Etyi Tyahonekwa na Luka

1 Etyi natala ovanyingi vataindya umwe nawa ovipuka viotyili, evi noonthwe tuyumba umwe onthumbi,*+ 2 evi twapopilwa naava vali-po konthyimbi, vevimwene umwe mwene,+ ava vapopia ondaka,+ 3 naame andyilipe-tyo, andyitaindya umwe nawa ovipuka aviho okuhimbikila konthyimbi, ndyipopie otyili, ndyityivile okukuhonekekela-vio omu vina okulilandulila, tatekulu Tiyofilu,+ 4 opo ove unoñgonoke umwe nawa ovipuka ove watolelwa.+

5 Pononthiki mba Helonde*+ ohamba yo Sundeya, kwali omunakwa umwe utiwa o Sakaliya vokuundapa na Ambiya.+ Omukai wae ankho utiwa o Elisambete, Elisambete omona wa Alau. 6 Aveho vevali valinga oviwa komaiho a Huku, kavavelelwe onombei mokonda valandulile vala ovitumino, ankho valinga etyi Siovaa* atuma. 7 Ankho vetupu omona, tyeetyi Elisambete kamono ovana, ngwe aveho vevali pahe vakulupa-le.

8 Hono nthiki imwe, pokuli nokuundapa movilinga viounakwa na vakwavo,+ movilinga vya Huku, 9 mokonda velipinga-pinga motyilinga tyavo tyounakwa, onthiki yae yehika-po yokukaava ombao yokunika nawa,+ anyingila momphangu ikola mondywo ya Siovaa.*+ 10 Ovaunyingi aveho ankho veli pondye velikwambela tyina oku ombao yokunika nawa ili nokwaawa. 11 Aendelwa noandyu ya Siovaa,* aitalama ponthele pomutala wokuyokela ombao inika nawa. 12 Sakaliya oko ati vala tuki ahanunuka, nomutima aumutundu umwe. 13 Ngwe oandyu aimuti: “Wahatile owoma Sakaliya, wahatile owoma evi waita vieivala, omukai wove Elisambete mekukutulila omona omukwendye, ove muluka uti o Swau.+ 14 Apa akutulwa, ove mokahambukwa unene, okakwiilila, ovaunyingi mavakatwa ondolo,+ 15 mokonda, makalinga omunene komaiho a Siovaa.*+ Mahi ovinyu ahanwe, ahanwe natyike tyikoleswa,+ mekeyula omphepo ikola na apa umwe ehenekutulwe,*+ 16 makakondola ova Isilayeli ovanyingi ku Siovaa,* Huku yavo.+ 17 Tupu makatetekela komutwe wa Huku nomphepo ikola ngo ya Iliya nononkhono mbatyo,+ opo apilulule omitima viovakulu vilinge ngo viovana,*+ ava vokwehetavela vakale nonondunge valinge onondingaviwa, opo aviukisile Siovaa* ovanthu mavemuundapela.”+

18 Sakaliya apopila oandyu, ati: “Mandyityitavela ñgeni? Ame nakulupa-le ñgaa, omanima omukai wange akalinga-le omanyingi.” 19 Oandyu aimuti: “Ame, ame Ngambiliyeli,+ ndyitalama kotyipala tya Huku,+ natumwa ndyipopie noove, ndyikupopile oviwa ovipe. 20 Tala, ove mokala otyihita-mulungu, kumapopi, ukapopia vala onthiki ovipuka ovio aviho mavilingwa, mokonda kwetavelele onondaka mbange, ngwe etyi napopia matyimoneka umwe mononthiki mbanakwa.” 21 Ava ovaunyingi ankho vakevelela Sakaliya, okutala, momphangu ikola wakaseta-mo, atyivelingisa otyiho. 22 Tyina alupuka-mo kapopi, ehetyivili vali okutomphola navo, ngwe avetyimono okuti mokati omo una etyi amona. Uyulaika vala, okupopia ketyivili. 23 Etyi ononthiki mbae mbovilinga vikola* mbapwa, akondoka keumbo.

