Maluku

14 Ankho kuakamba ononthiki onombali opo Opasikwa Notyipito tyo Nombolo Mbahapakelwe Onkhiso vihimbike. Iya ovanene-nakwa novahoneki vovitumino ankho vekahi nokuovola onkhalelo yokukuatela Sesusi momatutu opo vemuipae. 2 Mahi, ankho vapopia okuti: “Tuhetyilingei mokueenda kuotyipito, hamwe ovanthu vetuyayesa.”

3 Iya etyi ekahi ko Betania nokulia* meumbo lya Simau wotyilundu, amuya omukai umwe watyinda okanthenda ko alabastru kena omulela wo nardu,* uhahonyene notyipuka natyike, ulanda onombongo ononyingi. Aikula okanthenda komulela ahimbika okuutila momutwe wa Sesusi. 4 Mokonda yotyo, vamwe avanumana avahimbika okupopia okuti: “Omokonda yatyi omulela ou unika nawa wapeselelua ñgaa? 5 Mokonda omulela ou unika nawa ankho upondola okulandeswa onondenaliu 300 iya onombongo mbatyo ambuavelwa ovahepi!” Avanumana unene* nae mokonda yotyo. 6 Mahi Sesusi ati: “Muyekei. Omokonda yatyi mupopila ngotyo omukai ou? Wandinga otyipuka tyikahi nawa. 7 Onwe apeho mamukala novahepi, iya mupondola okuvelinga nawa apeho, mahi kamamukala na ame apeho. 8 Walinga etyi evila, watetekela okutila omulela unika nawa kolutu luange, pala okukapakwa. 9 Tyotyili ame ndyimupopila okuti, mouye auho pana mapakaiviswa onondaka onongwa, etyi tyalinga omukai ou tupu matyikapopiwa pala okumuhinangela.”

10 Iya Sunda Isikaliote, umwe Pekwii na Vevali, aende kovanene-nakwa opo emupakule. 11 Etyi vetyiiva, avahambukwa avemulae okumuavela onombongo mbopalata. Ngotyo, Sunda ahimbika okuovola omphitilo yokumuyondya.

12 Monthiki yo tete Yotyipito tyo Nombolo Mbahapakelwe Onkhiso, tyina vehole okuava otyilikutila tyo Pasikwa, ovalongwa vae avemupulu okuti: “Opi uhanda tukapongiye opo tulie Opasikwa?” 13 Ngotyo, atumu ovalongwa vae vevali evepopila okuti: “Endei mepunda-umbo, mamuvasi omulume umwe watyinda omulindi womaande. Mulandulei, 14 iya omu amanyingila, popilei muhekulu yeumbo okuti: ‘Omulongesi wati: “Ondyuo yovaenda ili-pi ndyilile-mo Opasikwa novalongwa vange?”’ 15 Iya memulekesa ondyuo imwe onene, yalingwa nawa. Ngamo mupongiyila okulia kuetu.” 16 Ngotyo ovalongwa avaende, avanyingila mepunda-umbo, avavasi umwe ovipuka ngetyi Sesusi evepopila, iya avapongiya Opasikwa.

17 Etyi kuanthikovela, eya no no apositolu 12. 18 Iya puetyi ankho vepumphi komesa nokulia, Sesusi evepopila okuti: “Ndyimupopila otyili okuti, umwe pu onwe mamphakula.” 19 Atyivekalesa omapita iya avemupulu wike-wike okuti: “Okuti ame?” 20 Evepopila okuti: “O umwe pe 12, una upakela kumwe na ame okuvoko motyilindo. 21 “Omona womulume maende ngetyi Ovihonekwa vipopia, mahi una uyondya Omona womulume ngongo yae! Hahe vali inkha omunthu oo katyitilwe.”

