Ndaniyele

5 Ohamba Mbelesasale+ walingile otyipito tyimwe otyinene, akongo omanene-atyo vena 1000, ngwe pahe ai mokunwa ovinyu otyo vena-vo opo.+ 2 Mbelesasale mokwanwa opo, apialuka umwe, pahe atumu vakapole omalufo oolu no opalata tate yae Nambukondonosole apolele mondywo ya Huku ko Selusalei,+ opo ohamba nomanene atyo, novakai vae, nononthawa mbae vanwine-mo. 3 Avaeta omalufo oolu no opalata apolelwe mondywo ya Huku ko Selusalei, ohamba nomanene atyo, novakai vae, nononthawa mbae, ngamo pahe vanwina. 4 Etyi vanwa ovinyu, avahilivika ono huku mboolu, no mbotyitasu, no mbopalata, no mbotyivela, no mbomiti, no mbomamanya.

5 Opo yatyo umwe opo, ohamba yakati vala ñgaa, ominwe vihoneka motyimato tyondywo yohamba ponthele pokandiyelo konomphalavinga, ohamba otyo itala umwe tyina enkhanya* lihoneka. 6 Ohamba aipaalala,* omutima aumutundu, onomanekelo mbae ambuhimbika okuteketa,+ onongolo mbae otyo mbuliveta kumwe.

7 Ohamba aipopila peulu aiti ihanei ovatali, nova Kalindeya* no vokutalela kononthungululu.+ Ohamba aipopila ovanongo vomo Mbambilonia aiti: “Omulume utanga onondaka ombu, amphopila etyi mbupopia, mavalekwa ovikutu viotyivala tyonkhula, apakwa okalienge koolu pomunyino,+ alingi omutumini wa tatu motyilongo.”+

8 Ovalume aveho ovanongo vohamba aveya, mahi onondaka ombo avehetyivili okumbutanga, nii vala okupopila ohamba etyi mbupopia.+ 9 Ohamba Mbelesasale pahe atili umwe owoma, otyipala atyityituka, wapaalala; ovanthu vae omanene-atyo, navo avalimbililwa.+

10 Mokonda yonondaka mbohamba no mbomanene-atyo, tembwa otyilongo anyingila mondywo omu veli nokulingila otyipito. Tembwa otyilongo ati: “Ove hamba, kala-ko apeho nomwenyo! Omutima wehekutunde, otyipala tyove tyahakale ñgaa. 11 Movilongo utumima muna omulume umwe una omphepo yono huku mbukola. Pononthiki mba tate yove, wali omunthu unoñgonoka ovipuka, wekungunyiko, wounongo welifwa nounongo wono huku.+ Ohamba Nambukondonosole tate yove, oe anakele alingi omunene wovanakwa vokwatambula, novatali, nova Kalindeya,* no vokutalela kononthungululu;+ tate yove otyo alingile otyo, ove hamba. 12 Ndaniyele, ou ohamba yaluka Mbeletesasale,+ una omphepo imwe onene, nenoñgonoko, nekungunyiko liokupimphulula onondyoi novipuka vieheiwe, nokukutulula omamphu.*+ Ndaniyele aihanwe pahetyino ekupopile etyi mbupopia.”

13 Ndaniyele aetwa pohamba. Ohamba aipulu Ndaniyele aiti: “Ove, ove Ndaniyele wo povikondo vyo ko Sundaa,+ ou tate ohamba apolele ko Sundaa?+ 14 Nekwiiva tyatiwa mu ove muna omphepo yono huku,+ utyivila okupimphulula ovipuka, mwoove muna ekungunyiko nounongo omunene.+ 15 Pahe, ovanongo novatali vaetelwe apa vatange onondaka ombu vantholele etyi mbupopia, mahi kavetyivilile okupimphulula etyi mbupopia.+ 16 Nekwiiva tyatiwa ove utyivila okupimphulula ovipuka,+ utyivila okukutulula omamphu.* Ine ove utyivila okutanga onondaka ombu, omphopila etyi mbupopia, movalekwa ovikutu viotyivala tyonkhula nokalienge koolu pomunyino, olingi omutumini wa tatu motyilongo.”+

17 Ndaniyele apopila ohamba ati: “Evi wahanda okumpha mwene kala vala navio, okuti hatyo, vipa vakwetu. Mahi, ame mandyitange onondaka ombu, mandyikupopila etyi mbupopia. 18 Tatekulu hamba, Huku Omukulami wapele tate yove Nambukondonosole ouhamba, nounene, nomunkhima, nouwa.+ 19 Mokonda younene Huku emupele, ovanthu vovilongo aviho nomalaka aeho pahe avemutili owoma.+ Ou ahanda okwiipaa waipaele, ou ahanda okuhupisa ahupisa, wavialekele ava ahanda okuvialeka, ukundisa ava ahanda okukundisa.+ 20 Mahi etyi omutima wae wahimbika okulipaka-ko, ehetavela, alingi ovipuka nomakamo,+ kovipundi atululwa-ko, nomunkhima ali nao eupolwa. 21 Povanthu atewa-tewa-po, omutima wae aukala ngo wotyinyama, akakala novimbulu viohika. Alia-alia eholi ngonongombe ononthwei, olutu lwae aluwilwa neyombo lyo keulu, atee etyimona okuti Huku Omunene oe Utumina mouhamba wovanthu, tyokutumina utyipa ou ahanda.+

22 “Mahi ove Mbelesasale, mona wa Nambukondonosole, kwelikondolele koututu, ngwe ovipuka ovio aviho uvii umwe nawa. 23 Mahi ove welipaka kounene, okulitalelapo na Mwene weulu,+ otumu vakapole omalufo o mondywo yae.+ Pahe noove nomanene atyo novakai vove, nononthawa mbove, omo munwina ovinyu, amuhilivika ono huku mboolu no mbotyitasu, no mbopalata, no mbotyivela, no mbomiti, no mbomamanya, ono huku mbahamono-po, mbeheivi-ko, mbehena-le etyi mbwii.+ Ove soka kwankhimanekele Huku wakwata omwenyo wove peke liae,+ nonondyila mbove ambuho. 24 Huku oe watuma enkhanya, liahoneka onondaka ombu.+ 25 Onondaka mbahonekwa mbati: MENE, MENE, TEKEL, PARSIM.

26 “Etyi onondaka ombu mbupopia otyetyi: MENE: Huku wavalula ononthiki mbouhamba wove, mbapwa-le.+

27 “TEKEL: Wapakwa kotyipeyalo, wamoneka wakamba.

28 “PERES: Ouhamba wove watepulwa, wapewa ova Mendia nova Pelesa.”+

29 Pahe, Mbelesasale evepe otyitumino, avavaleka Ndaniyele ovikutu viotyivala tyonkhula nokalienge koolu pomunyino; avahimbika okupopia okuti, malingi omutumini wa tatu motyilongo.+

30 Motyinthiki tyatyo otyo, Mbelesasale ohamba yova Kalindeya, aipawa.+ 31 Ndaliu+ omu Mendia, atambula ouhamba; opo una omanima ehungi po 62.