumbulula okuti: “Ame nemuholovona 12, hatyo? Mahi umwe pu onwe omutendeleyi.”* 71 Ankho ukahi nokupopia Sunda omona wa Simau Isikaliote, mokonda ankho oe memupakula, namphila ankho o umwe pono apositolu 12.