22 Puetyi nkhele vekahi nokulia, apolo ombolo, elikuambela, eivembaula, eveavela ati: “Tambulei liei. Etyi otyilekeso tyolutu luange.” 23 Iya apolo okopo elikuambela eveavela-yo, iya aveho avanu-ko. 24 Iya evepopila okuti: “Etyi tyilekesa ‘ohonde yange yomphango,’ maikamomeswa pala ouwa wovanyingi. 25 Ndyimupopila otyili okuti, Himanu vali ovinyu, alo onthiki mandyikanwa ovinyu omphe no onwe Mouhamba wa Huku.” 26 Okuhulilila-ko, etyi vamana okuhilivika Huku noviimbo,* avaende no Komphunda Yomindyambi.

27 Iya Sesusi evepopila okuti: “Onwe amuho mamunthyi-po, mokonda tyahonekwa okuti: ‘Ame mandyiipaa omunthita, iya onongi ambulityandyana.’ 28 Mahi tyina namapindulwa-po kononkhia, mandyipiti komutwe wenyi okuenda ko Galileia.” 29 Mahi Petulu emukumbulula okuti: “Alo umwe inkha vakuetu aveho vekusa-po, ame himekusi-po.” 30 Moluotyo, Sesusi emupopila okuti: “Ame ndyikupopila otyili okuti hono, otyinthiki etyi, tyina ekuandambolo lihenepopie tuvali, mondyanye opopi ovikando vitatu okuti kundyi.” 31 Mahi Petulu atualako okuti: “Inkha tyesukisa mandyinkhi no ove, himapopi okuti hikwii.” Tupu na vakuavo aveho ngatyo vapopia.

32 Ngotyo Sesusi aende novalongwa vae pomphangu itiwa o Getesemane, evepopila okuti: “Pumphamei apa, putyina nkhele ndyikelikuambela.” 33 Aende na Petulu na Tiaku na Suau, ahimbika okukala tyeihamenwa* unene nokusukalala unene. 34 Iya evepopila okuti: “Ame* neihamenwa unene mandyinkhi. Kalei apa, tualeiko okukala tyipahi.” 35 Iya, aende katutu no komutwe, aikila konongolo elipetamena-po, elikuambela okuti, inkha tyitavela, oola oyo imulambe. 36 Iya ati: “Abba,* Tate, ovipuka aviho ove uvivila. Mphole okopo ei. Mahi ha ngetyi ame ndyihanda, ongetyi ove uhanda.” 37 Iya akondoka evevasi velele, iya apopila Petulu okuti: “Simau, ulele? Utupu ononkhono mbokukala tyipahi moola ike vala? 38 Tualeiko okukala tyipahi, tualeiko okulikuambela, opo muhayondyue. Tyotyili omunthu uhanda okulinga etyi tyaviuka, mahi olutu* lutupu ononkhono.” 39 Iya aende vali ekelikuambela, aiti vali etyi ankho aita-le po tete. 40 Iya akondoka vali, evevasi velele, mokonda ankho valiwa unene nolumphoki, moluotyo ankho kavei etyi vemukumbulula. 41 Akondoka vali otyikando tya tatu iya evepopila okuti: “Mulele, mupululukwa momuvo ngou? Tyatuuka! Oola yehika-po! Talei! Omona womulume mapakulwa pomavoko ovanthu vokulinga ononkhali. 42 Katukei, tuendei. Talei! Una mamphakula ukahi nokuhika popepi.”

43 Liwa-liwa, putyina nkhele ekahi nokupopia, Sunda, umwe po no apositolu 12, eya novanthu ovanyingi vamaneka omitunga novimuti, vatumwa novanene-nakwa novahoneki vovitumino, novakulu. 44 Omupakuli ankho weveavela enyingilikilo liokuti: “Una namape ombesinyu, oe yatyo, mukuatei, amuende nae amuhemuyeke.” 45 Iya aviuku no pu Sesusi, ati: “Oñgeni Mulongesi!”* Iya emupe ombesinyu. 46 Ngotyo, ovanthu aveya, avakuate Sesusi avemukutu. 47 Mahi, omulongwa umwe ankho utai ngo opo, apolo omutunga autukila omupika womunene-nakwa wavilapo, emutete okutwi. 48 Mahi Sesusi apopila ounyingi oo okuti: “Onwe mueya nomitunga novimuti ngoti mueya okukuata otyimphulu? 49 Ononthiki ambuho ame ankho ndyikala no onwe mondyuo ya Huku nokulongesa, mahi amuhankhuate. Etyi opala okufuisapo etyi Ovihonekwa viapopia.”

