Omukanda wo Tete Onohamba

8 Pononthiki opo, Salomau aonganeka+ ovakulu aveho vo Isilayeli: ononkhalamutwe mbomihoko, nonohongoi mbonombunga mbova Isilayeli.+ Ovo aveho aveya Kohamba Salomau, ko Selusalei, opo vakapole otyikasa tyomphango tya Siovaa Mepunda-Umbo lya Ndaviti,+ ko Siyau.+ 2 Ovalume aveho vo Isilayeli avekeliongiya Pohamba Salomau motyipito,* mohanyi ya Etanii,* ohanyi oyo oya pandu-vali.+ 3 Ovakulu aveho vo Isilayeli aveya, ovanakwa avatyindi-po Otyikasa.+ 4 Avatyindi-po Otyikasa tya Siovaa, nekaka liomaliongiyo,+ novityuma aviho vikola vili mekaka. Ovanakwa no vomuhoko wa Levii avevitwala no kombanda. 5 Ohamba Salomau novanthu aveho vo Isilayeli vaihanwa opo vekeliongiye nae, vali komutwe Wotyikasa; avalingi onongi ononyingi ovilikutila,+ nonongombe mbehevilwa okuvalulwa.

6 Ovanakwa avatwala Otyikasa tyomphango tya Siovaa pomphangu yatyo,+ mondywo yo mokati, Momphangu Ikola Unene, avetyipake mombwelo yomavava ono kelumbii.+

7 Omavava ono kelumbii atandavela keulu Liotyikasa, Otyikasa novikwatelelo viatyo, avikala mombwelo yono kelumbii.+ 8 Ovikwatelelo+ ovilaale unene, onondungu mbavio mbumoneka Komphangu Ikola komutwe wondywo yomokati, mahi kambumonenwa kondye. Ovikwatelo na hono opo vikahi. 9 Motyikasa mutupu natyike, muna vala omamanya evali omapapi+ apakelwe-mo+ na Mwisesi ko Holembe, etyi Siovaa alinga omphango+ nova Isilayeli pokwatunda kotyilongo tyo Isitu.+

10 Etyi ovanakwa vatunda momphangu ikola, mondywo ya Siovaa+ amuyula ekaka.+ 11 Mokonda yekaka, ovanakwa avehetyivili vali okukala-mo opo valinge* ovilinga viavo, tyeetyi onohanya mbomunkhima wa Siovaa, mbeyulile mondywo ya Siovaa.+ 12 Pahe Salomau apopi okuti: “Siovaa wapopile okuti makala momakaka anthikovela.+ 13 Ame netyivila okukutungila ondywo imwe ongwa unene opo ukale-mo, omphangu natunga opo ukale-mo apeho.”+

14 Ohamba aipilukila kovaunyingi aveho vo Isilayeli, aihimbika okuveyamba, otyo ovaunyingi aveho vo Isilayeli vetai.+ 15 Aipopi okuti: “Siovaa Huku yo Isilayeli ahilivikwe, una wafwisapo nokuvoko kwae etyi alaele tate yange Ndaviti nomulungu wae, okuti: 16 ‘Tundee onthiki napola ovanthu vange ova Isilayeli mo Isitu, hakoyele epunda-umbo nalike pokati komihoko aviho vyo Isilayeli opo ndyitunge-mo ondywo omu mamukala enyina liange apeho,+ mahi naholovona Ndaviti akale omutumini wovanthu vange ova Isilayeli.’ 17 Etyi tate yange Ndaviti ahandele momutima wae, okutunga ondywo yenyina lya Siovaa Huku yo Isilayeli.+ 18 Mahi Siovaa apopila Ndaviti tate yange okuti: ‘Etyi wahanda komutima wove, okutunga ondywo yenyina liange, etyi wahanda okulinga otyiwa. 19 Mahi ove have-ko motungu ondywo, omona matuku mwoove* oe makatunga ondywo yenyina liange.’+ 20 Siovaa wafwisapo omulao alingile, etyi napinga tate yange Ndaviti, andyipumphama kotyipundi tyouhamba wo Isilayeli, ngeetyi Siovaa alaele. Tupu natunga ondywo yenyina lya Siovaa Huku yo Isilayeli,+ 21 andyiovola omphangu napakala Otyikasa tyina omphango+ Siovaa alingile novakwaukulu vetu etyi evepola motyilongo tyo Isitu.”

