Isekiyele

36 “Ove mona womulume, popila onomphunda mba Isilayeli uti: ‘Onwe nomphunda mba Isilayeli, tehelei ondaka ya Siovaa. 2 Etyi otyo tyapopia Tatekulu Ohamba Onene Siovaa wati: “Ondyale yekukwela, yati: ‘Wolo umwe! Nonomphunda umwe ononkhulu mbalinga mbetu!’”’+

3 “Ove popia uti: ‘Etyi otyo tyapopia Tatekulu Ohamba Onene Siovaa wati: “Mokonda ngwe vemuhanya, pokumulwisa vatumbukila na nthele na nthele, opo onwe mulinge vovanthu vahupa* movilongo, pahe ovanthu onwe vala vapopia, veli nokumupenya,+ 4 onwe nomphunda mba Isilayeli, tehelei ondaka ya Tatekulu Ohamba Onene Siovaa! Etyi otyo Tatekulu Ohamba Onene Siovaa apopila onomphunda, novipunda, nonondongi, nomalola, nonohika mbahanyauka mbalinga omakongola,+ nomapunda-umbo ehena vali ovanthu, apundwa, apenywa novanthu vovilongo vokwahupa-po veliseta nao;+ 5 Tatekulu Ohamba Onene Siovaa, wapopila ovipuka ovio wati: ‘Motupia twombili yange+ omo mandyipopila ava vokwahupa kovanthu vovilongo no Endoo aiho, ava vokwapopia tyahambukwa unene, vokwapenya*+ avati umwe otyilongo tyange otyavo, vanyingile momalihilo atyo, vetyipunde.’”’+

6 “Popia etyi matyikalingwa otyilongo tya Isilayeli, opopila onomphunda, novipunda, nonondongi, nomalola, uti: ‘Etyi otyo tyapopia Tatekulu Ohamba Onene Siovaa wati: Tala! Mandyipopila mombili yange, monyengo yange, mokonda onwe mwakundiswa novanthu vovilongo.”’+

7 “Otyo Tatekulu Ohamba Onene Siovaa atila: ‘Ame ndyikatula okuvoko kwange andyiane, andyiti ovanthu vovilongo viokuli popepi, navo mavakakunda.+ 8 Mahi onwe nomphunda mba Isilayeli, mamukapapula onompha, mamukaimina ovinyango ovanthu vange ova Isilayeli,+ mokonda apa katutu mavakondoka. 9 Mwene ame ndyina onwe, mandyilikondaka kwoonwe, onwe mamukalimwa, amukakunwa ombuto. 10 Ovanthu vove mandyikevelinga ovanyingi — eumbo aliho lya Isilayeli, aliho umwe — momapunda-umbo mamukakalwa,+ tyahanyauka matyikapindulwa-po.+ 11 Otyo umwe, ame ovanthu vove mankhevelinga ovanyingi, novipako viove;+ ovanthu mavekeliyawisa, avakalinga ovanyingi, navo novipako viove. Ame mwene mankhetyilinga, mwoove mamukakala vali ovanthu ngo kohale,+ mandyikekuputukisa vali tyipona kohale.+ Onwe mamukanoñgonoka umwe okuti ame, ame Siovaa.+ 12 Ame ovanthu vange — ovanthu vange ova Isilayeli — mandyikeveendaisa mwoonwe, avakakala mwoonwe.+ Onwe mamukalinga epingo liavo, kamukevekalesa vali tyehena ovana.’”+

13 “Etyi otyo tyapopia Tatekulu Ohamba Onene Siovaa wati: ‘Mokonda veli nokukuti: “Ove utyilongo tyinyina ovanthu, ovanthu vakala mwoove uvesa tyehena ovana,”’ 14 ‘pahe kumakanyina vali ovanthu, nii kumekevesa vali tyehena ovana,’ o Tatekulu Ohamba Onene Siovaa wetyipopia. 15 ‘Himekekuyeka vali ulewe novanthu vovilongo, nii himekekuyeka ulingwe omukwele novanthu,+ ove kumakatokesa vali ovanthu vove,’ o Tatekulu Ohamba Onene Siovaa wetyipopia.”