24 Etyi pakala ononthiki, omukai wae Elisambete alingi omulemi, akala onohanyi ononthano tyahaende povanthu, ati: 25 “Etyi otyo Siovaa* andinga ononthiki ombu. Wanthyinangela, ndyikunduluke pokati kovanthu.”+

26 Tyina ati mohanyi ya pandu, Huku atumu oandyu Ngambiliyeli+ ko Ngalileya, mepunda-umbo litiwa o Nasalee, 27 eitumu komuhikwena+ umwe utiwa o Maliya,+ omuhikwena wehei mulume, manepwa* nomulume utiwa o Susee, omulume watuka meumbo lya Ndaviti. 28 Oandyu aiya aimuti: “Oñgeni, wokwapandwa unene, Siovaa* una ove.” 29 Mahi, omufikwena ahahavala okwiiva onondaka ombo, pahe otyo asoka ati otyipuka otyo ndyiiva otyityi. 30 Oandyu aimuti: “Wahatile owoma Maliya, ove wapandwa na Huku. 31 Tala! Ove molingi omulemi,*+ mokutula omona omukwendye, omuluku okuti o Sesusi.+ 32 Omona oo, makalinga omunene,+ akatiwa Omona Womukulami,+ Siovaa* Huku memupe otyipundi tyoutumini wa he, otyipundi tya Ndaviti.+ 33 Makalinga Ohamba yeumbo lya Sakoo, akatumaina apeho, Ouhamba wae kamaukapwa.”+

34 Ngwe Maliya apulu oandyu ati: “Otyo matyiende ñgeni, ame nehenelale na mulume?”+ 35 Oandyu aimukumbulula aiti: “Omphepo ikola oyo maiya mwoove,+ ononkhono Mbomukulami mambukulingila okahi. Otyo omona mokutula matilwa omukwa-ukola,+ Omona wa Huku.+ 36 Tala! Ou mulii nae utiwa o Elisambete, nae mamono omona omukwendye, mbili akulupa-le, una-le eimo lina onohanyi epandu, ou ovanthu vati o wokwahamono ovana, 37 kutupu otyipuka* Huku ehevili.”+ 38 Maliya ati: “Ame, ndyimupika wa Siovaa!* Tyeende umwe ngeetyi wapopia.” Oandyu ayeende.

39 Maliya ahakala vali ehimbwe, pononthiki mbatyo umwe opo, akatuka aende no kotyilongo tyo nomphunda, kepunda-umbo lyo Sundaa, 40 hikee meumbo lya Sakaliya, akukunya Elisambete. 41 Elisambete okwiiva Maliya wakukunya, omona meimo ahomboka, Elisambete eyulwa nomphepo ikola, 42 apopila peulu ati: “Ove pu vakai vakwenyi ove una-po elao, otyinyango tyo meimo liove tyimone elao! 43 Pahe ame ame-lie ndyikamona elao nge eli liokweendelwa na ina ya Tatekulu yange! 44 Tala! Ove wati vala nkhukunyee, omona meimo liange ahomboka, wahomboka tyokwahambukwa. 45 Nae ahambukwe, ahambukwe wokwetyitavela, mokonda ovipuka aviho apopilwa na Siovaa,* aviho mavilingwa.”

