Ova Efesu

1 Ame Paulu, o apositolu ya Kilisitu Sesusi kehando lya Huku, nahonekela ovasukuki vekahi mo Efesu, ovalanduli ovakuatyili va Kilisitu Sesusi:

2 Kalei nokankhenda okanene nombembwa itunda ku Huku Tate yetu, no ku Tatekulu Sesusi Kilisitu.

3 Huku, Tate ya Tatekulu yetu Sesusi Kilisitu ahilivikwe, mokonda wetuavela ononkhano onongwa mbutunda kononkhono mbae, kumwe na Kilisitu konomphangu mbo keulu, 4 tyetyi wetuholovona-le kohale etyi nkhele ouye uhenetungwe opo tukakale kumwe na Kilisitu, atukala nohole nokukala ovasukuki tyihavelwa onombei komaiho ae. 5 Mokonda kehando liae ngwe watokola okutavela tukale ngovana vae muene mokonda ya Sesusi Kilisitu, monkhalelo imuhambukiswa, 6 opo ankhimanekwe mokonda yokankhenda kae okanene etuavela motyali tyae, menyina lya una ehole unene. 7 Mokonda yomona wae, tuayovolwa nofeto yeyovo alinga nohonde yae iya tuevelwa oviponyo vietu mokankhenda okanene ka Huku.

8 Huku wetuavela unene okankhenda oko okanene mounongo auho nenoñgonoko,* 9 mokuetunoñgonokesa ovipuka viae viaholekwa konthele yehando liae. Mokonda kehando liae muene wapanga okupaka-ko 10 outumini umwe maukalako tyina omivo vianakwa viamelifuilapo, opo awaneke ovipuka aviho mu Kilisitu, ovipuka keulu novipuka kombanda yohi. Yoo, maviwanekwa mwe 11 mu una tukahi kumwe nae, tuanakwa kumwe nae opo tukakale onomphinga, tyetyi tuaholovonwa tunde ponthyimbi monkhalelo yelikuata nehando lya una ulinga ovipuka aviho, ngetyi muene atokola kehando liae, 12 opo mokonda yetu, vokuatetekela okukevelela mu Kilisitu, Huku ankhimanekwe nokuhilivikwa. 13 Mahi no onwe tupu muakevelela mwe etyi mueiva ondaka yotyili, onondaka onongwa konthele yeyovo lienyi. Etyi muetavela, amupakwa enyingilikilo kononkhono mba Huku mbalaelwe menyina liae, 14 ambukala opinyolo yepingo lietu, opo Huku kehando liae ayovole ovanthu vae nofeto yeyovo, na apewe omunkhima omunene.

15 Moluotyo, tupu tunde etyi neiva ekolelo muna-lio mu Tatekulu Sesusi noluembia mualekesa kovasukuki aveho, 16 nalumwe nayekele-ko okupandula mokonda yenyi. Ndyitualako okumutumbula momalikuambelo ange, 17 opo Huku ya Tatekulu yetu Sesusi Kilisitu, Tate wenkhimano emuavele ononkhono mbounongo iya amunoñgonoka ovipuka ahololola konthele yenoñgonoko liae liafuapo. 18 Iya Huku wamimikila omaiho omomitima vienyi, opo munoñgonoke ekevelelo patyi emuihanena, nomalumono omunkhima apaka ngepingo pala ovasukuki, 19 nokunoñgonoka epondolo liae enene alekesa ku onthue ovataveli. Epondolo olio likahi nokulekeswa nawa netyi ononkhono mbae ononene mbukahi nokulinga, 20 mbuna aundapesa etyi apindula-po Kilisitu kononkhia iya emupumphika kokulio kwae ko nomphangu mbo keulu, 21 kombanda yomauhamba aeho, nounene auho, nepondolo aliho, nomautumini aeho, no kombanda yomanyina aeho apondola okutumbulwa, ha mouye* uno vala, mahi no mouye mauya. 22 Tupu wapaka ovipuka aviho mombuelo yonomphai mbae iya emulingi onkhalamutwe yovipuka aviho mewaneno. 23 Ewaneno olio olutu lwae, lieyula ovituwa viae, una ufuisapo ovipuka aviho mu atyiho.