22 Salomau atalama pomutala wovilikutila wa Siovaa, komutwe wovaunyingi aveho vo Isilayeli, ayelula omavoko no peulu,+ 23 ati: “Siovaa Huku yo Isilayeli, kutupu vali Huku ulifwe noove+ keulu nii pano pohi mombwelo. Ove kuyeke-po omphango walinga, nolwembia lwove olunene+ novaumbili vove, vokweendela monondyila mbove nomutima auho.+ 24 Ove wafwisapo etyi walaele omuumbili wove Ndaviti, tate yange. Walaele nomulungu wove mwene, hono wetyifwisapo nokuvoko kwoove mwene.+ 25 Pahe, Siovaa Huku yo Isilayeli, linga etyi wapopile omuundapi wove Ndaviti, tate yange, etyi watile: ‘Apeho makukakala umwe makatuka mwoove makapumphama kotyipundi tyoutumini wo Isilayeli, ine ovana vove vakakatela monondyila mbange, avetavela kwaame ngeetyi ove wetavelele kwaame.’+ 26 Pahe, mbambavo Huku yo Isilayeli, etyi walaele omuundapi wove tate yange Ndaviti, tyikale otyili.

27 “Mahi okuti tyotyili Huku makala umwe pohi?+ Tala! Komaulu, keulu lyo komaulu, kufu-ko,+ pahe okuti mondywo ei natunga mofu-mo?+ 28 Pahe tehelela-vo elikwambelo liange ame muundapi wove neetyi nekwita okankhenda, Siovaa Huku yange, nthehelele-vo ame muundapi wove etyi nekwita unkhwateseko, nelikwambelo ame muundapi wove nalinga hono kwoove. 29 Omaiho ove ayunge ondywo ei otyitenya notyinthiki, omphangu ei ove wati: ‘Omu, omo mamukala enyina liange,’+ tehelela elikwambelo ame muundapi wove nalingila pomphangu pano.+ 30 Tehelela-vo etyi ame muundapi wove nekwita okankhenda, tehelela tyina ovanthu vove ova Isilayeli vamelikwambelela pomphangu ei. Tyiivale-vo kwoove, komphangu yove keulu,+ oku ukala; tavela-vo, oveevela.+

31 “Ine omulume umwe ulinga mukwavo onkhali, akuluminywa okulinga omphango,* pahe akala nonkhuluminya yeetyi tyaitwa momphango oyo,* aende komutala wove wovilikutila mondywo ei putyina nkhele eli momulao oo,*+ 32 tehelela-vo keulu oko, olingi tyimwe, okoyesa ovaundapi vove: vela onombei* una walinga otyivi, etyi alinga tyitokele komutwe wae mwene, wahavele onombei omuviuki,* muyamba mwetyi alinga tyaviuka.+

33 “Ine ovanthu vove ova Isilayeli vatila konondyali mbavo mokonda yokukalela vala okulinga onkhali kwoove, avakondoka vali kwoove,+ avahilivika enyina liove,+ avelikwambela, avelivondela avaiti uvelingi okankhenda mondywo ei,+ 34 vetehelela-vo keulu oko, oevela-vo onkhali yovanthu vove ova Isilayeli, ovekondola kotyilongo waavela onombwale mbavo.+

35 “Ine eulu lipata, ombila ayahaloko,+ mokonda ovanthu vove vakalela vala okulinga onkhali kwoove,+ avelikwambelela pomphangu ei, avahilivika enyina liove, avayeke-po onkhali yavo mokonda wevelongesa okuliola omutima,*+ 36 vetehelela-vo keulu oko ukala, oevela onkhali yovanthu vove ova Isilayeli, ovelongesa ondyila ikahi nawa vena okweendela,+ olokesa ombila motyilongo+ waavela ovanthu vove, atyikala epingo liavo.