46 Maliya ati: “Ohande yange* inkhimaneka Siovaa,*+ 47 ame himayeke-po okuhambukilwa mu Huku Omuyovoli wange,+ 48 mwene oe watala umwe, amono omupika wae+ wehena-le apa elifwe. Tala! Okutuka hono ovanthu aveho, naava vekeya mavakanthi ame wehambu,+ 49 mokonda Omunene wandingila ovipuka ovinene, ngwe enyina liae likola,+ 50 apeho tyiti umwe akuya ava, akuya ava okankhenda kae kalinga vala ka ava vemutila owoma.+ 51 Evi alinga, uvilinga nononkhono mbokuvoko kwae; wahandaula vokuna onomphango mbokulipaka-ko momitima viavo.+ 52 Ovanene vatyo kovipundi wevetulaula-ko,+ avialeka vokulipaka koututu,+ 53 vokwaliwa nondyala wevepa oviwa,+ wevepa umwe avekuta, mahi ovahona wevetaata avai mankhanya. 54 Weya okukwatesako omuundapi wae Isilayeli, welikondoka monkhenda yae,+ 55 walinga umwe etyi apopilile ovo tate, etyi apopilile Ambalayau no vokwatuka mwe.”*+ 56 Maliya akala-ko otyikambo tyonohanyi ononthatu, pahe akondoka keumbo liavo.

57 Elisambete pahe ononthiki mbae ambuya-po, akutula omona omukwendye. 58 Ava velitungaila navo pomaumbo aveho no vavo etyi veiva etyi Siovaa* emulingila, navo avahambukwa.+ 59 Tyina tyiti monthiki ya tyinana, onthiki omona atyoyoka,+ aveya, avahande okumuluka he, atiwe o Sakaliya. 60 Mahi ina apopi-po ati: “Au! Ou matiwa o Swau.” 61 Etyi apopia otyo, ngwe avemuti: “Povenyi petupu ou utiwa o Swau.” 62 Pahe avapulu ku he enyina emuhandela, vahanda alekaise vala nokuvoko. 63 Ngwe aiti okavai, ahoneka-ko okuti: “Utiwa o Swau.”+ Otyo atyivehuvisa. 64 Vakati vala ñgaa, pahe utyivila okumakuka, elaka pahe liapatusuka, ahimbika okupopia,+ ahilivika Huku. 65 Aveho velitungaila navo pomaumbo avatili owoma, ovipuka ovio aviho avilingi etompho liovanthu aveho potyilongo opo, otyilongo atyiho tyo nomphunda mbo Sundeya. 66 Aveho vetyiivile, vetyipakele umwe nawa komutima, pahe ankho vati: “Omona oo malingi omunthu patyi?” Mokonda, omona oo tyili una umwe okuvoko kwa Siovaa.*

67 Pahe Sakaliya he yomona, eyulwa nomphepo ikola apopi ati: 68 “Siovaa* ankhimanekwe, ankhimanekwe Huku ya Isilayeli,+ welikondoka kovanthu vae, weveetela eyovo.+ 69 Wayelula ombinga yeyovo,*+ weiyelulila eumbo lya Ndaviti omuundapi wae,+ 70 walinga umwe etyi apopile, tyatundile momulungu wovauli ovakwa-kola kohale,+ 71 etyi atile metuyovola konondyale mbetu, metuyovola peke lya ava vetuyele,+ 72 etulinge okankhenda ngeetyi apopilile ovo tate, ahinangela omphango yae ikola,+ 73 omphango alingile na tate yetu Ambalayau, aane,+ 74 etuyovole konondyale mbetu, onthwe etwaavela elao liokulinga ovilinga viae nomutima wakola, 75 tulinge ovanthu votyili, ovanthu vokulinga oviwa kotyipala tyae ononthiki ambuho mbomwenyo wetu. 76 Mahi ove, mona wange, ove mokatiwa umuuli Womukulami, ove mokatetekela komutwe wa Siovaa* uvialule onondyila mbae,+ 77 upopie eyovo movanthu vae, eyovo mavakamona tyina ameveevela ononkhali mbavo,+ 78 mokankhenda ka Huku yetu. Mokonda yokankhenda oko katunda keulu, wetupindula lwekumbi litunda, 79 amimikile ava veli menthiki naava veli motyihi tyononkhia,+ apake onomphai mbetu mondyila yombembwa.”

80 Omona ekulu, alingi umwe omulume wapama, una omphepo ikola, akala moluhandya atee onthiki yae yokuhololoka ku Isilayeli yehika-po.