Etyi Tyahonekwa na Swau

6 Sesusi pahe aende, atauluka elunga lyo Ngalileya, lyo Timbeliyande.+ 2 Ovaunyingi avemulandula,+ mokonda ankho veete ovipuka vihuvisa eli nokulinga, ankho uli nokuhakula ovavei.+ 3 Sesusi alondo komphunda apumphama pohi, ngako nkhele akala novalongwa vae. 4 Opasikwa,+ otyipito tyova Sundaa, ankho tyili popepi. 5 Etyi Sesusi ayelula omaiho amono onthumbo yovanthu veli nokuya no kwe, apulu Filipi ati: “Opi matukalandela ovanthu ava onombolo valie?”+ 6 Ankho wapopia vala atale etyi asoka, ngwe etyi malingi mwene ankho utyii-ale. 7 Filipi emukumbulula ati: “Nonombolo umwe mbonondenaliu* 200 kambuvetuuka-ale, kavali-po-ale aveho na katutu vala.” 8 Omulongwa wae umwe utiwa o Andelee velikwai na Simau Petulu, emuti: 9 “Apa pena omona una onombolo ononthano mbosevata nonombisi onombali. Mahi pahe ovanthu ngaava aveho mambuvelingi-tyi?”+

10 Sesusi ati: “Popilei ovanthu muti vapumphame.” Mokonda opo yatyo ankho pena vala eholi, ovanthu ngamo vapumphama, ankho pena ovalume vehungi po 5.000.+ 11 Sesusi apolo onombolo ombo, elikwambela, pahe embwavaila ava ankho veli-po vepumphi-po, eveavaila vali ombisi avali umwe avatuuka. 12 Etyi valia-alia opo pahe vatuuka, apopila ovalongwa vae ati: “Ongololei ovimbembu viahupa-po, viahapeseke.” 13 Pahe avaongolola ovimbembu viokwahupa-po aviyula monosesu 12, ovimbembu viahupa konombolo ononthano ovanthu valia.

14 Etyi ovanthu vamona otyilekesa alinga, avahimbika okupopia avati: “Ou Omuuli umwe ankho una okuya mouye.”+ 15 Etyi Sesusi etyimona okuti vahanda okumukwata vemulinge ohamba, atundu-po,+ aende vali no komphunda, aende vala aike.+

16 Tyina pahe okawiiwii katoka, ovalongwa vae avalauka no kelunga,+ 17 avalondo mowato, avatete elunga vende no ko Kafalanau. Ankho pahe kwanthikovela-le, mahi Sesusi ankho nkhele keneye.+ 18 Ngwe ankho elunga liankhinduka, omphepo yalinga onene.+ 19 Etyi pahe vaenda-po umwe onokilometu mbukehika umwe pononthano no pepandu,* vakati ñgaa Sesusi uya no kowato weendela kombanda yomeva melunga, avatili owoma. 20 Ngwe eveti: “Ame umwe; mwahatilei owoma!”+ 21 Pahe avahande eye no kowato, kavakalelepo-ale, kuna owato yehika-le keheke, veli-ale oku ankho vaya nako.+

22 Muhuka tyee, ovanthu vasile nthele ina vakati ñgaa petupu vali owato naike, pena vala imwe onthutu, na Sesusi naina kaile-ale novalongwa mowato, ovalongwa vae vakatundile-po vala aveke. 23 Onowato mbo ko Timbeliyande, ambuya popepi na apa ovanthu ovo valila-lila onombolo etyi Tatekulu elikwambela. 24 Etyi ovaunyingi vetyimona okuti Sesusi novalongwa vae kave-po opo, avalondo mo nowato mbavo avaende no ko Kafalanau avakaovola Sesusi.

25 Etyi vemuvasa nthele ina, avemupulu avati: “Lambii,+ kuno weya-ko nalupi?” 26 Sesusi evekumbulula ati: “Ndyimutolele otyili, onwe kamuli nokundyovola tyovilekesa mwamona, mundyovolela vala onombolo ombu mwalia, mokonda mwalia amukuta.+ 27 Undapei, mahi mwahaundapelei okulia kuvola, undapelei okulia kwahapu, okulia kupa omunthu omwenyo wahapu,+ oku mwapewa Nomona womulume; mokonda kwe oko Huku yatyo mwene, Tate, apaka otyilimbo tyokwemutavela.”+

28 Avemupulu avati: “Oityi onthwe matulingi tufwisepo ovilinga vya Huku?” 29 Sesusi evekumbulula ati: “Ovilinga vya Huku ovievi, onwe okuyumba onthumbi mu ou atuma.”+ 30 Pahe avemupulu avati: “Otyilekesa patyi molingi, noonthwe tutyimone,+ opo tukutavele? Ovilinga patyi ove ulinga? 31 Ovo tate no mee valile omanaa etyi veli moluhandya,+ ovihonekwa viati: ‘Ngwe weveavelele ombolo yo keulu avali.’”+ 32 Sesusi pahe eveti: “Ndyimupopile otyili, onwe Mwisesi kemupele ombolo yo keulu, mahi Tate yange wemupa ombolo yotyotyili yo keulu. 33 Ombolo ya Huku, oyou watunda keulu, weya okupa omwenyo ouye.” 34 Pahe avemupopila avati: “Tatekulu, twavaile vala apeho ombolo yatyo oyo.”