37 “Ine motyilongo mukala ondyala+ hamwe amutokela omukihi, nomutenya omunene, nonkhume,+ notyipahu tyovimphunia-mphunia ine ovimphunia-mphunia viokunyona; hamwe tupu onondyale ambulisete nepunda-umbo limwe liotyilongo,* hamwe akuya ovihuna ovikwavo, ouvela umwe autumbuka motyilongo,+ 38 omulume umwe okuti hatyo ovanthu vove aveho ova Isilayeli avalingi elikwambelo hamwe avaiti okankhenda,+ (mokonda munthu na munthu wii olwihamo lwo momutima wae)+ putyina ngwe vatandaveka omavoko avo pondywo ei, 39 vetehelela-vo keulu oko, komphangu ove ukala,+ oveevela+ olingi tyimwe, okondolela munthu na munthu, okutalela konondyila mbae ambuho,+ mokonda ove wii omitima viavo (ove vala wii nawa omutima wovanthu aveho),+ 40 opo vakale nonthilo* noove ononthiki ambuho mavakala motyilongo ove waavelele ovakwaukulu vetu.

41 “Ine omunthu umwe onthunda-vilongo wehe-wovanthu vove ova Isilayeli, utunda kotyilongo tyo kokule mokonda yenyina liove*+ 42 (mokonda ovanthu maveivi enyina liove enene+ lipopiwa, nononkhono mbeke liove no mbokuvoko kwoove kwatandavekwa), eya elikwambelela pondywo ei, 43 mutehelela-vo keulu oko, komphangu ove ukala,+ olingi atyiho onthunda-vilongo yekwiita, opo ovanthu vovilongo aviho vanoñgonoke enyina liove, avakala nonthilo noove+ ngeetyi ovanthu vove ova Isilayeli valinga, avanoñgonoka okuti enyina liove likahi nokutumbulwa mondywo ei natunga.

44 “Ine ovanthu vove vaya kovilwa okukalwisa onondyale mbavo, avaendela mondyila wevelekesa,+ avelikwambela+ kwoove Siovaa kepunda-umbo ove waholovona,+ no kondywo natungila enyina liove,+ 45 vetehelela-vo keulu oko elikwambelo liavo, nokankhenda vekwita ovelingi ouviuki.

46 “Ine valinga onkhali kwoove (mokonda petupu omunthu wahalingi onkhali)+ ovenumanena, oveyekela pomavoko ondyale yavo aivetwala koukonde kotyilongo tyayo, kokule ine opopepi,+ 47 ngwe avelivele tyina veli kotyilongo vatwalwa,+ avakondoka kwoove+ avekwiti okankhenda motyilongo tya vana vokwevetwaile koupika,+ avati: ‘Twalinga onkhali, twalinga otyivi neetyi tyapenga,’+ 48 avakondoka kwoove nomutima auho,+ nohande* aiho motyilongo tyonondyale mavevetwala koupika, avelikwambela kwoove tyapilukila kotyilongo waavelele ovakwaukulu vavo, kepunda-umbo waholovona, no kondywo natungila enyina liove,+ 49 tehelela-vo elikwambelo liavo keulu oko ukala,+ na tyina velivondela opo uvelinge okankhenda, ovelingi ovekoyesa, 50 oevela ovanthu vove onkhali valinga kwoove; evela ononkhali ambuho valinga kwoove. Movekwatesako valingwe okankhenda, ovanthu vokwevetyinda koupika avevelingi okankhenda+ 51 (mokonda ovanthu vove, epingo liove+ wapola ko Isitu,+ mofolono yokuyoka ovivela).+ 52 Omaiho ove atale-vo okankhenda+ omuundapi wove aita, nokankhenda ovanthu vove ova Isilayeli vaita, vetehelela apeho tyina veliyava kwoove.*+ 53 Mokonda ove weveyapula kovanthu aveho vovilongo+ opo vakale epingo liove, ngeetyi wapopilile omuundapi wove Mwisesi, etyi wapola ovakwaukulu vetu ko Isitu, ove Tatekulu Hamba Onene Siovaa.”

