Selemiya

32 Ondaka ya Siovaa yaendelele Selemiya menima 10 ohamba yo Sundaa Sendekiya eli kovipundi, menima 18 ohamba Nambukondonosole* eli kovipundi.+ 2 Pononthiki mbatyo opo ovita viohamba yo Mbambilonia, viapakele pokati o Selusalei, opo yatyo omuuli Selemiya waikwa uli Mepata Liovayungi+ mondywo* yohamba yo Sundaa. 3 Sendekiya ohamba yo Sundaa, wemukwatele emwiiki,+ ati: “Oityi upopila ovipuka evi? Ove wati: ‘Siovaa wati: “Mandyipakula epunda-umbo eli peke liohamba yo Mbambilonia, malilingi liae;+ 4 Sendekiya ohamba yo Sundaa kamakahupa kova Kalindeya, makapakulwa umwe peke liohamba yo Mbambilonia, makapopia nae tyipala na tyipala, mavekelitala umwe kaiho-kaiho.”’+ 5 ‘Ngwe matwala Sendekiya ko Mbambilonia, ngako akakala atee mwene haa ndyimukondokela,’ o Siovaa wetyipopia. ‘Nga mutwalako vala nokulwisa ova Kalindeya, kamuketyivila-le.’”+

6 Selemiya ati: “Ondaka ya Siovaa yandyendela yati: 7 ‘Hanameli omona wa ho yomukulu* Saluu, mekweendela ati: “Landa-po epia liange ko Anatote,+ mokonda ove hekulu yatyo uhiwa okuliyovola-ko.”’”+

8 Tyili tyapopile Siovaa, Hanameli omona wa tate yomukulu, andyendela ambasi Pepata Liovayungi amphopila ati: “Landa-po-vo vala mbaa epia liange ko Anatote kotyilongo tya Mbesamii, mokonda ove, ove umwe una okuliyovola-ko. Lilanda-po lilinge liove.” Andyityimono okuti otyo tyapopiwa nondaka ya Siovaa.

9 Andyilande ku Hanameli omona wa tate yomukulu epia ko Anatote. Andyimupeyalelako onombongo+ mbatyo, onosikulu* epandu-vali, nonopalata 10. 10 Pahe andyityihoneka pomukanda,+ andyiupake otyilimbo, andyiihana onombangi,+ onombongo andyimbupeyala. 11 Andyikwata omukanda wokwalanda, ou wapakwa otyilimbo, omu mutyipopila ovitumino, omu mwene tyilingilwa, no ou wokwehena otyilimbo, 12 omukanda oo wokwalanda andyiutambeka Mbaluke+ omona wa Neliya,+ Neliya omona wa Maseiya, otyo Hanameli omona wa tate yomukulu atala, nae nonombangi vokwapakele omanyina avo pomukanda wokwalanda, nova Sundaa aveho vepumphi Pepata Liovayungi.+

13 Pahe andyitumu Mbaluke otyo tuna-vo andyiti: 14 “Etyi otyo tyapopia Siovaa womambamba ovita Huku ya Isilayeli wati: ‘Kwata omikanda evi, omukanda wokwalanda wokuna otyilimbo, nomukanda omukwavo wehena otyilimbo, ovipake mombiya yoluma opo vikale-ko ehimbwe.’ 15 Etyi otyo tyapopia Siovaa womambamba ovita, Huku ya Isilayeli wati: ‘Omaumbo, nomapia, nomiti vionouva, atyiho matyikalandwa vali motyilongo etyi.’”+

16 Etyi natambeka Mbaluke omona wa Neliya omukanda wokwalanda, andyilikwambela ku Siovaa andyiti: 17 “Tatiei, Tatekulu Ohamba Onene Siovaa! Tala! Ove walinga eulu nohi nononkhono mbove ononene,+ nokuvoko kwove kwatandavela. Ove natyike tyikupona, 18 Ove ulinga olwembia olunene otyiumbe-umbe tyovanthu, ovana* uvetyepesako umwe kombanda yovivi vialingaile ovohe,+ ove, ove Huku yotyotyili, Omunene, una Ononkhono ononene, utiwa o Siovaa womambamba ovita. 19 Onomphango mbove ononene unene,* ovipuka ulinga ovinene;+ omaiho ove atala onondyila ambuho mbovanthu,+ opo munthu na munthu umupe etyi tyata monondyila mbae, tyata mweevi alinga.+ 20 Ove walinga ovinene, walinga omaelema motyilongo tyo Isitu, na hono tyiiwe, ove welipa enyina mo Isilayeli, no movanthu aveho,+ otyo tulwete hono. 21 Wapola ovanthu vove ova Isilayeli kotyilongo tyo Isitu, novilinga ovinene, nomaelema, nenkhanya liove liononkhono, nokuvoko kwove kwatandevela, novipuka vitilisa owoma walinga.+

22 Etyi pakala, ovepe otyilongo etyi watolelele onombwale mbavo,+ otyilongo tyomahini, nowiki.+ 23 Ngwe avanyingila-mo, avetyipiñgana mahi kavetavelele ondaka yove, nii kavaendelele motyitumino tyove. Kavalingile natyike wevetuma, otyo weveetelela ovihuna evi aviho.+ 24 Tala! Veya nonondondelo mbokulwila, vanyingile mepunda-umbo,+ ngwe kombanda yomutunga, + nondyala, nomukihi,*+ malitoko umwe komavoko ova Kalindeya veli nokulilwisa; etyi wapopia, atyiho otyo umwe tyaenda, otyo umwe pahe tulwete. 25 Mahi ove, Tatekulu Ohamba Onene Siovaa wamphopila okuti: ‘Landa epia konombongo, oihana onombangi,’ namphila tyili epunda-umbo malipakulwa umwe peke liova Kalindeya.”

