Luka

22 Pahe ankho Otyipito tyo Nombolo Mbahapakelwe Onkhiso, tyitiwa Opasikwa, tyikahi nokuhika-po. 2 Ovanene-nakwa novahoneki vovitumino ankho vekahi nokuovola onkhalelo yokumukuata, mokonda ankho vatila owoma ovanthu. 3 Iya Satanasi anyingila mu Sunda ankho utiwa o Isikaliote, umwe Pekwii na Vevali, 4 iya aende akapopia novanene-nakwa no nonkhalamutwe mbo mondyuo ya Huku, oñgeni apondola okumupakula kuvo. 5 Otyo atyivehambukiswa iya avelipakela-mo okumuavela onombongo mbopalata. 6 Etavela iya ahimbika okuovola omphitilo yokumupakula kuvo otyo pehena ovanthu.

7 Onthiki yo tete Yotyipito tyo Nombolo Mbahapakelwe Onkhiso aihiki-po, ankho onthiki yokuava otyilikutila tyo Pasikwa. 8 Ngotyo, Sesusi atumu Petulu na Suau, ati: “Endei, kapongiyei Opasikwa opo tulie.” 9 Avemupulu okuti: “Opi uhanda tukeipongiyile?” 10 Evepopila okuti: “Tyina muamanyingila mepunda-umbo, mamuvasi omulume umwe watyinda omulindi womaande. Mulandulei, alo meumbo amanyingila. 11 Popilei hekulu yeumbo okuti: ‘Omulongesi wati: “Ondyuo yovaenda ili-pi ndyilile-mo Opasikwa novalongwa vange?”’ 12 Iya omulume oo memulekesa ondyuo imwe onene mosapalalo yapongiyua nawa pala ovaenda, ngamo muipongiyila.” 13 Moluotyo avaende, avavasi umwe ovipuka ngetyi Sesusi evepopila, iya avapongiya Opasikwa.

14 Ngotyo etyi oola yehika-po, akapumphama komesa nono apositolu. 15 Evepopila okuti: “Ankho nahanda unene okulia Opasikwa ei no onwe tyina nehenemoneswe ononkhumbi. 16 Ame ndyimupopila okuti, himeili vali alo ikafuiswapo Mouhamba wa Huku.” 17 Atambula okopo, elikuambela, ati: “Umei, litambekei, kese umwe pu onwe anwe-ko. 18 Ame ndyimupopila okuti, okutuka hono, himanu vali ovinyu alo Ouhamba wa Huku uya.”

19 Tupu akuate ombolo, elikuambela, eivembula, eveavela-yo, ati: “Etyi otyilekeso tyolutu luange, maluaawa pala ouwa wenyi. Tualeiko okutyilinga opo munthyinangele.” 20 Tupu, ngatyo alinga nokopo. Etyi vamana okulia ondalelo, ati: “Okopo ei otyilekeso tyomphango omphe mokonda yohonde yange, maikamomeswa pala ouwa wenyi.

21 “Mahi talei! enkhanya lya una mamphakula likahi na ame komesa. 22 Ovipuka aviho viahonekwa konthele yo Mona womulume mavifuisuapo mwe, mahi una memupakula ngongo yae!” 23 Moluotyo avahimbika okulipula poyavo olie puvo malingi ngotyo.

24 Mahi tupu avahimbika okuyaya poyavo konthele yolie omunene vali pokati kavo. 25 Mahi evepopila okuti: “Onohamba mbomalongo mbukolonyeka ovanthu, iya vana vatumina vaihanwa okuti Vokulinga Oviwa. 26 Mahi onwe kamupondola okukala ngotyo. Omunene vali pokati kenyi akale ngatyina omututu vali, iya onkhalamutwe akale ngou uundapela vakuavo. 27 Olie omunene ku vakuavo, oyouna upumphi komesa* ine oyouna ukahi nokuava?* Hayou upumphi komesa?* Mahi ame ndyikahi pokati kenyi ngou ukahi nokumuundapela.*

28 “Mahi onwe, onwe muatualako okukala na ame mononkhumbi mbange. 29 Ame ndyilinga omphango no onwe, ngetyi Tate alinga na ame omphango youhamba, 30 opo mukalie amunu komesa yange Mouhamba wange, iya amupumphama kovipundi vioutumini opo mukoyese omihoko 12 vyo Isilayeli.

31 “Simau, Simau, Satanasi waita opo amuho musiswe ngotiliku. 32 Mahi, ame ndyikahi nokukulingila-ko unene omalikuambelo, opo ekolelo liove lihatepuluke. Iya ove tyina wamakondoka pameka ovakuatate vove.” 33 Mahi ngwe ati: “Tatekulu, ame nafuapo opo ndyende no ove tyilinge mokaleya tyilinge okukaipawa.” 34 Mahi ngwe ati: “Petulu, ame ndyikupopila okuti hono apa ekuandambolo liakapopila, ove mopopi ovikando vitatu okuti kundyi.”

