Ovilinga Viovatumwa

3 Hono ovo Petulu na Swau vainduka venda no kondywo ya Huku koola yokulikwambela, koola ya tyive,* 2 vavasa omulume umwe watyitwa-le otyilema uli nokutwalwa no kombundi Yondywo ya Huku. Ononthiki ambuho ankho vemupaka ponthele pombundi yondywo ya Huku ankho itiwa Ongwa, oko ankho vemupaka otyo aita osimola kwava vanyingila mondywo ya Huku. 3 Etyi ngwe amona ovo Petulu na Swau vanyingila mondywo ya Huku, ahimbika okwita osimola. 4 Ovo Petulu na Swau avemutale, avati: “Tala kuno.” 5 Evetale otyo akevela, wati hamwe vena etyi mavemupe. 6 Petulu ati: “Ame ndyitupu opalata, ndyitupu oolu, etyi ndyina-tyo, otyo mankhupe. Menyina lya Sesusi Kilisitu omu Nasalee, katuka weende!”+ 7 Emukwate mokuvoko kwokulio emukatule.+ Kuna onomphai mbae mbukala nawa, ovikalo viae avionyonoka;+ 8 akatusuka atalama,+ ahimbika okweenda, nae anyingila navo mondywo ya Huku, otyo aenda nokuhela, ankhimaneka Huku. 9 Ovanthu aveho etyi vemumona uli nokweenda, avankhimaneka Huku. 10 Ovanthu pahe otyo vemutala umwe nawa, vatala oe umwe upumphama-pumphama Kombundi Ongwa yondywo ya Huku+ otyo aita osimola, avahuvu unene, avakukuta omate okutala otyipuka otyo.

11 Omulume oo pahe ankho wakwata vala movo Petulu na Swau, otyo oku ovanthu aveho vahateka no kuvo momuvanda utiwa Omuvanda wa Salomau,+ ankho vahuva unene. 12 Petulu okutyimona, apopila ovanthu ati: “Vanthu va Isilayeli, oityi otyipuka etyi tyemuhuvisila unene ñgaa, otyo pahe mutala mwoonthwe ñgaa tyehena okuti etyi tyalingwa nomunthu, tyehena okuti waenda tupu okutila kwetu Huku? 13 Huku ya Ambalayau, Huku ya Isake, Huku ya Sakoo,+ Huku yo votate no mee, wankhimaneka Omuundapi wae+ Sesusi,+ ou onwe mwapakula,+ ou mwaanyenene umwe kotyipala tya Pilatu, ngwe ankho soka wahanda okumuyovola. 14 Onwe mwaanya omunthu ukola, ondingaviwa, onwe mwaita kuyovoke omulume omwipai ngae mupewa,+ 15 pahe amwipaa Ohongoi Onene yomwenyo.+ Mahi Huku wemupindula-po kovokwankhia, onthwe tunombangi mbotyipuka otyo.+ 16 Mokonda menyina liae, no mokuyumba onthumbi menyina liae, otyo tyapa omafa omulume ou mweete, ou onwe mwii. Okuyumba onthumbi mwe otyo tyalinga nawa omulume ou, otyo akalela umwe nawa momaiho enyi. 17 Mahi pahe vanthu vetu, ame ndyityii okuti ovipuka mwalinga-linga ankho okwehetyii,+ mwalinga vala lwovatumini venyi.+ 18 Mahi omo umwe omo Huku alingila ovipuka amapopile viatundaile momilungu viovauli aveho, vatile Kilisitu yae ankho mamoneswa ononkhumbi.+

19 “Livelei,+ pilulukei,+ opo ononkhali mbenyi mbunyimwe,+ ku Siovaa* kutunde omivo viapola vieeta okahi, 20 atume Kilisitu ou aholovonena onwe, Sesusi. 21 Eulu malimwanyena alimukwata atee kononthiki mbokupindula-po ovipuka aviho Huku apopile, viatundile momilungu viovauli vakola kohale. 22 Ngwe Mwisesi watile: ‘Siovaa* Huku yenyi mekemukatulila omuuli pokati kovanthu mulikwai navo, omuuli ukalinga ngaame.+ Onwe haa tehelelei ovipuka aviho memutolela.+ 23 Mahi ou wahatehela* Omuuli watyo oo, makahanyimwa-ko pu vakwavo ahakala-po.’+ 24 Ovauli aveho okutuka ku Samuwele naava valandula kwe, novakwavo vali, navo vapopile unene ononthiki ombo.+ 25 Onwe muvana vovauli, muvana vomphango Huku alingile nonombwale mbenyi kohale,+ etyi apopila Ambalayau ati: ‘Onombunga ambuho kombanda yohi mambukamonena oviwa mu ou makatuka mwoove.’*+ 26 Etyi Huku apindula-po Omuundapi wae, nkhele wemutumine kwoonwe,+ emupe oviwa, emuhondovole onwe amuho kovivi mulinga.”