26 Pahe ondaka ya Siovaa ayeendela Selemiya aiti: 27 “Ame, ame Siovaa, Huku yovanthu aveho.* Okuti kuna otyipuka ame tyimphona? 28 Etyi otyo tyapopia Siovaa wati: ‘Ame ndyili nokupakula epunda-umbo eli kova Kalindeya, peke lya Nambukondonosole* ohamba yo Mbambilonia, ngwe manyingila-mo.+ 29 Ova Kalindeya veli nokulwisa epunda-umbo eli, mavanyingila-mo avelipake otupia, malikapia-po umwe+ nalio nonondywo mbalio ombu ovanthu valingila ovilikutila Mbaale, keulu liambo, omu vanengulila oviaawa viovikunwa kovika-huku vandeve.’+

30 “‘Mokonda ovanthu vo mo Isilayeli no vomo Sundaa, valinga vala ovivi komaiho ange nkhele vala tya poututu;+ ovanthu vo mo Isilayeli vandeva novilinga viomavoko avo,’ o Siovaa wetyipopia. 31 ‘Epunda-umbo eli, okutuka umwe vala monthiki liatungwa atee hono, likalela vala okunkhindula onyengo yange, nolunuma lwange,+ otyo mandyilihondovolela kotyipala tyange,+ 32 mokonda yovivi aviho ovanthu vo mo Isilayeli no vomo Sundaa vehole okulinga vindeva — navo, nonohamba mbatyo,+ novanene vatyo,+ novanakwa vatyo,+ novauli vatyo, novalume vo mo Sundaa, no vokukala mo Selusalei. 33 Otyo vakalela vala tyokunthyindamena, kavamphe otyipala;+ nalwile-ko-vo nokuvelongesa, okupalaika-po,* nawike-ale watehelele-vo, atambula-vo onondunge ndyivepa.+ 34 Vapaka ovilolo viavo vitoyesa mondywo yenyina liange, tyokwahanda umwe velisilise.+ 35 Oku tupu nkhele, vatungila Mbaale onomphangu mbukola mbaya peulu, Melola Liomona omukwendye wa Hinoo,*+ opo vayokele Moleke*+ ovana vavo ovakwendye novakainthu, otyipuka ame nahatumine,+ tyeheile-ale komutima* wange tyokuveti valinge otyipuka ngootyo tyitoyesa, pahe avalingisisa o Sundaa onkhali.’

36 “Mahi, etyi otyo Siovaa Huku ya Isilayeli apopia tyiyemba kepunda-umbo eli onwe mwati, malipakulwa peke liohamba yo Mbambilonia, komutunga, no kondyala, no komukihi, wati: 37 ‘Ame mandyikevekongolola-ko kovilongo aviho nevetyandyanesa nako monyengo yange, molunuma lwange, pweetyi nalungulula,+ mandyikeveeta andyivekondola motyilongo muno, andyivekalesa-mo netuliyo.+ 38 Ngwe mavakalinga ovanthu vange, ame ankhalinga Huku yavo.+ 39 Ame mandyikevepa omutima wike,+ nondyila ike, opo vanthile-nthile owoma, mwene tyiveetele ouwa, navo novana vavo vekevepinga.+ 40 Mandyilingi navo omphango yahapu,+ himayeke-po okuvelingila oviwa;+ mandyikapaka momutima wavo owoma naame, opo vahayapuke mondyila yange.+ 41 Matyikanthyambukiswa okuvelingila oviwa,+ mandyikevetwika motyilongo etyi,+ nomutima wange auho, nohande yange aiho.’”*

42 “Etyi otyo tyapopia Siovaa wati: ‘Ngeetyi naetela ovanthu ava ovihuna evi aviho, otyo mandyilingi, andyiveetela oviwa aviho* nevepopilile.+ 43 Ovanthu mavakalanda vali omapia motyilongo etyi+ namphila onwe muti: “Tyalinga ekongola tyitupu omunthu nii ovinyama, tyapakulwa kova Kalindeya.”’

44 “‘Omapia maakalandwa konombongo, omikanda viokwalanda avipakwa nawa, avipakwa otyilimbo, onombangi ambukapolwa kotyilongo tya Mbesamii,+ ponthele po Selusalei, komapunda-umbo o Sundaa,+ komapunda-umbo otyilongo tyonomphunda no komapunda-umbo o mombwelo,+ no komapunda-umbo o kombwelo, mokonda mandyikapola-ko ovikonde viavo,’+ o Siovaa wetyipopia.”