Wa Vali wa Swau

1 Ombwale yahonekela* omukai waholovonwa, novana vae, ava ndyihole unene, mahi hame vala, na vakwetu aveho pahe vei otyili, 2 tumuhole tupu otyili tuna-tyo tyili mwoonthwe, ngwe matukala-kala umwe natyo apeho. 3 Onthwe matukala nokankhenda okanene, nonkhenda, atyiho nombembwa itunda ku Huku, ku Tate, no ku Sesusi Kilisitu Omona wa Tate, notyili nolwembia.

4 Tyanthyambukiswa unene okweiva okuti ovana vove vamwe veli nokweendela motyili,+ veli umwe motyitumino twatambula tyatunda ku Tate. 5 Pahe ame nkhwita-vo meyo, tulihumbei na vakwetu. (Ame ndyili nokukuhonekela, hili nokukuhonekela otyitumino otyipe, mahi otyitumino otyikulu, etyi tuna-tyo-ale nkhele tya nthyimbi.)+ 6 Ngwe onthyole oñgaa, onthwe okweendela omu mutululikila ovitumino viae.+ Otyitumino tyae, etyi onwe mweiva-le nkhele tya nthyimbi, o tyokwati, muna vala okweendela monthyole. 7 Mokonda mouye mwatumbuka ovayondyi ovanyingi,+ ava vehetavela okuti Sesusi Kilisitu weile mohitu.+ Ovo yatyo, ovo omuyondyi, wokupondakana Kilisitu.+

8 Lungukei mwahapumbwe ovipuka viatuka movilinga onthwe twalinga, opo mukamone ondyambi yaoya.+ 9 Omunthu ulamba mondongeso ya Kilisitu, utunda-mo, oo utupu Huku.+ Mahi ou wahatundu mondongeso omo, oo una umwe na Tate Nomona.+ 10 Ine umwe umweendela ahaeta ondongeso oyo, oo mwehemuyakulei momaumbo enyi,+ nokumukukunya mwehemukukunyei. 11 Mokonda ou ukukunya omunthu oo, nae uli nokulipaka movilinga viae ovivi.

12 Ndyina umwe ovipuka ovinyingi ñgeno ndyimuhonekela, mahi hahandele okumupopila-vio vala notinda nopapelo, mwene nahanda okuya oko atutomphola umwe tyipala na tyipala, opo ehambu lienyi liooye umwe.

13 Ovana vomukulu wove waholovonwa, vekutyalungusa-po.