1 Ova Kolindu

15 Pahe vakuatate, ame ndyimuhinangelesa onondaka onongwa, mbuna nemupopila amumbutavela, mbuna tupu mutualako okulandula. 2 Mokonda yambo, onwe mukahi nokuyovolwa inkha mutualako okukakatela monondaka onongwa ombu nemupopila; okuhalingi ngotyo opo ekolelo lienyi mu Tatekulu kalisilivila.

3 Mokonda povipuka vyo tete ame nemupopila, pena etyi ame natambula, tyokuti Kilisitu wankhia mokonda yononkhali mbetu ngetyi Ovihonekwa vipopia; 4 apakwa iya apindulwa-po monthiki ya tatu, ngetyi Ovihonekwa vipopia; 5 iya amonekela Sefa,* konyima amonekela ovalongwa Ekwi na vevali. 6 Konyima amonekela ovakuatate valamba po 500 motyikando tyike vala, ovanyingi puvo nkhele tuna-vo, mahi vamwe velele-ale mononkhia. 7 Iya amonekela vali Tiaku konyima amonekela ono apositolu ambuho. 8 Mahi konyima ya aveho, tupu amonekela ame, nga una watyitwa tyihakolele.

9 Mokonda ame ndyinkhelo yono apositolu, hatele-mo okuihanwa okuti o apositolu, mokonda namonesile ononkhumbi ewaneno lya Huku. 10 Mahi mokonda yokankhenda okanene ka Huku, ame ndyi apositolu. Iya okankhenda kae ku ame kakapesekele, mokonda naundapa vali unene tyipona ono apositolu ambuho; mahi hameko, okankhenda okanene ka Huku kekahi na ame. 11 Ngotyo, tyilinge ame ine hamwe ovo, oyo onkhalelo onthue tuivisa iya onkhalelo oyo, oyo onwe muetavela.

12 Pahe inkha onthue tukahi nokuivisa okuti Kilisitu wapindulua-po mononkhia, oñgeni vamwe pu onwe vapopia okuti kutupu etutilo lyo vokuankhia? 13 Inkha tyili kutupu etutilo lyo vokuankhia, opo naina Kilisitu kapindulilwe-po. 14 Mahi inkha Kilisitu kapindulilwe-po, opo etyi tuivisa katyisilivila, nekolelo lienyi tupu kalisilivila. 15 Tyihe-otyo vala, opo no onthue tuakala onombangi mbomatutu mba Huku, mokonda tukahi nokuava oumbangi konthele ya Huku, wokuti Huku wapindula-po Kilisitu, ngwe naina kemupindulile-po, inkha vokuankhia tyili kamavapindulwa-po. 16 Mokonda inkha vokuankhia kamavapindulwa-po, opo Kilisitu nae kapindulilwe-po. 17 Tupu, inkha Kilisitu kapindulilwe-po, ekolelo lienyi kalisilivila; nkhele mukahi vala mononkhali. 18 Na vana velele-ale mononkhia kumwe na Kilisitu, navo vanyima-ko umwe kaveya vali. 19 Inkha momuenyo ou, tukevela vala mu Kilisitu, opo tueetesa vali onkhenda tyipona ovanthu vatyo aveho.

20 Mahi pahe Kilisitu wapindulua-po mononkhia, akala ngotyinyango tyo tete pu vana velele mononkhia. 21 Mokonda ngetyi ononkhia mbaetwa nomulume wike vala, netutilo lyo vokuankhia maliya mokonda yomulume wike. 22 Mokonda ngetyi mu Andau ovanthu aveho vekahi nokunkhia, tupu mu Kilisitu aveho mavakakala nomuenyo. 23 Mahi kese umwe una onkhalelo yae muene: Kilisitu oe otyinyango tyo tete, konyima aveho va Kilisitu mokueenda kuomuvo ngwe eyale. 24 Konyima, okuhulilako, apakula Ouhamba ku Huku, Tate yae, tyina amanyimi-ko outumini auho, nepondolo, nounene auho. 25 Mokonda ngwe una okutumina alo Huku apaka onondyale mbae ambuho mombuelo yonomphai mbae. 26 Iya ondyale yahulilila-ko, ononkhia, ainyimwa-ko. 27 Mokonda Huku, “wapaka ovipuka aviho mombuelo yonomphai mbae.” Mahi tyina ngwe ati ‘ovipuka aviho viapakwa mombuelo yonomphai mbae,’ tyayandyuluka nawa okuti kapakutikinya Una wapaka ovipuka aviho mombuelo yae. 28 Mahi tyina ovipuka aviho viamapakwa mombuelo yonomphai mbae, pahe Omona nae ukakala mombuelo ya Una wapaka ovipuka aviho mombuelo yae, opo Huku akale ovipuka aviho pala aveho.