35 Tupu evepopila okuti: “Etyi nemutumine tyihena otyipapo tyonombongo nosaku yokulia nononkhaku, muna etyi muakambele?” Avati: “Au!” 36 Iya evepopila okuti: “Mahi pahe ou una otyipapo tyonombongo etyityinde, nou una osaku yokulia, iya ou uhena omutunga alandese omuvalo wae alande wike. 37 Mokonda ame ndyimupopila okuti etyi tyahonekwa tyina okufuisuapo mu ame tyokuti: ‘Wavalulilua kumwe no vokutomba ovitumino.’ Mokonda otyo tyikahi nokufuiswapo mu ame.” 38 Ngwe avati: “Tatekulu, tala! pena omitunga vivali.” Evekumbulula okuti: “Vituuka.”

39 Etyi atunda opo, aende no Komphunda Yomindyambi ngetyi ehole-ale okulinga iya ovalongwa navo avemulandula. 40 Etyi vehika-ko, evepopila okuti: “Tualeiko okulikuambela opo muhayondyue.” 41 Iya ahondovoka katutu ponthele yavo, aikila konongolo ahimbika okulikuambela, 42 ati: “Tate, inkha uhanda, mphole okopo ei. Mahi, hehando liange lilingwa, oliove lina okulingwa.” 43 Iya keulu akutundu oandyu imwe, aiya kwe, aimupameka. 44 Mahi ankho waihamenua unene, pahe elikuambela vali unene; iya omatukuta ae aakala ngatyina omata ohonde atokela pohi. 45 Etyi amana okulikuambela akatuka aende povalongwa, evevasi velele vaponwa mokonda vaihamenwa. 46 Iya evepopila okuti: “Omokonda yatyi mualalela? Katukei, tualeiko okulikuambela, opo muhayondyue.”

47 Putyina nkhele ekahi nokupopia, akuya ovanthu ovanyingi vahongolelwa nomulume utiwa o Sunda, umwe po no apositolu 12, eya no pu Sesusi emupe ombesu. 48 Mahi Sesusi emupulu okuti: “Sunda upakula Omona womulume nombesu?” 49 Etyi vana ankho ena-vo vamona etyi matyiende-po, avati: “Tatekulu, tupondola okuvelwisa nomutunga?” 50 Umwe puvo autukila omupika womunene-nakwa wavilapo, emutete okutwi kwo kokulio. 51 Mahi Sesusi emupopila okuti: “Kuapwa.” Iya akuate okutwi emuhakula. 52 Sesusi apopila ovanene-nakwa no nonkhalamutwe mbo mondyuo ya Huku novakulu ankho veya okumupola, ati: “Onwe mueya nomitunga, novimuti ngoti mueya okukuata otyimphulu? 53 Ononthiki ambuho ame ankho ndyikala no onwe mondyuo ya Huku nokulongesa, mahi amuhankhuate. Mahi ou omuvo wenyi, no womutumini wenthiki.”

54 Pahe avemukuate avaende nae avemutuala keumbo lio munene-nakwa wavilapo. Petulu emulandula, mahi akalela kokule. 55 Etyi vanthiakana otupia mokati kepata aveho avapumphama, na Petulu apumphama pokati kavo. 56 Mahi omuhikuena umwe omuundapi, etyi emumonena kotyitei tyotupia upumphi, emutale nawa, ati: “Omulume ou nae ankho vena-e.” 57 Mahi ngwe ehetavela, apopi okuti: “Ame himwii.” 58 Etyi pakala katutu, apeya omunthu omukuavo emupopila okuti: “Ove no ove uumwe puvo.” Mahi Petulu emukumbulula okuti: “Ame hame-ko.” 59 Iya etyi pakala oola, omulume omukuavo ahimbika okupopia nononkhono, ati: “Tyotyili omulume ou ankho nae vena-e, mokonda nae omu Galileia!” 60 Mahi Petulu ati: “Ame etyi ukahi nokupopia hityii.” Tyina nkhele ankho ekahi nokupopia liwa-liwa ekuandambolo alipopi. 61 Ngotyo Tatekulu apiluluka atale ku Petulu iya Petulu ahinangela etyi Tatekulu emupopilile okuti: “Hono, tyina ekuandambolo lihenepopie ove mondyanye ovikando vitatu.” 62 Ngotyo, alupuka kondye iya alili unene.

63 Pahe ovalume ankho vakuata Sesusi avahimbika okumukuela otyo vemuveta. 64 Avemuhiki motyipala, avemupulu okuti: “Inkha umuuli pahe tupopile olie wekuveta?” 65 Iya avahimbika okumupopia unene omapita.

66 Etyi kuatya, ovakulu no vanene-nakwa novahoneki vovitumino aveliongiya, avemutuala Mombonge, avati: 67 “Inkha ove Kilisitu, tupopile.” Mahi ngwe evepopila okuti: “Alo umwe inkha ndyimupopila, kamamutavela. 68 Tyihe-otyo vala, inkha ndyimupula kamamukumbulula. 69 Mahi, okutuka hono, Omona womulume makapumphama kokulio kwa Huku kuepondolo.” 70 Ngotyo aveho avapulu okuti: “Muaina ove Umona wa Huku?” Evepopila okuti: “Muene onwe mukahi nokutyipopia.” 71 Ngwe avati: “Omokonda yatyi tuesukisila vali onombangi? Muene tuetyiiva momulungu wae.”