50 Iya ovalongwa aveho avai nkholo, avemusi-po. 51 Mahi, omukuendye umwe ankho wavala vala otyikutu tyolinyu kolutu, ahimbika okulandula Sesusi, avahande okumukuata, 52 akahomboka omuvalo wae eusi-po iya aende tyihavalele.*

53 Avatuala Sesusi komunene-nakwa wavilapo, iya ovanene-nakwa aveho novakulu novahoneki vovitumino aveliongiya. 54 Mahi Petulu emulandula, mahi akalela kokule, alo mepata liomunene-nakwa wavilapo; iya apumphama na vana vaundapa-mo otyo aunguluka kotupia. 55 Pahe omunene-nakwa novatumini Vombonge Onene yova Sundeu ankho vekahi nokuovola ovanthu mavaave oumbangi womatutu opo vetyivile okuipaa Sesusi, mahi avahavasi nawike. 56 Ovanyingi ankho vekahi nokuava oumbangi womatutu, mahi etyi vapopia ankho katyelikuatele. 57 Tupu vamwe ankho vakatuka otyo vemutendeleya okuti: 58 “Onthue tuemuiva tyina apopia okuti: ‘Mandyiteye-po ondyuo ei ya Huku yatungwa nomavoko ovanthu, andyitungu onkhuavo mononthiki ononthatu, ihatungwa nomavoko ovanthu.’” 59 Mahi no ngotyo, etyi vapopia ankho katyelikuatele.

60 Pahe, omunene-nakwa wavilapo atalama pokati kavo, apulu Sesusi okuti: “Kukumbulula natyike? Kutyiivite okuti ovanthu ava vekahi nokukupopia?” 61 Mahi ngwe atualako okuhapopi natyike, ahakumbulula. Omunene-nakwa wavilapo ahimbika okumupula vali okuti: “Ove, ove Kilisitu, Omona wa Huku Omukulami?” 62 Sesusi ati: “Enga ame, iya ove mokamona Omona womulume upumphi kokulio kwa Huku Wepondolo aliho, ukahi nokuya kombanda yomakaka.”* 63 Moluotyo, omunene-nakwa wavilapo atandula omivalo viae, ati: “Ñgaa tuesukisa vali onombangi? 64 Pahe muetyiiva etyi apopia omapita Huku. Oityi onwe muatokola?”* Aveho avatokola okuti una okuipawa. 65 Vamwe avahimbika okumunthila omate, nokumuhika motyipala, avemuvete nonosoko, otyo vemupopia okuti: “Inkha umuuli pahe tupopile olie wekuveta!” Iya avemuvete motyipala, omafualali ombonge aemutyindi-po.

66 Iya puetyi Petulu ankho ekahi mombuelo mepata liombonge, omuhikuena umwe omuundapi womunene-nakwa wavilapo eya. 67 Etyi amona Petulu ukahi nokuunguluka kotupia, emutale ati: “No ove ankho muna omu Nasalee, Sesusi.” 68 Mahi aanye, ati: “Ame himwii, tupu etyi ukahi nokupopia hityii,” iya aende no konthele kombundi.* 69 Omuhikuena oo omuundapi emumono vali, ahimbika okupopila vana ankho etai navo, ati: “Ou nae o umwe puvo.” 70 Aanye vali. Etyi pakala vali katutu, vamwe ankho veli-po navo avahimbika okupopila Petulu okuti: “Tyotyili ove uumwe puvo, mokonda no ove umu Galileia.” 71 Mahi ahimbika okulihingana, aane ati: “Ame omunthu oo mukahi nokupopia himwii!” 72 Liwa-liwa ekuandambolo alipopi otyikando tya vali, Petulu ahinangela etyi Sesusi emupopilile okuti: “Tyina ekuandambolo lihenepopie tuvali ove mondyanye ovikando vitatu.” Atyimuihama unene, ahimbika okulila.