29 Inkha hatyo, iya opo vokukahi nokumbatisalwa opo vankhie mavalingi ñgeni? Inkha vokuankhia kamavapindulwa-po iya opo omokonda yatyi ngwe vekahi nokumbatisalelwa opo vankhie? 30 Omokonda yatyi onthue tukalela motyiponga omuvo auho?* 31 Vakuatate ame nelimphanda mokonda yo onwe ovalongwa va Kilisitu Sesusi Tatekulu yetu iya ononthiki ambuho ndyihupa kononkhia. 32 Inkha nalwa novinyama ko Efesu nga vakuetu,* ouwa patyi otyo tyindyetela? Inkha vokuankhia kamavapindulwa-po opo “tuliei, tunwei, mokonda muhuka matunkhi-ale.” 33 Muhayondyuei. Omapanga omavi anyona ovituwa oviwa.* 34 Pakei pomphangu onondunge mbenyi monkhalelo yaviuka iya muhalingei onkhali, mokonda vamwe vetupu enoñgonoko lya Huku. Ame ndyipopia ngotyo opo tyimukundise.

35 Mahi umwe mapulu okuti: “Vokunkhia mavakapindulwa-po ñgeni? Olutu patyi maveya nalo?” 36 Onwe kamusoko nawa! Etyi ukuna katyipondola okukala nomuenyo, tete tyina okunkhia. 37 Iya onwe kamukunu olutu ngalo lukula, mahi mukuna oñgima, tyilinge otiliku ine ombuto onkhuavo vali; 38 mahi Huku uuyavela olutu lumuhambukiswa iya kese ombuto uyavela olutu luayo. 39 Ohitu kayelifuile, kuna ohitu yovanthu, kuna ohitu yongombe, kuna ohiti yoviila, no yombisi. 40 Iya kuna omalutu okeulu, nomalutu opohi: mahi omunkhima womalutu okeulu utyao iya womalutu opohi tupu utyao. 41 Omunkhima wekumbi utyao iya omunkhima wohanyi omukuavo iya omunkhima wononthungululu omukuavo, kese nthungululu omunkhima wayo welikalela.

42 Otyo tyelifwa netutilo lyo vokuankhia. Olutu luvola luhihilwa; mahi olutu lupindulwa-po kalupondola okuvola. 43 Olutu luhihilwa* tyihena omunkhima; alututiliswa nomunkhima. Luhihilwa* tyihapamene; alututiliswa nepondolo. 44 Luhihilwa olutu luohitu nohonde; alupindulwa-po tyihena ohitu nohonde. Inkha kuna olutu luohitu nohonde tupu kuna olutu luhena ohitu nohonde. 45 Tyahonekwa okuti: “Omulume wo tete Andau wakala omunthu* una omuenyo.” Andau wahulilila wakala oandyu yaava omuenyo. 46 Mahi, wokuhena ohitu nohonde haeko tete. Tete o wokuna ohitu nohonde, pahe akuya wokuhena ohitu nohonde. 47 Omulume wo tete watunda meheke walingilue neheke; omulume wavali watunda keulu. 48 Ngetyi omulume walingilue neheke ankho ekahi, otyo tyikahi ovanthu valingwa neheke; iya vana vokukahi keulu vekahi nga una watundile keulu. 49 Iya ngetyi tuelifwa nomulume una Huku alingile neheke, tupu matulifu nomulume wokuatundile keulu.

50 Mahi vakuatate ame ndyimupopila okuti ohitu nohonde kavipondola okupiñgana Ouhamba wa Huku, nii etyi tyivola katyipiñgana etyi tyihavolo. 51 Mandyimupopila otyipuka tyaholekwa tya Huku: Ha atuho matulala mononkhia, mahi atuho matupilululwa, 52 momuvo umwe, mokupanyina kueiho, tyina onkhuino yahulilila-ko yamahikwa. Mokonda onkhuino maihiki iya vokuankhia avapindulwa-po nolutu luhavolo iya onthue matukapilululwa. 53 Mokonda olutu luokuvola luna okuvalekwa olu luhavolo iya luokunkhia luna okuvalekwa olu luhankhi. 54 Mahi tyina olutu luokuvola luamavalekwa olu luhavolo iya luokunkhia aluvalekwa olu luhankhi, onondaka mbokuati: “Ononkhia mbanyimwa-ko apeho,” mambufuiswapo. 55 “Nonkhia, ononkhono mbove mbulipi? Nonkhia, oulio wove ulipi?” 56 Oulio weeta ononkhia onkhali, iya epondolo lionkhali Ovitumino.* 57 Mahi upandulwa o Huku, mokonda wetukuatesako okufinda ononkhia menyina lya Tatekulu yetu Sesusi Kilisitu!

58 Ngotyo, vakuatate vange ononthyolwe, kalei tyapama, amuhatengatenga, undapei unene apeho movilinga vya Tatekulu, amunoñgonoka okuti ononkhono mulinga movilinga vya Tatekulu hanonkhono-puila.