35 Sesusi eveti: “Ame, ame mbolo yomwenyo. Ou uya kwaame, kankhi vali kondyala, ou uyumba onthumbi mwaame, kankhi kohunga.+ 36 Mahi otyetyi nemupopila-le, onwe mwamona umwe, mahi soka kamwetavelele.+ 37 Aveho Tate ampha, ovo maveya kwaame, ame himataata ou uya no kwaame;+ 38 mokonda etyi neila tyamphola keulu,+ hakweya okulinga etyi mwene nahanda, mahi ame neya okulinga etyi tyahanda ou wanthuma.+ 39 Ou wanthuma wahanda pu ava ampha ame nahaombese-po nawike, ndyikevetutilise+ monthiki yahulilila. 40 Otyo, otyo Tate yange ahanda, wahanda aveho vanoñgonoka Omona avayumbu mwe onthumbi, vakamone omwenyo wahapu,+ ame ndyikevetutilise+ monthiki yahulilila.”

41 Ova Sundaa avahimbika okulondovola etyi veiva etyi ati: “Ame, ame mbolo yatunda keulu.”+ 42 Avahimbika okupopia avati: “Ou ha Sesusi omona wa Susee? Katyatile umwe he tumwii ina tumwii,+ oñgeni akati, ‘ame natunda keulu’?” 43 Sesusi eveti: “Yekei-po okulitotovaikila nokulondovola. 44 Petupu omunthu uya kwaame, eya vala ahaetelwe na Tate wanthuma,+ ngwe ame mandyikemututilisa monthiki yahulilila.+ 45 Ovauli vahoneka vati: ‘Ovo aveho mavakalongeswa na Siovaa.’*+ Ou utehelela tyipopia Tate, anoñgonoka, uya kwaame. 46 Petupu omunthu wamwene Tate,+ ou ovanthu vamona, oyou vala watunda ku Huku; ngwe oo yatyo, oe wamwene Tate.+ 47 Ame ndyimutolele otyili, ou utavela, wamona omwenyo wahapu.+

48 “Ame, ame mbolo yomwenyo.+ 49 Ovo tate yenyi kohale valile omanaa etyi veli moluhandya, mahi avankhi.+ 50 Oyo ombolo yeya yatunda keulu, mwene ou ulia-ko ulia-ko, ahankhi. 51 Ame, ame mbolo yomwenyo yeya yatunda keulu. Ou ulia kombolo oyo, makamona omwenyo wahapu; ngwe tyili, ombolo ame mandyipe ovanthu, ohitu yange, opo ouye umone omwenyo.”+

52 Ova Sundaa avahimbika okulipula-pula opo avati: “Omulume ou wati utwaavela ohitu yae tulie, ñgeni ngootyo?” 53 Sesusi eveti: “Ndyimupopile otyili, ine kamuli ohitu Yomona womulume, amwahanu ohonde yae, opo mutupu omwenyo mwoonwe.+ 54 Ou ulia ohitu yange, anu ohonde yange, oo una omwenyo wahapu, ya ame mandyikemututilisa+ monthiki yahulilila; 55 ohitu yange okulia kwotyotyili, ohonde yange okunwa kwotyotyili. 56 Ou wamali ohitu yange, anu ohonde yange ukala-kala umwe vala naame, ame ndyikala-kala umwe vala nae.+ 57 Tate wanthuma una omwenyo, naame ndyina omwenyo mokonda ya Tate, noou ulia kwaame ongootyo, nae makamona omwenyo mokonda yange.+ 58 Oyo ombolo yeya yatunda keulu. Oyo kailii neei ovoho valile, ei valile avankhi. Ou ulia ombolo oyo makakala-ko apeho.”+ 59 Wapopia ovipuka ovio pweetyi ankho eli nokulongesila mondywo yokufendela* mo Kafalanau.

60 Ovalongwa vae etyi vetyiiva, ovanyingi avati: “Onondaka ombo apopia mbuleva, olie utehela otyipuka ngo otyo?” 61 Mahi Sesusi etyi atala ovalongwa vae veli nokulondovola kavetyihandele, evepulu ati: “Otyo tyimunumanesa? 62 Naina ñgaa ine mutala Omona womulume wenda no oku atundile tyimukala ñgeni?+ 63 Tyipa ovanthu omwenyo, omphepo;+ ohitu itupu-ale etyi ina-tyo. Onondaka nemupopila omphepo, omwenyo.+ 64 Mahi vamwe pwoonwe kavetavela.” Sesusi ankho uvei-ale ava vahamemutavela nkhele tya ponthyimbi, ankho umwii-ale memupakula.+ 65 Apopi ñgoo vali ati: “Otyo ame nemutila, nawike uya kwaame, ehetyipelwe na Tate.”+

66 Ovalongwa vae ovanyingi avakondoka kovipuka vasile-sile-po,+ avahaende vali nae kombanda yo otyo apopia. 67 Sesusi apulu Ekwii na Vevali ati: “Ine noonwe mwahanda okwenda?” 68 Simau Petulu emukumbulula ati: “Mukwe pahe twende napi Tatekulu?+ Ove una ondaka yomwenyo wahapu.+ 69 Onthwe twetavela, twetyinoñgonoka okuti ove Umusukuki wa Huku.”+ 70 Sesusi eveti: “Ame naholovona onwe Ekwii na Vevali, hatyo?+ Mahi pwoonwe pena wike omutendeleyi.”*+ 71 Ou ankho eli nokupopia o Sunda, omona wa Simau Isikaliyote, mokonda oe ankho memupakula, ngwe ankho nae uli umwe 12.+