54 Etyi Salomau amana okulinga elikwambelo olio aliho, nokwita okankhenda oko ku Siovaa, akatuka komutwe womutala wa Siovaa wovilikutila, oku aikila konongolo nomavoko atandavekela peulu.+ 55 Akatuka, apeleyila oviwa ewaneno aliho lyo Isilayeli nondaka yakaluluka okuti: 56 “Siovaa ahilivikwe mokonda waavela ovanthu vae ova Isilayeli omphangu yokupululukwapo, ngeetyi alaele.+ Petupu ondaka naike yaponya pomilao aviho oviwa apopilile omuundapi wae Mwisesi.+ 57 Siovaa Huku yetu, akale noonthwe ngeetyi akalele novakwaukulu vetu.+ Ehetuyeke, nii ehetuse-po.+ 58 Etukwateseko omutima wetu ukondoke kwe,+ tweendele monondyila mbae ambuho, atulingi etyi tyipopia ovitumino viae, nomahongolelo ae, novitumino viae vionomphela, evi atumine ovakwaukulu vetu vaendele-mo. 59 Onondaka ombo napopia mbokwita okankhenda ku Siovaa, mbukale popepi na Siovaa Huku yetu, otyitenya notyinthiki, opo alinge ouviuki omuundapi wae novanthu vae ova Isilayeli, mu atyiho tusuka natyo nthiki na nthiki, 60 opo ovanthu aveho kombanda yohi vanoñgonoke okuti Siovaa o Huku yotyotyili.+ Kutupu vali nawike!+ 61 Omutima wenyi ukale omukwatyili*+ ku Siovaa Huku yetu, endelei mwetyi apopia amutavela ovitumino viae ngeetyi mukahi nokulinga hono.”

62 Ohamba nova Isilayeli aveho avalingila Siovaa otyilikutila otyinene.+ 63 Salomau aave ovilikutila viombembwa+ ku Siovaa: aave onongombe 22.000 nonongi 120.000. Ngootyo, ohamba novanthu aveho vo Isilayeli avapakula ondywo ya Siovaa.+ 64 Monthiki oyo, ohamba yesukisa okusukukisa pokati-na-kati kepata likala komutwe wondywo ya Siovaa, mokonda opo ena okulingila ovilikutila viokuyokwa, noviawa viovilia, novilenga viovilikutila viombembwa. Omutala wovilikutila wotyitasu+ ukala komutwe wondywo ya Siovaa, hamunene-ko. Ovilikutila viokuyokwa, noviawa viovilia, no viovilenga+ viovilikutila viombembwa kavifu-ko. 65 Pononthiki opo, Salomau alingi otyipito+ novanthu aveho vo Isilayeli, ovanthu vamwe ovanyingi, vatunda ko Lembo-Hamate* no Kelola lyo Isitu.+ Avalingi otyipito komaiho a Siovaa Huku yetu, mononthiki 7, konyima avalingi vali ononthiki 7, ambuho ambutuuka 14. 66 Monthiki yalandula-ko,* ayeke ovanthu vaye avape elao ohamba, avaende komaumbo avo tyahambukwa, nomutima wavialuka mokonda yokankhenda+ Siovaa alinga omuundapi wae Ndaviti, novanthu vae ova Isilayeli.