16 Ondaka ya Siovaa aindyendela vali aiti: 17 “Mona womulume, pweetyi eumbo lya Isilayeli liali motyilongo tyavo, vetyisilisile nonondyila mbavo, novituwa viavo.+ Onondyila mbavo tyina ankho ndyimbutala ñgaa mbasila uti omukai uli konohanyi.+ 18 Andyiveuyulila onyengo yange mokonda vamomesa ohonde motyilongo,+ vasilisa otyilongo novilolo viavo vitoyesa.*+ 19 Pahe andyivetyandyanesa movanthu vovilongo, andyivetwala-twala movilongo.+ Pokuteta omphela yavo natala vala konondyila mbavo no kweevi valinga. 20 Mahi etyi vehika movilongo omo, ovanthu avasilisa enyina liange likola,+ avai mokuvepopia avati: ‘Ovanthu ava, ova Siovaa, mahi otyilongo tyae vetyisapo.’ 21 Otyo ame mandyisukila unene nenyina liange likola, eli eumbo lya Isilayeli liasilisila pokati kovanthu vovilongo oku vapita-pita nako.”+

22 “Popila eumbo lya Isilayeli uti: ‘Etyi otyo tyapopia Tatekulu Ohamba Onene Siovaa wati: “Hakuti onwe ndyilingila, onwe umbo lya Isilayeli, mahi ndyilingila enyina liange likola, eli onwe mwasilisila pokati kovanthu vovilongo oku mwaya-aya nako.”’+ 23 ‘Ame mwene mandyikoho enyina liange enene,+ liokwasilisilwa pokati kovanthu vovilongo, eli onwe mwasilisila pokati kavo; ovanthu vovilongo mavakankhola umwe okuti ame, ame Siovaa,’+ o Tatekulu Ohamba Onene Siovaa wetyipopia, ‘tyina tyamamoneka umwe pokati kenyi okuti ame ndyikola otyo navo vatala. 24 Mandyikemupola pokati kovanthu vovilongo, andyikemukongolola movilongo aviho, andyimweeta motyilongo tyenyi.+ 25 Mandyikemunyanya omeva avinguluka, onwe amusukuka;+ mandyikemukoha kosilo yenyi aiho,+ no kovilolo vienyi aviho vitoyesa.+ 26 Ame mandyikemupa omutima omupe,+ andyipake mokati kenyi omphepo omphe.+ Mandyikapola momalutu enyi omutima wemanya,+ andyimupe omutima wohitu.* 27 Mandyikapaka omphepo yange mokati kenyi, andyikemweendesila movitumino viange,+ onwe mamuketavela ovitumino viange vionomphela, amweendela-mo. 28 Opo pahe mamukakala motyilongo napele onombwale mbenyi, onwe mamukalinga ovanthu vange, ame andyikalinga Huku yenyi.’+

29 “‘Ame mandyikemuyovola kosilo yenyi aiho, mandyikatumina ovilia, ankhevilinga ovinyingi, anehekemweetela vali ondyala.+ 30 Ovinyango komiti, novikuna momapia, mandyikevilinga ovinyingi, opo mwahakakunde-kunde vali pokati kovanthu vovilongo mokonda yondyala.+ 31 Opo pahe onwe mamukahinangela onondyila mbenyi onombi, novituwa vienyi ovivi, mwene amukelitoya mokonda yonombei mbenyi, novipuka vitoyesa mulinga.+ 32 Mahi tyinoñgonokei okuti: Otyo hanwe ndyili nokutyilingila,’+ o Tatekulu Ohamba Onene Siovaa wetyipopia. ‘Mahi, kalei-vo nolukundo, onondyila mbenyi mbumukundise-vo, ove umbo lya Isilayeli.’

33 “Etyi otyo tyapopia Tatekulu Ohamba Onene Siovaa wati: ‘Monthiki mandyimusukula konombei mbenyi ambuho, momapunda-umbo mandyikaeta-mo ovanthu amukalwa,+ tyaahanyaukile atyipindulwa-po.+ 34 Otyilongo tyokwahanyauka, tyalinga ekongola komaiho a ava valamba, matyikalimwa. 35 Ovanthu mavakati: “Otyilongo tyokwali ekongola, pahe uti vala epia lyo Endene,+ omapunda-umbo okwahanyaukile, ali ekongola, atokele, pahe apama, pahe mukalwa.”+ 36 Ovanthu vokwahupa-po vovilongo vieliseta noonwe, mavetyikolo umwe okuti ame Siovaa, ame napindula-po etyi tyatokele, ame nalima apa pali ekongola. Ame mwene netyipopia, ame Siovaa, ame netyilinga.’+

37 “Etyi otyo tyapopia Tatekulu Ohamba Onene Siovaa wati: ‘Tupu mandyikayeka eumbo lya Isilayeli lityindyite etyi ndyivelingile-tyo: Ovanthu vavo mandyikevelinga ovanyingi ngotyunda. 38 Omapunda-umbo ahanyaukile, maekeyula ovanthu valinga ngotyunda+ tyovakwa-ukola, ngotyunda tyo mo Selusalei* povipito viayo;+ mavakanoñgonoka okuti ame, ame Siovaa.’”